Kine ‘Kyotupela’nka Kupa Bipa Bingi’

1, 2. (a) Le Yesu wēsambile bika na bandi bana ba bwanga mu bufuku bukya ke lufu lwandi? (Tala kifwatulo ku ngalwilo.) (b) Mwanda waka i biyampe tuyuke bubinga bwine botusapwila? (c) I bika byotusa kwisambila’po?

YESU wēsambile bininge na batumibwa bandi mu bufuku bukya ke lufu lwandi. Wēbakulupije amba wibasenswe bininge. Kadi wēbalombwele ne kyelekejo kya muñanza, kine kyotwesambīle’po mu kishinte kishele kunyuma. Yesu wādi usaka kukankamika bandi bana ba bwanga ‘bape’nka kupa bipa,’ ko kunena’mba, bōminine na kusapula musapu wa Bulopwe.​—Yoano 15:8.

² Inoko, Yesu kāsapwidilepo bandi bana ba bwanga’nka bintu byobafwaninwe kulonga, ino i ne kine kyobafwaninwe kulongela’byo. Wēbapele bubinga bwine bobādi bafwaninwe kwendelela na kusapula. I biyampe netu tuyuke kine kyotufwaninwe kwendelela na kusapula. Kulangulukila pa kino, kuketutonona tūminine potupāna “bukamoni ku mizo yonso.” (Mateo 24:13, 14) Mu kino kishinte, tusa kwisambila’mo pa bubinga buná bwa mu Bisonekwa bwine botusapwila. Kadi, tusa kwisambila ne pa byabuntu biná bitupele Yehova bine bitukwasha twendelele kupa bipa.

 3. (a) Mungya Yoano 15:8, i bubinga’ka bukatampe bwine botusapwila? (b) Lelo mañanza a mu kyelekejo kya Yesu elekeja bika, ne mwanda waka kuno kudingakanya i kwendele’mo?

³ Bubinga bukatampe botusapwila i mwanda tusakanga kutumbija Yehova ne kupandula dijina dyandi. (Tanga Yoano 15:1, 8.) Yesu paāsekunwine kyelekejo kya muñanza, wādingakenye Yehova na kidimye nansha mudimi wa mañanza. Yesu wānenene amba aye mwine i muñanza, ne balondi bandi nabo i misambo. (Yoano 15:5) O mwanda mu kino kyelekejo, mañanza elekeja bipa bilupula bana ba bwanga ba Yesu, ko kunena’mba, mwingilo wa busapudi obengila. Yesu wāsapwidile batumibwa bandi amba: “Tata utumbijibwanga na kino, amba mupe’nka kupa bipa bingi.” Shi miñanza ibape mañanza mayampe, kidimye wayo usangalanga. Mu muswelo umo onka, potulonga bukomo bwetu bonso bwa kusapula musapu wa Bulopwe, tusangajanga Yehova nansha kumutumbija.​—Mateo 25:20-23.

 4. (a) Le i muswelo’ka otupandulanga dijina dya Leza? (b) Le wiivwananga namani pa dyese dyodi nadyo dya kupandula dijina dya Leza?

⁴ Dijina dya Leza adyo i dijila nyeke. Kekudipo kintu kyotubwanya kulonga pa kwidikadija dijila bininge. Penepo i muswelo’ka otupandulanga dijina dya Leza potusapula? Langulukila pa byānenene mupolofeto Isaya amba: “Yehova wa bibumbo o mukapandula.” (Isaya 8:13) Tupandulanga dijina dya Leza, Yehova, potwidimona bu dikatampe bininge kupita majina onso ne potukwasha bantu bakwabo bedimone amba i dijila. (Mateo 6:9) Kimfwa, potufundija bantu bubine butala pa ngikadila ya kutendelwa ya Yehova ne mpango yandi itala pa bantu ya kwikala na būmi bwa nyeke mu Paladisa, twibakwashanga bayuke amba bintu byonso bibi byobānenene Yehova kudi Satana i bya bubela. (Ngalwilo 3:1-5) Kadi tupandulanga dijina dya Leza potukwasha bantu bayuke amba Yehova ye ufwaninwe “kupebwa ntumbo ne bulēme ne bukomo.” (Kusokwelwa 4:11) Rune, waingile bu pania mu myaka 16 unena’mba: “Kuyuka’mba ne mupebwe mukenga wa kusapula myanda ya Umpangi wa diulu ne ntanda, kumpanga mutyima wa kufwija’ko. Kadi kumpanga mutyima wa kwendelela’nka na kusapula.”

 5. (a) Le Yoano 15:9, 10 utela bubinga’ka bwa kusapwila? (b) Le Yesu wākweshe namani bandi bana ba bwanga bevwanije amba bakasakilwa kūminina?

