Bwendeji Bwa Kiteokratike Bwa Mu Myaka Ya Bwine Kidishitu

“Monka mwendele mutyima wandi muyampe . . . abungakenye bintu byonso monka mudi Kidishitu, byobya bidi mūlu, ne panopanshi bīne kumo.”​—EFISESA 1:​9, 10.

KUNO kubungakanya kwa “byobya bidi mūlu” kwāshilwile mu mwaka wa 33 K.K., pābutwilwe ‘Isalela wa Leza.’ (Ngalatea 6:16; Isaya 43:10; 1 Petelo 2:​9, 10) Kupwa kwa myaka katwa imbajinji K.K., kuno kubungakanya kwāshilwile kutyepa, kitatyi kyātādilwe bene Kidishitu babine (bātelelwe na Yesu bu “ñano”) na “bityani” bya bupondo byākuninwe na Satana. Ino pano paikele kufwena “kyaba kyamfulo,” Isalela wa Leza wamwekele patōka, mu 1919, wapebwa bu kalama wa lupeto lwa Yesu lonso.a​—Mateo 13:​24-30, 36-43; 24:​45-​47; Danyele 12:⁠4.

² Umbula bwa divita dibajinji dya ntanda yonso, bene Kidishitu bashingwe-māni bāingile mingilo ya bukomo, pamo’nka na mwālongele ba Mosesa ne Ediya.b (Kusokwelwa 11:​5, 6) Tamba mu 1919, basapulanga myanda miyampe mu ntanda ya balwana, bekiloñanga na bukankamane pamo na bwādi na Ediya. (Mateo 24:​9-14) Kadi tamba mu 1922, basapulanga butyibi bwa Yehova bukaponena pa muzo wa muntu, pamo na mwāletele Mosesa mpupo ya Leza pa Edipito wakala. (Kusokwelwa 15:1; 16:​2-​17) Dyalelo, basheleko ba mu bano bene Kidishitu bashingwe-māni yo nkūngilo ya kisaka kya Batumoni ba Yehova kikekala mu ntanda impya.

Kitango Kyendeji Kiputumina mu Mwingilo

³ Tamba kungalwilo, balondi bashingwe-māni ba Yesu bādi belongolole. Bāshimika bipwilo mu bibundi ne kutūla’mo bakulumpe pamwanda wa kibalwa kya bana-babwanga kyādi kyenda kivudila’ko. (Tetusa 1:5) Kupwa kwa mwaka wa 33 K.K., batumibwa 12 bābunda kitango kyendeji kidi na lupusa. Penepo, bāshilula kuludika mwingilo wa busapudi pampikwa moyo. (Bilongwa 4:​33, 35, 37; 5:​18, 29) Bālongolola mwingilo wa kwabanya bidibwa ku bantu bādi basakilwa bukwashi, bātuma ne ba Petelo ne Yoano mu Samadia kukatala bantu bādi basepelela musapu mwine’mwa. (Bilongwa 6:​1-6; 8:​6-8, 14-​17) Banabasa pa kwivwana nabya, wāsela Polo, wāenda nandi kobadi amba bakemwene abo bene uno muntu wādi wibapangapanga pano ke mulondi wa Yesu. (Bilongwa 9:27; Ngalatea 1:​18, 19) Petelo nandi paāpwile kusapwila Konilusa pamo ne kisaka kyandi, wākutyile lwendo, wājokela ku Yelusalema kukashintulwila batumibwa ne banabetu bakwabo Bayuda muswelo wālombwele mushipiditu sandu kiswamutyima kya Leza pa kyokya kyaba.​—Bilongwa 11:​1-18.

⁴ Mwenda mafuku, kitango kyendeji kyātambwa bya kasumalomo. Petelo wāelwa mu kifungo, ino mwikeulu wāiya, wāmunyongolola’mo. (Bilongwa 12:​3-​11) Uno o wādi musunsa umbajinji kumona muntu ungi wakubulwa kwikala umo wa mu batumibwa 12 wimanina myanda mu Yelusalema. Pālupwilwe Petelo mu kifungo, wāsapwidile kibumbo kya bantu bādi bongwidile mu njibo ya inandya Yoano Mako amba: “Endai mukasapwile baYakoba [mwanabo na Yesu], ne bāna betu bino’bi.”​—Bilongwa 12:⁠17.

