Kyelekejo Kya Bengidi Mu Budimi Bwa Mañanza

Yesu wapu kusapwila bevwaniki bandi mu Pelea amba “bavule babajinji bakekala ba mfulo, ba mfulo nabo babajinji.” (Mateo 19:30) Watōkeja binenwa byandi na kyelekejo kitala pa bengidi ba mu budimi bwa mañanza amba:

“Bulopwe bwa mūlu budi pamo bwa mwinē njibo watambile lubanga bwē kukakimba bengidi ba kwingila mu budimi bwandi bwa mañanza. Aye pa kwiivwanika na bengidi kwibafuta ndenadi imo ku difuku, webatuma mu budimi bwandi bwa mañanza. Pa kutamba monka kubwipi na nsá ya busatu, wamona bakwabo bemene mu nsoko kaji mpika; webanena’mba, ‘Banwe nenu endai mu budimi bwa mañanza, nami nkemupa kyokya kifwaninwe.’ Penepo nabo baenda. Kadi watamba monka kubwipi na nsá ya busamba ne nsá ya kitema walonga’nka nabya. Ku mfulo, kubwipi na nsá ya 11 watamba, watana bakwabo bemene koku ne koku, webepangula’mba, ‘Mwanda waka mwimene pano dyuba dyonso kaji mpika?’ Nabo bamulondolola’mba, ‘Mwanda kekudipo witupele kaji.’ Nandi webanena’mba, ‘Nenu endai mu budimi bwa mañanza.’”​—Mateo 20:1-7.

Bevwaniki ba Yesu kebabudilwepo kuvuluka Yehova Leza pobaivwana utela “Bulopwe bwa mūlu” ne “mwinē njibo.” Bisonekwa bitela Yehova bu mwinē budimi bwa mañanza, bwelekeja muzo wa Isalela. (Ñimbo ya Mitōto 80:8, 9; Isaya 5:3, 4) Boba badi mu kipwano kya Bijila abaelekejibwa na bengidi ba mu budimi bwa mañanza. Ino Yesu kelekejangapo myanda ya kala. Washintulula myanda ipita mu kyandi kitatyi.

Bendeji ba bipwilo, mwikadile Bafadiseo batompele Yesu panopano na mwanda wa dilubu, bo bamweka bu bengila nyeke mu mwingilo wa Leza. Badi pamo bwa bengidi ba difuku dituntulu belaije kufutwa mfutwa mibwane, ya ndenadi imo ku difuku dimo dya mingilo.

Babitobo ne bakwabo ba mu kino kisumpi bamwene Bayuda bitupu bwa bengidi baingidila Leza bityetye, pamo bwa bengidi ba kipindi kya difuku mu budimi bwa mañanza bwa Leza. Mu kyelekejo kya Yesu, bano bonso bo bantu bengile “na nsá ya busatu” (9:00 ya lubanga) nansha mu mansá alonda’po a mu dyuba​—mu nsá ya busamba, ya kitema, ne ku mfulo, ya 11 (5:00 ya kyolwa).

Bana-balume ne bana-bakaji balonda Yesu bamwenwe bu “bantu bafingwe mafingo.” (Yoano 7:49) Myaka mivule mu būmi bwabo, badi babiluwe ba lui bakwabo nabo babidimye. Ebiya, ku dikumbi dya mu 29 Yesu ke mwiye, “mwinē budimi bwa mañanza” watuma Yesu kwita bano bantu ba munshi bengidile Leza bu bana ba bwanga ba Kidishitu. Bo “ba mfulo” batelele Yesu, bengidi ba mu budimi bwa mañanza ba mu nsá 11.

Yesu pa kuvuya kyelekejo kyandi, walombola bintu byalongeka ku mfulo kwa difuku dya mingilo amba: “Kyolwa pa kōloba, mwinē budimi bwa mañanza wanena kalama wandi amba, ‘Ita bengidi wibafute mpalo yabo, ushilule na ba mfulo wifule na babajinji.’ Bantu bashilwile na nsá 11 pa kufika, batambula muntu ne muntu ndenadi imo. Penepo babajinji pa kwiya, balanga’mba basa kutambula mivule, ino ne abo bene batambula enka mpalo ya ndenadi imo imo. Pa kutambula’yo, bashilula kutompwela mwinē njibo amba, ‘Bano bantu ba mfulo abaingila’tu nsá imo kete; ino ubebadingakanya pamo netu batwe bantu baputuma na mingilo difuku dituntulu ne kyanga kya dyuba!’ Ino walondolola’po muntu umo amba, ‘A mukwetu, nkikulubīlepo. Mwene tubeivwanikanga ndenadi imo, ke amopo? Sela’tu yobe wiendele. Ami kyonsaka i kupa ne yeu wa mfulo yonka yonakupa. Le nkidipo na lupusa lwa kulonga kyonsaka na bintu byami? Nansha diso dyobe dyo dyabilaabila mwanda amiwa ne muyampe?’ Mu uno muswelo, ba mfulo bakekala babajinji, babajinji nabo ba mfulo.”​—Mateo 20:8-16.

Bana ba bwanga ye bano beipangula pa bene ba mfulo ba mu kyelekejo kya Yesu. Le bendeji ba bipwilo bya Bayuda bemona bu “babajinji” bakekala “ba mfulo” namani? Le Bana ba bwanga ba Yesu bakekala “babajinji” namani?

Bana ba bwanga ba Yesu, bamonwa na Bafadiseo ne bakwabo bu “ba mfulo,” badi mu mulongo wa “babajinji” kutambula mfutwa yabo mibwane. Yelusalema wa pano pa nshi ukatalulwa’ko pasa kufwa Yesu, ne kupingakanibwa na muzo mupya usa kutonga Leza, ke “Isalela wa Leza” kadi. (Ngalatea 6:16; Mateo 23:38) Yoano Mubatyiji webatelele pa kwisambila pa boba bakabatyijibwa na mushipiditu ujila. Boba badi “ba mfulo” basa kwikala babajinji kutambula luno lubatyijo ne kupebwa dyese dya kwikala batumoni ba Yesu “ne kulakula kwine kwa ntanda.” (Bilongwa 1:5, 8; Mateo 3:11) Nansha bana ba bwanga byobaivwanija kuno kushinta kukatampe kwesambila’po Yesu, bafwaninwe ne kuyuka’mba kumeso’ku, bendeji ba bipwio, baikala ke “ba mfulo,” bakebashikwa bininge.