Lekai Buswe Bwenu Bwa Bu Bana Na Bana Bwendeende!

‘Lekai buswe bwenu bwa bu bana na bana bwendeende.’​—BAHEBELU 13:⁠1.

PANJA padi mashika alala kabwabwa, ne mutalela mubimubi. Kintu kimo kishele kikabija mu yenu njibo i enka mudilo ulakuka lubimbi mu kyoto kete. Pano kwitumbula mashika ke enka kusonshila mudilo. Lelo mukaswa kolola’nka maulu kemutale mubudila mudilo ne mongela makala enda abumbwila? Mhm, kemukasupo. Mukendelela na kwiusonshila, kutyina amba wakabula. I pamo ponka ne batwe, umo ne umo umbukata mwetu udi na uno mwingilo wa kusonshila “mudilo” wa mvubu mikatampe mpata​—mudilo wa kutema mu mityima yetu​—ke buswe kadi.

² Kino kitatyi kyotudi’mo, enka na mwātobele’kyo kala Yesu, i kitatyi kyenda kitalala buswe umbukata mwa bantu betela bu bene Kidishitu kujokoloka ntanda yonsololo. (Mateo 24:12) Yesu wādi wisambila pa buswe bwa mvubu mikatampe mpata, i buswe bwa kusanswa Yehova Leza ne Bible, Kinenwa kyandi. Buswe bwa miswelo mikwabo nabo bwendanga butyepa. Bible wātobele butobo amba mu “mafuku a kumfulo,” bantu bavule bakekala ‘bampikwa kisanso kya bubutule.’ (2 Temote 3:​1-5) Kino i kyabine! Amo mu kisaka mwadi mwa kubikala kisanso kya bubutule, ino pano bukalabale ne konañana ku bukomo​—dimodimo ne butomboki bulengeja moyo​—byo bintu bibabikala’mo. Eyo, mu uno mutalela wa ino ntanda, bene Kidishitu kebapelwepo enka musoñanya wa kwikala na buswe umo ku mukwabo kete, ehe, ino bafwaninwe kwikala ne na buswe bwa kwipānina bakwabo, kutūla bakwabo kumeso, abo kunyuma. Tufwaninwe kulombola buno buswe kufikija ne pa mfulo, bumweke ku bantu bonso, mwanda ko kayukeno ka kuyukila’po kipwilo kyabine kya bwine Kidishitu.​—Yoano 13:34, 35.

³ Mutumibwa Polo, wāpelwe mushipiditu, wāsoñenye amba: ‘Lekai buswe bwenu bwa bu bana na bana bwendeende.’ (Bahebelu 13:​1) Kukwatañana na dibuku dimo dya bayuki, kishima kya Kingidiki kyalamwinwe bu ‘buswe bwa bu bana na bana’ (phi·la·del·phiʹa) “kifunkila pa buswe bwa kisanso, kulombola kanye, kwitūla pa kyaba kya bakwabo, kukwashañana.” Pano pānene Polo amba tufwaninwe kuleka buno buswe bwendeende, lelo wādi usaka kunena kika? Dino dibuku dyonka dinena’mba: “Buswe kebufwaninwepo nansha dimo kutalala.” Nanshi, kwivwana kisanso pa banabetu kekubwenepo; tufwaninwe kwikilombola patōka. Kadi tufwaninwe kwendeleja buno buswe, ketwakibutalajai. Lelo i bikomo? Eyo, inoko mushipiditu wa Yehova ukokeja kwitukwasha tutamije kisanso kya bu bana na bana ne kwikilama. Pano tubandaulei miswelo isatu yotubwanya kusonshila mudilo wa buno buswe mu mityima yetu.