⁵ Kunyuma, pāpwile kwiyowa Yudasa Isakadiota, mutumibwa wāabile Yesu, pa ‘kyaba kyandi kya mingilo’ ya bu mutumibwa pāshele kipunzu kyādi kilomba wa kupingakena’po, muntu wādi pamo na Yesu mu mwingilo wandi, wātenwe pa lufu lwandi ne lusangukilo lwandi. Inoko, kitatyi kyāipaibwe Yakoba, mwanabo na Yoano, kekudipo muntu wāmupingakenine bu umo wa mu batumibwa 12. (Bilongwa 1:​20-26; 12:​1, 2) Nansha byobyādi owa muswelo, Kisonekwa kikwabo kisambila pa kitango kyendeji kilombola amba kyābaile’ko. Kitatyi kyātambile lupotopoto lwa kusaka kuyuka shi Bajentaila bālondele Yesu bādi bafwaninwe kukōkela ku Mukanda-wabijila wa Mosesa, uno mwanda wākatwelwe kudi “batumibwa ne bakulumpe bēne badi mu Yelusalema” amba bakatyibe’o. (Bilongwa 15:​2, 6, 20, 22, 23; 16:4) Mwanda waka “bakulumpe” bādi mu Kitango Kyendeji mu kyokya kyaba? Bible kanene’popo kintu, ino kyādi kya kamweno kabinebine. Lufu lwa Yakoba ne kukutwa kwa Petelo byālombwele amba, dyakadilwe kintu dino’di, batumibwa bakakutwa ne kwipaibwa. I bine, mu myanda ya owa muswelo, kwikala’po kwa bakulumpe babwenye bisakibwa, bapotolwele senene mingidilo ya kitango kyendeji, kwādi kulombola kikulupiji amba mwingilo ukendelela mu ndudi.

⁶ Pāfikile Polo mu Yelusalema kidingadinga na 56 K.K., wākatwelele mwa Yakoba, wāmupityila monso, pa kino, Bible unena amba “ne bakulumpe bonso badi monka.” (Bilongwa 21:18) Mwanda waka kebatelelepo batumibwa kwikala’bo mu kuno kubungakana? Napo Bible kanene’popo kintu. Ino Eusebius, mwifundi wa mānga, wānene mwenda mafuku amba, kitatyi pokyādi kekisenselela ku 66 K.K., “batumibwa bāshele’ko, bādi mu kyaka kya katēkelēle kya bitumba bya kwibepaya byādi bibakutyilwa, bātalwilwe mu Yudea. Ino bādi benda mu matanda onso na bukomo bwa Kidishitu, benda bafundija musapu wabo.” (Eusebius, Dibuku III, V, v. 2) Nansha bino binenwa bya Eusebius byokebibadilwa mu bisonekwa bya ku bukomo bwa mushipiditu, ino bikwatañene na myanda inenwe mu ino mānga. Kimfwa, kubwipi na 62 K.K., Petelo wādi mu Babiloni​—kulampe na Yelusalema. (1 Petelo 5:13) Inoko, i kimweke patōka amba, mu 56 K.K., dimodimo kufika ne mu 66 K.K., kitango kyendeji kyādi kikingila mu Yelusalema.

