Binenwa Bya Yesu Bibakukaja Bavule

Yesu udi mu shinankonka ya Kapanama, mwaafundija amba aye i mukate wa bine mutūke mūlu. Bimweka bu wabweja ku binenwa byaasapwidile bantu batambile kutunduka kwa Dijiba dya Ngadilea, bene badile mikate ne twita byaebapele.

Yesu waendeleja na mwisambo wandi amba: “Bakulutuba benu bādile māna mu ntanda mutuputupu ino bafwa.” Ino washintulula’mba: “Ami ne mukate mūmi utūkile mūlu. Shi muntu adye ku uno mukate ukekala mūmi nyeke; kadi na bubine, mukate mwine onsa kupāna i ngitu yami mwanda wa būmi bwa ino ntanda.”​—Yoano 6:48-51.

Ku muketeko wa mu 30 Yesu ke mwiye, Yesu wasapwidile Nikodema amba Leza wasenswe ntanda bininge, watuma wandi Mwana bu Mupandiji. Yesu pano walombola mvubu ya kudīla ngitu yandi na kulombola lwitabijo mu kitapwa kyasaka kulambula. Uno o muswelo wa kutambula būmi bwa nyeke.

Ino bantu abaivwana bingi binenwa bya Yesu. Kebepangula’mba, “Le uno muntu ubwanya namani kwitupa ngitu yandi tudye?” (Yoano 6:52) Yesu usaka bevwanije amba muneneno waanena i wa kyelekejo. Byaabweja’ko byo byaleta buluji.

“Shi kemudilepo ngitu ya Mwanā muntu ne kutoma mashi andi, kemukekalapo na būmi mudi banwe bene. Yewa ense udya ngitu yami ne utoma mashi ami udi na būmi bwa nyeke, . . . mwanda ngitu yami i byakudya bya bine, kadi ne mashi ami i bitomibwa bya bine. Yewa ense udya ngitu yami ne kutoma mashi ami udi nyeke nami umbumo, ami nami umbumo nandi.”​—Yoano 6:53-56.

Fwatakanya’po mobyasanshila Bayuda bamwivwana! Abalanga’mba Yesu ukimba bamudye ne kujilula kijila kya Leza kipeleja kudya mashi. (Ngalwilo 9:4; Levi 17:10, 11) Ino Yesu kesambilanga’po pa kudya ngitu yandi nansha kutoma mashi andi menemene. Ukimba kulombola’mba bonso basaka būmi bwa nyeke bafwaninwe kulombola lwitabijo mu kitapwa kyasa kupāna kya ngitu yandi ya bu muntu mubwaninine ne mashi andi asa kumwanga. Ino ne bandi bana ba bwanga kebevwanijepo buno bufundiji. Bamo abanena’mba: “Uno mwanda usansa; i ani ukokeja kwiwivwana?”​—Yoano 6:60.

Yesu pa kujingulula’mba bana bandi ba bwanga bamo abeuninga, waipangula’mba: “Le bibemukukaja? Penepo bikekala namani le shi mubamone Mwanā muntu ukanda kokwa kwaadi dibajinji? . . . Binenwa byonemunena i mushipiditu kadi i būmi. Ino kudi bamo momudi’mo kebetabijepo.” Pa uno mwanda, bana ba bwanga bavule abaleka’byo, kebakimulonda monka.​—Yoano 6:61-64.

Yesu waipangula batumibwa bandi 12 amba: “Le banwe nenu kemusakilepo kwenda?” Petelo wamulondolola’mba: “A Mfumwetu, le twenda kudi ani? Abe udi na binenwa bya būmi bwa nyeke. Twitabije ne kuyuka’mba abe wi Mwine Ujila wa Leza.” (Yoano 6:67-69) Luno shalo lo lulamato, ne pano pene Petelo ne batumibwa bakwabo kebevwanijepo senene mushintulwila bufundiji bwa Yesu pa uno mwanda!

Yesu pa kusangela malondololo a Petelo, wanena’mba: “Nemutongele dikumi ne babidi, ke amopo? Ino umo pomudi’po i vubavuba.” (Yoano 6:70) Yesu wisambilanga padi Yudasa Isakadiota. Bimweka bu Yesu wadi ke mushilule kumona amba Yudasa kemwanze mwiendelejo mubi.

Ino bine Yesu wasangala pa kumona’mba Petelo ne batumibwa bakwabo abaendelela kumulonda ne kwingila mwingilo upāna būmi waingila.