² Yesu pano kubamushadila mafuku matyetye kete. Ino uno mulangwe kewasangejepo Petelo, weumwene bu wakubulwa kwendelamo. Kadipo ukokeja kwitabija Meshiasa epaibwe binebine. Penepo, Petelo wapima kulondolola Mfumwandi. Wādi na milangwe milumbuluke, inoko walondolwēle na kansotomokela’mba: “Kokikolwa abe Mfumwami, kino kekidipo nobe pa bwipi, mhm; wididileko lusa.” Pamo ka na muntu usaka kupondakanya mutwe wa nyoka wa bulembe, Yesu wafutulwile kiponka-naponka kano kanye ka Petelo kakubulwa kwendelamo. “Jokela kunyuma abe Satana, ubankolela nanshi [udi pamo bwa dibwe dya kunkukaja, MN], ke-wi-muntu abe kutele mutyima umbintu bya Leza, ehe, poso mu bya bantu.”​—⁠Mateo 16:​22, 23.

³ Petelo weingidije aye mwine bu kingidilwa kya Satana, pakubulwa kuyuka. Yesu wamulondolwele na kusumininwa kukatampe, pamo ka na mwālondolwedile Satana mu ntanda mutuputupu. Mu kyokya kyaba, Dyabola wapimine kutompa Yesu na kusaka kumupa būmi bupēla: bulopwe pakubulwa kwibususukila. (Mateo 4:​1-10) Pano, ke Petelo wādi nandi kamukankamika ekale kwikwatyilwa lusa. Yesu wādi uyukile’mba ­kekyādipo kiswamutyima kya Shandi. Bwandi būmi bwādi bufwaninwe kwikala būmi bwa masusu, bwa kwipāna, ke būmi bwa kwikwatyilwapo lusa, bwa kusaka nsangaji, mhm. (Mateo 20:28) Petelo wamwikadile bu kijika, bu dibwe dya kumukukaja; wādi na milangwe milumbuluke, ino lusa lwandi lwaikele bu dikinga.a Inoko, Yesu wādi ujingulwile senene’mba shi até mutyima ku būmi bwakubulwa masusu, wādi wakujimija buntu bwa Leza, mwanda nankyo waswile kupya mu dikinga dya Satana dya lufu.

[Footnote]

²³ Shi twikale na mushipiditu wa kwipana binebine, nankyo tukevwana nsangaji ya kwikala bu bengidi-pamo na Leza. (1 Kodinda 3:⁠9) Kadi tukekala na nsangaji ya kuyuka’mba bine tusangajanga mutyima wa Yehova. (Nkindi 27:11) Kadi ­tukekala na kikulupiji’mba bine Yehova kaketwilwapo nansha kwituleka kwine, shi twendelele na kumukokela.​—⁠Bahebelu 6:​10-12.