Yesu Watonge Batumibwa Dikumi ne Babidi

Pabapite mwaka umo ne kipindi tamba Yoano Mubatyiji uyukanya Yesu bu Kana ka Mukōko. Yesu pa kushilula mwingilo wandi ku meso a bantu, bantu bavule ba mutyima wampikwa budimbidimbi abaikala ke bana bandi ba bwanga, kimfwa Andele, Shimona Petelo, Yoano, Yakoba (padi mwanabo na Yoano), Fidipa, ne Balatelemi (witwa ne bu Natanela). Mwenda mafuku bakwabo nabo belunga bu balondi ba Kidishitu.—Yoano 1:45-47.

Pano Yesu katonge batumibwa. Bano bantu basa kwikala bapwani nandi kadi basa kufundijibwa bufundiji bwa pa bula. Ino kumeso kwa kwibatonga, Yesu waenda ku lūlu, padi i lolwa ludi kubwipi na Dijiba dya Ngadilea kubwipi na Kapanama. Wapityija bufuku bonso ulombela, mobimwekela i mwanda wa kulomba tunangu ne madyese a Leza. Difuku dilonda’ko waite bandi bana ba bwanga ne kutonga’mo 12 bu batumibwa.

Yesu watonge basamba botwatelanga, pamo ne Mateo waityilwe na Yesu ku njibo ya musonko. Batano bakwabo batongwa i ba Yudasa (witwa ne bu Tadeusa ne bu “mwanā Yakoba”), Shimona mwine Kanane, Tomase, Yakoba mwanā Afesa, ne Yudasa Isakadiota.—Mateo 10:2-4; Luka 6:16.

Tamba pano bano ba 12 kebenda na Yesu, kadi nandi wibayukile senene. Ne bavule’mo i babutule bandi. Ba Yakoba ne Yoano i bana na bana, kadi bimweka bu i banababo na Yesu bana ba mwanabo na inandi mwana-mukaji. Kadi bamo balañanga’mba, Afesa i mwanabo na Yosefa, shandya Yesu wa bulelwa, nanshi mutumibwa Yakoba mwanā Afesa i mwanabo na Yesu, mwana wa mwanabo na shandi.

Na bubine, Yesu kakolelwangapo kuvuluka majina a batumibwa. Le nobe ubwanya kwiavuluka? Kintu kimo kibwanya kukukwasha wiavuluke i kuyuka’mba kudi babidi betwa bu Shimona, babidi betwa bu Yakoba, ne babidi betwa bu Yudasa. Shimona (Petelo) udi na mwanabo Andele, Yakoba (mwanā Zebede) udi na mwanabo Yoano. Kino kala kikukwasha uvuluke batumibwa mwānda. Mu baná bakwabo mudi (Mateo), musonkeji wa musonko, (Tomase) watatene mwenda mafuku, (Natanela) waityilwe munshi mwa mutyi, ne (Fidipa) mulunda wa Natanela.

Batumibwa dikumi ne umo i ba ku Ngadilea, ku ba Yesu. Natanela aye i wa ku Kana. Fidipa, Petelo, ne Andele i ba ku Betesaida. Petelo ne Andele bavilukīle mwenda mafuku mu Kapanama, mobimwekela ko kwadi kushikata Mateo. Ba Yakoba ne Yoano nabo badi bashikata mu Kapanama nansha kubwipi, kobadi na mwingilo wa buluwe bwa lui. Yudasa Isakadiota, mwine waabile Yesu mwenda mafuku ye mutumibwa umo kete wa ku Yudea.