Mwingilo wa Mushipiditu Sandu mu Kufikidija Mpango ya Yehova

“Kinenwa kyami kyalupuka mu kyakanwa kyami . . . kikafikijija biyampe’tu kintu kyo nekitumine.”—IS. 55:11.

 1. Leta kimfwa kilombola kwishila kudi pa kukuta nkuku ne kukwata mpango.

LANGA’PO bantu babidi beteakanya kwenda lwendo lwa motoka. Umo washika kalata kapotoloke kalombola kashinda katwala kobenda. Mukwabo nandi ulamine mu ñeni kwine kwendwa, ne kadi uyukile mashinda mavule. I mwilongolole mwa kushintyila dishinda shi kubaikala bikoleja. Bino byanenwa pa bano bantu babidi, bilombola kwishila kudi pa kukuta nkuku ne kukwata mpango mu myanda kampanda. Kukuta nkuku kudi pamo bwa kushika kalata kalombola dishinda dya kwenda kuntu kampanda, ino kukwata mpango i kuyuka kitungo kwampikwa kushintulula mwa kufikidijija’kyo.

2, 3. (a) I bika bibadilwa mu mpango ya Yehova, ne aye mwine wālongele namani pālubile ba Adama ne Eva? (b) Mwanda waka i biyampe twimvwanije ne pa mfulo mpango ya nyeke ya Yehova?

² Yehova pa kufikidija kiswa-mutyima kyandi, kakutangapo nkuku ino ukwatanga mpango ya nyeke. (Ef. 3:11) Mu ino mpango mudi ne mulangwe wandi mubajinji utala bantu ne ntanda—amba ntanda yonso ikale ke paladisa, pekele bantu babwaninine mu ndoe ne nsangaji ya nyeke. (Ngal. 1:28) Ba Adama ne Eva pa kulonga bubi, Yehova kāikele’popo talala, wākwete’ko mpangiko amba mpango yandi ikafikidile. (Tanga Ngalwilo 3:15.) Yehova wānene biyampe amba mwana-mukaji wa kyelekejo wādi wa kubutula ‘lutundu,’ ke ye Mwana kadi, ukonakanya Satana kalenga-byanzwe mwine, ne kufundula bibi byaletele.—Bah. 2:14; 1 Yoa. 3:8.

³ I kutupu bukomo bwa mūlu nansha bwa panshi bukankaja mpango ya Leza kufikidila. (Is. 46:9-11) Mwanda waka tunena namino? Mwanda mushipiditu sandu wa Yehova utalwa na uno mwanda. Buno bukomo kebukomenwapo kintu bwitukulupija amba mpango ya Leza ‘ikafikidila biyampe’tu.’ (Is. 55:10, 11) I biyampe twimvwanije ne pa mfulo mpango ya nyeke ya Leza. Lukulupilo lwa būmi bwetu bwa kumeso lwimanine pa kufikidila kwayo. Kadi kumona mwingidijija Yehova mushipiditu sandu wandi kukankamikanga lwitabijo lwetu. Pano nanshi, tubandaulei mwingilo wa mushipiditu sandu mu kufikidila kwa mpango ya Yehova—pa kala, dyalelo ne mafuku āya kumeso.

Mwingilo wa Mushipiditu Sandu pa Kala

 4. Lelo Yehova wāsokwele namani bityebitye mpango yandi?

⁴ Mu mafuku āsonekelwe Bible, Yehova wāsokwele bityebitye mpango yandi. Dibajinji, Lutundu lwine lwālailwe kyādi “kifībwe” kikola. (1 Kod. 2:7) Yehova wēsambile monka pa lutundu ke myaka 2000 pa kupita’po. (Tanga Ngalwilo 12:7; 22:15-18.) Yehova wāpele Abalahama mulao wādi na kufikidila kukatampe. Bishima “ku lukunwa lobe” bilombola patōka amba lukunwa lwādi lwa kwiya bu muntu, wa ku musuku wa Abalahama. Tukokeja kukulupila amba Satana wādi utele mutyima bininge pa kusokolwa kwa ino myanda. Na bubine, uno Walwana wādi ukimba’tu kutukija nansha kōna mwana utamba kudi Abalahama amba mpango ya Leza ivutakane. Inoko kebyādipo bya kubwanika, mwanda mushipiditu wampikwa kumweka wa Leza wingilanga. Namani?