Kulombola Mutyima wa Lusalusa

⁴ Shi usaka kwikala na buswe bukatampe ku batutu ne bakaka bobe bene Kidishitu, ufwaninwe bidi kwitūla pa kyabo kyaba, kwiabanya nabo matompo ne makambakano ebafikila umbūmi. Mutumibwa Petelo wāletele uno mulangwe pa kusoneka’mba: “Ikalai ne mutyima umo, ne kanye, ne kwisanswa [bu bāna na bana], ne mutyima wa lusalusa, ne wa bumvubumvu.” (1 Petelo 3:8) Kishima kya Kingidiki kingidijibwe pano mwanda wa kulombola “mutyima wa lusalusa” kishintulula “kususuka na.” Mupotolodi umo wa Kingidiki kya Bible wisambila pa kino kishima’mba: “Kilombolanga ngikadilo ya mu ñeni yotwikalanga nayo kitatyi kyotwivwaninanga bakwetu bulanda pamo bwa bwetu.” Nanshi i kiyampe kwitūla pa kyaba kya bakwabo. Mununu umo, mwingidi wakikōkeji wa Yehova, wānene amba: “Kwitūla pa kyobe kyaba i kwivwana byobe bisanso mu mutyima wami.”

⁵ Lelo Yehova udi na mutyima wa lusalusa wa uno muswelo? Bine udi nao. Kimfwa, tutanga pa mwanda utala masusu a bantu bandi bene Isalela amba: “Ebiyampe mu disusu dyabo dyonsololo aye wasusulwa.” (Isaya 63:9) Yehova kādipo umona bitupu makambakano abo, mhm; ino wādi wibakwatyilwa bulanda. Muswelo wādi utenekwa Yehova i mulombolwe mu binenwa byandi ku bantu bandi, bisonekelwe mu Zekadia 2:8 amba: “Yewa wimutenga uteñanga nkishi wa mu dīso [dyami].”a Mushintuludi umo i munenene pa uno vese amba: “Diso i kimo kya mu bipindi bikutakane kadi bikola mpata ku umbidi wa muntu; mo mwikadile ne nkishi wa mu diso​—dyo dilolo patwelelanga kitōkeji kya mūlu kilengejanga muntu kamone​—i kipindi kitengwa’nka bityetye, myanda myoneke, ino akyo kya mvubu ku diso. I kutupu kintu kikwabo kilomba lukwatakani, kibwanya kudingakanibwa na bintu bikwatakanya Yehova pangala pa buswe bwaebiswele.”

⁶ Ne Yesu nandi wādi ulombola nyeke mutyima wa lusalusa. Muntu yense wādi ubela nansha ukambakanibwa, Yesu kādipo wija “kumukwatyilwa lusa.” (Mako 1:​41; 6:​34) Wānene amba, paleka muntu kulongela balondi bandi bashingwe-māni biyampe, aye wivwana bu i aye obashikenye. (Mateo 25:41-​46) Kadi pano paikele dyalelo bu ‘kitobo mukatampe’ wetu wa momwa mūlu, i aye ukokeja “kusanswa mu buzoze bwetu.”​—Bahebelu 4:​15, BB.

⁷ “Kusanswa mu buzoze bwetu”​—i mulangwe witusenga, lelo ke amopo? I amo, omwanda netu tusaka tulongela monka ku umo ne mukwabo. I kyabine, kumona bukōkekōke bwa mukwenu kupēlanga. (Mateo 7:​3-5) Ino wabulwapo kutompa kwikilonga kitatyi kikulubila tutu nansha kaka kampanda? Witūle bidi pa kyaba kya uno muntu, uyuke ne kyamutonona kine i kika, bumuntu bwandi, ne bino bilubo byalwa nabyo. Lelo binebine ulangile abe kubwanyapo kuluba bino bilubo bimo byonka​—pakwabo bipite ne bino’bi? Pa kyaba kya kubala bilubo bya bakwetu, ino batwe twikalei na mutyima wa lusalusa, kino kiketukwasha, twikale na mutyima unekena pamo bwa Yehova, “uvulukanga amba batwe twi luvumbi.” (Mitōto 103:​14, BB; Yakoba 3:​17) Aye uyukile pafudīle bukomo bwetu. Ketulombangapo bintu bivule bipityile bukomo bwetu. (Enzankanya na 1 Balopwe 19:​5-7.) Netu twikalei na mutyima wa lusalusa wa uno muswelo na bakwetu.

