Lelo i kika kikafikila mikōko ne bambuji?

“[Ukakalañanya bantu, “NW”] palapala bwa mukumbi ukalañanya mikōko umbambuji.”​—MATEO 25:32.

YESU KRISTU ye wādi Mufundiji mukatampe mwine wāikeleko pano pantanda. (Yoano 7:46) Mu miswelo yādi wingidija mu bufundiji bwandi tutela’mo bwino bwa kwingidija nkindi nansha byelekejo. (Mateo 13:​34, 35) Ino nkindi yādi iyukija bubinebine bwa kumushipiditu bwamushike butala pa bupolofeto mu muswelo upēla ino kadi na bukomo.

² Mu lukindi lwa mikōko ne bambuji, Yesu wēsambile pa kitatyi kyakengila mwingilo wa pabula, amba: “Pākāya Mwanā muntu mu ntumbo yandi, ne . . . ” (Mateo 25:31) Tufwaninwe kuta mutyima ku kino kyelekejo mwanda kyo kyāfudije nakyo Yesu kilondololwa kyandi ku kipangujo kyobāmwipangwile’mba: “I kika kikekala bu kiyukeno kya kwikalapo kobe ne kya mfulo ya ngikadilo ya bintu?” (Mateo 24:3, NW) Lelo kino kidi na buluji’ka kotudi?

³ Yesu wātobele butobo butala pa myanda itulumukwa yotutengele, ‘ikalondakana’ na kyamalwa kibūke. Wānene’mba penepo kukalupuka “kiyūkeno kya Mwanā muntu.” Kino kikatenkenya “mizo yonso ya bantu ba panopantanda” poikamona “Mwanā muntu wiya pa makumbi a mūlu ne bulobo, ne ntumbo mikatampe mīne.” Mwanā muntu ukāya pamo na “bamwikeulu bandi.” (Mateo 24:​21, 29-31)a Ino lelo i kika kyotukanena pamwanda utala lukindi lwa mikōko ne bambuji? Mu ma Bible alamunwa panopano lutudilwe mu shapita wa 25, ino luno lukindi i kipindi kya kilondololwa kya Yesu, luletela’ko bushintuludi bukwabo bwisambila pa kwiya kwandi mu ntumbo, kadi luningila nakampata pa butyibi bwandi bwakafikidija pa “mizo yonso.”​—Mateo 25:32.

Bantu Batelelwe mu Luno Lukindi

⁴ Yesu ushilula luno lukindi na kunena’mba: “Pākāya Mwanā muntu.” Padi nobe uyukile kala uno “Mwanā muntu.” Pavule, Basoneki ba Myanda Miyampe bādi bengidija uno mwityilo pakutela Yesu. Nansha ke Yesu mwine nandi wāingidije’o, mwanda wādi uyukile kimonwa kyāmwene Danyele kya muntu ‘umo wifwene mwanā muntu,’ wāfwenene kudi Kafulamoba mwanda wa kutambula “bufumu, ne ntumbo, ne bulopwe.” (Danyele 7:​13, 14; Mateo 26:​63, 64; Mako 14:​61, 62) Yesu ye mutwe mu luno lukindi, ino kadi’mopo kasuku kandi mhm. Mu myanda yānene kumeso kwa kuleta luno lukindi, pamo’nka na mokinenenwe mu Mateo 24:​30, 31, wālombwele’mba pākāya Mwanā muntu na ‘bulobo, ne ntumbo mikatampe mīne,’ bamwikeulu bandi bakengila mwingilo wa mvubu mikatampe. Muswelo umo onka, lukindi lwa mikōko ne bambuji nalo lulombola’mba bamwikeulu badi pamo na Yesu, kitatyi kyashikata ‘pa lupona lwa bulopwe lwa ntumbo’ mwanda wa kutyiba mambo. (Enzankanya na Mateo 16:27.) Mutyibi ne bamwikeulu bandi badi momwa mūlu, lelo tukokeja kunena’mba bantu besambilwe’po mu luno lukindi nabo badi mūlu?