Bwendeji bwa mu Kino Kyetu Kitatyi

⁷ Tamba mu 33 K.K. kufika ne ku kyamalwa kibūke kyāfikile Yelusalema, kitango kyendeji kyādi kibundilwe na bene Kidishitu Bayuda. Mu bupempudi bwa Polo mu 56 K.K., wāsapwidilwe amba bene Kidishitu Bayuda bavule badi mu Yelusalema, nansha ‘byobalamine lwitabijo lwa Mfumwetu Yesu Kidishitu,’ ino badi na “lupata lonka lwa kulama mukanda-wabijila [wa Mosesa].”c (Yakoba 2:1; Bilongwa 21:​20-25) Kekubulwe padi boba Bayuda bādi beshisa kumona Mujentaila mu kitango kyendeji. Ino, mu kino kyetu kitatyi, kudi kwalamuka kukwabo kutala pa muswelo ubundilwe kino kitango. Dyalelo, i kibundwe enka na bene Kidishitu Bajentaila bashingwe-māni, kadi Yehova weselanga bininge mingilo yabo.​—Efisesa 2:​11-15.

⁸ Tamba mu kitatyi kyāpelwe Watch Tower Bible and Tract Society of Pennsylvania lupusa mu 1884 kufika ne mu 1972, mwimaniji wa Sosiete wāingidije lupusa lukatampe mu bulongolodi bwa Yehova, pākidi kitango kyendeji kikibundilwe na kitango kya batangidiji ba Sosiete. Madyese obādi beselwa mu yoya myaka alombola amba Yehova wāitabije ino mpangiko. Pa bukata bwa 1972 ne 1975, Kitango Kyendeji kyābaile’ko kufika ku bantu 18. Ino mpangiko yādi isenselela bininge ku yoya yākwetwe mu myaka katwa imbajinji kitatyi kyāpelwe lupusa lukatampe ku kino kitango kyendeji kyābaile’ko, bamobamo umbukata mwabo i batangidiji ba Watch Tower Bible and Tract Society of Pennsylvania.

⁹ Tamba mu 1975, bavule mu bano 18 baikele kufudija lwendo lwabo pano panshi. I banekenye ntanda, omwanda ‘bashikete na Yesu pa lupona lwandi lwa momwa mūlu.’ (Kusokwelwa 3:21) Pamwanda wa kuno kupatuka ne buluji bukwabo, pano Kitango Kyendeji kidi na bantu dikumi, kubadila’mo ne umo watwelele’mo mu mwaka wa 1994. Bavule ke banunu bininge. Ino bano banabetu bashingwe-māni batambulanga bukwashi bulumbuluke kitatyi kyobavuija biselwa byabo bilēma. Lelo buno bukwashi butambanga kwepi? Shi tutale kutūbuluka kwa mingilo kudi umbukata mwa bantu ba Leza dyalelo, bine ketukabulwepo kusokola kilondololwa ku kino kipangujo.

Bukwashi Kudi Isalela wa Leza

¹⁰ Kunyuma mu 1884, kubwipi kwa bonso bādi bengila mu kine kitatyi’kya, bādi bene Kidishitu bashingwe-māni bādi babundile Isalela wa Leza. Ino kibumbo kikwabo kyāshilula kumweka bityetye, ebiya mu 1935, bājingulula amba kino kibumbo ye akyo “kibumbo kikatampe” kisambilwe’po mu Kusokwelwa shapita 7. Ba mu kino kibumbo byobadi na lukulupilo lwa kukekala pano panshi, bafunkilanga pa ‘bintu bya pano panshi,’ byākwetwe’po mpango na Yehova ya kwibibungakenya pamo mudi Kidishitu. (Efisesa 1:10) Bafunkila pa “mikōko mikwabo” ya mu lukindi lwa Yesu lwa ñombe. (Yoano 10:16) Tamba mu 1935, mikōko mikwabo itūtyikilanga mu bulongolodi bwa Yehova. Bayānga “balelemba bwa dikumbi, ne bwa bankutyi ku bipombo byabo.” (Isaya 60:⁠8) Pamwanda wa kwilundilako kwa kibumbo kikatampe ne kutyepa kwa kabumbo ka bashingwe-māni, mwanda wa bavule bafudija lwendo lwabo pano panshi, mikōko mikwabo ibwenye bisakibwa pano yenda ipebwa kipindi kikatampe kya mingilo ya bwine Kidishitu. Mu muswelo’ka?

