Wabelulwa na Kutenga Kivwalwa kya Yesu

Myanda ya kujoka kwajokela Yesu mu Dekapodi ibasambakana mu Bayuda bashikete pa bukata bwa kungala ne kushika kwa nkula ya Dijiba dya Ngadilea. Padi bavule ye bano baivwene amba Yesu wataleje panopano kivula pa mema, kadi bamo padi bayukile kubelulwa kwa bantu badi bakwatwe na bandemona. O mwanda “kibumbo kikatampe” kibebungila ku dijiba, padi i mu ntanda ya Kapanama, kutambula Yesu wajoka. (Mako 5:21) Aye pa kufika ku nkula, kudi kala bantu batengēle kumona bingelengele.

Yelusa mwendeji wa shinankonka, padi i shinankonka ya mu Kapanama, nandi udi mu bano bantu bakimba kumona Yesu. Wapone ku maulu a Yesu kamuzenze’nka kumuzenza’mba: “Wami mwana mwana-mukaji ubela bininge. Iya’po ukamutenteke makasa akome ne kwikala mūmi.” (Mako 5:23) Le Yesu walonga namani na kulomba kwalomba Yelusa amukwashije wandi mwana mwana-mukaji umo kete wa myaka’tu 12 kadi wasenswe bininge?​—Luka 8:42.

Yesu paenda kwa Yelusa, watana mwanda mukwabo wamulengeja evwane bulanda. Bantu bavule benda na Yesu beipangula shi basa kumumona ulonga kingelengele kikwabo. Inoko, mwana-mukaji umo mu kibumbo nandi udi na misongo mikatampe imukambakanya.

Uno mwana-mukaji Muyuda wasusuka na muyeye wa mashi pano ke myaka 12. Waundapwa na bamuñanga palapala, ne kupwa lupeto lwandi lonso ku bundapi bobamutelela. Ino kutupu kyendeka. Ino po pene “wenda ubelela’ko.”​—Mako 5:26.

Monka mowamwena misongo yandi i mimukōkeje, imukambakanya ne kumufwija bumvu. Bavule kebalombolangapo bantu misongo ya uno muswelo. Ino mu Bijila bya Mosesa, mwana-mukaji utambwa mashi wādi umonwa bu wa disubi. Muntu yense umutenga nansha utenga mashi adi ku bivwalwa byandi, wādi ufwaninwe koya ne kwikala wa disubi kufika ne ku kyolwa.​—Levi 15:25-27.

Uno mwana-mukaji waivwene “myanda ya Yesu,” o mwanda pano kamukimbe. Pa mwanda wa disubi dyandi wekuja mu kibumbo mu bufyafya kaenena’mba: “Shi ntenge’tu ku bivwalwa byandi bya pangala, nsa kukoma.” Aye pa kutenga ku milomo ya kivwalwa kya Yesu, waivwana amba mashi andi abaleka kumutamba! “Wakoma ku luba lusansa’lwa.”​—Mako 5:27-29.

Penepo Yesu wanena’mba: “I ani wantenga?” Le ulanga mwana-mukaji weivwana namani pa kwivwana bino binenwa? Petelo wapatanya na kudingila Yesu amba: “Bibumbo byobi bikujokolokele kadi bikutyininye mbū.” Penepa mwanda waka Yesu waipangula amba, “I ani wantenga?” Yesu wanena’mba: “Kudi muntu wantenga, mwanda nayuka’mba bukomo bubantambe’mo.” (Luka 8:45, 46) Bine bukomo bwabelula uno muntu bubatambe mudi Yesu.

Mwana-mukaji pa kumona’mba mwanda ubayukana, wapone ku meso a Yesu na moyo kazakala. Wasapula bubine bwa misongo yandi ku meso a bonso ne amba pano ye paapwibwa. Yesu wamusenge na kanye amba: “Enda mu ndoe, kadi beluka ku luba lobe lusansa.”​—Mako 5:34.

Bine, Yewa utongelwe na Leza bu wa kuludika ino ntanda i muntu wa nsangaji, wa lusa, utele mutyima ku bantu kadi udi bine na bukomo bwa kwibakwasha!