⁸ Polo wāsonekele amba, kipwilo kidi pamo bwa umbidi, udi na bipindi bishileshile bifwaninwe kwingidila umbumo. Wābweja’ko amba: “Shi kimo kyakungitu kimone malwa, nabya byonsololo bibamone malwa pamo na akyo.” (1 Kodinda 12:12-​26) Netu tufwaninwe kususuka pamo na boba batēmwa mityima, kutēmwa nabo. Bakulumpe baletanga kimfwa na kutēma nabo. Polo wāsonekele kadi amba: “Lelo i ani mukōkekōke ami kukōkakōka mpika? Le i ani wakolejibwa ami mutyima kuntema mpika?” (2 Kodinda 11:29) Bakulumpe ne batadi bendakana beulanga Polo pa uno mwanda. Mu bishinte byabo, mu mwingilo wabo wa bukumbi, nansha ke mu myanda ya butyibi mine, baloñanga buninge bwa kulombola mutyima wa lusalusa. Polo wāsoñenye amba: “Dilai na boba badila.” (Loma 12:15) Pajingululanga mikōko amba binebine bakumbi beitele mutyima, bayukile pafudile bukomo bwayo, ne amba basusukanga nayo pamo mu tusua twayo, ikalanga nyeke itabija madingi, bwendeji, ne bulemununi bwiipebwa. Itanwa ku kupwila pakubulwa nsengwa, na kikulupiji kyonso amba ikamona’ko ‘kutūkijibwa mityima biyampe.’​—Mateo 11:29.

Kwanya

⁹ Muswelo wabubidi wa kusonshila buswe bwa bu bana na bana i kwanya. Pa kwanya bakwetu, twimaninei bininge pa ngikadilo yabo milumbuluke ne pa buninge bobalonga, ne kwibikwata na mutyika. Shi tulonge uno muswelo, nankyo tubaiula Yehova. (Efisesa 5:1) Witulekelanga tubilubo tuvulevule difuku ne difuku. Kadi witulekelanga ne bubi bukatampe shi padi kwisāsa kwabinebine. Kadi shi wetulekela bubi, kubapu, kajokelanga’popo dikwabo. (Ezekyele 33:14-​16) Mulembi wa mitōto wāipangwile amba: “Shi abe, Yehova, ubangile mambo nankyo le i ani, a Mfumwami, ukēmananga?” (Mitōto 130:3) Yehova wimaninanga pa bintu biyampe byotulonga mu mwingilo otumwingidila.​—Bahebelu 6:​10.

¹⁰ Kulonda kino kimfwa mu kisaka kudi na mvubu mikatampe. Wivwane bambutwile bayukile kwanya bakwabo, nabya abaleta kimfwa kiyampe ku kisaka. Mu ino myaka ya masongi afīkwa bipanda bukile bukya, bantu bapēlelwanga bininge kupēlula bene-pabo, basokola twabo tuto, biyampe’ko byobapūta. Milangwe mibi ya uno muswelo yonakanyanga busongi, yebwalamuna ke kitundu kiselwa na mutyima kanyonga. Shi kwanya koanyanga mwine-pobe kubatyepa, nankyo wiipangule bidi amba, ‘Lelo na bubine, mwine-pami wabulwe’tu ngikadilo miyampe yonso?’ Languluka pa byowāmuswedile ke mwisonge. Lelo binebine, bino byowāmusanshilwe amba ami’nka uno, kekudipo mukwabo, byonso bibajimankana jimejime? Nansha dimo; penepo nanshi longa buninge wanye biyampe bilonga mwine-pobe, kumwanya kobe kwikale ne kwa mu binenwa.​—Nkindi 31:28.

