Yesu Watalaja Kimpumpu kya Luvula pa Dijiba

Yesu waingila bininge difuku dyonso. Ke ku kyolwa, wanena bandi bana ba bwanga amba: “Twabukilei bobwa bukila,” ko kunena’mba bukila bwa ntanda ya Kapanama.—Mako 4:35.

Abaenda ku nkula idi ku bukila bwa kutunduka kwa Dijiba dya Ngadilea idi mu ntanda ya Ngenesaleta. Ino ntanda iyukilwe ne bu Dekapodi. Bibundi bya Dekapodi i bibikalwe na bibidiji bya Bangidiki, inoko mudi Bayuda bavule.

Yesu wataluka mu Kapanama bantu bamwene. Kudi ne mato makwabo akimba kukija dijiba. (Mako 4:36) Na bubine, kwendwa ke kulampepo. Dijiba dya Ngadilea i dijiba didi talala nyā, dya kintu kya makilometele 21 mu bula ne 12 mu bunkimbwa. Kadi didi na mushike mukata.

Nansha Yesu byadi muntu mubwaninine, i byendele’mo evwane bukōke pa kupwa kwingila bininge. O mwanda abo pa kushikula bwato, walāla kunyuma kwa bwato, watūla mutwe pa musāmo kalēle bukū.

Bandi batumibwa bavule bayukile kuvua bwato, ino luno lwendo kelusapo kwibapēlela. Divule pa Dijiba dya Ngadilea pekalanga kakyanga, mwanda i dijokolokwe na ngulu. Kyaba kimo, kaluvula katalala katūkanga ku lūlu, ketana na kakyanga kadi pa mema, byakolomona kivula kikatampe pa dijiba. Ne uno mwanda o walongeka. Na pano kala mabimbi keateme ku bwato. ‘Bwato bwabo bubashilula kuyula mema, abaikala mu kyaka.’ (Luka 8:23) Yesu papo kashā ulēle!

Bano bamvui kebalu na bwato, abaingidija manwa abo obadi bayukile mwa kutyibulwila kivula. Inoko pano, kutupu muswelo. Abo pa kutyina kufwa abalangula Yesu amba: “A Mfumwetu, witupandije, tubafu!” (Mateo 8:25) Bana ba bwanga abakwatwa moyo amba kebalobela!

Yesu pa kulanguka, wanena batumibwa bandi amba: “I kika kyomuzakela, banwe ba lwitabijo lutyetye?” (Mateo 8:26) Yesu wasoñanya kivula ne dijiba amba: “Shhh! Talala nyā!” (Mako 4:39) Kivula kitomboke kibaketeka ne pa dijiba pabatalala nyā. (ba Mako ne Luka i balembe pa ino myanda itulumukwa, dibajinji na kukomeneja kutalaja kwataleje Yesu kivula mu kingelengele, ne kubulwa lwitabijo kwa bana ba bwanga.)

Fwatakanya’po mweivwanina bana ba bwanga! Abemwena dijiba ditomboke na kivula ditalala nyā. Moyo ungi ubebakwata. Kebenena abo bene na bene amba: “Le bine uno’u i ani? Enka ne kivula ne dijiba dine bimukōkela.” Ebiya bafika senene ku bukila bukwabo bwa dijiba. (Mako 4:41–5:1) Mobimwekela padi mato makwabo adi pa dijiba etolēle ku nkula.

Bine kuyuka’mba Mwanā Leza udi na lupusa pa bintu kuleta kikulupiji! Mu Bulopwe bwandi pakashilula kwendeja ino ntanda yetu, kekukekalapo kimpengele kya kipangila kileta moyo!