⁵ Bubandaudi bwa luno lukindi bulombola’mba kudi bibumbo bisatu byotufwaninwe kupotolola. Kutentekela pa mikōko ne bambuji, Mwanā muntu ubwenye’ko kibumbo kyabusatu; kujingulula kino kibumbo o mwanda mukatampe mwine uketukwasha tujingulule mikōko i bāni ne bambuji nabo i bāni. Yesu wātelele kino kibumbo kyabusatu amba i bana babo ba kumushipiditu. (Mateo 25:​40, 45) Bafwaninwe kwikala batōtyi babine, mwanda Yesu wānene’mba: “Ke-muntu yewa wakulonga kiswa-mutyima wa Tata wa mūlu, nabya ye tūtu ne kāka wami ne lolo.” (Mateo 12:50; Yoano 20:17) Kupityidila, Polo wāsonekele myanda itala pa bakristu ba ku “lukunwa lwa Abalahama,” batelwa bu bana ba Leza. Wēbatelele bu ‘bana babo’ na Yesu ne bu “bakwiabanya lwito lwa mūlu.”​—Bahebelu 2:​9—3:​1; Ngalatea 3:​26, 29.

⁶ Mwanda waka Yesu wēsambile pa “katyut[y]u” ku bana babo? Bino binenwa bitamba ku myanda yāivwene batumibwa yāebasapwidile dibajinji. Pakulombola kwishila kudi pa Yoano Umbatyiji, wāfwile kumeso kwa Yesu kadi wādi na lukulupilo lwa kukekala pano pantanda, na boba badi na lukulupilo lwa kukekala na būmi momwa mūlu, Yesu wānene’mba: “Ku bonso bakubutulwa ku bāna-bakaji kekwamwekele, nansha umo, wakukila Yoan[o] Mubatyiji buleme, mhm; nanshi nankyo kadi, wakwikalapo mutyetye umbulopwe bwa mūlu aye nankyo wamukile buleme.” (Mateo 11:11) Bantu bamo-bamo bādi na lukulupilo lwa kwenda mūlu padi bādi bipanda mu kipwilo, kimfwa batumibwa, bakwabo nabo batyutyu kutabuka, ino abo bonso i bana babo na Yesu. (Luka 16:10; 1 Kodinda 15:9; Efisesa 3:8; Bahebelu 8:11) Omwanda nanshi nansha shi bamo-bamo bādi bamweka bu bakubulwa mvubu pano pantanda, ino bādi bana babo na Yesu, bādi bafwaninwe kulongelwa bintu kukwatañana na kano kalungi kabo ka bwana.

Mikōko i Bāni, ne Bambuji Nabo i Bāni?

⁷ Pamwanda utala butyibi bwa mikōko, tutanga namino’mba: “[Yesu] mwine ukanena boba ba ku lundyo amba: Iyai kuno bānwe bakweselwa dyese kudi Tata, mupyanei bulopwe bwimulongolwele kala [tamba’nka] pa ngalwilo ya pano pantanda. Mwanda ami nadi na nzala mwaumpa byakudya; nadi ne kyumwa mwampa byakutoma; kadi nadi mweni, bānwe mwandubula. Nadi ne mutaka, kadi mwaumvwika; nadi mu luba, mwiya kumpempula; nadi mu kifungo mwiya ko ndi. Penepo boba [boloke] nabo bakamulondolola’mba: Abe Mfumwetu le po twakumwene na nzala twakudisha, ne ko twakumwene [ne] kyumwa twakutomeja i kwepi? Nansha ko twakumwene mweni twakulubula, kadi ne mutaka ino twakuvwika i kwepi le? Ne ko twakumwene mu luba, nansha mu kifungo twenda tukupempulako i pi le? Ebiya kwivwana kudi Mulopwe ukebalondolola’mba: i binebine byo nemunena’mba: Byo mwaubilepo nabya ku kamo katyut[y]u ka boba bana betu, nanshi mwaubile kudi amiwa.”​—Mateo 25:​34-40.

⁸ I kimweke patōka’mba mikōko, ifunkila pa kisaka kya bantu, i mipebwe bubinga bwa kutulwa ku lundyo lwa Yesu lwa buleme ne katōkwe. (Efisesa 1:20; Bahebelu 1:3) Lelo yālongele bika ne kitatyi’ka? Yesu unena’mba yāmupele byakudya, byakutoma, ne bivwalwa, yāmupempula pādi na luba nansha mu kifungo, na kanye, na buleme, ne na buntu. Panena mikōko amba keyālongelepo Yesu bino byonso, aye wiitentulula’mba yākweshe bana babo ba kumushipiditu, basheleko ba ku bakristu bashingwe-māni, i aye oyālongele’byo.

