Pashika Ya Mfulo Ya Yesu Ibafwena

Yesu wapu kufundija batumibwa baná pa Lūlu lwa Impafu, walondolola kipangujo kyabo kitala kwikala’po kwandi kwa kumeso ne kwa mvuyo ya ngikadilo ya bintu.

Bine waingila bininge mu difuku dya Nisane 11! Bimweka padi i pobajokela ku Betani bufuku pasapwila Yesu batumibwa bandi amba: “Muyukile amba kubashala mafuku abidi Pashika ifike, kadi Mwanā muntu ukapānwa ku bantu amba epaibwe ku mutyi.”​—Mateo 26:2.

Bimweka bu Yesu wapityija talala difuku dilonda’ko, Dya Busatu, pamo na batumibwa bandi. Dya Bubidi, wafunine bendeji ba bipwilo ne kwibatuluja patōka. Ke bakimbe kumwipaya. O mwanda kelombwelepo ku meso a bantu mu difuku dya Nisane 12, kutyina kwakekala kintu kimukankaja kusoba Pashika na bandi batumibwa pashilula kyolwa kya Nisane 14 kupwa kwa dyuba kupona.

Ino babitobo bakulu ne bendeji ba bantu kebekelepo talala kumeso kwa Pashika. Abebungila mu kipango kya kitobo mukatampe, Kaifasa. Le kyobakimba i kika? I balobe mwanda Yesu webatuluja patōka. Pano bakutyilanga pamo kitumba “mwa kukwatyila Yesu na bunwa bamwipaye.” Le basa kumukwata muswelo’ka ne kitatyi’ka? Abanena’mba: “Ketwakimukwata pa masobo, kutyina kwakatamba lupotopoto mu bantu.” (Mateo 26:4, 5) Abatyina mwanda bantu bavule basenswe Yesu.

Mu kine kitatyi’kya, bendeji ba bipwilo abatambula mweni. Na bya kutulumukwa, i Yudasa Isakadiota, mutumibwa wa Yesu. Satana watwejeje mwadi mulangwe wa kwaba Mfumwandi! Yudasa webepangula’mba: “Le musa kumpa bika mwabe komudi?” (Mateo 26:15) Abasangela uno mwanda, “beivwanika kumupa lupeto lwa ndalama.” (Luka 22:5) Le i inga? Abaitabija na nsangaji kumupa bibese bya ndalama 30. Kino kidi na buluji kampanda, mwanda lupoto lwa umpika umo i shekele 30. (Divilu 21:32) Mu uno muswelo bendeji ba bipwilo abamone Yesu bu wa mvubu mityutyu. Na pano kala Yudasa kakimbe “mukenga muyampe wa kumwaba kobadi kwa kubulwa kibumbo koku ne koku.”​—Luka 22:6.

Difuku dya Nisane 13 dibashilula na kupona kwa dyuba mu Dya Busatu, ne buno bo bufuku bwa busamba kadi bwa mfulo bwa Yesu kulāla mu Betani. Difuku dilonda’ko, i dya kuvuya kulongolola Pashika. Bilomba kukimba kana ka mukōko ka kutapa ne kwikosha konso katuntulu pashilula difuku dya Nisane 14. Le basa kudīla’yo kwepi ne i ani usa kwiiteakanya? Yesu kashintulwilepo bino byonso. O mwanda Yudasa kasapwidilepo’byopo babitobo bakulu.

Padi i ku kyolwa kwa Dya Buná, kwatuma Yesu ba Petelo ne Yoano pobadi ku Betani amba: “Endai muketulongolwele Pashika tudye.” Nabo bamunena’mba: “Lelo usaka tukeilongolwele kwepi?” Yesu webashintulwila’mba: “Talai! Pomusa kutwela mu kibundi, mwana-mulume umo uselele mulondo wa mema usa kwimutana. Mulondei mu njibo mwasa kutwela’mwa. Kadi nenai mwinē lubanza ludi’mo njibo amba, ‘Mufundiji wakunena’mba: “I kwepi le kudi kyumba kya beni monkokeja kudīla Pashika na bami bana ba bwanga?”’ Kadi yao muntu ukemulombola kyumba kya peulu kikata, kidi’mo bintu byonso senene. Longolwelai’yo mwine’mwa.”​—Luka 22:8-12.

Na bubine mwinē lubanza i mwanā bwanga wa Yesu. Ubwanya nanshi kwitabijija Yesu walomba bengidije yandi njibo. Batumibwa babidi pa kutwela mu Yelusalema, abatana bintu byonso’nka mwebalombwelanga Yesu. Abamone amba kana ka mukōko kadi’ko kala ne bintu bikwabo bya Pashika i bilongololwe kala bibwana bantu 13​—Yesu ne batumibwa bandi 12.