¹¹ Kadi kwanya kukwashanga bantu besongele balame buswe bwabo pampikwa buzazangi. (Enzankanya na 2 Kodinda 6:6; 1 Petelo 1:​22.) Popa padi buno buswe busonshilwa na kwanya na mutyima umo, kepekalangapo bukalabale, binenwa bitapa ku mutyima nansha bya tufutululo, kusūla mwine-pandi mafuku kapwila pampikwa kwineneja biyampe na bulēme, nansha ke kwikupila kwine. (Efisesa 5:​28, 29) Bine, wivwane mulume wanyanga mukaji, mukaji nandi wanya mulume, nankyo i belēmeke abo bonso. Kebekiloñangapo enka shi badi pa bantu kete, mhm, ino i ponso pobamonwa na Yehova​—kushintulula ko kunena amba, kitatyi kyo-kyonso.​—Nkindi 5:​21.

¹² Bana nabo basakanga kwanibwa. Ke kunenapo amba bambutwile bafwaninwe kwibasopeka na lushiñanya bitupu, ino bafwaninwe kwanya ngikadilo itendelwa idi na babo bana ne bintu biyampe byobalonga. Vuluka kimfwa kyāletele Yehova, wālombwele patōka amba i mutōkelwe Yesu pa mutyima. (Mako 1:​11) Kadi vuluka kimfwa kyēdingakenye Yesu bu ‘mfumu’ mu lukindi lwandi. Wātendele ‘bapika bayampe ne bakikōkeji’ mwa kimo, nansha byopādi kwishīla mu mpalo yobāpadilwe ne mu bintu byobāsokwele. (Mateo 25:20-​23; enzankanya Mateo 13:23.) Ne bambutwile batunangu nabo mo monka, batendelanga mwana ne mwana mungya ngikadilo yandi, manwa andi, ne mingilo yandi. Ino kuno kwanya nako ke kwa ambapo wadi wanya ke ina kwanya, mhm, kutyina amba bakebimona bu usaka kwibengija mingilo yakubulwa mpwilo. Kebasenswepo babo bana batama na kinsungwila nansha banyoñame pa mityima.​—Efisesa 6:4; Kolose 3:​21.

¹³ Mu kipwilo kya bwine Kidishitu, bakulumpe ne batadi bendakana baletanga kimfwa na kwanya muntu yense wa mu luombe lwa Leza. Badi pa ditabula dikomo, mwanda badi kadi na kiselwa kya kulemununa umboloke, kōlola mu mushipiditu wa butūkanye boba balubaila, ne kupāna madingi a kumwa umeso ku boba basakilwa’o. Lelo bajadikanga senene bino biselwa bishileshile muswelo’ka?​—Ngalatea 6:1; 2 Temote 3:​16.

¹⁴ Kimfwa kya Polo kibakwashanga mpata. Aye wādi mufundiji, mukulumpe, ne mukumbi utendelwa. Wādi ukamba na bipwilo byādi na bimyanda bya miswelo ne miswelo, kadi kādipo na moyo wa kuleta madingi a kumwa umeso, shi kyo kyendele’mo. (2 Kodinda 7:​8-​11) Bubandaudi bwa mwingilo wa Polo bulombola amba, Polo kādipo utopekañana kitopeketopeke​—ino wādi utopeka enka poso myanda’ya ilomba matopi nansha madingi. Pa kino, wāiwile tunangu twa kwa Leza.

