KIFUNDWA 19
Lelo Batumoni ba Yehova I Bene Kidishitu ba Bine?
Batwe Batumoni ba Yehova, tukulupile amba twi bene Kidishitu ba bine. Mwanda waka? Bandaula kwine kutamba nkulupilo yetu, dijina ditushiyañanya, ne buswe botwisenswe batwe bene na bene.
1. Le Batumoni ba Yehova i balupule kwepi nkulupilo yabo?
Yesu wānenene amba: “Kinenwa [kya Leza] i bubine.” (Yoano 17:17) Pamo bwa Yesu, Batumoni ba Yehova nabo balupulanga nkulupilo yabo mu Kinenwa kya Leza. Tompa’tu kutala mānga yetu ya mu ano etu mafuku. Dya ku mfulo kwa myaka ya katwa ka 19, kisumpi kya befundi ba Bible kyashilwile kubandaula na katentekeji Bible. Bano bantu balupwile nkulupilo yabo mu byobya binena Bible nansha shi yadi mitupe na byobya bifundija bipwilo. Kupwa, bashilula kusapwila bantu bakwabo bobwa bubine bwa mu Bible.a
2. Mwanda waka twitelanga bu Batumoni ba Yehova?
Yehova utelanga boba bamutōta bu batumoni bandi mwanda basapulanga bubine pādi. (Bahebelu 11:4–12:1) Kimfwa, mu kitatyi kya kala, Leza wāsapwidile bantu bandi amba: “Banwe mwi bami batumoni.” (Tangai Isaya 43:10.) Yesu i mutelwe bu “Kamoni Mukōkele.” (Kusokwelwa 1:5) O mwanda, mu 1931, twaselele dijina dya bu Batumoni ba Yehova. Tudi na nsangaji ya kutelelwa pa dino dijina.
3. Lelo Batumoni ba Yehova beulanga buswe bwa Yesu namani?
Yesu wādi usenswe bana bandi ba bwanga bininge, bāikala pamo’nka bwa babutule bandi. (Tangai Mako 3:35.) Mo monka, ne batwe Batumoni ba Yehova netu, twi kisaka kya ntanda yonso kidi mu bumo. O mwanda mwine twiitanga bu batutu ne bakaka. (Filemone 1, 2) Kadi tukōkelanga ne musoñanya wa amba: “Sanswai kisaka kyonso kya banabetu.” (1 Petelo 2:17) Batumoni ba Yehova balombolanga buswe mu miswelo mivule, kimfwa bakwashanga banababo ba ntanda yonso kitatyi kyobasakilwa bukwashi.
LANGULUKA BININGE
Bandaula na katentekeji mānga ya Batumoni ba Yehova ne kumwena’ko bukamoni bukwabo bulombola’mba bine twi bene Kidishitu ba bine.
Bene Kidishitu ba bine balupulanga nkulupilo yabo mu Bible ne kusapwila’yo bantu bakwabo
4. Tulupulanga nkulupilo yetu mu Bible
Yehova wālaile amba bubine bwa mu Bible bwadi bwa kusokolwa. Tangai Danyele 12:4 ne kunshi kwa dyani, ne kwisambila pa kino kipangujo:
Lelo i bika byadi bya ‘kuvula’ mu bantu ba Leza kitatyi kyobendelela na kubandaula Bible?
Tala kisumpi kya befundi ba Bible kubadila’mo ne Charles Russell, mobādi befundila Kinenwa kya Leza. Talai VIDEO, ne kwisambila pa kino kipangujo:
Mu ino video, le ba Charles Russell ne Befundi bakwabo ba Bible bādi befunda namani Bible?
Le wadi uyukile?
Bitatyi bimo, twadi tujadika nkulupilo yetu. Mwanda waka? Mwanda monka mumwekelanga senene bintu penda patemena’ko dyuba, ne Leza nandi mo mwakwashishanga bantu bityebitye bevwane Kinenwa kyandi. (Tangai Nkindi 4:18.) Nansha Bible byakashintyilepo, batwe twadi tujadika nkulupilo yetu, ponso padi penda palumbulukila’ko muswelo otwivwana Bible.
