‘Le Bubinebine i Kika?’

BANTU babidi bādi betala mpala na mpala bādi beshīle bininge. Umo wādi muntu wakipolitike wādi na kafutululo, wādi na kilokoloko kikatampe kyakusaka ntumbo, wādi na bupeta buvule, ne wakampeja​—⁠bukidi ka kusaka kulonga kintu kyo kyonso mwanda wa mwingilo wandi wendelele kumeso. Mukwabo nandi wādi mwadimu wāpelele kwikala na lupeto luvule ne ntumbo ku bantu ne wādi mwiteakanye mwanda wa kupāna būmi bwandi bwi kitapwa kya kukūla būmi bwa bakwabo. Kimweka’tu patōka’mba bano bantu babidi bādi na milangwe mishīle! Nakampata, mu mwanda umo, bādi na milangwe mishīle bininge​—⁠mwanda utala bubinebine.

Bano bantu bādi i Pontyusa Pilato ne Yesu Kristu. Yesu wāimikilwe kumeso a Pilato pamo bwa ñonga bubi wātopekelwe. Mwanda waka? Yesu ushintulula’mba buluji bwine​—⁠kyabine, buluji bwabine bwāidile pano pantanda ne kushilula mwingilo wandi⁠—​kyādi pamwanda wa kintu kimo: bubinebine. Wānene’mba: “Po pa mwanda o nabutwidilwe pano, ne o naīdile pano panshi na’mba, nkebasapwile [bubinebine, NW].”​—⁠Yoano 18:⁠37.

Malondololo a Pilato kyādi kipangujo kyakafutululo amba: “Le bubinebine nabo i kika?” (Yoano 18:38, MB) Nabubine lelo wādi usaka kuyuka malondololo? Kimweka bu ke amopo. Yesu wādi muntu wādi ukokeja kulondolola ku kipangujo kyo kyonso kipangwilwe pakubulwa budimbidimbi, ino kālondolwelepo Pilato. Ne Bible unena’mba kupwa kwa kwipangula kipangujo kyandi, pakubulwa nansha kwelaija kwine, Pilato wātambile wāenda mu kyumba mutyibilwanga mambo. Kimweka bu Mbikavu mwine Loma wāipangwile kipangujo mwanda wa kulombola kafutululo ka kupela kwitabija, pamo bwa aye unena’mba: “Bubinebine? I kintu’ka? Kebwikalangakopo ne kwikala kwine!”