¹⁵ Shi tudingakanye mwingilo wingila mukulumpe pa kipwilo na byombanwa, nankyo madingi ne matope akekala pamo bwa mikokwelo ya musakwijo. Mukokwelo ne mukokwelo usakwija mu muswelo wao pa bula. (Luka 17:3; 2 Temote 4:⁠2) Fwatakanya’po bidi shi lwimbo ludi’nka na mukokwelo kete, ukokwelwa onkaonka. Keukejepo kwitutonda ku matwi ketwiupele. I pamo ponka ne bakulumpe bene Kidishitu, bekalanga basobakanya myanda mishileshile mu bufundiji bwabo mwanda wa kwibuneñenya. Kebebukadikijangapo enka pa myanda yobasaka kolola kete, ehe. Ino buteñanga myanda mivule yūbaka. Bakulumpe basenswe luombe, omwanda bakimbanga nakampata bilongwa biyampe bya kwanya, pamo na mwādi mulongela Yesu Kidishitu, kupita’ko kukimba bilubo bya kutopeka. Batendelanga mwingilo mukomo wingila balunda nabo bene Kidishitu. Bakulupile amba, pavule, muntu ne muntu uloñanga buninge bwandi bonso mwanda wa kwingidila Yehova. Kadi bakulumpe kebeshisangapo kwibasabila ino milangwe yabo mu binenwa.​—Enzankanya na 2 Tesalonika 3:4.

¹⁶ Kepadipo kya kwela lupata, bene Kidishitu bavule bāingidilwe na Polo bājingulwile amba wādi witemba’bo ne kwibakwatyilwa lusa. Lelo bino byonso tubebiyuka namani? Tala’tu mobādi bekadile na Polo. Kebādipo bamutyina, nansha byaādi na lupusa lukatampe. Eyo, wādi muswedibwe kadi obololwa. Kyabine, paātalukile mu mwaba kampanda, bakulumpe bāile “bamuponena peshingo, ke bamwimuna lwimu lwa ku kanwa”! (Bilongwa 20:17, 37) Nanshi, bakulumpe​—ne batwe bonso​—twikalei na mutyima wa kufwija’ko, mwanda twi bapebwe kimfwa kya Polo kya kulondela’po! Eyo, twanyei bakwetu, bakwetu nabo betwanye.

Bilongwa bya Kanye-Kabuswe

¹⁷ Kimo kya mu bintu bisonshilanga nkelwa ya buswe bwa bu bana na bana i bilongwa bya kanye. Yesu wānene’kyo kala amba, “dyese dya kupana ditabukile dyakupebwa.” (Bilongwa 20:35) Potupāna bintu bya kumushipiditu, bya kungitu, nansha ke kitatyi kyetu ne bukomo bwetu, ketusangajangapo’nka bakwetu kete, ino twisangajanga ne batwe bene. Ketudi bebimone, kanye ka mu kipwilo kasambukilañana. Kilongwa kimo kiyampe kibutulanga bikwabo bivulevule. Kepejepo, kisanso kya bu bana na bana kyaloa!​—Luka 6:​38.

¹⁸ Yehova wāsoñenye bantu bandi bene Isalela balombole kanye. Tutanga mu Mika 6:8 amba: “Wakulaija abe muntu kyokya kilumbuluke; lelo i kika kyaswele Yehova kodi, a? Poso’nka kulonga buluji, ne kusanswa kanye, ne kunanga mu kwiubija na Leza obe?” Lelo “kusanswa kanye” kishintulula kika? Kishima kya Kihebelu kingidijibwe pano bu “kanye” (cheʹsedh) kyalamunwanga kadi mu Angele bu “lusa.” Kukwatañana na dibuku (The Soncino Books of the Bible), kino kishima “kilombola kintu kampanda kingila, kitabukile lusa, kishima bitupu kya mu Angele. Kishintulula ‘lusa luyukena ku bilongwa,’ kulongela bantu bilongwa bya kanye, ke’nkapo ku balanda ne bafudilwe kete, mhm, ino i ku bantu bonso.” Omwanda muyuki mukwabo unena amba, kino kishima cheʹsedh kishintulula “buswe buyukena ku bilongwa.”