¹¹ Kusapula konso konso byabuyabuya bya Yehova kyo kiselwa kya pabula kikalanga nyeke na “muzo wa bu-ujila” wa Leza. Polo wāikele kwisambila pa kino kiselwa bu kitapwa kyelwa mu tempelo, kidi na boba ba kukekala bu ‘kitango kya babitobo balopwe,’ bāpelwe na Yesu mwingilo wa kusapula ne kufunduja. (Divilu 19:​5, 6; 1 Petelo 2:​4, 9; Mateo 24:14; 28:​19, 20; Bahebelu 13:​15, 16) Ino, Kiteba kya Mulami kya 1 kweji 8, 1932 (Angele), kyāimanine pa kukankamika boba bādi bafunkila padi Yonadaba amba nabo bekale kuputumina mu uno mwingilo. Kyabine, bavule ba mu ino mikōko mikwabo bādi kala bekilonga. Dyalelo, kubwipi kwa mwingilo onso wa busapudi uvuijibwanga na ino mikōko mikwabo, mwanda i basumininwe amba o mwingilo mwine mukatampe obengidila “[Leza] dyuba ne bufuku, mu njibo īkola yandi.” (Kusokwelwa 7:15) Muswelo umo onka, mu kipindi kibajinji kya mānga ya bantu ba Yehova ba dyalelo, bakulumpe pa bipwilo bādi bene Kidishitu bashingwe-māni, “ñenyenye” mu kuboko kulume kwa Yesu Kidishitu. (Kusokwelwa 1:​16, 20) Ino Kiteba kya Mulami kya 1 kweji 5, 1937 (Angele) kyāelele lubila amba, mikōko mikwabo ibwenye bisakibwa ikokeja kwikala bengidi bapwani (batadi bemaniji). Nansha byokwādi bana-balume bashingwe-māni, mikōko mikwabo yādi ikokeja kwingidijibwa shi bana-balume bashingwe-māni kebādipo bakokeja kusela kino kiselwa. Dyalelo, bakulumpe ba mu bipwilo kisengele bonso i mikōko mikwabo.

¹² Lelo kupa mikōko mikwabo bino biselwa bilēma i kilubo? Ehe, uno mulongelo keushilwilepo dyalelo. Bamobamo bapya mu mutōtelo wa Bayuda (bekadi bēni) bādi bapebwa bitenta bikatampe mu Isalela wakala. (2 Samwele 23:​37, 39; Yelemia 38:​7-9) Kupwa kwa kuselwa mu bu misungi mu Babiloni, Banetini (bengidi ba mu tempelo bakubulwa kwikala bene Isalela) babwanye bisakibwa bādi bapebwa madyese ādi a bene Levi kete mu myaka yakala mu mingilo yādi ingilwa mu tempelo. (Ezela 8:​15-20; Nehemia 7:60) Kadi Mosesa, wāmwekele pamo ne Yesu mu kimonwa kya kwalamuka kalelema, wāitabije madingi malumbuluke āmupelwe na Yefelo mwine Midyana. Mwenda mafuku, wāikele kulomba Hobabe, mwanā Yefelo mwana-mulume, ebaludike mu ntanda mutuputupu.​—Divilu 18:​5, 17-24; Umbadilo 10:⁠29.

¹³ Pobādi kebalumba kumfulo kwa myaka 40 mu ntanda mutuputupu, Mosesa, pa kuyuka amba kakatwelapo mu Ntanda ya Mulao, wālombele Yehova ekale kutonga’ko mpingakani. (Umbadilo 27:​15-17) Yehova wāmusapwila amba tonga Yoshua atangidile kumeso kwa bantu bonso, ebiya Mosesa wālongela monka nansha byāadi ukidi na bukomo bwa mu ngitu, ne kadi kālekelepo ponka na ponka kwingidila Isalela. (Kupituluka 3:28; 34:​5-7, 9) Bashingwe-māni byobadi na mushipiditu onka wa kwityepeja, bendanga bapāna madyese mavule ku bantu babwenye bisakibwa ba mu mikōko mikwabo.