5, 6. Lelo Yehova wāingidije namani mushipiditu sandu wandi mwanda wa kukinga bantu ba ku musuku wādi wa kutambija Lutundu?

⁵ Yehova wāingidije mushipiditu wandi mwanda wa kukinga bantu ba ku musuku wādi wa kutambija Lutundu. Yehova wānene kudi Abalama (Abalahama), amba: “Amiwa ne ngabo yobe.” (Ngal. 15:1) Bino binenwa kebyādipo bya bitupu. Kimfwa, tala byālongekele kubwipi na mwaka wa 1919 K.K.K. pākashikete ba Abalahama ne Sala mafuku matyetye mu Ngelala. Abimeleke mulopwe wa Ngelala, pa kubulwa kuyuka’mba Sala i mukaja Abalahama, wāmuyata ekale ke mukajandi. Lelo pano i Satana wādi ulonga bintu mwanda wa kuvutakanya kutyina Sala wakabutula lukunwa lwa Abalahama? Bible kanenene’popo kintu. Aye’ko unena amba Yehova wālongele’po kintu. Wādyumwine Abimeleke mu kilotwa aleke kutenga Sala.—Ngal. 20:1-18.

⁶ Yehova kēbalaminepo dimo kete. Wānyongolwele Abalahama ne kisaka kyandi mu bitatyi bivule. (Ngal. 12:14-20; 14:13-20; 26:26-29) O mwanda mulembi wa mitōto wānene pa bitala Abalahama ne ntundu yandi amba: “[Yehova] kalekelepo muntu nansha umo kwibalonga kyakwibalonga; eyo, i binebine wadingile balopwe pa mwanda wabo; amba, kemukatengako bami bashingwe-māni, kadi kemukalonga bapolofeto bami kyakulonga, mhm.”—Mit. 105:14, 15.

 7. Lelo Yehova wākingile muzo wa Isalela namani?

⁷ Yehova kupityila ku mushipiditu wandi wālamine muzo wa Isalela wa kala, mwādi mwa kubutulwa Lukunwa lwālailwe. Yehova kupityila ku mushipiditu wandi, wāpele Isalela Bijila bine byālamine mutōtelo wa bine ne kukinga Bayuda bakasubijibwa ku mushipiditu, mwikadilo, ne ku ngitu. (Div. 31:18; 2 Kod. 3:3) Mu kitatyi kya Batyibi, mushipiditu wa Yehova wākomeje bantu bamo mwanda wa kunyongolola Isalela ku balwana nandi. (Bat. 3:9, 10) Umbula bwa tutwa twa myaka itwala ku kubutulwa kwa Yesu, kipindi kibajinji kya lukunwa lwa Abalahama, mushipiditu wāingile mwanda wa kukinga Yelusalema, Betelema, ne tempelo—byonso byādi bya kukwasha mu kufikidila kwa bupolofeto butala Yesu.

 8. Le i bika bilombola amba mushipiditu sandu wāingile mu būmi ne mu mwingilo wa Mwanā Leza?

⁸ Mushipiditu sandu wāingile mu būmi ne mu mwingilo wa Yesu. Mu difu dya Madia mujike, mushipiditu sandu wāfikidije kintu kekyalongekele kashā. Wālengeje mwana-mukaji wampikwa kubwaninina emite ne kubutula Mwana mubwaninine, wampikwa mambo a lufu. (Luka 1:26-31, 34, 35) Kupwa, mushipiditu wālamine Yesu kutyina wakapulumuka. (Mat. 2:7, 8, 12, 13) Yesu paādi kalumba ku myaka 30, Leza wāmushingile māni a mushipiditu sandu, wāmutonga kwikala mpyana pa lupona lwa Davida ne kumulobeka mwingilo wa kusapula. (Luka 1:32, 33; 4:16-21) Mushipiditu sandu wāpele Yesu bukomo bwa kulonga bingelengele, kubadila’mo ne kubelula babela, kudisha bibumbo, ne kusangula bafu. Bino bilongwa bya bukomo bilaya byabuyabuya byotubwanya kutengela mu buludiki bwa Yesu.

