Yesu I Umo Na Shandi, Ino Ke Lezapo

Yesu i mwiye ku Yelusalema ku Masobo a Kupāna (a Hanuka). Ano masobo i a kuvuluka kupānwa kwa tempelo. Myaka katwa kunyuma, Antiokusa IV Epifane, mulopwe wa Shidea wāūbakile kisōkelo pa kisōkelo kikatampe kya mu tempelo ya Leza. Mwenda mafuku, bana ba kitobo Muyuda bākwata Yelusalema ne kupāna monka tempelo ya Yehova. Tamba penepa, masobo a pa mwaka pa mwaka aloñwanga mu mafuku 25 a kweji wa Kishileve, kweji uponena ku mfulo kwa Kweji 11 ne ku ngalwilo kwa Kweji 12.

Muno i mu kitatyi kya mashika. Yesu unañanga mu tempelo mu bukōnde bwa Solomone. Bayuda abamujokoloka ne kumwela mu bukata kebamwipangula’mba: “Le abe uketuseleja mityima kūlu kufika ne kitatyi’ka? Shi abe ye Kidishitu, witulombole’tu patōkelela.” (Yoano 10:22-24) Lelo Yesu walondolola namani? Walondolola’mba: “Nemulombwele, ino banwe kwitabija mpika.” Yesu kebasapwidilepo patōkelela amba aye i Kidishitu, na mwaalombwedile mwana-mukaji mwine Samadia ku mushimwa. (Yoano 4:25, 26) Inoko, wasokwele kwatambile pa kunena’mba: “Abalahama paādi kaikele’ko, ami nādi’ko.”​—Yoano 8:58.

Yesu usaka bantu bene bayuke amba aye i Kidishitu na kudingakanya mingilo yaingila na yoya yālailwe Kidishitu kwingila. O mwanda kitatyi kimo wasapwidile bana bandi ba bwanga baleke kusapwila muntu amba i Meshiasa. Ino pano walombola patōkelela bano Bayuda balwana amba: “Mingilo yononga mu dijina dya Tata, yo isapula bukamoni pa mwanda wami. Ino banwe kemwitabijangapo.”​—Yoano 10:25, 26.

Mwanda waka kebetabijepo amba Yesu i Kidishitu? Aye amba: “Banwe kemwitabijangapo, mwanda kemudipo mikōko yami. Mikōko yami ivwananga diwi dyami, neiyukile, kadi nayo inondanga. Neipanga būmi bwa nyeke, keikonakanibwapo nansha dimo dine, ne kadi i kutupu ukansompola’yo mu dikasa dyami. Kyokya kimpele Tata i kikatampe kutabuka bintu bikwabo byonso.” Ebiya Yesu webalombola mwapwanine na Shandi amba: “Amiwa ne Tata twi umo.” (Yoano 10:26-30) Yesu udi pano pa ntanda ino Shandi udi mūlu, nanshi kabwanyapo kunena’mba aye ne Shandi i umo kishima pa kishima. Aye ne Shandi i umo, mu kwingidila pamo.

Binenwa bya Yesu bibalobeja bininge Bayuda, ababoya monka mabwe ke basake kumwipaya. Kino kekizakejepo Yesu. Wanena’mba: “Nemulombwele mingilo mivule milumbuluke ya kwa Tata. Lelo pa ino mingilo i wepi mwine omungashila mabwe?” Abo amba: “Kyotukwashila mabwe, ke pa mwandapo wa mingilo milumbuluke, aa, ino i pa mwanda wa mutonko otuka Leza; . . . witūlanga bu leza.” (Yoano 10:31-33) Yesu ketelelepo nansha dimo bu leza, penepa mwanda waka abamulambika ino myanda?

Yesu udi na bukomo bunena Bayuda amba budi’nka na Leza kete. Kimfwa, pa mwanda utala “mikōko” wanene amba: “Neipanga būmi bwa nyeke,” kintu kekibwanyapo kulonga muntu wa mashi ne mema. (Yoano 10:28) Bayuda bapumpunyanga bubine bwa binena Yesu amba lupusa lwadi nalo i Shandi umupele’lo.

Yesu pa kupela matope abo a bubela, waipangula’mba: “Le kekilembelwepo mu Bijila byenu [mu Ñimbo ya Mitōto 82:6] amba, ‘Nanenene amba: “Mwi baleza”’? Shi waite boba bāponejibwe na kinenwa kya Leza bu ‘baleza’ . . . le kemunena ami upandwilwe na Tata ne kutumwa mu ino ntanda’mba, ‘Ubatuke Leza,’ mwanda’tu nanena’mba, ‘Ne Mwanā Leza’?”​—Yoano 10:34-36.

Bine, Bisonekwa bitanga ne bantu batyiba na bukondame bu “baleza.” Penepa bano Bayuda abatopeka namani Yesu pa kunena’mba “Ne Mwanā Leza”? Watela kintu kya kwibanekenya amba: “Shi nkiloñangapo mingilo ya Tata, kemwakingitabijai. Ino shi noñanga’yo, nansha shi kemungitabijepo, itabijai mingilo, amba muyuke ne kwendelela kuyuka’mba Tata udi nami umbumo, ami nami umbumo na Tata.”​—Yoano 10:37, 38.

Bayuda abakimbe kukwata Yesu, ino webaponyoka monka. Watambe mu Yelusalema ne kwenda bukila bwa Munonga wa Yodano ku mutamba kwadi kubatyija Yoano kubwipi kwa myaka iná kunyuma. Bimweka bu ke kulampepo na kufudile Dijiba dya Ngadilea, mutamba wa kunshi.

Bibumbo bibaiya kudi Yesu kebinena’mba: “Yoano kalongelepo kiyukeno nansha kimo, ino bintu byonso byanenene Yoano pa uno muntu, i bya bine.” (Yoano 10:41) Enka nenki, Bayuda abaitabija mudi Yesu.