Yesu—Lufungulo lwa Būmi Budi na Kitungo

LE BINE Yesu wādi na būmi budi na kitungo? Wātamīne mu bantu betyepeje, kadi wādi na bintu bityetye bya ku ngitu mu būmi bwandi. Na bubine kādipo “ne pakusamina mutwe.” (Luka 9:57, 58) Kadi, wādi mushikibwe, wabepelwa bya bubela, mfulo mfulō waipaibwa na balwana nandi.

Ubwanya kulanga amba, ‘būmi bwa uno muswelo ke būmipo bomona bu budi na kitungo!’ Inoko, kudi bintu bivule bya mu būmi bwa Yesu byotufwaninwe kubandaula. Tubandaulei’ko bintu biná bya mu būmi bwandi.

1. YESU WĀDI NA KITUNGO KYA KULONGA KISWA-MUTYIMA KYA LEZA MU BŪMI.

“Bidibwa byami i byonka bino’mba: Ngube kiswa-mutyima kya yewa wakuntuma.”—Yoano 4:34.

Yesu wādi usaka kufikidija kiswa-mutyima kya Yehovaa Shandi wa mūlu, kupityila ku binenwa ne bilongwa byandi. Yesu wātene nsangaji mikatampe mu kulonga kiswa-mutyima kya Leza. Na bubine, wādingakenye kulonga kiswa-mutyima na bidibwa, enka mulombwela’kyo kisonekwa kitelelwe’ki. Tutalei bidi ngikadilo yaāingidije’mo kuno kudingakanya.

Yesu wānenene bino binenwa kubwipi kwa midi. (Yoano 4:6) Wāendele lubanga lonso lwendo lwa kupityila mu Samadia ntanda ya ngulu, ebiya waivwana nzala. Bine, bana bandi ba bwanga bāmunene amba: “Rabi, dya po bidi.” (Yoano 4:31, Bisonekwa Bitokele) Yesu wālombwele kupityila ku malondololo andi amba, wādi bine udishibwa ne kukomejibwa na kwingila mwingilo wa Leza. Le kino kekilombolapo amba, muntu wa uno muswelo wādi na kitungo mu būmi?

2. YESU WĀDI USENSWE SHANDI BININGE.

“Nsenswe Tata.”—Yoano 14:31.

Yesu wādi upwene kipwano kya mpwaninine na Shandi wa mūlu. Buswe bukatampe bwa Yesu bwaādi usenswe Leza bwāmutonwene ayukanye Shandi—dijina Dyandi, mpango yandi ne ngikadilo yandi. Kupityila ku binenwa, bilongwa ne ngikadilo yandi, Yesu wāmwekeje Shandi ne pa mfulo—mu muswelo otubwanya kumumona bu kyelekejo kyūmi kya Shandi. O mwanda, Fidipa paānene Yesu amba: “Witulombolepo Shobe,” Yesu wālondolwele amba: “Wakumona ami nankyo wamone ne Tata mwine.”—Yoano 14:8, 9.

Yesu wādi usenswe Shandi bininge, o mwanda wāmukōkele ne mutyima tō kufika’nka ne ku lufu. (Fidipai 2:7, 8; 1 Yoano 5:3) Buno buswe bukatampe bwa kuswa Leza bwālengeje būmi bwa Yesu bwikale na kitungo.

3. YESU WĀDI USENSWE BANTU.

“Kekudi nansha umo udi na lusa lutabukile luno’lu lwa kwelela balunda nandi muya wandi.”—Yoano 15:13.

Byotudi bantu ba kubulwa kubwaninina, ketuyukile’po musa kwikadila būmi bwetu dyakesha. Bible ushintulula amba: “Monka mwatwelele bubi panopantanda ku muntu umo [Adama], ne lufu nalo ponka pa bubi, mo monka mwasambakanine lufu ku bantu bonso, mwanda abo bonso bapīle mambo.” (Loma 5:12) Ketubwanyapo na bukomo bwa batwe bene kunyema bipa bibi bilupuka ku bubi, ke lufu kadi.—Loma 6:23.

Na bya dyese, Yehova wātūdile’ko na buswe muswelo wa kupwija makambakano a muzo wa muntu. Wālekele wandi Mwana mubwaninine kadi wampikwa bubi, wāyukene bu Yesu, asusuke ne kufwa mwanda wa kuleta kikūlwa kyādi kisakibwa pa kunyongolola muzo wa muntu mu bupika bwa bubi ne lufu. Yesu pa kutononwa na buswe bwaswele Shandi ne bantu, wākōkele na mutyima tō ne kupāna būmi bwandi bubwaninine pa mwanda wetu. (Loma 5:6-8) Buno buswe bwa kubulwa kwisakila bwalengeje būmi bwandi bwikale na kitungo.b

4. YESU WĀDI UYUKILE’MBA SHANDI UMUSENSWE NE KUMWITABIJA.

“Uno nandi i wami Mwana wakuswedibwa o ntōkelwe pa mutyima.”—Mateo 3:17.

Yehova wānenene bino binenwa aye momwa mūlu kitatyi kyābatyijibwe Yesu. Mu uno muswelo, Yehova wālombwele patōkelela amba uswele Yesu wandi Mwana ne kumwitabija. Ke kya kutulumukapo shi Yesu wānene na kusumininwa amba: “Tata unsenswe”! (Yoano 10:17, DD) Yesu byaādi uyukile’mba Shandi umusenswe ne kumwitabija, wālwile na lwana ne mifutululo na kikulupiji. Wālamine’nka ne ndiñamano ne bujalale paādi wikonda na lufu. (Yoano 10:18) Muswelo wādi umona Yesu buswe bumuswele Shandi ne kumwitabija, wālengeje būmi bwandi bwikale na kitungo kikatampe.

Na bubine, Yesu wādi na būmi budi na kitungo. Bine, tubwanya kuboila ñeni mivule kwadi pa muswelo otubwanya kwikala na būmi budi na kitungo kya binebine. Kishinte kilonda’ko kikesambila pa madingi amo mapotoloke a mwa kwikadila āpele Yesu balondi badi.

[Kunshi kwa dyani]

[Kifwatulo pa paje 4, 5]