⁹ Luno lukindi kelwisambilapo pa myanda ikalongeka umbula bwa Myaka Kanunu, mhm, mwanda mu kine kitatyi’kya bashingwe-māni kebakasusukapo kadi na nzala, na kyumwa, na misongo, nansha kwelwa umbifungo. Inoko bavule umbukata mwabo bāpityile mu ano masusu umbula bwa kino kitatyi kyamfulo ya ino ngikadilo ya bintu. Tamba kwelwa kwa Satana pano pantanda, kitungo kyandi kibajinji i kupungulwila bukalabale bwandi pa basheleko ba ku bashingwe-māni, na kwibafwija bumvu, kwibamwesha malwa ne kwibepaija.​—Kusokwelwa 12:17.

¹⁰ Lelo Yesu unena’mba muntu yense ulongela bana babo kakilongwa katyetye ka kanye, kimfwa kwibapa kalundu nansha lubaya lwa mema, ye ukekala umo wa mu ino mikōko? Eyo, kulongela muntu kilongwa kya kanye ka uno muswelo kilombola kanye ka kibutwila’tu, ino nabubine, mikōko ya mu luno lukindi isakilwa kulonga bintu bivule kutabuka. Yesu kādipo wisambila pa bantu ba uno muswelo mhm, kimfwa bakubulwa lukulupilo nansha bakulumpe ba Bipwilo bya Ki-kristu balongela bana babo na Yesu kilongwa kampanda kya kanye. Ino Yesu wātelele mikōko misunsa ibidi mituntulu bu bantu “boloke.” (Mateo 25:​37, 46) Nanshi mikōko ifwaninwe kwikala bantu bākwesheko ne​—kwangulako na bupyasakane​—bana babo na Kristu umbula bwa kitatyi kilampe, kadi bālombwele lwitabijo, ne mwimanino moloke kumeso a Leza.

¹¹ Bantu bavule, kimfwa Abalahama, bālamine mwimanino moloke umbula bwa tutwa twa myaka. (Yakoba 2:​21-23) Noa, Abalahama ne bantu bakwabo bakikokeji babadilwa mu “mikōko mikwabo” bakapyananga būmi mu Paladisa munshi mwa Bulopwe bwa Leza. Mu mafuku a kunyuma’a, midiyo ya bantu baikele kutonga mutōtelo wabine, babadilwa mu mulongo wa mikōko mikwabo, ebiya baikala ke “luombe lumo” na bashingwe-māni. (Yoano 10:16; Kusokwelwa 7:9) Bano bantu badi na lukulupilo lwa kukekala pano pantanda betabije’mba bana babo na Yesu i mikendi ya Bulopwe, omwanda bebakwashako​—kungitu ne kumushipiditu. Bintu byonso biloñanga mikōko mikwabo mwanda wa kwangulako bana babo na Yesu bakidi pano pantanda, Yesu wibimonanga bu i aye obalongelanga’byo. Bantu ba uno muswelo bakekala bōmi pakāya Yesu kutyiba mambo a mizo bakatyibilwa mambo bu mikōko.

¹² Shi ekale dyalelo mikōko mikwabo isapulanga myanda miyampe pamo na bashingwe-māni ne kadi ibakwashangako, lelo mwanda waka ikeipangula’mba: “Abe Mfumwetu le po twakumwene na nzala twakudisha, ne ko twakumwene kyumwa twakutomeja i kwepi?” (Mateo 25:37) Kudi buluji bwishileshile. Luno i lukindi. Yesu ulombola kupityila ku luno lukindi amba utele mutyima bininge ku bana babo ba kumushipiditu; wibalangila kadi wibasusukila. Dibajinji Yesu wānene’mba: “Yewa wakwimutundaila nabya untundailanga ami, kadi yewa untundaila ami utundailanga yewa wantumine.” (Mateo 10:​40) Mu kino kyelekejo, Yesu utandabwile uno musoñanya ulombola’mba kintu kyonso kilongelwanga bana babo (kiyampe nansha kibi) kiyukananga momwa mūlu; kidi pamo bu kintu kyobamulongela aye mwine momwa mūlu. Kadi, Yesu uningila pa musoñanya wa butyibi bwa Yehova, ulombola patōka’mba butyibi bwa Leza, bwa kuponejibwa nansha kubingijibwa i bwendelemo kadi i boloke. Bambuji kebakekalapo kadi na buluji bwa kulomba kufwilwa lusa’mba: ‘Bine shi twakumwene abe mwine.’

