Waite Mateo

Kinondanonda na kupwa kubelula wa bulebe, Yesu ukidi ku mutamba wa Kapanama dya ku Dijiba dya Ngadilea. Bibumbo bibaiya monka kwadi, washilula kwibifundija. Papita, wamone Mateo witwa ne bu Levi ushikete pa njibo ya musonko. Yesu wamwite na nsangaji amba: “Ikala mulondi wami.”​—Mateo 9:9.

Mobimwekela, Mateo wadi kala kemwivwane bufundiji bwa Yesu ne bilongwa bya bukomo byalonga mu ino ntanda, monka mwaivwanine’byo ba Petelo, Andele, Yakoba, ne Yoano. Mateo nandi waitabija bukidibukidi. Mateo ushintulula uno mwanda mu Evanjile yandi amba: “Ponkapo [Mateo] waimana kamulonda” Yesu. (Mateo 9:9) Enka papo Mateo washiye mingilo yandi ya kusonkeja musonko, waikala ke mwanā bwanga wa Yesu.

Kitatyi kityetye pa kupita’po, padi mwanda wa kufwija’ko pa luno lwito lwa pa bula lwa kwitwa na Yesu, Mateo watēkeja masobo makatampe ku yandi njibo. Le i bāni bakwabo baitwa pamo na Yesu ne bandi bana ba bwanga? I bakwabo na Mateo bobadi bengila nabo kala, basonkeji ba musonko. Bekalanga basela musonko wa kupa ba lupusa bene Loma bobashikilwe, ne musonko wa byombo bishīka ku nkula, musonko wa bansunga benda mu mashinda makatampe, ne wa bintu bitwela mu ntanda. Le Bayuda mu kikonge bamonanga namani boba basonkeja musonko? Bantu bebashikilwe mwanda wa budimbidimbi bwabo bwa kulomba lupeto luvule kupita lwine lufwaninwe. Kadi kuno ku masobo kudi ne ‘babipya-mambo,’ bantu batumbīle bilongwa bibi.​—Luka 7:37-39.

Bafadiseo bemona bu boloke badi ku masobo’kwa pa kumona Yesu na bantu ba uno muswelo, abaipangula bandi bana ba bwanga amba: “Mwanda waka mufundiji wenu udyanga na basonkeji ba musonko ne babipya-mambo?” (Mateo 9:11) Yesu pa kwibevwana, walondolola’mba: “Bakomo kebadipo kyobasakila muñanga, poso boba babela. Shi ke pano, endai mukayuke mushintulwila kino: ‘Nsakanga lusa ke kitapwapo, aa.’ Mwanda naidile kwita babipya-mambo, ke bolokepo, mhm.” (Mateo 9:12, 13; Hosea 6:6) Bafadiseo betanga Yesu bu “mufundiji” bya buzazangi, nansha nabya, babwanya kuboila ñeni kampanda kwadi ya kyokya kitelwa bu kyoloke.

Bimweka bu Mateo waityija basonkeji ba musonko ne babipya-mambo kwinjibo amba bevwane Yesu ne kubelulwa ku mushipiditu, “mwanda mwadi bavule bene badi bamulonda.” (Mako 2:15) Yesu usaka kwibakwasha bafikile pa kupwana na Leza. Yesu kafutulwilepo bano bantu na mwibafutulwila Bafadiseo bemona bu boloke. Udi na kanye ne lusa; ubwanya kwikala bu muñanga wa ku mushipiditu ku boba bonso babela ku mushipiditu.

Yesu wafwila lusa basonkeji ba musonko ne babipya-mambo, ke na kukonkotolapo bubi bwabo, ino walombola kinyenye na kyokya kilombolanga muñanga ku babemvu. Vuluka kimfwa mwaatengele na lusa yewa wa makopo ne kumunena’mba: “Nsakile! Tōka tō.” (Mateo 8:3) Le tubulwe’po netu kutamija lusa ne kukwasha boba basakilwa bukwashi, nakampata na kwibakwasha ku mushipiditu?