Lelo I Bika Bine Bisubija Muntu?

Pafwena Pashika ya mu 32 Yesu ke mwiye, papo ukikoka na kufundija mu Ngadilea. Bimweka bu pano kaenda ku Yelusalema ku Pashika, mungya musoñaninye’kyo Bijila bya Leza. Yesu waenda’ko na wifya mwanda Bayuda bakimbanga kumwipaya. (Yoano 7:1) Kupwa wajokela ku Ngadilea.

Bimweka bu Yesu udi mu Kapanama pamwiila Bafadiseo ne basonekeji kutamba ku Yelusalema. Le kyobaila i kika? Abaiya kukimba mwanda kampanda wa kukwatyila’po Yesu utala nkulupilo ya bipwilo. Abaipangula’mba: “Mwanda waka bobe bana ba bwanga bajilula kishi kya bantu ba pa kala? Kimfwa, keboyangapo ku makasa pa kudya byakudya.” (Mateo 15:2) Kashā Leza kasapwidilepo bantu bandi kulama kisela kya ‘koya ku makasa kufika ne mu nkongweba.’ (Mako 7:3) Ino Bafadiseo bamwene amba shi koilepo nabya, ubajilula kijila kikatampe.

Yesu pa kyaba kya kwibalondolola patōkelela, aye walombola mobatyumwina ku kusaka Bijila bya Leza. Webepangula’mba: “Lelo banwe nenu kyomujilwilanga kijila kya Leza pa mwanda wa kishi kyenu i kika le, a? Kimfwa, Leza wānenene amba, ‘Lēmeka shobe ne inobe,’ kadi amba, ‘Yewa unena shandi nansha inandi bibi epaibwe.’ Ino banwe munenanga’mba, ‘Yewa ense unena shandi nansha inandi amba: “Kyonso kyondi nakyo kyowadi wa kumwena’mo i kyabuntu kya kupāna kudi Leza,” kanenwepo kulēmeka shandi nansha dimo.’”​—Mateo 15:3-6; Divilu 20:12; 21:17.

Bafadiseo banenanga’mba lupeto, kituntwa, nansha kintu kyo-kyonso kipēnwe bu kyabuntu kudi Leza i kya ku tempelo, o mwanda kekifwaninwepo kwingidijibwa ku mwanda mukwabo. Ino abo papo bakidi na kintu kipānwe’kya ku makasa. Kimfwa, mwana ubwanya kunena’mba kituntwa kyondi nakyo i “kobana,” kyabuntu kipānwe kudi Leza nansha ku tempelo, ke bidi bwa tempelo ye ke mwinē’kyo. Nalo lupeto lukidi mu makasa a mwana, ino kanena’mba kafwaninwe kwingidija’lo mwanda wa kukwasha bambutwile bandi banunu basakilwa bukwashi. Ye mu uno muswelo mobanyemena kiselwa kya kulela bambutwile.​—Mako 7:11.

Yesu udi na bubinga bwa kufītyilwa pa kuno kunyengakanya Bijila bya Leza, wanena’mba: “E momwaalamwina kinenwa kya Leza ke kya bitupu mwanda’tu wa kishi kyenu. Banwe banzazangi, Isaya wādi na nsambu pa kunena mu bupolofeto myanda yenu amba: ‘Bano bantu bandēmekanga na milomo yabo bitupu, ino mutyima wabo udi kulampe nami. I bya bitupu byobantōtanga, mwanda bafundijanga bijila bya bantu amba yo mfundijo.’” Bafadiseo abakomenwa kya kulondolola ku bino binenwa bya kufuna bya Yesu. O mwanda waityila kibumbo pabwipi. Wanena’mba: “Kyokya kitwela mu kyakanwa kya muntu kekimusubijangapo, ino kyokya kilupuka mu kyakanwa kya muntu kyo kimusubijanga.”​—Mateo 15:6-11; Isaya 29:13.

Kupwa Yesu paadi mwinjibo bana ba bwanga bamwipangula’mba: “Le uyukile amba Bafadiseo badi abakukala pa kwivwana byowadi ubanena’bya?” Nadi walondolola’mba: “Kyonso kimena kyampikwa kukunwa na Tata udi mūlu kikatukunwa. Mwibalekei. I batulombwe bampofu. Mwanda shi mpofu uludika mpofu mukwabo, bonso babidi bakaponena mu kīna.”​—Mateo 15:12-14.

Yesu watulumuka Petelo pa kumulomba ashintulwile bana ba bwanga buluji bwa kyokya kisubija muntu. Yesu walondolola’mba: “Le kemujingulwilepo amba kintu kyonso kitwela mu kyakanwa kipitanga mu kifu kupwa kyakelwa ku musalani? Inoko, byonso bilupukanga mu kyakanwa bitambanga ku mutyima, kadi bino bintu byo bisubijanga muntu. Kimfwa, ku mutyima kutambanga milangwe mibi, butapani, makoji, busekese, bwivi, bukamoni bwa bubela, ne mutonko. Bino byo bintu bisubijanga muntu; ino kudya byakudya pampikwa koya ku makasa kekusubijangapo muntu.”​—Mateo 15:17-20.

Yesu kapelejepo bukundwe nansha kupeleja muntu koya ku makasa kumeso kwa kuteakanya bidibwa nansha kwibidya. Ino, watopeka buzazangi bwa bendeji ba bipwilo batabuka bijila byoloke bya Leza na kutumbija’ko bisela bya bantu. Bubine i buno amba bilongwa bibi bitamba mu mutyima byo bisubija muntu.