Endai Munanga Pamo na Mwānangile Yesu Kidishitu

“Yewa unena’mba: Ngikele mudi [Leza] nyeke; nabya i kimwendelemo amba anange mwānangile aye [Yesu].”—1 YOANO 2:6.

1, 2. Kwela meso kudi Yesu kulomba kulonga bika ne bika?

MUTUMIBWA Polo wāsonekele amba: “Tunyeme ne bukankamane ponka luno lubilo lo tutungilwe lwa kwela meso konka kudi aye Yesu kilongoji kya kwitabija kwetu, ke mubingiji wako kadi.” (Bahebelu 12:1, 2) Kulonda dishinda dya kikōkeji kulomba twele meso konka kudi Yesu Kidishitu.

² Mu ludimi lubajinjibajinji “kwela meso,” kutelelwe mu Bisonekwa bya Kingidiki bya bwine Kidishitu kushintulula amba “kuta mutyima kuntu kampanda pampikwa kulaba,” “kuleka kutala kintu kansangwa mwanda wa kubambila meso pa kintu kankenge,” “kutala sō.” Dibuku dimo dinena’mba: “Kitatyi munyemi Mungidiki udi mu kikailo kyaleka kwela meso andi mu kiwanza mwaenda lubilo ne ku kitūlo kwaepangila kufika, ino katale bibumbo bibandila, nabya lubilo lwandi lukatyepa. Ne bene Kidishitu nabo i monka na monka.” Bilabi bikokeja kukankaja kwendelela kotwendelela ku mushipiditu. Tufwaninwe nanshi kwela meso sō enka kudi Yesu Kidishitu. Le i bika byotutala kudi Kilongoji wetu? Kishima kya Kingidiki kyalamwinwe bu “kilongoji” kishintulula amba “mwendeji mwinemwine, yewa utangidile kumeso mu bintu byonso ne ushila bakwabo kimfwa kya kumulondela’po.” Kwela meso kudi Yesu kulomba nanshi tulonde kimfwa kyandi.

3, 4. (a) Kunanga mwānangile Yesu Kidishitu kwitulomba bika? (b) I bipangujo’ka byotufwaninwe kuta’ko mutyima?

³ “Yewa unena’mba: Ngikele mudi [Leza] nyeke; nabya i kimwendelemo amba anange mwānangile aye [Yesu],” mo munenena Bible. (1 Yoano 2:6) Tufwaninwe kwikala mudi Leza na kulonda mbila ya Yesu pamo na mwāalondele aye mbila ya Shandi.—Yoano 15:10.

⁴ Pa kino, kunanga mwānangile Yesu kulomba tubambile meso sō padi aye Kilongoji ne kulonda mpata mu mayo andi. Bipangujo bya mvubu bifwaninwe kubandaulwa pano i bino: Le Yesu witwendejanga namani dyalelo? Lelo kunanga mwāanangile kudi na lupusa’ka potudi? I byabuyabuya’ka bidi mu kulonda kimfwa kyāshile Yesu Kidishitu?

Mwendejeja Kidishitu Balondi Bandi

 5. Kumeso kwa Yesu kukanda mūlu, le wālaile balondi bandi bika?

⁵ Kumeso kwa Yesu Kidishitu musanguke kukanda mūlu, wāmwekēle bidi bandi bana ba bwanga ne kwibapa wēbapa mwingilo wa kamweno. Wānene amba: “Endai nanshi mukafundijei mizo yonso ya bantu nabo ke bāna-babwanga.” Pano po apo kadi pēbalaile Mwendeji wabo amba ukekala nabo ponso pobakengila uno mwingilo. Amba: “Ami nami kadi, ngidi nenu mafuku onso nyeke, ne kumfulo kwine kwa panopantanda.” (Mateo 28:19, 20) Lelo Yesu Kidishitu udi na balondi bandi mu buluji’ka mu ano mafuku a ku mfulo?

6, 7. Le Yesu witwendejanga namani kupityila ku mushipiditu sandu?

⁶ Yesu wānene amba: “Aye Nsenga-mukwashi, Mushipiditu Sandu, ukatuma Tata mu dijina dyami, aye ukemulombolanga byonsololo, ne kwimuvulula byonso byo nemusapwila bino.” (Yoano 14:26) Mushipiditu sandu, utuminwe mu dijina dya Yesu, o witwendeja ne kwitukomeja dyalelo. Witupanga kitōkeji ku mushipiditu ne kwitukwasha twivwanije “ne bikomo bīne bya Leza.” (1 Kodinda 2:10) Ne kadi, ngikadilo ya bwine Leza pamo bwa “buswe, nsangaji, ndoe, kitūkijetyima, kanye, buyampe, lwitabijo, kutalala, kwīfula” yo ibundile “kipa kya mushipiditu.” (Ngalatea 5:22, 23, NW) Tukokeja kutamija ino ngikadilo shi tukwashibwe na mushipiditu sandu.

