Kine Kya Kwibonakenya Kumeso

Yesu waingidija miswelo yonso mwanda wa kukwasha bantu balangulukile pa kipwano kyabo na Leza. Mukenga mukwabo ubamweka paapwa kwisamba na bantu badi panja pa njibo ya Mufadiseo.

Bamo abatela kinzengele kimo. Abesambila pa “bene Ngadilea, ba mashi asambakenye [Pontyusa Pilato, mbikavu wa Loma] na bitapwa byabo.” (Luka 13:1) Lelo bakimba kunena bika?

Padi bano bene Ngadilea baipailwe patombokele Bayuda mwanda Pilato waselele lupeto lwa mu tempelo kayenga mukola wa kuleta mema mu Yelusalema. Bimweka bu Pilato wesambile na bakatampe ba mu tempelo pa kusela lupeto. Bano basekununa uno mwanda balanga’mba bano bene Ngadilea bafwile mwanda balongele bubi kampanda. Yesu ketabije’byopo.

Waipangula’mba: “Banwe mulangile amba boba bene Ngadilea’ba badi babipya-mambo babi kutabuka bene Ngadilea bonso mwanda’po batenwe na bino bintu?” Aye mwine amba ke amopo. Ino waingidija kino kinzengele mwanda wa kudyumuna Bayuda amba: “Shi kemwisāshilepo, mukonakanibwanga banwe bonso enka nabya.” (Luka 13:2, 3) Kupwa Yesu wesambila pa kinzengele kikwabo kyalongekele panopano kitala enka pa kuyengwa kwa uno mukola, waipangula’mba:

“Boba 18 bafikīlwe na kiteba mu Sailoma, kyebepaya​—le mulanga’mba badi na mambo makatampe kutabuka bantu bonso bekalanga mu Yelusalema?” (Luka 13:4) Kibumbo ye kino kilangile amba bantu’ba bafwile mwanda wa bubi bwabo. Pano napo Yesu ketabije’byopo. Uyukile amba “kitatyi ne myanda yampikwa kulaa” bifikanga kadi padi byo byafikile ne bano bantu. (Musapudi 9:11) Inoko bantu bafwaninwe kuboila’ko ñeni. Yesu wanena’mba, “Shi kemwisāshilepo, mukonakanibwanga banwe bonso’nka bwa abo.” (Luka 13:5) Ino kyaletela bufundiji pa uno mwanda i kika?

I mwanda wadi kadi pabwipi na kuvuya mwingilo wandi, waelekeja mwanda amba: “Muntu umo wadi na kikuyu kikune mu budimi bwandi bwa mañanza, waiya kukimba’ko bipa, ino katene’kopo kintu. Penepa wanena mwingidi wa mu budimi bwa mañanza’mba, ‘Tala pano ke myaka isatu ngiyanga nkimba bipa ku kino kikuyu, ino nkyatene’ko kintu. Tēta’kyo! I mwanda’ka okyonena nshi?’ Ino aye wamulondolola’mba, ‘Mfumwami, wikileke bidi ne uno mwaka enka ne byonekikolela kufulakufula ne kwela’ko mboleo. Shi mwenda mafuku kibape bipa, nankyo i biyampe; ino shi kekipelepo, kotēta’kyo.’”​—Luka 13:6-9.

Yesu walonga bukomo bwa kutamija lwitabijo lukomo mu Bayuda mu kintu kya myaka isatu ne kupita. Ino batyetye’tu bo baikala ke bana bandi ba bwanga, byo bipa bya mingilo yandi mikomo. Pano mu mwaka wa buná wa mwingilo wandi, watakamena’ko. Udi bwa ukolela ne kupa mutyi wa kikuyu wa Buyuda bumeni na kusapula ne kufundija mu Yudea ne mu Pelea. Le bibaikala namani? Mubaitabija’tu Bayuda batyetye kete. Ino mu kikonge, muzo onso ubapele kwisāsa, ubaikala mu mulongo wa ba konakanibwa.

Kubulwa lwitabijo kwa bavule kubamweka monka kitatyi kityetye mu difuku dya Sabato. Yesu ufundija mu shinankonka. Wamone mwana-mukaji ususulwa na ndemona, i mumutontele pa nshi mu myaka 18. Yesu pa kumwivwanina lusa, wamunena’mba: “A mwana-mukaji, ubakutululwa ku buzoze bobe.” (Luka 13:12) Yesu wamutenteka maboko, ponka’po wakomejibwa katumbija Leza.

Kino kibalobeja mwendeji wa shinankonka, wamunena’mba: “Kudi mafuku asamba afwaninwe kwingila mingilo; mu ano mafuku, mwiyai’tu mwabelulwa, ino ke mu difukupo dya Sabato.” (Luka 13:14) Mwendeji kapelelepo amba Yesu udi na bukomo bwa kubelulañana; ino watopeka bantu baiya kubelulwa mu dya Sabato! Yesu wamulondolola na milangwe miluji amba: “Banwe banzazangi, mwene ense pomudi’po wikalanga ukutulula mu dya Sabato ñombe nansha mpunda wandi mu kipopole wamutambija, wakamutomeja? Penepo le kekifwaninwepo uno mwana-mukaji, mwanā Abalahama, wadi ukutyilwe na Satana ke myaka 18, akutululwe mu bino bikutwa mu difuku dya Sabato?”​—Luka 13:15, 16.

Balwana nandi abaivwana bumvu, ino bibumbo bibasangala pa bintu bya kutendelwa byobamona Yesu ulonga. Yesu wapituluka mu Yudea byelekejo bibidi bya bupolofeto bitala pa Bulopwe, bine byaanenene mu bwato mu Dijiba dya Ngadilea.​—Mateo 13:31-33; Luka 13:18-21.