9, 10. (a) Lelo mushipiditu sandu wāmwekele namani pa bana ba bwanga ba Yesu ba mu myaka katwa kabajinji? (b) Lelo i kwendelela’ka kwāsokwelwe mu myaka katwa kabajinji, K.K. kutala mu kufikidija mpango ya Yehova?

⁹ Kushilwila mu Pentekosa 33 K.K., Yehova wāingidije mushipiditu wandi pa kushinga māni kipindi kya bubidi kya lukunwa lwa Abalahama, bavule’mo ke ba ku musukupo wa Abalahama. (Loma 8:15-17; Ngat. 3:29) Mushipiditu sandu wāmwekele pa bana ba bwanga ba Yesu ba mu myaka katwa kabajinji, wēbapele bukomo bwa kusapula na bupyasakane ne bwa kulonga mīngilo ya bintu bikomokomo. (Bil. 1:8; 2:1-4; 1 Kod. 12:7-11) Kupityila ku byabuntu bya bingelengele, mushipiditu sandu wāsokwele kwendelela kutulumukwa kwa kufikidila kwa mpango ya Yehova. Yehova kākidipo wingidija mpango ya kala itala pa butōtyi bwa mu tempelo ya mu Yelusalema. Wādi kaitabije enka kipwilo kya Bwine Kidishitu kyādi kikishimikwashimikwa. Tamba papo, Yehova wingidijanga kino kipwilo kya bashingwe māni mu mpango yandi.

¹⁰ Kulama, kukomeja, ne kushinga māni—ino i miswelo’tu mityetye yāingidije Yehova mushipiditu sandu wandi mu bitatyi byāsonekelwe Bible mwanda wa kwendeleja mpango yandi ne byoifikidila. Le bidi namani mu ano etu mafuku? Le pano Yehova wingidijanga namani mushipiditu sandu mwanda wa kukwatakanya mpango yandi? Tusakanga kuyuka, mwanda tudi na buya bwa kwingila kukwatañana na uno mushipiditu. Pano tubandaulei miswelo iná ingidija’mo Yehova mushipiditu wandi dyalelo.

Mwingilo wa Mushipiditu Sandu Dyalelo

11. I kika kilombola’mba mushipiditu sandu i bukomo butōkeja bantu ba Leza, ne ukalombola namani amba wingilanga nao pamo?

¹¹ Kibajinji, mushipiditu sandu i bukomo butōkeja bantu ba Leza ne kwibalunga umbumo. Boba bengila mu mpango ya Yehova bafwaninwe kwikala na mwikadilo utōka. (Tanga 1 Kodinda 6:9-11.) Bantu bamo bekalanga ke Bene Kidishitu bādi balonga byabulongelonge, kimfwa busekese, makoji, ne busekese bwa bantu ba ngitu imo. Bilokoloko bibutula bilongwa bya bubi bikokeja kwala miji. (Yak. 1:14, 15) Ino bano bantu ‘boijibwanga’ mwanda wa kulombola amba abashinta būmi bwabo mwanda wa kusangaja Leza. Lelo i bika bikwashanga bantu baswele Leza bakomene bukomo bwa kulonda bilokoloko bibi? 1 Kodinda 6:11 amba i “Mushipiditu wa Leza wetu.” Shi ulame mwikadilo utōka, ubalombola’mba witabije bukomo bwa mushipiditu buludike būmi bobe.

12. (a) Mungya kimonwa kya Ezekyele, le Yehova uludikanga bulongolodi bwandi namani? (b) Ukokeja kulombola namani amba wingilanga pamo na mushipiditu?

¹² Kya bubidi, Yehova wingidijanga mushipiditu wandi pa kwendeja bulongolodi bwandi konso kwasaka. Mu kimonwa kya Ezekyele, kipindi kya mūlu kya bulongolodi bwa Yehova i kyelekejibwe na dikalo ya mūlu dyenda kwampikwa kutatala kukafikidija mpango ya Yehova. I kika kyendeja dino dikalo? I mushipiditu sandu. (Ezek. 1:20, 21) Tuvulukei amba bulongolodi bwa Yehova budi na bipindi bibidi, kya mūlu ne kya pano panshi. Shi kipindi kya mūlu kiludikwanga na mushipiditu sandu, nanshi kya panshi nakyo mo monka. Pokōkela ne kulamata ku bwendeji bwa kipindi kya pano panshi kya bulongolodi bwa Yehova, ulombolanga’mba wendanga pamo na dikalo dya mūlu dya Yehova kadi wingilanga pamo na mushipiditu sandu wandi.—Bah. 13:17.

