KIFUNDWA 18
Mwa Kuyukila Bene Kidishitu ba Bine
Bantu bavule betelanga bu bene Kidishitu. Inoko abo bonso kebadipo na nkulupilo imo, kadi kebalondangapo mu būmi misoñanya imo. Pene’po, le tukajingulula namani bene Kidishitu ba bine?
1. Le bene Kidishitu i bāni?
Bene Kidishitu i bana ba bwanga, nansha’mba balondi ba Yesu Kidishitu. (Tangai Bilongwa 11:26.) Le balombolanga namani amba i bana ba bwanga ba Yesu? Yesu wānenene amba: “Shi mwikale mu mwanda wami, nabya mwi bami bana ba bwanga binebine.” (Yoano 8:31) Kino kishintulula’mba bene Kidishitu ba bine bafwaninwe kukōkela bufundiji bwa Yesu. Kadi monka mwālupwidile Yesu bufundiji bwandi mu Bisonekwa, ne bene Kidishitu ba bine nabo balupulanga nkulupilo yabo mu Bible.—Tangai Luka 24:27.
2. Le bene Kidishitu ba bine bamwekejanga namani buswe?
Yesu wāsapwidile balondi bandi amba: “Amba mwisanswe banwe bene na bene monka monemusanshilwe.” (Yoano 15:12) Le Yesu wālombwele namani amba usenswe bana bandi ba bwanga? I na kupityija kitatyi kyandi pamo nabo, kwibakankamika, ne kwibakwasha. Wēbapānine’nka ne būmi bwandi. (1 Yoano 3:16) Mo monka ne bene Kidishitu dyalelo, kebemaninangapo’tu’nka pa kwisambila pa buswe. Ino bamwekejanga mu binenwa ne mu bilongwa’mba besenswe abo bene na bene.
3. Le bene Kidishitu ba bine i bepāne mu mwingilo’ka?
Yesu wāpēle bandi bana ba bwanga mwingilo wa kwingila. “Webatuma kukasapula Bulopwe bwa Leza.” (Luka 9:2) Bene Kidishitu babajinji bādi basapula, ke’nkapo mu bifuko mobatōtela, ino kadi i ne mu bifuko munangila bantu bavule ne ku mobo a bantu. (Tangai Bilongwa 5:42; 17:17.) Mo monka ne dyalelo nadyo bene Kidishitu ba bine basapulanga bubine bwa mu Bible konso kobatana bantu. Basenswe bantu-nabo, kadi basangelanga kwingidija kitatyi kyabo ne bukomo bwabo mwanda wa kwibasapwila musapu wa mu Bible uleta lukulupilo ne busengi.—Mako 12:31.
LANGULUKA BININGE
Bandaula umone muswelo obwanya kushiyañanya bene Kidishitu ba bine na bantu kebalondapo bufundiji bwa Yesu ne kimfwa kyandi.
4. Bakimbanga bubine bwa mu Bible
Bene Kidishitu babajinji bādi basenswe Kinenwa kya Leza
Ke bonsopo betela bu bene Kidishitu balēmekele bubine bwa mu Bible. Talai VIDEO, ne kwisambila pa kipangujo kilonda’kya.
Le bipwilo bītela bu bya bwine Kidishitu byakomenwe namani kufundija byobya byāfundije Yesu?
Yesu wāfundije bubine bwa mu Kinenwa kya Leza. Tangai Yoano 18:37, ne kwisambila pa kino kipangujo:
Mungya Yesu, i muswelo’ka otubwanya kuyuka bene Kidishitu badi “ku mutamba wa bubine”?
5. Basapulanga bubine bwa mu Bible
Bene Kidishitu babajinji bādi basapwila bantu
Yesu, kumeso kwa kwenda mūlu, wāpēle balondi bandi mwingilo ukyendelela ne dyalelo. Tangai Mateo 28:19, 20 ne Bilongwa 1:8, ne kwisambila pa kino kipangujo:
Lelo mwingilo wa kusapula wadi wa kufika ne kwepi?
6. Baloñanga mungya byobasapula
Le i bika byakulupije muntu witwa bu Tom amba pano wasokola bwine Kidishitu bwa bine? Talai VIDEO, ne kwisambila pa bipangujo bilonda’bya.
Mu ino video, i bika byalengeje Tom ashikwe myanda ya kipwilo?
Mwanda waka i mukulupile na kusumininwa’mba wasokola bubine?
Bilongwa binenanga kupita ne binenwa. Tangai Mateo 7:21, ne kwisambila pa kino kipangujo:
Le kya mvubu mpata kudi Yesu i kyepi—i byobya byotunena’mba ye byotukulupile’ni nansha i byobya byotumwekeja na bilongwa byetu?
7. Besenswe abo bene na bene
Bene Kidishitu babajinji bādi besenswe abo bonso
Lelo bene Kidishitu ke basake kujimija būmi bwabo pa mwanda wa bene Kidishitu bakwabo? Talai VIDEO, ne kwisambila pa bipangujo bilonda’bya.
Mu ino video, i kika kyatonwene Tutu Lloyd asake kujimija būmi bwandi pa mwanda wa Tutu Johansson?
Le ulanga bino byaalongele bilombola’mba i mwine Kidishitu wa bine?
Tangai Yoano 13:34, 35, ne kwisambila pa bino bipangujo:
Lelo bana ba bwanga ba Yesu (nansha’mba bene Kidishitu ba bine) badi ba kumona namani bantu ba misaka ingi ne ba mizo ingi?
Le badi ba kulombola kino namani mu kitatyi kya mavita?
BANTU BAMO BANENANGA’MBA: “Bene Kidishitu i balonge bintu bya munyanji—le babwanya namani kwikala bu kipwilo kya bine?”
I kisonekwa’ka kyobwanya kupa muntu kilombola muswelo wabwanya kuyuka bene Kidishitu ba bine?
MU KĪPI
Bene Kidishitu ba bine balondanga bufundiji bwa mu Bible, balombolanga buswe bwampikwa kwisakila, kadi basapulanga bubine bwa mu Bible.
Pitulukai’mo
Lelo bene Kidishitu ba bine balupulanga nkulupilo yabo kwepi?
I ngikadila’ka iyukilwanga’ko bene Kidishitu ba bine?
Lelo i mwingilo’ka wingilanga bene Kidishitu ba bine?
KIMBA
Yukila’ko bivule pa kisumpi kimo kya bantu bekankila’ko kulonda kimfwa kya Yesu ne bufundiji bwandi.
Tala byobya byatwele masele umo ku kusokola “kisaka kya bine kya ku mushipiditu.”
“Balondolwele Bipangujo Byonso na Bible!” (Kiteba kya Mulami, 1 Kweji 4, 2014)
Tala bene Kidishitu ba bine mobalombwelanga buswe ku batōtyi-nabo basakilwa bukwashi.
Tukwashanga Banabetu Pobaponenwa na Bimpe-ngele—Kakipindi (3:57)
Tala bene Kidishitu babajinji ne bene Kidishitu ba bine dyalelo mobamwekejeja kiyukeno kyānenene Yesu amba kyo kya kuyukila’po balondi bandi.
“Le I Biyukeno’ka bya Kuyukila’po Bwine Kidishitu bwa Bine?” (Kiteba kya Mulami, 1 Kweji 4, 2012)