5. Twiendejanga mungya dijina dyetu
Mwanda waka twaselele dijina dya bu Batumoni ba Yehova? Talai VIDEO, ne kwisambila pa kipangujo kilonda’kya.
Mwanda waka dijina dya bu Batumoni ba Yehova i dyendele’mo?
Mwanda waka Yehova i mutonge bantu bekale bandi batumoni? I mwanda wa kumuyukanya bu Leza wa bine; ke-pantu, bubela buvule i bunenwe pādi. Talai’tu bidi buno bubela bubidi.
Bipwilo bimo bifundijanga bantu babyo amba Leza usaka twingidije bankishi potumutōta. Inoko, tangai Bene Levi 26:1, ne kwisambila pa bino bipangujo:
Lelo bubine i bwepi? Yehova umonanga namani bankishi?
Bendeji bamo ba bipwilo bafundijanga’mba Yesu i Leza. Inoko, tangai Yoano 20:17, ne kwisambila pa bino bipangujo:
Lelo bubine i bwepi? Lelo Leza ye enka Yesu?
Ubeivwana namani pa kuyuka’mba Yehova i mutume Batumoni bandi mwanda wa kukasapula bubine pādi ne padi wandi Mwana?
6. Twisenswe batwe bene na bene
Bible udingakanya bene Kidishitu na bipindi palapala bya ku umbidi. Tangai 1 Bene Kodinda 12:25, 26, ne kwisambila pa bino bipangujo:
Lelo bene Kidishitu ba bine bafwaninwe kulonga bika shi abamone bene Kidishitu bakwabo basusuka?
Umona namani buswe budi umbukata mwa Batumoni ba Yehova?
Shi Batumoni ba Yehova ba mu kipindi kimo kya ntanda abatanwa mu masusu, Batumoni ba ntanda yonso bebakwashanga bukidibukidi. Pa kumona’ko kimfwa kimo, talai VIDEO. Kupwa, mwisambilei pa kipangujo kilonda’kya.
Lelo buswe bwa Batumoni ba Yehova bubamwekela namani mu bukwashi bobaleta?
Bene Kidishitu ba bine balombolanga buswe ku boba basakilwa bukwashi
BANTU BAMO BANENANGA’MBA: “Batumoni ba Yehova i kipwilo’tu kya panopano.”
Le i tamba kitatyi’ka kyātelele Yehova batōtyi bandi bu batumoni?
MU KĪPI
Batumoni ba Yehova i bene Kidishitu ba bine. Twi kisaka kya ntanda yonso kya batōtyi balupwile nkulupilo yabo mu Bible ne bayukanya bubine padi Yehova.
Pitulukai’mo
Mwanda waka twi basele dijina dya bu Batumoni ba Yehova?
Lelo twimwene namani batwe bene na bene?
Le ulanga Batumoni ba Yehova i bene Kidishitu ba bine?
KIMBA
Yukila’ko bivule bitala mānga yetu.
Batumoni ba Yehova—Lwitabijo Lwingila, Kipindi 1: Kutamba mu Fukutu (1:00:53)
Tala kimfwa kimo kya muswelo wasokwedile patōka Batumoni ba Yehova mfundijo ya bubela.
Kimba malondololo a bipangujo byobwanya kwikala nabyo bitala pa Batumoni ba Yehova.
“Bipangujo Bipangulwanga Divule pa Mwanda wa Batumoni ba Yehova” (Paje wa pa Entelenete)
Stephen wadi kipolapola kya mu meso fututu. Tala bintu byaamwene mu Batumoni ba Yehova byamulengeje ashinte.
“Būmi Bwami Bwadi Bwenda Bubipila’ko” (Kiteba kya Mulami, 1 Kweji 7, 2015)
a Kiteba kya Mulami, julunale yetu mibajinji, kishintululanga bubine bwa mu Bible mu muswelo umo tamba mu 1879.