¹⁴ Bino biselwa byenda bipebwa mikōko mikwabo mu bulongolodi nao i mwanda wālombwelwe kala mu bupolofeto. Zekadia wātobele amba bene Fidishitia bakubulwa kwikala bene Isalela bakekalanga “bwa muledi mu Yuda.” (Zekadia 9:​6, 7) Baledi bādi mitwe ya bisaka, omwanda Zekadia wānene amba boba bādi balwana na Isalela bakelunga ku mutōtelo wabine, ne kwikala’bo pamo bwa mutwe wa kisaka mu Ntanda ya Mulao. Kadi, pēsambile Yehova kudi Isalela wa Leza, wānene’mba: “Beni bakemanako kudisha ñombe yobe, ne bāna ba beni bana-balume bakekala badimi benu ne bakutalatala mañanza enu. Ino pano banwe mukenikwa [bu babitobo, NW] ba Yehova; bantu bakemutēla amba: I bengidi ba Leza wetu.” (Isaya 61:​5, 6) “Beni” ne “bāna ba beni” i mikōko mikwabo. Pano benda bapebwa biselwa bya mu mwingilo amba basele’byo, mwanda basheleko ba mu bashingwe-māni ke banunu bendanga bafudija lwendo lwabo pano panshi, kebakengila mingilo yabo mine ya bu ‘babitobo ba Yehova’ ba momwa mūlu, bajokolokele lupona lwa Yehova lwa ntumbo bu “bengidi ba Leza wetu.”​—1 Kodinda 15:​50-​57; Kusokwelwa 4:​4, 9-11; 5:​9, 10.

“Lukongo . . . Lwiyako”

¹⁵ Pano basheleko ba mu bashingwe-māni bakātakāta na kufundija mikōko mikwabo mwa kuselela biselwa byenda bibavudila. Mitōto 71:18 unena’mba: “I binebine, pa kununupa ne mvwi ku mutwe, abe Leza, kokandekelela; poso’mba, mpwe kusapula bidi bukomo bobe ku lukongo lukwabo lwiyako, ne bukomo bobe bukata kudi bonso bakāyako.” Pa kushintulula uno vese, Kiteba kya Mulami kya 15 kweji 12, 1948, (Angele) kyānene’mba kipwilo kya bene Kidishitu bashingwe-māni bine kibafikila pa myaka ya bununu bwakyo. Kyābwejeje’ko amba i kyansangaji mwanda bashingwe-māni “batala mu bupolofeto bwa mu Bible ne bamona lukongo lupya.” Lelo kino kifunkilanga nakampata pa bāni? Kiteba kya Mulami kyānene’mba: “Yesu wēbatelele bu ‘mikōko mikwabo.’” Luno ‘lukongo lwiya’ko’ lufunkila pa bantu bakekala na būmi munshi mwa bwendeji bupya bwa Bulopwe bwa mūlu bukabikala pano pantanda.

¹⁶ Bible kalombwelepo patōkelela kitatyi kikekala bene Kidishitu bonso bashingwe-māni kushia banababo ba luno ‘lukongo lwiya’ko’ ne kwenda kukatumbijibwa pamo na Yesu Kidishitu. Ino bano bashingwe-māni i bakulupile amba kitatyi kya kufikidila ino milao kekidi pabwipi. Myanda yonso yātobelwe mu bupolofeto bwa Yesu itala pa “kyaba kya kumfulo” yoi yenda imweka tamba mu 1914, ilombola amba konakanibwa kwa ino ntanda kekudi pabwipi. (Danyele 12:4; Mateo 24:​3-14; Mako 13:​4-20; Luka 21:​7-24) Panopano ponka, Yehova ukatweja mu ntanda impya ‘lukongo lwiya’ko’ ‘lukapyana bulopwe [kikalo kya pano panshi] bwibalongolwele kala pa ngalwilo ya pano pantanda.’ (Mateo 25:34) Bateñwanga ku mutyima byamwiko, pa kufwatakanya muswelo ukajokejibwa Paladisa ne mukasangwilwa midiyo ne midiyo ya bafwe, batamba mu Hades. (Kusokwelwa 20:13) Lelo bano bashingwe-māni bakekala’po pa kutundaila bano bantu bakasangulwa? Mu myaka ya kunyuma, mu 1925, Kiteba kya Mulami kya 1 kweji 5 (Angele), kyānene’mba: “Ketufwaninwepo kufwikila bintu bikalonga Leza nansha byobya byakakalongapo. . . . [Ino] tufulanga na mulangwe wa amba bantu ba mu Kipwilo [bene Kidishitu bashingwe-māni] bakatumbijibwa kumeso kwa lusangukilo lwa bantu bakala bafwaninwe [batumoni babinebine ba kumeso kwa kwiya kwa Yesu pano pantanda].” Pa kwisambila monka pa mwanda wa kuyuka shi bashingwe-māni bamo bakafika ne kumfulo mwanda wa kutundaila bantu bakasangulwa, Kiteba kya Mulami kya 1 kweji 9, 1989, (Falanse) kyānene’mba: “Kino kekidipo na mvubu.”d