¹³ Shi tujingulule kitatyi kikatyibwa buno butyibi bulombwelwe mu luno lukindi, tukayuka biyampe boba betwa bu bambuji. Luno lukindi lukafikidila “pakamweka ne mūlu kiyukeno kya Mwanā muntu ino ponkapo mizo yonso ya bantu ba panopantanda īkēpapa, īyoyokota miyoa, ebiya bakamumona Mwanā muntu wiya pa makumbi a mūlu ne bulobo, ne ntumbo mikatampe mīne.” (Mateo 24:​29, 30) Boba bakapanda ku kyamalwa kibūke kikaponena Babiloni Mukatakata, bādi bafutulula bana babo na Mulopwe, bakābija Mutyibi amba “Mfumwetu,” na kukulupila amba ukakūla būmi bwabo.​—Mateo 7:​22, 23; enzankanya na Kusokwelwa 6:15-17.

¹⁴ Butyibi bwa Yesu kebukemaninapo pa binenwa byabituputupu bikesambwa na bantu bādi umbipwilo pakala, nansha bya bantu bakubulwa lwitabijo ne bakwabo. (2 Tesalonika 1:8) Ino, mutyibi ukabandaula ngikadilo ya mutyima ne bilongwa byālongele bantu pakala ku “kamo katyut[y]u ka boba bāna [babo].” Nabubine kibalwa kya bakristu bashingwe-māni bakidi pano pantanda kyenda kityepa. Inoko, bashingwe-māni babundile “umpika wabinebine ne wamanwa” byobakyendelela na kupāna buludiki ne bidibwa bya kumushipiditu, boba bonso basaka kwikala mikōko bakidi na kyaba kya kulongela kakibumbo ka umpika bintu biyampe, pamo’nka na mwikilongela ‘kibumbo kikatampe kya bantu batambile mu mizo yonso ne mu bisaka ne mu bantu.’​—Kusokwelwa 7:​9, 14.

¹⁵ Bana babo na Kristu ne midiyo ya mikōko mikwabo ikutyile nabo umbumo bu luombe lumo, lelo italwanga muswelo’ka? Kudi bantu kebāikelepo kupangapanga mikenji ya Kristu, ino abo ne kulombolapo buswe ku bantu bandi mpika. Bantu badingakene na bambuji basenswe ino ntanda imbi bapelanga kwitabija musapu wa Bulopwe, nansha byobewivwananga abo bene nansha kupityila ku bantu bangi. (1 Yoano 2:​15-17) Binebine, tufwaninwe kuyuka’mba kumfulo kwa byonso, Yesu ye aye utongelwe wa kufikidija butyibi. Ino kujingulula mikōko i bāni, ne bambuji i bāni, ke mwandapo witutala batwe mhm.​—Mako 2:8; Luka 5:22; Yoano 2:​24, 25; Loma 14:​10-12; 1 Kodinda 4:5.

I Kika Kikafikila Kibumbo ne Kibumbo?

¹⁶ Yesu wāletele butyibi bwandi pa mikōko amba: “Iyai kuno bānwe bakweselwa dyese kudi Tata, mupyanei bulopwe bwimulongolwele kala [tamba’nka] pa ngalwilo ya pano pantanda.” I lwito lwa kyanga kashā​—“Iyai kuno”! Kwenda kwepi? Ku būmi bwanyeke, pamo’nka na mwāekinenene mu kīpi amba: “Boloke abo bakenda ku būmi bwa kulādila nyeke na nyeke.”​—Mateo 25:​34, 46.