⁵ Tanga Yoano 15:9, 10. Bubinga bwa bubidi bwine botusapwila musapu wa Bulopwe, i mwanda tusenswe Yehova ne Yesu. (Mako 12:30; Yoano 14:15) Yesu wāsapwidile bandi bana ba bwanga’mba bafwaninwe ‘kwikala mu buswe bwandi.’ Mwanda waka Yesu wānenene namino? Mwanda wādi uyukile amba balondi bandi bakasakilwa kūminina pa kwikala bene Kidishitu ba bine. O mwanda, mu Yoano 15:4-10, Yesu wāingidije’mo misunsa mivule kishima “ikalai” mwanda wa kukwasha bandi bana ba bwanga bevwanije amba bakasakilwa kūminina.

 6. Lelo tulombolanga namani amba tusakanga kwikala mu buswe bwa Kidishitu?

⁶ Lelo tulombolanga namani amba tusakanga kwikala mu buswe bwa Kidishitu ne kwitabijibwa nandi? I na kumukōkela. Yesu witulombanga tulonge enka bintu byaālongele ne aye mwine. Wānenene amba: “Monka mondamine mbila ya Tata ne kwikala mu buswe bwandi.” Bine, Yesu i mwitushile kimfwa.​—Yoano 13:15.

 7. Lelo kikōkeji ne buswe i bikwatañane namani?

⁷ Yesu wālombwele patōka’mba kikōkeji kikwatañene na buswe paānenene amba: “Yewa udi na mbila yami ne kulama’yo ye unsenswe.” (Yoano 14:21) Mbila ya Yesu itambanga kudi Shandi, o mwanda shi tukōkela mbila ya Yesu ya kusapula, nabya tulombolanga kadi amba tusenswe Yehova. (Mateo 17:5; Yoano 8:28) Kadi shi tulombole ba Yehova ne Yesu amba twibasenswe, nabo baketulama mu buswe bwabo.

8, 9. (a) Le i bubinga’ka bukwabo botusapwila? (b) Lelo binenwa bya Yehova bidi mu Ezekyele 3:18, 19 ne 18:23 bitukankamika namani twendelele na kusapula?

⁸ Bubinga bwa busatu bwine botusapwila, i mwanda tusakanga kudyumuna bantu ku difuku dya Yehova dīya’di. Noa i mutelwe mu Bible bu “musapudi.” (Tanga 2 Petelo 2:5.) Kumeso kwa Dilobe, mu musapu wādi usapula Noa ku bantu, mwādi ne kidyumu kya bonakani bwādi bwibatengēle. Mwanda waka tubanena namino? Mwanda Yesu wānenene amba: “Monka mobādi bekadile mu oa mafuku a kumeso kwa Dilobe, badya batoma, bana-balume basonga, bana-bakaji nabo basongwa, kufika ne difuku dyātwelele Noa mu safina, kadi kebātele’kopo mutyima enka ne byāile Dilobe dyēbakomba bonso, ne kitatyi kya kwikala’po kwa Mwanā muntu nakyo kikekalanga’nka nabya.” (Mateo 24:38, 39) Nansha bantu bavule byokebātejejepo Noa, aye wāsapwile na kikōkeji musapu wa kidyumu wāmupele Yehova.

⁹ Dyalelo nadyo, tusapulanga musapu wa Bulopwe mwanda wa kupa bantu mukenga wa kwifunda bintu bikalongela Leza bantu mu mafuku āya kumeso. Pamo bwa Yehova, na bubine netu tusakanga bantu bate mutyima ku musapu amba bamone “būmi.” (Ezekyele 18:23) Potusapula ku njibo ne njibo ne mu bifuko mudi bantu bavule, tudyumunanga bantu bavule bene amba Bulopwe bwa Leza busa kwīya ne konakanya ino ntanda mibi.​—Ezekyele 3:18, 19; Danyele 2:44; Kusokwelwa 14:6, 7.

10. (a) Le Mateo 22:39 utela bubinga’ka bwine botusapwila? (b) Le ba Polo ne Shilasa bākweshe mulami wa kifungo mu Fidipai muswelo’ka?

¹⁰ Bubinga bwa buná botusapwila’nka kusapula, i mwanda tusenswe bantu. (Mateo 22:39) Buno buswe bwitukwashanga twendelele na kusapula, mwanda tuyukile amba bantu babwanya kushinta mumweno wabo shi ngikadilo yobadi’mo ibashinta. Kimfwa, balwana bāelele ba Polo ne Shilasa mu kifungo mu kibundi kya Fidipai. Ino pa bukata bwa bufuku, kwāikala kutenkana kwa ntanda kwine kwātenkenye kifungo ne kushitula bibelo byakyo. Mulami wa kifungo wākwatwa moyo amba bakutwa abanyema, kasake ne kwiipaya. Ino Polo wāmukankaja na kwela lubila’mba: “Kokelonga kibi!” Mulami wāmwipangula’mba: “Le nonge namani mpande?” Ba Polo ne Shilasa bāmulombola’mba: “Itabija mudi Mfumwetu Yesu usa kupanda.”​—Bilongwa 16:25-34.