13, 14. (a) Lelo i bāni babundile “luno lukongo” lutelelwe na Yesu? (b) Leta kimfwa kilombola’mba mushipiditu wingilanga mu kuleta mwinya wa bubinebine bwa mu Bible. (Tala kapango “Lelo Wendelanga Pamo na Mwinya Wenda Ukamba?”)

¹³ Kya busatu, mushipiditu sandu wingilanga mu kuleta mwinya wa bubinebine bwa mu Bible. (Nk. 4:18) Dino dipepala dingidijibwanga na “umpika wa binebine, udi na manwa” bu dishinda dya kupānina’mo mwinya wenda ukamba. (Mat. 24:45) Kimfwa, tala muswelo otwimvwanije boba babundile “lukongo” lwātelelwe na Yesu. (Tala Mateo 24:32-34.) Lelo i lukongo’ka lwātelelwe Yesu? Kishinte “Kwikala’po kwa Kidishitu—Kushintulula Bika Kodi?” kyashintulwile amba Yesu kādipo wisambila pa babi, ino i pa bandi bana ba bwanga badi ba kushingwa māni a mushipiditu sandu.a Balondi ba Yesu bashingwe māni, ba mu myaka katwa kabajinji ne ba mu ano etu mafuku, badi ba kumona kiyukeno ne kwimvwanija buluji bwakyo—amba Yesu kadi “pa kibelo ponka.”

¹⁴ Lelo ino nshintulwilo idi na buluji’ka kotudi? Nansha byoketubwanyapo kupikula bula bwa “luno lukongo,” ino i biyampe tulame mu ñeni myanda palapala itala kishima “lukongo”: Divule kifunkilanga pa bantu ba myaka palapala bekele’ko mu kitatyi kampanda, ke kilampepo bininge, kadi kidi na mfulo. (Div. 1:6) Penepa, le tukemvwana namani binenwa bya Yesu bitala pa “luno lukongo”? Mobimwekela, wādi usaka kunena amba būmi bwa bashingwe māni bakatanwa’ko pashilula kumweka kiyukeno mu 1914 bwadi bwa kwitana na bwa bashingwe māni bakwabo bakamona ngalwilo ya kyamalwa kibūke. Luno lukongo lwadi na ñanjilo, kadi lukekalanga bine na mfulo. Kufikidila kwa bipindi palapala bya kiyukeno kulombola patōka’mba kyamalwa kibafwena. Shi ulame mutyima obe wa kampeja-bukidi ne kutengela nyeke, ukalombola’mba wendelanga pamo na mwinya ne kulonda buludiki bwa mushipiditu sandu.—Mako 13:37.

15. I kika kilombola’mba mushipiditu sandu witupanga bukomo tusapule myanda miyampe?

¹⁵ Kya buná, mushipiditu sandu witupanga bukomo tusapule myanda miyampe. (Bil. 1:8) Lelo kudi kintu kikwabo kikokeja kulengeja myanda isapulwe ntanda yonso? Langa’po bidi. Padi udi mu boba badi na bumvu bupitepite ne moyo, badi balanga amba ‘Nkibwanya kwenda kukasapula ku njibo ne njibo!’ Inoko pano, wingilanga uno mwingilo na bupyasakane.b Batumoni ba Yehova bavule ba kikōkeji bendelelanga na kusapula koku bakankajibwa ne kupangwapangwa. Enka mushipiditu sandu wa Leza kete o witupa bukomo tunekenye bijika bilenga moyo ne kulonga bintu byoketwadipo ba kubwanya na bukomo bwetu. (Mika 3:8; Mat. 17:20) Shi upyasakene mu mwingilo wa busapudi, ukalombola amba wingilanga pamo na mushipiditu.