¹⁷ Kyabine, ketuyukilepo kikafikila umo ne umo wa mu bene Kidishitu bashingwe-māni. Ino kwikala’po kwa ba Mosesa ne Ediya na Yesu mu kimonwa kya kwalamuka kulombola amba bene Kidishitu bashingwe-māni batengelwe kwikala pamo na Yesu pākāya mu ntumbo mwanda wa kupala “muntu ne mpalo yandi, muntu ne mpalo yandi, monka mwakēkadila mīngilo yabo” pakatyibwa butyibi bwandi ne kufikidijibwa’bo. Kadi, tuvuluka mulao wālaile Yesu amba boba bene Kidishitu bashingwe-māni ‘bakanekenya’ ‘bakalela mizo ku mukombo wa kilonda’ pamo nandi ku Amakedona. Pakāya Yesu mu ntumbo, bakashikata nandi mwanda wa “kuketa mambo a bisaka dikumi ne bibidi bya bene Isalela.” Abo ne Yesu, ‘bakatyumwina Satana munshi mwa maulu abo.’​—Mateo 16:27–17:​9; 19:28; Kusokwelwa 2:​26, 27; 16:​14, 16; Loma 16:20; Ngalwilo 3:15; Mitōto 2:9; 2 Tesalonika 1:​9, 10.

¹⁸ Yehova, mu bwendeji bwandi bwa bintu, wendelelanga nyeke kumeso na kubungakanya “bintu byonso monka mudi Kidishitu.” I bine, byotwisambila pa “byobya bidi mūlu,” mpango yandi keidi pabwipi na kufikidila. Kwikuta umbumo kwa Yesu na boba 144 000 momwa mūlu kekudi pabwipi, buno bo bukekala “butundaile bwa Kāna-ka-mukōko.” Omwanda nanshi, tamba kala, banabetu bapye ba mu mikōko mikwabo, bemanine bintu bya “panopanshi,” benda bapebwa biselwa bilēma mwanda wa kukwasha banababo bashingwe-māni. Bine tudi mu bitatyi bya nsangaji ya kasha! Kino kituteñanga ku mityima pa kumona mpango ya Yehova yenda ifikidila! (Efisesa 1:​9, 10; 3:​10-​12; Kusokwelwa 14:1; 19:​7, 9) Kadi mikōko mikwabo i misangale bininge na buno bukwashi boikwasha banababo bashingwe-māni, bengidila bonso pamo bu “luombe lumo,” ludi munshi mwa “mukumbi aye umo” na kukōkela kudi Yesu Kidishitu, Mulopwe, mwanda wa kutumbija Yehova Leza, Mfumu Mulopwe mukatampe wa Diulu ne Ntanda!​—Yoano 10:16; Fidipai 2:​9-11.

[Kunshi kwa dyani]

Lelo Ukokeja Kushintulula?

◻ Lelo i muswelo’ka wāendelele kumeso bulongolodi bwa Leza mu myaka katwa imbajinji?