¹⁹ Buswe bwetu bwa bu bana na bana ke bwa ku kanwapo bitupu, kumweka’bo mpika. I kintu kimweke binebine. Shi kepano, kimba mikenga ya kulongela batutu ne bakaka bobe bintu biyampe. Ikala pamo bwa Yesu, aye kādipo bidi wilaija bantu bamufwene kumulomba bukwashi, ino pavule, wādi witalukila aye mwine. (Luka 7:​12-​16) Nakampata, langila boba basakilwa bukwashi bininge. Lelo kudi mununu nansha kilemafu ufwaninwe kupempulwa nansha kukwashibwa? Lelo kubulwe “mwana-nshie” ufwaninwe kushikata nandi kitatyi kampanda nansha kutebwa mutyima? Le i kutupu unyoñamine pa mutyima usaka muntu umwivwana nansha wa kumusenga? Shi tubwanya, twitūdilei’ko kitatyi kya kulonga bino bilongwa bya kanye. (Yoba 29:12; 1 Tesalonika 5:​14; Yakoba 1:​27) Ino ketukilwai’ko, mu kipwilo byomuyudile bantu bakubulwa kubwaninina, tuyukei amba, kimo kya mu bilongwa byamvubu mikatampe bya kanye i lulekelo​—kuleka kwikala na kinji ku mutyima nansha shi tudi na bubinga bwa kutompwela. (Kolose 3:​13) Kupeja kulekela bakwabo kukiñanga kipwilo ku nkalañani, mfika, ne lupotopoto, bino byo bintu bidi pamo bwa mutalela ubulanga mudilo wa buswe bwa bu bana na bana.

²⁰ Ino batwe tusumininwei kulama uno mudilo wa buswe ukitēma mu mityima yetu. Twibandaulei bidi batwe bene. Lelo tulombolanga kanye ku bakwetu? Lelo twanyanga bakwetu? Lelo tulongelanga bakwetu bilongwa biyampe? Shi twibiloñanga, nankyo mudilo wa buswe ukakabija kipwano kyetu kya bu bana na bana, nansha shi ino ntanda i mikwatwe na mashika alala kabwabwa, yambulwa lusa. Nansha kenemupanga kenemupeta, o mwanda uno’u, ‘buswe bwetu bwa bu bana na bana bwendeende’ mu miswelo yonso​—tamba’nka pano ne nyeke ne nyekeke!​—Bahebelu 13:1.

[Kunshi kwa dyani]

Lelo Ulanga’po Namani?

◻ Buswe bwa bu bana na bana i kika, ne mwanda waka tufwaninwe kwibuleka bwendeende?

◻ Lelo kwikala na mutyima wa lusalusa kwitukwashanga muswelo’ka tulame buswe bwetu bwa bu bana na bana?

◻ Lelo kwanya kudi na mwingilo’ka mu myanda itala buswe bwa bu bana na bana?

◻ Lelo bilongwa bya kanye bishinsakanyanga muswelo’ka buswe bwa bu bana na bana mu kipwilo kya bwine Kidishitu?

[Bipangujo bya Kifundwa]

 1. Lelo ukalonga namani shi usaka mudilo wikale utema’nka kutema mu bufuku budi’ko mashika, ne kiselwa’ka kyotudi nakyo kidingakene na kino?

 2. (a) Mwanda waka tukokeja kunena amba buswe bubatalala mu ano mafuku a ku mfulo? (b) Lelo buswe budi na mvubu’ka ku bene Kidishitu babine?

 3. Lelo buswe bwa bu bana na bana i kika, ne kwibuleka bwendeende kishintulula kika?

 4. Lelo mutyima wa lusalusa i kika?

 5. Lelo tubayuka namani amba Yehova udi na mutyima wa lusalusa?

 6. Le Yesu Kidishitu wālombwele mutyima wa lusalusa muswelo’ka?

 7. I muswelo’ka ukokeja kwitukwasha mutyima wa lusalusa shi tutu nansha kaka kansangwa wetulubila?

 8. Lelo tufwaninwe kulonga kika shi tutu nansha kaka watanwa na makambakano?

 9. Le i muswelo’ka ulombolanga Yehova amba witwanyanga pangala pa biyampe byotulonga?

10. (a) Mwanda waka kubulwa kwanya mwine-pandi i kyaka ku ba mulume ne mukaji? (b) Le i kika kifwaninwe kulonga muntu yense ukomenwa kwanya mwine-pandi?