11, 12. (a) Le nsekununi ya mulami wa kifungo itufundija bika pa mwingilo wa busapudi? (b) Mwanda waka tusakilwa kwendelela na kusapula?

¹¹ Le ino nsekununi ya mulami wa kifungo itufundija bika pa mwingilo wa busapudi? Ubamone amba mulami wa kifungo wāshintyile mumweno wandi ne kulomba bukwashi enka pāpwile kutenkana kwa ntanda’pa. Mu muswelo umo onka, bantu bamo bapela kwivwana musapu wa mu Bible, babwanya kushinta mumweno wabo ne kulomba bukwashi shi abatanwa na mwanda mubi mu būmi bwabo. Kimfwa, bantu bamo babwanya kutyumukwa mutyima pa kujimija kaji nansha kwilubula. Bakwabo nabo babwanya kwikala na njia mikatampe pa mwanda wa misongo mikatampe yobabela nansha pa mwanda wa muntu obasenswe wafwa. Shi bino bintu bibebatana, bantu babwanya kushilula kwiipangula bipangujo bitala pa būmi, bine byobadi kebalangulukīle’po kashā. Babwanya’nka ne kwiipangula’mba, ‘Le nonge namani mpande?’ Babwanya kusangela kwivwana musunsa wabo mubajinji mu bwabo būmi musapu wa lukulupilo otusapula.

¹² Shi twendelele kusapula na kikōkeji, nabya tukakwasha bantu kitatyi kyobasaka kwitabija busengi botwibasenga. (Isaya 61:1) Charlotte, waingile bu pania mu myaka 38, unena’mba: “Dyalelo bantu i bajimine. O mwanda basakilwa mukenga wa kwivwana myanda miyampe.” Ejvor, waingile bu pania mu bula bwa myaka 34, unena’mba: “Dyalelo, bantu bavule bemonanga bule mu muswelo kewamwekele kashā. Nsakanga bine kwibakwasha. Kino kinkwashanga nsapule bininge.” Na bubine, kusanswa bantu i bubinga bulumbuluke’po kashā bwa kwendelela na kusapula!

13, 14. (a) Le i kyabuntu’ka kitelelwe mu Yoano 15:11? (b) Le i muswelo’ka otubwanya kwikala na nsangaji yādi na Yesu? (c) Le nsangaji itukwashanga namani mu mwingilo?

¹³ Mu bufuku bukya ke lufu lwandi, Yesu wātelele ne byabuntu bikakwasha batumibwa bandi bendelele kupa bipa. Le bino byabuntu i byabuntu’ka, ne i muswelo’ka obibwanya kwitukwasha dyalelo?

¹⁴ Kyabuntu kya nsangaji. Le tumonanga kusapula bu kiselwa kilēma? Nansha dimo. Yesu pa kupwa kwisambila pa kyelekejo kya muñanza, wānenene amba kitatyi kyotusapula tukekala na nsangaji yandi. (Tanga Yoano 15:11.) Namani? Vuluka, mu kyelekejo kya Yesu, wēdingakenye aye mwine na muñanza, bandi bana ba bwanga nabo bu misambo. Misambo ikokanga mema ne bintu bya bumeni byoisakilwa enka shi ilamete nyeke ku muñanza. Mu muswelo umo onka, tubwanya kwikala na nsangaji pamo bwa Yesu enka shi twikale nandi nyeke mu bumo ne kulonda senene matabula andi. Mu uno muswelo, tukekala na nsangaji yaādi nayo, ko kunena’mba nsangaji itamba ku kulonga kiswa-mutyima kya Leza. (Yoano 4:34; 17:13; 1 Petelo 2:21) Hanne, waingile bu pania mu myaka 40 ne kupita, unena’mba, “Nsangaji yongivwananga nyeke pa kupwa kutambila mu busapudi inkankamikanga ñendelele kwingidila Yehova.” Nsangaji iketupa bukomo bwa kwendelela kusapula nansha shi bantu bavule bapela musapu.—Mateo 5:10-12.

15. (a) Le i kyabuntu’ka kitelelwe mu Yoano 14:27? (b) Le ndoe itukwashanga namani twendelele kupa bipa?

