Muswelo Unyengakanya Bipwilo bya Bubela Bubine bwa Mwikadile Leza

Shi Leza i buswe, mwanda waka kudi bintu bibi bivule bilongwa na bipwilo bītela bu byandi? Kunena’tu patōka, byabyo bipwilo i bya bubela, binyengakanya bubine bwa mwikadile Leza. Le i binyengakanye’bo namani? Leza mwine wibimonanga namani? Ne le i bika byasa kulonga’po?

1. Bipwilo bya bubela i binyengakanye namani bubine bwa mwikadile Leza mu mfundijo yabyo?

Bipwilo bya bubela i bishinte “bubine bwa Leza na bubela.” (Bene Loma 1:25) Kimfwa, bipwilo bivule kebifundijepo balondi babyo dijina dya Leza. Papo aye Bible unena’mba dijina dya Leza difwaninwe kutelwa. (Bene Loma 10:13, 14) Bendeji bamo ba bipwilo banenanga’mba shi kintu kibi kibalongeka i kiswa-mutyima kya Leza. Ino buno i bubela. Bibi kebitambangapo nansha dimo kudi Leza. (Tangai Yakoba 1:13.) Kya bulanda, bubela bwa bipwilo i bupalule bantu kulampe na Leza.

2. Bipwilo bya bubela i binyengakanye namani bubine bwa mwikadile Leza mu bilongwa byobilonga?

Bipwilo bya bubela kebilongelangapo bantu bintu mulongelanga Yehova. Bible unena’mba bubi bwa bipwilo bya bubela “bubaungwila mulwi kufika ne mūlu.” (Kusokwelwa 18:5) Pano ke myaka, bipwilo bya bubela i bīkuje mu politike, bikwatakanye mavita, kadi i bikolomone mfwani ya bantu kebabadika ne kwitabija’yo. Bendeji bamo ba bipwilo basenswe būmi bwa katutu na kulomba bantu babo lupeto. Bino bilongwa byabo bilombola’mba kebayukilepo Leza, ne kebafwaninwepo kumwimanina.—Tangai 1 Yoano 4:8.

3. Lelo Leza umonanga namani bino bipwilo bya bubela?

Shi bintu bilonga bipwilo bya bubela bikulobejanga, le ulanga aye Yehova wiivwananga namani? Aye usenswe bantu, kadi ufītwanga pa kumona bendeji ba bipwilo banyengakanya bubine butala pādi ne kususula balondi babo. I mulaye amba bipwilo bya bubela bisa konakanibwa kadi ‘kebikamwekapo monka nansha dimo.’ (Kusokwelwa 18:21) Panopano ponka Leza usa kufudija bipwilo byonso bya bubela.​—Kusokwelwa 18:8.

LANGULUKA BININGE

4. Leza ketabijepo bipwilo byonso

Bantu bavule bakulupile amba bipwilo bidi pamo bwa mashinda atwala onso kudi Leza. Le bino i bya bine? Tangai Mateo 7:13, 14, ne kwisambila pa kino kipangujo:

• Lelo Bible ulombola’mba dishinda ditwala ku būmi didi namani?

Talai VIDEO, ne kwisambila pa kipangujo kilonda’kya.

VIDEO: Lelo Leza Witabije Bipwilo Byonso?​—Kakipindi (3:22)

• Lelo Bible unena’mba kudi bipwilo bivule bisangaja Leza?

5. Bipwilo bya bubela kebimwekejangapo buswe bwa Leza

Bipwilo i bimwekeje Leza bibi mu miswelo mivule. Muswelo umo bidi mumwekelele i owa wa kwikuja mu mavita. Pa kumona’ko kimfwa kimo, talai VIDEO. Kupwa, mwisambilei pa bipangujo bilonda’bya.

VIDEO: Muswelo Wekujije Bipwilo mu Divita II dya Ntanda (2:22)

• Le i ku mitamba’ka kwekupile bipwilo mu Divita II dya Ntanda?

• Le ulanga namani pa byobalongele’bya?

Tangai Yoano 13:34, 35 ne 17:16. Kupwa, mwisambilei pa bino bipangujo:

• Lelo Yehova wiivwananga namani pamona bipwilo bīkuja mu mavita?

• Bipwilo bya bubela i bilonge bintu bibi bivule. I muswelo’ka obikomenwe kwiula buswe bwa Leza?

6. Leza usakanga kunyongolola bantu ku bipwilo bya bubela

Tangai Kusokwelwa 18:4,a ne kwisambila pa kino kipangujo:

• Le ubeivwana namani pa kuyuka’mba Leza usakanga kunyongolola bantu bongwelwe na bipwilo bya bubela?

7. Endelela na kwifunda myanda itala Leza wa bine

Le ufwaninwe kushikwa Leza pa mwanda wa byobya binena ne bilonga bipwilo bya bubela? Langa’po bidi mwana wapele madingi a tunangu amupa shandi. Watambe ne ku njibo kwine wakekala na būmi bwa bya bulongelonge. Papo shandi ketabijepo bilongwa bya mwana. Le ulanga i byendele’mo kutopeka shandi pa būmi budi’mo uno mwana ntomboki?

• Le i kyendele’mo kutopeka Yehova ne kuleka kwifunda myanda yandi pa mwanda wa byobya bilonga bipwilo bya bubela?

MU KĪPI

Bipwilo bya bubela i binyengakanye bubine butala padi Yehova kupityila ku mfundijo yabyo ne bilongwa byabyo bya munyanji. Leza usa konakanya bipwilo bya bubela.

Pitulukai’mo

• Le umona namani bintu bifundija bipwilo bya bubela ne byobilonga?

• Le Yehova umonanga namani bipwilo bya bubela?

• I bika bisa kulonga Leza ku bipwilo bya bubela?

KIMBA

Bipwilo bivule i bifītyije Leza ku mutyima mu miswelo ibidi, tala’yo.

“Le Bipwilo Byonso Bidi’nka Muswelo Umo? Le Byonso Bitwalanga Kudi Leza?” (Kishinte kya pa Entelenete)

Mwanda waka Yehova usaka tumutōte pamo na bakwabo?

“Lelo Bidi na Mvubu Kwikala mu Kipwilo Kampanda?” (Kishinte kya pa Entelenete)

Mumpe umo wavutakanibwe ñeni na kipwilo kyaadi’mo. Ino kino kekyamulengejepo aleke kwifunda bubine padi Leza.

“Kyatambīle Mumpe Umo mu Kipwilo Kyabo” (Langukai!, Kweji 2, 2015)

Ku nkongo ne nkongo, bipwilo i binene bya bubela’mba Leza kadipo pabwipi na bantu kadi amba udi na mutyima mūmu. Wifunde bubine pa ino myanda isatu.

“Bubela Bumwekeja’mba Leza Kadipo na Buswe” (Kiteba kya Mulami, 1 Kweji 11, 2013)