¹⁷ Mu lukindi lwa talenta, Yesu wālombwele bintu bifwaninwe kubwanya boba bakaludika nandi pamo momwa mūlu, ino mu luno lukindi ulombola bisakilwa kubwanya boba bakabikalwa na Bulopwe. (Mateo 25:​14-23) Nabubine, mikōko idi na buluji bwa kukapyana kifuko kilumbuluke pano pantanda munshi mwa umbikalo wa Bulopwe bwa Yesu, mwanda ikwashangako bana babo na Yesu na mutyima umo. Bakasepelela kwikala na būmi mu paladisa pano pantanda​—būmi bukāya kumeso bwebālongolwedile Leza tamba “kungalwilo ya [ntanda]” ya bantu banyongolwelwe.​—Luka 11:​50, 51.

¹⁸ Buno butyibi i bwishile kulampe kwine na bobwa bukatyibilwa bambuji! “Ebiya kadi ukālamukila kunena [ba ku] lunkuso nabo amba: Mfundukei papo bānwe bafingwe mafingo, mwende ku mudilo wa nyeke na nyeke, wakulongolwelwa dyabola, ne bamwikeulu bandi. Mwanda nadi na nzala, ino bānwe kumpa byakudya mpika. Kadi nadi ne kyumwa, ino bānwe kumpa byakutoma mpika. Nadi mweni, ne kundubulapo mpika; nadi ne mutaka ne kumvwika kwine kukola; nadi mu luba ne mu kifungo, ne kumpempulako mpika. Ponkapo kwivwana ko badi nabo ke bamulondolola’mba: Abe Mfumwetu! Lelo ko twakumwene na nzala i kwepi? nansha na kyumwa, nansha mweni, nansha wamutaka, nansha na luba, nansha mu kifungo ne kukukwasha biyampe mpika. Penepo kadi nandi ukebalondolola’mba: I binebine byo nemunena’mba, po kemwaubilepo byobya ku kamo kene ka boba, nanshi kemwangubilepo ami.”​—Mateo 25:​41-45.

¹⁹ Befundi ba Bible bayukile’mba kino kekishintululapo amba bantu badingakene na bambuji badi na myuya keifwanga ikasusuka mu mudilo wanyeke na nyeke. Mhm, mwanda bantu yo myuya; kebadipo na myuya keifwanga. (Ngalwilo 2:7; Musapudi 9:​5, 10; Ezekyele 18:4) Panena Mutyibi amba ukatyibila bambuji nsambu ya kwelwa mu “mudilo wa nyeke na nyeke,” kino kishintulula bonakani bwakubulwa lukulupilo, kadi yo ikekala mfulo ya lonso ya Dyabola ne bandemona bandi bene kumo. (Kusokwelwa 20:​10, 14) Omwanda nanshi Mutyibi wa Yehova utudileko butyibi bwishile. Usapwila mikōko’mba, “Iyai kuno,” ino ku bambuji amba “Mfundukei papo.” Mikōko ikapyananga “būmi bwa kuladila nyeke na nyeke.” Bambuji ‘bakafundulwa lonso.’​—Mateo 25:46.b

Luno Lukindi Ludi na Buluji’ka Kotudi?

²⁰ Batumibwa baná bāivwene kilondololwa kya Yesu, kitala pa kiyukeno kya kwikalapo kwandi ne kya mfulo ya ino ngikadilo, bādi bafwaninwe kubandaula myanda mivule. Bādi bafwaninwe kudyumuka ne kwendelela na kutengela. (Mateo 24:42) Kadi bādi basakilwa kwingila mwingilo wa kupāna bukamoni utelelwe mu Mako 13:10. Dyalelo ba Tumoni twa Yehova i bepāne na bukomo bonso mu uno mwingilo.