⁷ Potwendelela na kwifunda Bisonekwa ne kulonga bukomo bwa kwingidija byotwifunda, mushipiditu wa Yehova witukwashanga tutamije tunangu, kusansanya, kwivwanija, buyuki, butyibi, ne bwino bwa kulanga. (Nkindi 2:1-11) Kadi mushipiditu witukwashanga tūminine mu matompo ne mu byongo. (1 Kodinda 10:13; 2 Kodinda 4:7; Fidipai 4:13) Bene Kidishitu i banenwe ‘kwioija abo bene ku bubi bonso bwa ku ngitu ne bwa ku mushipiditu ne kufikijija bupandulwe’mo.’ (2 Kodinda 7:1) Lelo bine tubwanya kufikila pa misoñanya ya Leza ya bupandulwe’mo nansha buujila shi mushipiditu sandu kewitukwashapo? Bine, muswelo umo witwendeja Yesu dyalelo i kupityila ku mushipiditu sandu, umupele Shandi Yehova Leza amba engidije’o.—Mateo 28:18.

8, 9. Le Kidishitu wingidijanga “umpika wa binebine ne wa manwa” namani mwanda wa kwitwendeja?

⁸ Ivwana muswelo mukwabo wendeja Kidishitu kipwilo dyalelo. Yesu wēsambīle pa kwikala’po kwandi ne pa kuvuika kwa ngikadilo ya bintu amba: “Lelo i ani na bubine umpika wa binebine ne wa manwa utūdilwe na mfumwandi kutala ba mingilo bandi, ne kwibapa bidibwa pa kitatyi kifwaninwe? I wa nsangaji yao umpika shi mfumwandi pa kujoka amutane ulonga namino. Bine nemunena amba, ukamutūla pa bintu byandi byonso.”—Mateo 24:3, 45-47, NW.

⁹ “Mfumwandi” uno i Yesu Kidishitu. “Umpika” i kisumpi kya bene Kidishitu bashingwe māni badi pano panshi. Kano kabumbo ka umpika i kapebwe kiselwa kya kutala tumweno twa Yesu twa pano panshi ne kupāna bidibwa bya ku mushipiditu pa kitatyi kiyampe. Kakisumpi ka batadi ba bwino babadilwa mu “umpika wa binebine ne wa manwa” ko kabundile Kitango Kyendeji, kingila bu ntunguluji wa kabumbo ka umpika. Bano bo baludika mwingilo wa busapudi ntanda yonso ne kupāna bidibwa bya ku mushipiditu pa kitatyi kifwaninwe. Nanshi Kidishitu wendejanga kipwilo kyandi kupityila kudi “umpika wa binebine ne wa manwa” mushingwe māni a mushipiditu ne kyandi Kitango Kyendeji.

10. Le tufwaninwe kumona bakulumpe namani ne mwanda waka?

¹⁰ Inoko kukidi kadi kilomboji kikwabo kya bwendeji bwa Kidishitu, ke “byabuntu ku bantu” kadi—bakulumpe bene Kidishitu, nansha batadi. I betupebwe “mwanda wa kukankamija bapandulwe’mo ku mingilo ya bwingidi, mwanda wa kutamija ngitu ya Kidishitu.” (Efisesa 4:8, 11, 12) Bahebelu 13:7 (MB) unena pangala pabo amba: “Vulukai kadi batangidiji benu bemusapwidile Myanda Miyampe. Langai bidi mo baikadile, iulai lwitabijo lwabo.” Bakulumpe batangidilanga kipwilo. Lwitabijo lwabo lufwaninwe kwiulwa mwanda nabo beulanga Kidishitu Yesu. (1 Kodinda 11:1, Bisonekwa Bitokele) Tukokeja kufwija’ko pangala pa mpangiko itūdilwe’ko bakulumpe shi tukōkela ne kukōkelelela bino “byabuntu ku bantu.”—Bahebelu 13:17.

11. Lelo Kidishitu wendejanga balondi bandi dyalelo kupityila ku bika ne bika, ne kunanga mwaānangile kulomba kulonga ne bika?

