Yoano Usaka Kwivwana Myanda Itamba Kudi Yesu

Pano ke padi kintu kya mwaka umo, tamba Yoano Mubatyiji ukutwa. Ino wivwana’nka kwivwana mingilo ya kutendelwa ilonga Yesu. Fwatakanya’po mweivwanina Yoano pamusapwila bandi bana ba bwanga amba Yesu wasangula mwana wa wa kishala mu Neni. Ino Yoano usaka kwivwana myanda itambidila kudi Yesu pa nshintulwilo ya byalonga. Ebiya Yoano waityija bandi bana ba bwanga babidi. Balonge bika? Bende kwipangula Yesu amba: “Lelo abe ye Aye wa Kwiya’ni, nansha tufwaninwe kutengela’ko ungi?”​—Luka 7:19.

Lelo kino kipangujo kimweka bu ke kyendele’mopo? Yoano i muntu mwipāne, paabatyije Yesu kubwipi kwa myaka ibidi kunyuma, wamwene mushipiditu wa Leza utūkila Yesu ne kwivwana diwi dya Leza dya kumutōkelwa mutyima. Ketudipo na bubinga bwa kulangila amba lwitabijo lwa Yoano lubazoza, aa. Shi byadi nankyo, Yesu kadipo wa kutendela Yoano pano kupita musunsa mubajinji. Ino shi Yoano katatanangapo, mwanda waka waipangula kino kipangujo padi Yesu?

Mobimwekela Yoano usakanga’tu kuyuka musapu utambidila kudi Yesu ulombola’mba i Meshiasa. Kino kibwanya kukomeja Yoano ususuka mu buloko. Bimweka bu kipangujo kya Yoano kidi ne na buluji bukwabo. Uyukile biyampe bupolofeto bwa mu Bible bulombola’mba Mushingwe Māni wa Leza usa kwikala mulopwe ne mukūdi. Ino pano ke myeji mivule idi Yoano mu kifungo tamba Yesu ubatyijibwa. Nanshi Yoano wipangulanga shi kwiyanga mukwabo wa kupingakana Yesu, wa kufikidija ne pa mfulo byonso byālailwe Meshiasa kulonga.

Pa kyaba’tu kya kusapwila bana ba bwanga ba Yoano amba, ‘Ami ye Aye wa kwiya,’ Yesu waletanga bukamoni amba Leza ye umukwasha pabelula bantu bavule ba misongo ya miswelo yonso mikata ne mityetye. Ebiya wasapwila bana ba bwanga’mba: “Endai, kasapwilei Yoano byomwaivwana ne byomwamona’bi: Bampofu pano kebamone, basunkuta kebanange, ba makopo abatōkejibwa, ba bitwi nabo kebevwana, ne bafwe nabo abasangulwa, kadi balanda nabo abasapwilwa myanda miyampe.”​—Mateo 11:4, 5.

Mu kipangujo kya Yoano mubwanya kwikala ne mulangwe wa amba Yesu ukalonga bivule kutabuka byalonga pano, padi ne kunyongolola Yoano mu kifungo. Ino Yesu wasapwila Yoano bu enka byalonga’bi byo abyo.

Bana ba bwanga ba Yoano pa kutaluka, Yesu wakulupija kibumbo amba Yoano i mupite ne pa bu mupolofeto. I “mukendi” wa Yehova wālailwe mu bupolofeto bwa Malaki 3:1. Kadi i mupolofeto Ediya, monka mokyālailwe mu Malaki 4:5, 6. Yesu washintulula’mba: “I bine nemulombola’mba, ku boba babutwilwe na bana-bakaji, kekwamwekele mukatampe nansha umo wa kutabuka Yoano Mubatyiji, ino yewa mutyetye mu Bulopwe bwa mūlu umutabukile bukatampe.”​—Mateo 11:11.

Yesu pa kunena’mba yewa mutyetye mu Bulopwe bwa mūlu utabukile Yoano bukatampe, walombola’mba Yoano kakekalapo mu Bulopwe bwa mūlu. Yoano wālongolwele dishinda dya Yesu ino wāfwa Kidishitu kashitwile kibelo kya kwenda mūlu. (Bahebelu 10:19, 20) Yoano byadi mupolofeto wa kikōkeji wa Leza, ukekala bu mubikalwa wa pano panshi wa Bulopwe bwa Leza.