²¹ Kuno kwivwanija kupya kwa luno lukindi lwa mikōko ne bambuji kudi na buluji’ka kotudi? Bine, bantu benda batonga mutamba wa kulamata. Bamo badi mu ‘dishinda dikatampe ditwala ku bonakani,’ bakwabo nabo balonga buninge bwa kushala mu ‘kashinda katyetye katwala ku būmi.’ (Mateo 7:​13, 14) Ino kitatyi kikatyiba Yesu butyibi bwamfulo pa mikōko ne pa bambuji batelelwe mu luno lukindi kikidi kumeso. Pakāya Mwanā muntu mu mwingilo wandi wa bu Mutyibi ukalombola shi bakristu babine​—batelwa bu “kibumbo kikatampe” kya mikōko mipāne​—babwenye bisakibwa mwanda wa kupanda ku kipindi kyamfulo kya kyamalwa kibūke, ne kutwela mu ntanda impya. Luno lukulupilo pano lufwaninwe kwikala nsulo ya nsangaji. (Kusokwelwa 7:​9, 14) Ku mutamba mukwabo, kibalwa kikatampe kya boba batambile mu “mizo yonzo” bakelombola abo bene bu bambuji bapupakane. ‘Bakafundulwako lonso.’ Ntanda ikanyongololwa byabinebine!

²² Nansha shi butyibi bulombwelwe mu luno lukindi bukalongibwa mu mafuku akāya kumeso, ino ne pano pene kudi kintu kyamvubu mikatampe kilongeka. Batwe bakristu twipene mu mwingilo wa bupandiji wa kusapula musapu ukalañanya bantu, aba koku, aba koku. (Mateo 10:​32-39) Polo wāsonekele’mba: “Ke-bantu bonso bakwita pa dijina dya Yehova bakapandanga. Le penepo kadi, bakamwita namani, boba bampikwa kwitabija mudi aye? Le kadi bakētabija mudi aye namani, boba bampikwa kumwivwana? Lelo bakēvwana namani, musapudi mpika?” (Loma 10:​13, 14) Busapudi bwetu botusapulanga kumeso a bantu bonso pano kebufike kala mu matanda 230 ne kupita, bwibayukija dijina dya Leza ne musapu wandi wa bukūdi. Ne pano pene bana babo na Kristu bashingwe-māni batangidileko uno mwingilo. Kubwipi kwa midiyo itano ya mikōko mikwabo ibelunga kobadi. Mu umbuo onso wa ntanda, bantu betabija musapu usapulwa na bana babo na Yesu.

²³ Bantu bavule bafikilwanga na wetu musapu kitatyi kyotusapulanga ku njibo ne njibo, ne mu busapudi bwa kiponka na ponka. Bakwabo bakokeja kuyuka ba Tumoni twa Yehova ne mwimanino wetu, batwe bene ne kuyukapo mpika. Kitatyi kikafika butyibi, lelo i muswelo’ka ukatyiba Yesu mambo a bantu badi mu kibumbo kimo nansha a ba mu kisaka kimo? Kekudipo kyotunena’po, ne ke kiyampepo kufwatakanya bitupu. (Enzankanya na 1 Kodinda 7:14.) Bantu bavule dyalelo bapelanga’nka ne kwivwana binena bantu ba Leza, bebafutulula nansha kadi bebapangapanga. Omwanda tufwaninwe kuyuka’mba kino kitatyi i kitatyi kikomo bininge; bantu ba uno muswelo pakwabo bakendelela na buñumauma bwabo kufika ne pobakatyibilwa mambo na Yesu bu bambuji.​—Mateo 10:22; Yoano 15:20; 16:​2, 3; Loma 2:​5, 6.

²⁴ Ino kibanengela mwanda kudi bantu bavule betabija pakubulwa lupata, befunda Kinenwa kya Leza, ebiya baikala ke ba Tumoni twa Yehova. Bamobamo bakimweka dyalelo bu bantu badingakene na bambuji bakokeja kwalamuka ke bantu badingakene na mikōko. Ino tuyukei amba boba betabija ne bangulako basheleko ba ku bana babo na Yesu balombola bukamoni bukebapa muswelo wa kukatulwa ku lundyo lwa Yesu, pakashikata pa lupona lwa bulopwe mwanda wa kutyiba mambo. Bano bantu beselwanga kadi bakendelela nyeke na kweselwa madyese. Nanshi luno lukindi lufwaninwe kwitusombela ku kwikala na bupyasakane mu mwingilo wa bwine-kristu. Kitatyi pokekyapityile, tufwaninwe kulonga bukomo bwetu bonso mwanda wa kusapula myanda miyampe ya Bulopwe, mu uno muswelo tukapa bakwabo kyaba kya kwitaba. Ino kutyiba mambo, a kuponejibwa nansha kubingijibwa, i kiselwa kidi mu makasa a Yesu.​—Mateo 25:​46.