Mukengidila Mushipiditu Sandu mu Mafuku Āya Kumeso

16. Mwanda waka tukokeja kukulupila amba Yehova ukakinga bantu bandi pa kyamalwa kibūke?

¹⁶ Mu mafuku āya kumeso, Yehova ukengidija mushipiditu wandi mu miswelo mimweke mwanda wa kufikidija mpango yandi. Dibajinji bandaula mwanda utala bulami. Monka motwekimwenanga, Yehova wāingidije mushipiditu sandu wandi pa kala mwanda wa kukinga bantu ne muzo onso wa Isalela. Tudi nanshi na bubinga bwa kukulupila amba ukengidija mushipiditu umo onka mukomo mwanda wa kukinga bantu bandi ku kyamalwa kibūke kyafwena pabwipi. Ketukokejapo kwipatanya pa muswelo mwine uketulama Yehova. Ino, tukokeja kwilaija ne kikulupiji ponka, koku tuyukile amba bonso baswele Yehova kebakajiminapo mu meso andi nansha kwikala kuntu kekukokejapo kufika mushipiditu sandu.—2 Bil. 16:9; Mit. 139:7-12.

17. Lelo Yehova ukengidija namani mushipiditu sandu wandi mu ntanda mipya?

¹⁷ Lelo Yehova ukengidija namani mushipiditu sandu wandi mu ntanda impya īya’i? Uno mushipiditu i bukomo bukekala ku mikanda ikapūtulwa’mo. (Kus. 20:12) Le i bika bikekala’mo? Mobimwekela, i bintu biketusakila Yehova kulonga mu myaka kanunu. Lelo utengele kukabandaula myanda idi mu mikanda’ya? Tutengele na kipyupyu yoya ntanda mipya. I bikomo kufwatakanya mwine mukekadila būmi mu kyokya kitatyi kya madyese Yehova pakengidija mushipiditu sandu wandi mwanda wa kufikidija mpango itala ntanda ne bantu bakekala’po.

18. Lelo ubasumininwa kulonga bika?

¹⁸ Ketwakilwai amba mpango ya nyeke ya Yehova isa kufikidila, ke-pantu, wingidijanga mushipiditu sandu wandi—bukomo butabukile bonso mu diulu ne ntanda—mwanda wa kwiifikidija. Ino mpango i kutala ne abe. Shi ke pano, sumininwa kulomba Yehova mushipiditu wandi ne kwendela pamo na buludiki bwao. (Luka 11:13) Mu uno muswelo, ukakulupila kwikala na būmi bwādi busaka Yehova amba bantu bekale nabo—ke bwa nyeke mu Paladisa pano pa ntanda kadi.

[Kunshi kwa dyani]

Lelo Ukivulukile?

• Lelo Yehova wāingidije namani mushipiditu sandu wandi mu bitatyi byāsonekelwe Bible mwanda wa kwendeleja mpango yandi?

• Le Yehova wingidijanga namani mushipiditu wandi dyalelo?

• Lelo Yehova ukengidija namani mushipiditu wandi mu mafuku āya kumeso mwanda wa kufikidija mpango yandi?

[Kapango pa paje 22]

Lelo Wendelanga Pamo na Mwinya Wenda Ukamba?

Yehova wendelelanga kumunikila bantu bandi. Le tunena namani pa bitōkeji biletwa mu Kiteba kya Mulami?

▪ Lelo kyelekejo kya Yesu kya kiyujo kya mikate kilombola patōka bufundiji’ka buyampe butala pa kutama kwa ku mushipiditu? (Mat. 13:33)—1 Kweji 7, 2008, paje 27-28.

▪ I kitatyi’ka kikafula lwito lwitwa Bene Kidishitu ba kwenda mūlu?—1 Kweji 5, 2007, paje 30-31, mu Falanse.

▪ Lelo kutōta Yehova “mu mushipiditu” kushintulula bika? (Yoa. 4:24)—1 Kweji 8, 2002, paje 12.

▪ Lelo i mu kipango’ka mwingila kibumbo kikatampe? (Kus. 7:15)—1 Kweji 5, 2002, paje 30-31, mu Falanse.

▪ Lelo kusansanya mikōko mu bambuji kukekala’ko kitatyi’ka? (Mat. 25:31-33)—1 Kweji 11, 1995, paje 10-20.