Yesu Walonga Bingelengele Bivule

Yesu wāile pano pa ntanda mwanda wa kusapula myanda miyampe ya Bulopwe bwa Leza. Yehova wāpēle Yesu mushipiditu wandi ujila alonge bingelengele, mwanda wa kulombola byakalonga pakekala Mulopwe. Wābelwile misongo ya miswelo yonso. Konso kwaādi wenda, bantu babela bādi bāya ebakwashe, nandi wādi wibondapa bonso. Bampofu bādi bamona, ba bitwi bevwana, bantu ba bulebe benda, ne boba bādi bakwatwe na bandemona nabo bānyongololwa. Enka ne bantu bādi batenga’tu ku milo ya kivwalwa kya pangala kya Yesu, bādi bakoma. Bantu bādi balonda Yesu konso kwaādi wenda. Nansha ke paādi usaka kushikata bunka, Yesu kādipo upanga muntu nansha umo.

Difuku dimo, bantu bāletele mwana-mulume umo wa bulebe kwinjibo kwādi Yesu. Inoko ku njibo kwādi kuyule bā bibumbo bya bantu, bākomenwa kwa kumutwejeja. Ebiya bāsaba kipunzu pa musaka wa njibo, bātūkijija’po mwana-mulume’wa mudi Yesu. Penepo Yesu wālombola mwana-mulume’wa amba: ‘Imana wende.’ Aye pa kwimana, bantu bātulumuka.

Difuku dikwabo, Yesu pa kutwela mu kibundi kimo kityetye, wātene bana-balume dikumi ba makopo bemene dya kulampe kebamwela mabila’mba: ‘Yesu, witukwashe’ko!’ Mu mene mafuku’a, bantu ba makopo bādi bebapeleje kufwena bantu bakwabo. Yesu wāsapwila bano bana-balume bende ku tempelo, monka mwādi musoñaninye’kyo Bijila bya Yehova kulonga shi muntu wa makopo wakoma. Pobādi benda ku tempelo, bākoma. Wa makopo umo pa kujingulula’mba wakoma, wājoka kufwija’ko Yesu ne kutendela Leza. Mu bano bantu dikumi ba makopo, muntu umo kete ye wājokele kufwija’ko Yesu.

Kudi mwana-mukaji umo wādi ke mulonge myaka 12 na misongo, kādipo ulanga’mba ukikoma. Wāendele kunyuma kwa Yesu mu kibumbo, wāmutenga ku milomo ya kivwalwa kyandi kya pangala. Ponka na ponka, wākoma. Aye pa kukoma, Yesu wāipangula’mba: “I ani wantenga?” Mwana-mukaji’wa wāenda kudi Yesu, wāmulombola byonso koku uzakala. Yesu wāmusenga na kumunena’mba: ‘A mwanami, enda mu ndoe.’

Kudi mwendeji umo wa shinankonka witwa bu Yelusa wāzenzele Yesu amba: ‘Twaya kwami! Wami mwana mwana-mukaji ubela bininge.’ Inoko kumeso kwa Yesu kukafika ku njibo ya Yelusa, mwana’wa wāfwa. Yesu pa kufika’ko, wātana bantu bavule badila. Yesu wēbanena’mba: ‘Lekai kudila; mwana’u ulēle’tu.’ Ebiya wākwata mwana’wa ku kuboko, wāmunena’mba: “A mwana, imana!” Mwana’wa wāimana ponka na ponka, Yesu wāsapwila bambutwile bandi amba mupei byakudya. Langa’po bidi mwēivwanine bambutwile bandi!