18, 19. Le i bika byāfikile Yona munshi mwa kalunga ka mema, i kipangwa’ka kyeēlele mu uno mwanda, ne i ani mwine wādi kunyuma kwa bino binkumenkume? (Tala ne kunshi kwa dyani.)

¹⁸ Ino tala bidi! Kudi kintu kimo kijina kyaba nabya​—kikatampe, kifita, kadi kyūmi. Kekiya kifwena pabwipi na Yona. Kyāshitula kyakanwa, kyamujokoloka, ne kumumina!

¹⁹ Pano’ko’ko kubapu. Ino kudi mwanda mukwabo wātulumuna Yona. Wādi ukidi mūmi! Katyumwinwepo, kusonsakanibwa, ne kuketa mupuya mpika. Nansha ke byaādi mu kyokya kyaādi umona bu ye kyandi kibundu, ino wādi ukidi na mupuya wa būmi. Mfulo mfulō, Yona wākwatwa moyo bininge. Ne kutatana mpika, Leza wandi Yehova ye “wasoñanye nyema-walui mukatakata kumina Yona.”c​—Yona 1:17.

20. Le i ñeni’ka yotuboila ku milombelo yālombele Yona kitatyi kyaādi mu bukata mwa kinyema kya lui kikatakata?

²⁰ Maminite apunguluka, ke mansá. Yona udi’nka mu mfindi mikomo yaādi kamwene kashā, ino wāshilula kukongela milangwe pamo ne kulombela kudi Yehova Leza. Milombelo yandi isonekelwe mu shapita wa bubidi wa Yona, idi na mvubu mpata. I milombole patōka amba Yona wādi na buyuki bwa peulu bwa Bisonekwa, mwanda i mujokelejokele mu binenwa bidi mu Mitōto. Ilombola kadi amba wādi na ngikadilo miyampe: ke mutyima wa kufwija’ko kadi. Yona wāfudile ku kunena amba: “Ino ami nkatapija kitapwa kodi ne diwi dya kufwijako; nkafuta kyokya kyo napika. Lupandilo i lwa Yehova.”​—Yona 2:9.

21. Le i bika byājingulwile Yona pa lupandilo, ne i mwanda’ka wa mvubu otufwaninwe kuvuluka?

²¹ Kitatyi kyaādi mu kino kifuko kibikibi​—“munda mwa nyema-walui’wa,”​—Yona wājingulwile amba Yehova ukokeja kupandija muntu ye-yense, konso kwadi, kadi kitatyi kyo-kyonso. Nansha byaādi mwine’mwa, Yehova wāmwene mwingidi wandi wādi mu kyamalwa ne kumupandija. (Yona 1:17) Enka Yehova ye ubwanya kulama muntu mūmi mu mafuku asatu mwinya ne bufuku munda mwa kimushipa kikatakata. Dyalelo nadyo, i kyendele’mo tuvuluke amba, Yehova i “Leza wa mu dikasa dyandi mudi mūya obe.” (Dan. 5:23) Būmi bwetu bonso i butambe kwadi. Lelo tudi na mutyima wa kumufwija’ko? Le twabulwapo kumukōkela pa kino?

22, 23. (a) Le mutyima wa kufwija’ko wa Yona wātūdilwe namani pa ditompo? (b) Le i ñeni’ka yotuboila kudi Yona kitatyi kyotuluba?

²² Le Yona nandi le? Le nandi wālombwele kufwija’ko kudi Yehova na kumukōkela? I amo. Kupwa kwa mafuku asatu, mwinya ne bufuku, mushipa waenda na Yona dya ku ntala penepo “walashila Yona pa ntanda myumu.” (Yona 2:10) Langa’po bidi​—pa kupwa kwa bino byonso, Yona kādipo usakilwa koila pa kwenda ku ntanda! Ino na bubine, wādi usakilwa mwa kutambila kuno ku ntanda kwaālashilwe. Ponka’po ne kwija mpika, mutyima wandi wa kufwija’ko watūlwa pa ditompo. Yona 3:1, 2, unena amba: “Penepa kadi kinenwa kya Yehova kyaiya kudi Yona musungu wa bubidi, amba: Taluka bidi, enda ku Nineva, kyokya kibundi kikatampe’kya, kwikyela lubila mwendele lubila lo nkakunena ami’lwa.” Le i bika byādi bya kulonga’po Yona?