¹¹ I amo, Yesu Kidishitu ye wendeja balondi bandi dyalelo kupityila ku mushipiditu sandu, kudi “umpika wa binebine ne wa manwa,” ne kudi bakulumpe pa kipwilo. Kunanga mwānangile Kidishitu kulomba nanshi ne kwivwanija muswelo waendeja balondi bandi ne kukōkela’ko. Kadi kilomba ne kwiula muswelo waānangile. Mutumibwa Petelo wāsonekele amba: “Ko konka ko mwityilwe; ke-muntu Kidishitu nandi wemususukile, wemush[īla] kitompekejo kya kumulonda bānwe mu māyo andi.” (1 Petelo 2:21) Le kulonda kitompekejo kibwaninine kya Yesu kudi na lupusa’ka potudi?

Ikala na Mutyima Unekena Poingidija Lupusa

12. I kimfwa’ka kya Kidishitu kifwaninwe kulondwa nakampata na bakulumpe ba mu kipwilo?

¹² Yesu wātambwile lupusa lukatampe kudi Shandi, ino wāingidije’lo na mutyima unekena. Bonso badi mu kipwilo—nakampata batadi—bafwaninwe ‘kuyukana bu bantu ba mutyima unekena.’ (Fidipai 4:5, NW; 1 Temote 3:2, 3) Bakulumpe i bapebwe lupusa kampanda mu kipwilo, o mwanda i kya kamweno balonde mayo a Kidishitu pobengidija luno lupusa.

13, 14. Lelo bakulumpe bakokeja kwiula namani Kidishitu pobakankamika bakwabo bengidile Leza?

¹³ Yesu wādi uyukile mikalo ya bandi bana ba bwanga. Kādipo wibalomba balonge bitabukile byobakokeja kulonga. (Yoano 16:12) Kadi Yesu kādipo uningila balondi bandi, ino wēbakankamikile ‘bepāne na kininga’ mu kulonga kiswa-mutyima kya Leza. (Luka 13:24) Kadi aye mwine wēbakankamikile na kwibatangidila kumeso ne kwibakunka ku mityima yabo. Mo monka ne bakulumpe bene Kidishitu ba dyalelo, nabo kebatuyulangapo bakwabo bashilule kwingidila Leza na bumvu nansha na mutyima wa kwitopeka. Ino, bebakankamikanga bengidile Yehova na buswe bobamuswele, bobaswele Yesu, ne bobaswele bakwabo.—Mateo 22:37-39.

¹⁴ Yesu kāingidijepo bibi lupusa lobāmupele na kukimba kukontolola būmi bwa bakwabo. Kāletelepo misoñanya mikomo kulonda nansha kujidika bijila bivulevule. Ino mufundijijo wandi wādi utenga bakwabo ku mityima amba balonde misoñanya ifyeme mu bijila bya Mosesa. (Mateo 5:27, 28) Bakulumpe nabo beulanga Yesu Kidishitu shi baleka kujidika bijila bya bujidikejidike, nansha kwimanina pa mimweno yabo ya bintu. Mu myanda itala muvwadilo ne mwidyangwilo nansha kukōkolokwa ne kwipwija mukose, bakulumpe bakimbanga kutenga mityima na kwingidija misoñanya ya bwine Leza, kimfwa yoya itanwa mu Mika 6:8; 1 Kodinda 10:31-33; ne mu 1 Temote 2:9, 10.

Ikala na Mutyima wa Lusa ne wa Lulekelo

15. Lelo Yesu wālongele bika pāikele kutupa bandi bana ba bwanga?

¹⁵ Kidishitu wētushidile kimfwa kya kulonda mu byaādi ulongela bandi bana ba bwanga shi abaluba na kutupa. Ivwana myanda’tu ibidi yālongekele bufuku bwandi bwa mfulo paākidi bu muntu pano panshi. Yesu wāfikile mu budimi bwa Ngesemani na batumibwa bandi, kupwa “wepasela ne Petelo, ne Yakoba, ne Yoano” ne kwibanena amba ‘endelelai na kukesha.’ Kupwa “pa kusonsolokela patyetye nabya waponena panshi kalombela.” Ino pa kujoka, “webatāna mu tulo.” Le wālongele’po namani? Wānene amba: “I bine mutyima ō muteleko, nanshi mubidi udi ne bukōkekōke.” (Mako 14:32-38) Na bubine wālombwele mutyima wa lusa padi ba Petelo, Yakoba, ne Yoano mwanda kēbatopekelepo na kalobolobo! Mu bufuku bumo bonka, Petelo wāmutuna misungu isatu. (Mako 14:66-72) Kupwa pene’pa, le Yesu wāmwene Petelo namani? “Mfumwetu wasanguka binebine; wasokokela kudi Shimona [Petelo].” (Luka 24:34) Kadi Bible unena’mba: “Ne mwāmwekele kudi Kefasa,” kupwa ke “kudi badikumi ne babidi.” (1 Kodinda 15:5) Nanshi Yesu kālamīnepo mutumibwa wēsashile kiji, ino wāmulekēle mambo ne kumukankamika ponka. Kadi mwenda mafuku, Yesu wāpele Petelo biselwa bikatampe.—Bilongwa 2:14; 8:14-17; 10:44, 45.