¹⁵ Kyabuntu kya ndoe. (Tanga Yoano 14:27.) Mu kyolwa kibadikila lufu lwandi, Yesu wāsapwidile batumibwa bandi amba: “Nemupe ndoe yami.” Le ndoe ya Yesu ibwanya kwitukwasha namani twendelele kusapula? Shi twendelele kusapula, nabya tukekala na ndoe mwanda tuyukile amba tusangajanga Yehova ne Yesu. (Ñimbo ya Mitōto 149:4; Loma 5:3, 4; Kolose 3:15) Ulf, waingile bu pania mu bula bwa myaka 45, unena’mba, “Mwingilo wa busapudi unkokejanga, ino umpanga nsangaji ya bine ne kumona’mba būmi bwami budi na kitungo.” Tufwijanga’ko bininge pa kwikala na ndoe ya endaenda!

16. (a) Le i kyabuntu’ka kitelelwe mu Yoano 15:15? (b) Le batumibwa bādi babwanya namani kwikala nyeke balunda ba Yesu?

¹⁶ Kyabuntu kya bulunda. Yesu pa kupwa kulombola batumibwa bandi amba wibasakilanga bekale na nsangaji, wēbashintulwidile mwanda waka i kya kamweno balombole buswe bwampikwa kwisakila. (Yoano 15:11-13) Kupwa wānena’mba: “Nemwite bu balunda.” Bine kwikala mulunda na Yesu, i kyabuntu kiyampe’po kashā! Ino le batumibwa bādi ba kwikala nyeke balunda nandi namani? Yesu wānenene amba: “Mwendelele kadi mupe’nka kupa bipa.” (Tanga Yoano 15:14-16.) Mu muneneno mukwabo, i kwendelela na kusapula. Kintu kya myaka ibidi kunyuma, Yesu wāsapwidile batumibwa bandi amba: “Pomwenda, sapulai amba: ‘Bulopwe bwa mūlu bubafwena pabwipi.’” (Mateo 10:7) O mwanda mwine, mu bufuku bukya ke lufu lwandi, Yesu wākankamikile bana bandi ba bwanga bōminine mu mwingilo wa busapudi. (Mateo 24:13; Mako 3:14) Na bubine, Yesu wādi uyukile amba kulama mbila yandi ke kupēlangapo. Ino bana bandi ba bwanga bādi ba kubwanya kulama’yo ne kwikala nyeke balunda nandi. Namani? Na bukwashi bwa kyabuntu kikwabo.

17, 18. (a) Le i kyabuntu’ka kitelelwe mu Yoano 15:7? (b) Le kino kyabuntu kikwashanga namani bana ba bwanga ba Yesu? (c) Le i byabuntu’ka bitukwasha dyalelo?

¹⁷ Kyabuntu kya kulondololwa milombelo yetu. Yesu wānenene amba: “Lombai kintu kyonso kyomusaka ne kikemulongelwa.” (Yoano 15:7, 16) Uno mulao wa Yesu ye uno wākomeje bininge batumibwa bandi!a (Tala kunshi kwa dyani.) Batumibwa kebāivwanijepo senene amba Yesu kasa kufwa. Ino lufu lwandi kelushintululapo amba bādi ba kubulwa mukwashi. Yehova wādi wa kulondolola milombelo yabo ne kwibakwasha mu mwingilo wabo wa busapudi. Ne ye byaālongele. Kinondanonda na kufwa kwa Yesu, batumibwa bāzenzele Yehova ebape bukankamane, kadi Yehova wālondolwele milombelo yabo.​—Bilongwa 4:29, 31.

¹⁸ Ne dyalelo nadyo mo monka. Shi tūminine mu mwingilo wa busapudi, nabya tukekala nyeke balunda na Yesu. Kadi tukulupilei amba Yehova ukalondolola milombelo yetu yotumulomba etukwashe shi tubamone amba i bikomo kusapula. (Fidipai 4:13) Tufwijanga’ko Yehova bininge pa kulondolola milombelo yetu ne pa kwikala balunda na Yesu. Bino byabuntu bitamba kudi Yehova bitukomejanga twendelele kupa bipa.​—Yakoba 1:17.

19. (a) Mwanda waka twendelelanga na kusapula? (b) Le i bika bitukwashanga twingile mwingilo witupele Leza?

¹⁹ Mu kino kishinte, tubefunde’mo bubinga buná bwine botusapwila: kutumbija Yehova ne kupandula dijina dyandi, kulombola buswe botusenswe Yehova ne Yesu, kudyumuna bantu, ne kulombola buswe botusenswe bantu. Kadi tubayuka’mo byabuntu biná: nsangaji, ndoe, bulunda, ne kulondololwa milombelo yetu. Bino byabuntu bitukomejanga twingile mwingilo witupele Leza. Yehova usangalanga bininge paetumona tulonga bukomo bwa ‘kupa’nka kupa bipa bingi’!