Abapulula Miseke Dya Sabato

Pano Yesu ne bana bandi ba bwanga abaenda kungala dya ku Ngadilea. I kubwipi na Kweji 4, kadi mu madimi kemudi bisampo bya miseke. Bana ba bwanga pa kukwatwa nzala, kebapulula bisampo bya miseke kebadye. Ino i difuku dya Sabato, koku Bafadiseo batala byobalonga.

Shi tuvuluke, kepaijije na padi pasaka Bayuda ba mu Yelusalema kwipaya Yesu na kumutopeka’mba ujilulanga dya Sabato. Pano Bafadiseo abaiya monka na matope obatopeka bana ba bwanga, amba: “Tala! Bobe bana ba bwanga abalonga kintu kijidikwe kulonga mu dya Sabato.”​—Mateo 12:2.

Bafadiseo abanena’mba kusela miseke ne kuvinga’yo mu makasa i pamo na kwangula ne kupūla. (Divilu 34:21) Kasumalomo kabo pa byobya bitelwa bu mingilo ya mu dya Sabato kabedilengeja dikale bu kiselwa kilēma, ino adyo tamba ku ngalwilo difwaninwe kwikala dya nsangaji, dya kwikomeja ku mushipiditu. Ino Yesu pa kulombola patōka mumweno wabo mubi, waleta bimfwa bilombola’mba Yehova Leza kasakangapo bijila bya dya Sabato bilondwe uno muswelo.

Kimfwa kimo kyaleta Yesu i kya Davida ne bantu bandi. Pobādi na nzala bāendele ku kipema, bādya mikate milambulwe. Ino mikate, shi ibatalulwa ku meso a Yehova yādi ipingakanibwa na mikate mipya, mikulu’ya yādi ilamwa na babitobo amba badye’yo. Ino mu kino kitatyi, Davida ne bantu bandi kebātopekelwepo pa kudya’yo.​—Levi 24:5-9; 1 Samwele 21:1-6.

Yesu wanena mu kimfwa kya bubidi amba: “Le kemwatangile mu Bijila’mba mu mafuku a Sabato babitobo mu tempelo bajilulanga Sabato, ino abo ne kupya mambo mpika?” Ukimba kunena’mba nansha ke mu dya Sabato babitobo batapanga banyama ba kwela bitapwa ne kwingila mingilo mikwabo ya ku tempelo. Ebiya Yesu wanena’mba: “Ino ami nemulombola’mba kintu kitabukile tempelo bukata kidi pano.”​—Mateo 12:5, 6; Umbadilo 28:9.

Yesu wakokela monka milangwe pa Bisonekwa pa kulombola mulangwe wandi amba: “Shi mwaivwanije mushintulwila kino amba, ‘Nsakanga lusa ke kitapwapo,’ longa kemuponejepo bantu bakubulwa mambo.” Wavuya na kunena’mba: “Mwanda Mwanā muntu e Mfumwandya Sabato.” Yesu wisambilanga pa kwiya kwandi mu Bulopwe bwa umbikalo wa ndoe wa myaka kanunu.​—Mateo 12:7, 8; Hosea 6:6.

Bantu i basusuke kitatyi kilampe na mingilo ya bupika bwa Satana, na butapani ne mavita bivudile’bi. Bine mu buludiki bwa Sabato mikatampe ya Kidishitu mukekala mwishile, mukekala kitatyi kya kukōkolokwa kyotusakilwa ne kyotwabila!