16. Tukananga namani mwanangile Yesu shi banabetu betabije abetulonga bibi kampanda?

¹⁶ Shi ke pano, shi banabetu betabije abetulubila nansha kwitulongela bibi mu muswelo kamukaya pa mwanda wa kubulwa kubwaninina, tubulwe’po kwikala na mutyima wa lusa ne wa kulekela na owa wādi na Yesu? Petelo wāsoñenye banababo betabije amba: “Ikalai ne mutyima umo, ne kanye, ne kwisanswa bu-bāna, ne mutyima wa lusalusa, ne wa bumvubumvu; ne kubulwa kulubula bubi na bubi bukwabo, nansha mutonko ku mutonko mukwabo, mhm; nanshi lubula kingi bitupu kyadyese.” (1 Petelo 3:8, 9) Ino bikekala namani shi muntu mukwabo waleka kwitulongela mwālongele Yesu, wapele kwitufwila lusa ne kwitulekela? Nansha nankyo, batwe tunenwe’nka kwiula Yesu ne kulonga bintu mwaādi ulongela aye.—1 Yoano 3:16.

Badikija Tumweno twa Bulopwe

17. I bika bilombola amba Yesu wātangidije kulonga kiswa-mutyima kya Leza mu būmi bwandi?

¹⁷ Kudi muswelo mukwabo otukokeja kunanga mwānangile Yesu Kidishitu. Kusapula myanda miyampe ya Bulopwe po apo pādi pemanine būmi bwa Yesu. Aye pa kupwa kusapwila mwana-mukaji mwine Samadia, kubwipi na kibundi kya Saika mu Samadia, wālombwele bandi bana ba bwanga amba: “Bidibwa byami i byonka bino’mba: Ngube kiswa-mutyima kya yewa wakuntuma, ne kumupwila mīngilo yandi.” (Yoano 4:34) Kulonga kiswa-mutyima kya Shandi ko kwādi kukwasha Yesu; byo byādi pamo bwa bidibwa byandi byatondwa ne bimutūkija mutyima. Mwene kwiula Yesu na kubambila meso pa kulonga kiswa-mutyima kya Leza ko kutwala muntu ku būmi bwa kamweno ka binebine ne bwa kuloelelwa?

18. I byabuyabuya’ka bimwenwa mu kukankamika bana bengile mwingilo wa kitatyi kyonso?

¹⁸ Shi bambutwile bakankamika babo bana kukwata mwingilo wa kitatyi kyonso, nabya abo ne bana bene kumo bakamwena’mo byabuyabuya bivule. Shabana pamba wātūdile bandi bana kitungo kya kwikala bapania tamba’tu bakidi banuke. Ba mapasa’ba pa kupwa’tu masomo a ku ngitu, bashilula bupania. Uno shabana pa kupwa kulangulukila pa nsangaji yamwenine’mo, usoneka’mba: “Betu bana kebetufityijepo mutyima, mhm. Tukokeja’nka ne kunena na kufwija’ko amba, ‘Bāna e bipyanwa bya Yehova.’” (Mitōto 127:3) Le bana bamwenanga namani mu mwingilo wa kitatyi kyonso obalondalonda? Ina bana batano unena’mba: “Mwingilo wa bupania i mukwashe bami bana bonso bekale na kipwano kiloe na Yehova, i bulumbulule bibidiji byabo bya kwifunda, i mwibakwashe bengidije kitatyi na tunangu, ne i mwibakwashe bayuke kutangidija bintu bya ku mushipiditu kumeso mu būmi bwabo. Nansha bonso byobekele kwisendulula mu bintu bivule, ino i kutupu nansha umo wialakanya pa mwanda wa dishinda dyobatongele kulonda.”

