Yesu Walombola Bine Bileta Katōkwe

Yesu watambe mu kupituluka bufundiji bwandi butala pa milombelo, ino ke abopo bumo kete bwaapituluka’mo mu bula bwa mwingilo wandi. Yesu paalongele bingelengele mu Ngadilea, watopekelwe bya bubela amba uloñanga’byo na bukomo bwa mulopwe wa bandemona. Pano abamutopeka’byo monka muno mu Yudea.

Yesu paatambija ndemona mu muntu, mwine wadi umukankeje kwisamba, kibumbo kibatulumuka. Ino balwana nandi kebetabije’byopo. Abalangula bubela bumo bonka amba: “Upañanga bandemona na bukomo bwa Belezebuba, mulopwe wa bandemona.” (Luka 11:15) Bakwabo bakisakila’ko biyukeno bilombola kwatambile, abamulombe kiyukeno kya mūlu.

Yesu pa kumona’mba bamutompanga, webalondolola, mwaalondolwedile dikwabo ku matope amo onka mu Ngadilea. Wanena’mba bulopwe bonso bwiabanya bukapona abo bwine, walanguluka nabo amba: “Shi Satana nandi elalulule aye mwine, le bulopwe bwandi bukemana namani?” Ebiya Yesu webalombwedidila amba: “Shi mpañanga bandemona na munwe wa Leza, nankyo bine Bulopwe bwa Leza bubemupeta.”​—Luka 11:18-20.

Kutela kwatela Yesu “munwe wa Leza” kufwaninwe kuvulula bevwaniki bandi byālongekele kala mu mānga ya Isalela. Bantu ba mu kipango kya Felo pa kumona Mosesa ulonga kingelengele bātulumuka’mba: “I munwe wa Leza!” Kadi i “munwe wa Leza” wālembele Mbila Dikumi pa bipapo bibidi bya mabwe. (Divilu 8:19; 31:18) Mo monka, “munwe wa Leza”​—mushipiditu wandi ujila, nansha’mba bukomo bwingila​—o ao ukwasha Yesu apange bandemona ne kubelula bantu. Nanshi na bubine Bulopwe bwa Leza bubapeta bano balwana, mwanda Mulopwe mutongwe wa buno Bulopwe, ke Yesu kadi, udi’po kala ulonga bingelengele.

Bukomo bwa Yesu bwa kupanga bandemona i bumwekele mu bukomo bwakomene Satana, monka mulongelanga muntu mukomo ufwena ne kunekenya muntu mwilumbile byabulwi. Kadi Yesu wapituluka monka kyelekejo kyandi kitala pa mushipiditu wa disubi watambile mu muntu. Shi muntu’wa kadingilepo munda mwandi bintu bilumbuluke, nabya mushipiditu usa kujokela mwadi na mishipiditu mikwabo isamba-ibidi, byalengeja ngikadilo ya mfulo ya uno muntu ibipile’ko kutabuka mibajinji. (Mateo 12:22, 25-29, 43-45) Mo mwikadile muzo wa Isalela.

Mwana-mukaji umo wadi uteja Yesu waela kabobo amba: “I ya katōkwe yoya ndá yakuselele ne oa mabele akwamishe!” Bana-bakaji Bayuda babilanga kubutula mwana wikala bu mupolofeto, kutabukidila Meshiasa. O mwanda uno mwana-mukaji walanga’mba Madia udi na nsangaji pa kwikala inandya uno mufundiji. Ino Yesu walemununa uno mwana-mukaji na kumulombola bine bileta katōkwe ka binebine amba: “Aa, ino, ba katōkwe i boba bevwana mwanda wa Leza ne kwiulama!” (Luka 11:27, 28) Kashā Yesu kanenene amba Madia ufwaninwe kupebwa bulēme bwa pa bula. Ino, katōkwe ka binebine ka mwana-mulume nansha mwana-mukaji katambanga ku kwikala mwingidi wa kikōkeji wa Leza, ke ku mumwekelopo wa umbidi nansha ku bilongele muntu mu būmi.

Yesu wafunina bantu pa kulomba kiyukeno kya mūlu na mwaalondolwedile paadi mu Ngadilea. Wanena’mba i kutupu kiyukeno kikebapebwa poso’nka “kiyukeno kya Yona.” Yona i kiyukeno mwanda wa kulonga kwaālongele mafuku asatu munda mwa mushipa ne pa mwanda wa kusapula kwaāsapwile na bukankamane, bine byalengeje bene Nineva besāse. Yesu wanena’mba: “Ino tala! kintu kitabukile Yona kidi pano.” (Luka 11:29-32) Kadi Yesu i mupite Solomone, mwine wa tunangu twāile kwivwana mulopwe mukaji wa ku Sheba.

Yesu wabweja’ko amba: “Shi muntu waakija kinanu, kekitūlangapo pafyame nansha munshi mwa kilala, ino wikitūlanga pa kitūlwa-binanu.” (Luka 11:33) Bimweka bu ukimba kunena’mba kufundija ne kulonga bingelengele ku meso a bano bantu kudi pamo bwa kufya kitōkeji kya kinanu. Mwanda meso abo adi kungi, i babulwe kuyuka kitungo kya mingilo yandi.

Yesu wapangile bandemona walamuna ne ludimi lwa muntu kadipo ubwanya kunena. Bino byadi bifwaninwe kutonona bantu batendele Leza ne kusapwila bantu byobya bilonga Yehova. Pano Yesu wakimbe kudyumuna bano balwana amba: “Tadija’mba kitōkeji kidi modi ke fukutupo. Nanshi, shi umbidi obe onso udi na kitōkeji pampikwa kipindi nansha kimo kidi fututu, ao onso ukekala na kitōkeji pamo bwa kinanu kikumunikila kitōkeji na mikejima yakyo.”​—Luka 11:35, 36.