[Kunshi kwa dyani]

[Kapango pa paje 16​—See printed copy for details]

JINGULULA MYANDA IKWATAÑENE

Mateo 24:​29-31 Mateo 25:​31-33

Kyamalwa kibūke kishilula,

Mwana muntu nandi wiya Mwanā muntu nandi wiya

Ukāya na ntumbo yandi Ukāya mu ntumbo, ushikete pa kipona kya ntumbo

Ne bamwikeulu pamo Bamwikeulu bakāya nandi pamo Bisaka byonso bya pano Mizo yonso pantanda bikamumona ikabungakanibwa; bambuji bakatyibilwa mambo dyamfulo (kyamalwa kibūke kifula)

[Bipangujo]

1, 2. Mwanda waka tufwaninwe kuta mutyima ku lukindi lwa mikōko ne bambuji?

3. Mu kishinte kyandi kibajinji, i myanda’ka yālombwele Yesu amba ikafikidila kupwa kwa kyamalwa kibūke?

4. I mwanda’ka wisambila padi Yesu ulombwelwe mu lukindi lwa mikōko ne bambuji, ne i bāni bakwabo batelelwe’mo?

5. Lelo tukokeja kujingulula ‘bana babo’ na Yesu muswelo’ka?

6. ‘Batyutyu’ ku bana babo na Yesu i bāni?

7, 8. Yesu wānene kika pamwanda utala mikōko, ne tukanena kika pamwanda wayo?

9. Mwanda waka luno lukindi kelwisambilapo pa myanda ikalongeka umbula bwa Myaka Kanunu?

10, 11. (a) Mwanda waka kekidipo na buluji kufwatakanya’mba mikōko i bantu bonso balongela bana babo na Yesu kilongwa kampanda kya kanye? (b) Mungya buluji, mikōko ifunkila pa bāni?

12. Mwanda waka mikōko ikepangula muswelo oyālongele Yesu bilongwa bya kanye?

13. Mwanda waka bantu badingakene na bambuji bakābija Yesu bu “Mfumwetu”?

14. Yesu ukatyiba mambo a mikōko ne bambuji kukwatañana na kitako’ka?

15. (a) Lelo bantu bavule balombolanga muswelo’ka abo bene amba badingakene na bambuji? (b) Mwanda waka tufwaninwe kutyina kunena’mba muntu kansangwa i mukōko, muntu kabidye i mbuji?

16, 17. I kika kikapebwa mikōko?

18, 19. (a) Yesu ukafikidija butyibi’ka pa bambuji? (b) Mwanda waka tukulupile’mba bambuji kebakasusulwapo nyeke ne nyeke?

20, 21. (a) Bakristu badi na mwingilo’ka mukatampe wa kuvuija? (b) I kukalañanya’ka kukyendelela kulongibwa ne pano? (c) Pakashilula kufikidila lukindi lwa mikōko ne bambuji, lelo i ngikadilo’ka ikekala’mo bantu?

22, 23. Byotubayuka’mba kufikidila kwa luno lukindi kukidi kumeso, mwanda waka mwingilo wetu wa busapudi udi na mvubu mikatampe dyalelo?

24. (a) Mwanda waka kidi na mvubu ku bantu kulondolola biyampe ku busapudi bwetu? (b) Buno bwifunji bubakukwasha umone mwingilo obe wa busapudi muswelo’ka?

Lelo Ukivulukile’byo?

◻ I kukwatañana’ka kudi pa Mateo 24:29-31 ne Mateo 25:31-33 kulombola’mba lukindi lwa mikōko ne bambuji lukafikidila mu kitatyi kikāya kumeso, ne i mu kitatyi’ka?

◻ ‘Batyut[y]u’ ku bana babo na Yesu i bāni?

◻ Kishima “boloke” kyāingidije Yesu kikokeja kwitukwasha namani tujingulule bano boloke amba bafunkila padi bāni ne kebafunkilapo padi bāni?

◻ Nansha shi luno lukindi lukafikidila mu kitatyi kikāya kumeso, mwanda waka busapudi bwetu budi na mvubu mikatampe ne mwanda waka tufwaninwe kwibusapula na kampeja bukidi?