19. I bintu’ka bya tunangu bifwaninwe kwitungila bankasampe mu myaka īya kumeso?

¹⁹ Bankasampe, le mwitungīle kulonga bika mu myaka īya kumeso? Le mukimbanga kukekala na kaji kayampe kupita’ni, nansha mwielelanga’ko mwanda wa kukengila mwingilo wa kitatyi kyonso? Polo uleta kino kidyumu amba: “Tūkanyai biyampe pa kunanga, kepamopo bwa bampikwa ñeni, mhm, poso bwa bañeni; ne kumwenamo byakumwenamo mu myaka, ke-mantu mafuku i mabimabi.” Kupwa ubweja’ko amba: “Penepo nanshi, kemukalembakanai, yūkai monka mwikadile kiswa-mutyima wa Mfumwetu.”—Efisesa 5:15-17.

Ikala na Dikōkeji

20, 21. Yesu wādi na dikōkeji mu muswelo’ka, ne tukokeja kwiula dikōkeji dyandi namani?

²⁰ Kunanga mwānangile Yesu kulomba ne kwiula dikōkeji dyandi. Bible unena pangala pa dikōkeji dya Yesu amba: “Aye pa kwikala mu ludingo lumo lonka na Leza, kafwatakenyepo’mba: Kudingakana pamo ponka na Leza kuno i kintu kya kusompola, mhm, nanshi wēbudija aye mwine, pa kwalamuka mu ludingo lwa bupika, ne kwa kifwa kya bu-bantu. Kadi pa kutānwa monka umuswelo wa bu-muntu wēpelulula aye mwine, pa kukōkela ku lufu, nalo, kadi, e-ē! i lufu lonka lwa [pa mutyi wa masusu].” Yesu wākwatakenye na dikōkeji bubikadi bwa Yehova na kukōkela ku byādi bimusakila Leza kulonga. Wākōkele kufika ne pa kwitabija kufwa pa mutyi wa masusu. Netu tufwaninwe ‘kwikala na uno mutyima’ ne kukōkela kulonga kiswa-mutyima kya Leza na dikōkeji.—Fidipai 2:5-8.

²¹ Yesu kadi wāikele na dikōkeji kudi batumibwa bandi ba kikōkeji. Nansha byobādi na bukōkekōke ne bampikwa kubwaninina, Yesu wēbaswele “ne kumfulo kwine.” (Yoano 13:1) Netu mo monka, kubulwa kubwaninina kwa banabetu kekufwaninwepo kwitwikadija bantu ba kutopekatopeka bakwetu.

Lamata ku Kitompekejo Kyāshile Yesu

22, 23. I byabuyabuya’ka bidi mu kulamata ku kyelekejo kyāshile Yesu?

²² Shako, byotudi bakubulwa kubwaninina, ketukokejapo kulonda mu mayo a Kimfwa kyetu kibwaninine. Inoko, tukokeja kulonga bukomo bwa kulonda’mo senene. Kino kilomba twivwanije ne kukōkela ku bwendeji bwa Kidishitu ne kulamata ku kitompekejo kyaāshile.

²³ Kwiula Kidishitu kuletanga byabuyabuya bivule. Būmi bwetu bukekala buluji, kadi buleta kuloelelwa mwanda twimanine pa kulonga kiswa-mutyima kya Leza, ke kyetupo. (Yoano 5:30; 6:38) Tudi na mutyima wa mundamunda utōka. Kadi munangilo wetu uletanga kimfwa kilumbuluke. Yesu wāityile boba bonso bādi baputuma na mingilo ne balēmenenwe amba bāye kwadi bamone kutūkijibwa mityima yabo. (Mateo 11:28-30) Shi ke pano, ponso potulonda kimfwa kya Yesu, netu tutūkijanga mityima ya boba botupwene nabo. Nanshi twendelelei na kunanga pamo na mwānangile Yesu.

Le Ukivulukile?

• Kidishitu wendejanga balondi bandi namani dyalelo?

• Bakulumpe bakokeja kulonda namani bwendeji bwa Kidishitu pobengidija lupusa lwibapele Leza?

• Le tukokeja kulonda kimfwa kya Yesu namani kitatyi kyotumona bilubo bya bakwetu?

• Bankasampe bakatangidija tumweno twa Bulopwe muswelo’ka?

[Kifwatulo pa paje 15]

Bakulumpe bene Kidishitu betukwashanga tulonde bwendeji bwa Kidishitu

[Kifwatulo pa paje 16]

Bankasampe, le i bitungo’ka byomwitungile mwa kumwena būmi bwa bwine Kidishitu buleta mpalo?