Kikulupiji Kikatampe kya mu Kadisomo Katyutyutyutyu ka mu Kihebelu

Le tubwanya kukulupila’mba milao ya Leza yonso isa kufikidila binebine? Yesu wādi ukulupile kino, kadi bufundiji bwandi bwākomeje lwitabijo lwa bantu bādi bamuteja. Tala kyelekejo kyaāletele mu Busapudi bwandi bwa ku Lūlu kilembelwe mu Mateo 5:18, amba: “Mwanda i bine nemulombola’mba i kinengele’ko diulu ne ntanda kupita, ino kadisomo kamo katyutyutyutyu nansha kapindi ka disomo ka mu Bijila kekakapitepo poso bintu byonso bifikidile.”

Kadisomo katyutyutyutyu ka alufabe ya mu Kihebelu i י (yod), dyo disomo dibajinji dya Tétragramme, masomo aná a mu Kihebelu a dijina dijila dya Leza, Yehova.a Kutentekela pa kino, basonekeji ne Bafadiseo bādi balēmekele bininge bishima ne masomo a mu Bijila bya Leza, o mwanda bādi bamona “kapindi ka disomo” konso bu kadi na mvubu mikatampe.

Yesu wānenene amba i biyampe’ko diulu ne ntanda bipite, pa kyaba kya kamwanda katyutyutyutyu ka mu Bijila kakomenwe kufikidila. Inoko Bisonekwa bitukulupija’mba madiulu ne ntanda byotumwene na meso’bi, bidi’ko nyeke. (Ñimbo ya Mitōto 78:69) Nanshi bino binenwa bikunka mutyima bilombola’mba i kutupu kamwanda ka mu Bijila nansha i katyutyutyutyu namani kasa kukomenwa kufikidila.

Le Yehova utele mutyima ne ku tumyanda tutyutyutyutyu? Bine i amo. Tala bidi uno mwanda: Bene Isalela ba pa kala bālombwelwe kuleka kutyumuna mukupa wa kana ka mukōko ka pa Pashika. (Divilu 12:46) Padi kano kamweka bu kamwanda katyutyu. Lelo bādi bevwanije kine kyokebādipo bafwaninwe kutyumwina mukupa nansha umo? Padi kebādipo bevwanije. Aye’ko Yehova Leza wādi uyukile uno mwanda bu bupolofeto butala Meshiasa amba kakatyumunwapo mukupa nansha umo pakepaibwa ku mutyi wa masusu.​—Ñimbo ya Mitōto 34:20; Yoano 19:31-33, 36.

Lelo binenwa bya Yesu bitufundija bika? Netu tubwanya kukulupila ne pa mfulo amba milao yonso ya Yehova Leza isa kufikidila binebine mu kanda ne kanda. Bine kino shakyo kyo kikulupiji kikatampe kya mu kadisomo katyutyutyutyu ka mu kihebelu!