⁹ Difuku dimo, basonkeji ba musonko bāipangwile Petelo shi mufundiji wabo usonkanga musonko wa tempelo.c Petelo kala wālondolola bukidi amba, “ufutanga.” Kupwa, Yesu wālanguluka nandi amba: “A Shimona, le ulanga namani? Le balopwe ba ntanda bafutyijanga bāni bitanshi ne musonko wa muntu ne muntu? Le i babo bana’ni, i beni?” Kwādi Petelo amba: “I beni.” Yesu amba: “Nanshi na bubine bana kebasonkangapo.” (Mateo 17:24-27) Kwa kubulwa ne kutatana kwine Petelo wāimvwanije buluji bwa kipangujo mwanda bantu ba mu kisaka kya mulopwe bādi bayukilwe amba kebasonkangapo musonko. O mwanda Yesu byadi Mwana wa bunka wa Mulopwe wa mūlu, mwine utōtwa mu tempelo, kādipo unenwe kusonka musonko. Ubamone amba pa kyaba kya kulondolwedidila’tu Petelo, Yesu wāmwipangula na bunwa’mba Petelo etanine malondololo mafike’po ne kadi shi abamwipangula dikwabo alanguluke kumeso kwa kulondolola.