¹³ Shi tusangedile lusa lwa Leza wa boloke, ketukekalapo na kampeja-bukidi ka kutyibila bakwetu mambo mu myanda keitutalepo nansha ya mvubu mityetye. Yesu mu Busapudi bwandi bwa ku Lūlu, wādyumwine amba: “Lekai kutyibila ba mambo kutyina’mba nenu mwakatyibilwa mambo.” (Mateo 7:1) Mungya nsekununi ya Luka, Yesu wābwejeje amba: “Lekai kuponejañana, nabya nenu kemukaponejibwapo nansha dimo.”a (Luka 6:37) Yesu wālombwele mu kidyumu kyandi amba bantu bampikwa kubwaninina bekalanga na mutyima wa kutyibila ba mambo. Muntu ense mu bemvwaniki bandi wādi na kibidiji kya kutyibila bantu mambo bukidibukidi wādi ufwaninwe kuleka’byo.

14. Le i bubinga’ka botufwaninwe ‘kulekela kutyibila bakwetu mambo’?

¹⁴ Mwanda waka ‘kuleka kutyibila bakwetu mambo’? Kibajinji bidi, mwanda lupusa lwetu ludi na mikalo. Mwanā bwanga Yakoba wituvuluja amba: “Kudi umo enka mujidiki wa bijila kadi mutyibi”—Yehova. Kupwa wipangula amba: “Le abe wi ani utyibila mukwenu mambo?” (Yakoba 4:12; Bene Loma 14:1-4) Ne kadi, ngikadilo yetu ya bubi ibwanya kona butyibi bwetu. Milangwe mivule ne kukanina kwa mutyima—kubadila’mo ne mfwatakani, mitatulo, mikao, boloke bwa muntu aye mwine—kubwanya kona muswelo otumona bakwabo. Tudi na mikalo mikatampe, ne kulangulukila pa kino kubwanya kwitukankaja kupeja bukidi kuboya bakwetu tuto. Ketubwanyapo kumona bidi mu mutyima, kadi ketuyukilepo myanda yonso ya mukwetu. Le abe wi ani, wa kumona bibi kukanina kwa mutyima kwa bakwenu betabije nansha kufutulula bukomo bobalonga mu mwingilo wa Leza? Bine i biyampe’po kashā tulonge bukomo bwa kwiula Yehova na kukimba biyampe bidi mu batutu ne bakaka, pa kyaba kya kwimanina pa tuto twabo!

15. Le i binenwa’ka ne bilongwa’ka kebifwaninwepo kulongeka mu batōtyi ba Leza, ne mwanda waka?

¹⁵ Le bantu ba mu kisaka kyetu nabo le? I kya bulanda, mu ntanda ya dyalelo bantu bavule bapejanga kutyibila bakwabo mambo na bukalabale mukifuko mufwaninwe kwikala ndoe—ke mu njibo kadi. Kyaba kyonso twivwananga balume, bakaji ne bambutwile ba kasusu baketa ba mu kisaka “bitambi” na kwibasusula ku ngitu. Ino bishima bisansa, binenwa bya kipuni, ne kasusu kebifwaninwe kutelwa mu batōtyi ba Leza. (Bene Efisesa 4:29, 31; 5:33; 6:4) Madingi a Yesu a amba “lekai kutyibila ba mambo” ne amba “lekai kuponejañana” engilanga ne ku njibo kwine. Vuluka amba kulonga buluji, kushintulula kumona bakwetu mwitumwena Yehova. Kadi Leza kadipo na mutyima mūmu nansha nshikani. Ino “i muyule kisanso kya ku mutyima” ku boba bamusenswe. (Yakoba 5:11) Bine kino i kimfwa kya kutendelwa kyotufwaninwe kwiula!