11. Lelo i milongelo’ka ifwaninwe kwepukwa mwanda wa buswe bwa boba besongele bwikale bwakubulwa buzazangi?

12. Mwanda waka bambutwile bafwaninwe kwanya babo bana pangala pa biyampe byobalonga?

13. Le i bāni baletanga kimfwa na kwanya muntu yense wa pa kipwilo?

14, 15. (a) Polo wālombwele bujalale muswelo’ka mu myanda itala kupañana madingi a kumwa umeso? (b) Lelo batadi bene Kidishitu bajadikanga senene kulemununa bilubo ne kwanya kwabo muswelo’ka? Shintulula.

16. Lelo ngikadilo ya Polo ya kwanya ne kwitūla pa kyaba kya bakwabo yādi na lupusa’ka ku bapwani nandi bene Kidishitu?

17. Le i byabuyabuya’ka bilupukanga ku bilongwa bya kanye mu kipwilo?

18. Lelo kishima “kanye” kisambīlwe’po mu Mika 6:8 kishintulula kika?

19. (a) Lelo i mu mashinda’ka motukokeja kwitalukila batwe bene mwanda wa kulombola kanye ku bakwetu mu kipwilo? (b) Leta kimfwa kimo kilombola muswelo obakulombolanga buswe bwa bu bana na bana.

20. Mwanda waka tufwaninwe kwendelela na kwibandaula batwe bene?

[Kapango pa paje 28]

Buswe Bwingila Mingilo

Ke papite myaka ibala inga, mwana-mulume umo, wefundile Bible na Batumoni ba Yehova umbula bwa kitatyi kampanda, wadi ukyalakana buswe bwabo bwa bu bana na bana. Ino wadi uyukile amba Yesu wānene amba: “Po ponka po bakemuyūkila bu-bāna-bami-babwanga ponka pa kwisanswa mo mwikadile bānwe bene.” (Yoano 13:35) Ino kadipo witabija amba badi na buswe. Difuku dimo, wemwenene aye mwine buswe bwa bu bana na bana mobwingidila mingilo.

Uno mukelenge wakutyile lwendo lwa kyenda bushikate, lwa kakinga, waenda mu bula bwa ntanda. Wafika mu Betelema, mu Isalela, wakatanwa ku kupwila kwa pa kipwilo. Kupwa kupwila, Kamoni umo Mwalabu waningila Kamoni umo munangi ne uno mwifundi wa Bible mwine, amba enka poso bakalāle kwandi. Kumeso kwa kukalāla, uno mwifundi walomba mufikilwa lupusa lwa kulupukila mu kibidi lubanga, mwanda wa kutala mutambila dyuba. Ino mufikilwa wamukoma amba kokolwa kutambila panja. Bwakya lubanga, uno tutu Mwalabu wamushintulwila kipelelo. Wamusapwila kupityila kudi mushintuludi amba, shi bekalwa-nabo badi bayukile amba kwami kufikīle Bayuda​—uno mwifundi wa Bible nandi wadi Muyuda​—longa baile kwitusokela mu njibo, ami ne kisaka kyami kyonso fututu. Uno mwifundi wa Bible byamupwa bunwa, wamwipangula amba: “Penepo kyowadi ubetutambwila i kika, abe kuyuka uyukile amba bidi kyaka?” Uno tutu Mwalabu kakimwenda nansha kulampe amba akimbe mushintuludi, wamubambila’nka mu meso sō, wanena’tu mu kīpi amba, “Yoano 13:35.”

Uno mwifundi wa Bible wapuka mutwe bininge, pa kumona buno buswe bwa bu bana na bana bumweke patōka. Kupwa kwa mafuku matyetye, nandi bamubatyija.

[Kifwatulo pa paje 31]

Ngikadilo ya bulunda ne ya kwanya ya mutumibwa Polo yāmwikadije bu muntu obololwa