Yesu Waleta Madingi Atala Pa Kukukala Ne Bubi

Yesu wapu kuleta kyelekejo kilombola ngikadila ifwaninwe kwikala nayo balondi bandi. Bafwaninwe kwimona bwa bana, bantu ba munshi kitenta mpika. Bana ba bwanga bafwaninwe ‘kutambula boba badi pamo bwa bano bana batyetye pa mwanda wa dijina dyandi nabya abatambula ne Yesu mwine.’​—Mateo 18:5.

Bana ba bwanga bepatenye panopano mwanda wa kufwila bukata, nanshi ye bano bamona binenwa bya Yesu bu madingi. Pano mutumibwa Yoano waleta mwanda mukwabo walongeka amba: “Twamwene muntu umo upanga bandemona na kutela dijina dyobe, netu twatompa kumukankaja mwanda kakulondangapo netu pamo.”​—Luka 9:49.

Le Yoano umwene amba batumibwa kete bo abo badi na lupusa lwa kubelula bantu ne kupanga bandemona? Shi i amo, le uno Muyuda wabwanya kupanga mushipiditu mubi namani? Yoano walanga’mba uno muntu kafwaninwepo kulonga bilongwa bya bukomo mwanda kendangapo na Yesu ne na batumibwa.

Yoano watulumuka panena Yesu amba: “Kemwakitompai kumukankaja, mwanda i kutupu muntu ukalonga kilongwa kya bukomo mu dijina dyami ukapēlakana kunenena mabi. Mwanda yewa ke walwana netupo i wetu. Mwanda ense wimupa nkopo umo wa mema a kutoma mwanda’tu mwi ba Kidishitu, nemulombola bine amba, kakajimijapo mpalo yandi nansha dimo.”​—Mako 9:39-41.

Pano’ko uno muntu kanenenwepo’nka kwenda na Kidishitu pa kwikala ku mutamba wandi. Kipwilo kya bwine Kidishitu kyadi kekyashimikilwe, nanshi shi muntu kendelepo na Yesu ke kunenapo kala amba i walwana nansha amba ukwatakenye kipwilo kya bubela. Kibamweka patōka’mba uno muntu udi na lwitabijo mu dijina dya Yesu, kadi byobya byanena Yesu bilombola’mba uno muntu kakajimijapo mpalo yandi.

Ku mutamba mukwabo, kyadi kya kwikala kibi shi muntu’wa wakukele pa mwanda wa binenwa ne bilongwa bya batumibwa. Yesu wanena’mba: “Ense ukukaja umo wa mu bano batyetyetyetye badi na lwitabijo, kyadi kya kumunengelela kutabuka shi dibwe dya mpelo dijokolojibwanga na mpunda dyamukutyīlwe mwishingo ne kwelwa’ye mu dijiba.” (Mako 9:42) Kupwa Yesu wasapwila balondi bandi amba bafwaninwe kutalula kintu kyonso kikukaja, nansha shi i kya mvubu mwikadile kuboko, kūlu nansha diso. I biyampe’ko kubulwa kino kintu kilēme abe’ko watwela mu Bulopwe bwa Leza pa kyaba kya kwikala nakyo, ino waelwa mu Ngehena (Musanza wa Hinome). Batumibwa bayukile uno musanza udi kubwipi na Yelusalema, mwine musōkwa bityakuku, nanshi abaivwanija amba welekeja bonakani bwa lonso.

Yesu webadyumuna’mba: “Tadijai kutyina’mba mwakafutulula umo wa mu bano batyetyetyetye, mwanda nemulombola’mba bamwikeulu babo momwa mūlu babandilanga nyeke mpala ya Tata udi mūlu.” Lelo bano “batyetyetyetye” i balēme kudi Shandi namani? Yesu waleta kimfwa kya muntu umo udi na mikōko 100, ino kubajimina umo. Muntu’wa washiye yoya 99 waenda kukakimba owa umo ujimine, aye pa kwiutana weusangela kupita ne yoya 99. Yesu wabweja’ko amba: “Tata udi mūlu nandi kasangelangapo nansha umo wa mu bano batyetyetyetye oneke.”—Mateo 18:10, 14.

Padi Yesu wavuluka mu ñeni batumibwa bandi badi bafwila bukata, webasoñanya amba: “Ikalai na mwepo munda mwenu, kadi lamai ndoe banwe bene na bene.” (Mako 9:50) Mwepo utobajanga bidibwa. Mwepo wa kyelekejo ulengejanga byobya binena muntu bitabijibwe ne kino kyalengeja alame ndoe, mine keibwanikapo ku boba ba lupata.​—Kolose 4:6.

Kupwa, kubatambe mwanda mukatampe, ino Yesu webasapwila mwa kupwijija’o. Yesu wanena’mba, “Shi mwanenu walonga bubi, enda ukamusokwele kilubo kyandi pa bubidi bwenu. Shi wakwivwana nabya ubaaluja mwanenu.” Ino shi kakwivwenepo? Yesu wadingila’mba, “Sela muntu umo nansha babidi, amba pa bukamoni bwa batumoni babidi nansha basatu mwanda onso uketabijibwa.” Shi kino kekipwijijepo mwanda, nabya ke kusapwila “kipwilo,” kupa bakulumpe bakwate butyibi. Ino shi nonga-bibi kutupu kwivwana le? “Nabya ekale kodi pamo’nka bwa muntu wa mizo ne pamo bwa musonkeji wa musonko,” bantu bamonwa na Bayuda bu kebafwaninwepo kupwana nabo.​—Mateo 18:15-17.

Bakulumpe pa kipwilo bafwaninwe kulamata ku Kinenwa kya Leza. Shi abamone amba kipya-mambo udi bine na mambo ne usakilwa kulemununwa, nabya butyibi bwabo ‘bo bonka bukekala ke bukwatwe kala ne mūlu.’ Ino shi abamumone bu kadipo na mambo, byobakutulula’bya bikekala “bikutululwe kala mūlu.” Buno bulombodi bukakwasha ne pakashimikwa kipwilo kya bwine Kidishitu. Pangala pa buno butyibi bukatampe, Yesu wanena’mba: “Popa padi babidi nansha basatu bebungile pamo mu dijina dyami, nami ngidi ponka umbukata mwabo.”​—Mateo 18:18-20.