◻ Kitango Kyendeji kyendelelanga muswelo’ka mu mānga ya Batumoni ba Yehova dyalelo?

◻ Lelo i Bisonekwa’ka bibingija kupebwa kwa mikōko mikwabo lupusa mu bulongolodi bwa Yehova?

◻ Lelo bintu “byobya bidi mūlu, ne panopanshi bīne kumo” bibungakanibwanga mudi Kidishitu muswelo’ka?

[Bipangujo bya Kifundwa]

1, 2. (a) Lelo i muswelo’ka wāshilwile kubungakanibwa kwa “byobya bidi mūlu,” tamba mu mwaka wa 33 K.K.? (b) Lelo bene Kidishitu bashingwe-māni bālombwele muswelo’ka, tamba mu mwaka wa 1914, mushipiditu pamo na owa wādi na ba Mosesa ne Ediya?

 3. I myanda’ka ilombola’mba kipwilo kya bwine Kidishitu kibajinji kyādi kilongololwe senene?

 4. I kika kyālongelwe mwanda wa kusaka kwipaya Petelo, ino lelo būmi bwandi bwāpandijibwe muswelo’ka?

 5. Lelo kubundwa kwa kitango kyendeji kwāalamukile muswelo’ka kupwa kwa kwipaibwa kwa Yakoba?

 6. Le kitango kyendeji kyāendelele kwingila mu Yelusalema muswelo’ka, nansha boba babajinji ku kubunda’kyo byokebākidipo mu kyokya kibundi?

 7. Shi tudingakanye kitango kyendeji kya mu myaka katwa imbajinji na kino Kitango Kyendeji kya dyalelo, lelo i kwishila’ka kukatampe kudi mu mubundilo wabyo?

8, 9. I kwendelela’ka kwamwekele mu Kitango Kyendeji mu kino kyetu kitatyi?

10. Lelo i bāni baikele kwilunga na bashingwe-māni mu mwingilo wa Yehova mu ano mafuku a kumfulo, ne kino kyātobelwe mu bupolofeto namani?

11. Lelo i madyese’ka, ādi ku ñanjilo’nka na bene Kidishitu bashingwe-māni, enda apebwa mikōko mikwabo?

12. I bimfwa’ka bya mu Bisonekwa bileta bubinga bwa kupa mikōko mikwabo biselwa bilēma mu bulongolodi?

13. Lelo i kimfwa kilumbuluke kya ani kya kwityepeja kilondanga banabetu bashingwe-māni pobapanga biselwa ku mikōko mikwabo ibwenye bisakibwa?

14. Lelo i bupolofeto’ka bufunkila pa kwenda kupa mingilo mivule ku mikōko mikwabo mu bulongolodi?

15. Mu kino kitatyi kya kumfulo, i kisumpi’ka kya bene Kidishitu kyafikila “pa kununupa” kwakyo, ne i kisumpi’ka kifunkila pa “lukongo . . . lwiyako”?

16. Lelo boba ba mu ‘lukongo lwiya’ko’ batengele madyese’ka?

17. Le i madyese’ka malumbuluke akatambula bashingwe-māni, abo bonso, pamo ne Yesu Kidishitu, Mulopwe mubikikwe?

18. (a) Lelo ‘kubungakanibwa kwa bintu bya momwa mūlu byonso pamo monka mudi Kidishitu’ kekudi pa ditabula’ka? (b) I kika kikanenwa pa mwanda utala ‘kubungakanibwa kwa bintu bya pano panshi byonso pamo monka mudi Kidishitu’?

[Kifwatulo pa paje 15]

Kitango kyendeji kyāendelele na kwingila mu Yelusalema, nansha byāikele kutupu bantu babajinji bābundile’kyo

[Kifwatulo pa paje 16]

Bene Kidishitu bashingwe-māni bapye i katokwe ku bantu ba Yehova

C. T. Russell: 1884-​1916

J. F. Rutherford: 1916-​1942

N. H. Knorr: 1942-​1977

F. W. Franz: 1977-1992

M. G. Henschel: 1992-