Binena Bible pa Mafuku a Kumeso

FWATAKANYA’PO wenda mu dishinda mudi fututu, kapita ke kāni. Nansha byokebwile kala, abe ukulupile amba kubwanyapo kujimina, mwanda udi na kimuni kimunika biyampe. Abe pa kumunika’kyo panshi, ubamone senene byonso bidi’po. Kadi abe ukisa’kyo kumeso na palampe mu dishinda, mikejima yakyo ibatōkeja konso tō.

Mo monka, Bible nandi udi pamo bwa kino kimuni. Enka na motwekimwena mu bishinte bibadikile’bi, Kinenwa kya Leza kibwanya kwitukwasha tumone mwa kulwila na bintu bidi ku meso kwetu​—ke makambakano a bukile-bukya kadi, otulwa nao mu ino ntanda mibi. Inoko Bible kemaninepo’nka pa bino. Kadi witumunikilanga tuyuke bintu bya kumeso, ne kwitupa mukenga wa kusokola ne kulonda kashinda katwala ku nsangaji ya nyeke ne kuloelelwa. (Ñimbo ya Mitōto 119:105) Muswelo’ka?

Lekai tubandaule’ko miswelo ibidi, mwine mwitupa Bible lukulupilo lwa kumeso: 1 Witukwashanga twikale na būmi budi na kitungo, ne 2 witufundijanga mwa kwikadila balunda na Umpangi wetu nyeke.

Bible witupanga madingi mayampe a mwa kulwila na makambakano etu, mene apityile kulampe kwine a mu mabuku makwabo. Pa kyaba kya kwitukankamika tute mutyima’nka ku tumweno twa batwe bene, inoko Bible aye witufundijanga twikale na mumweno mujalale. Namino, būmi bwetu bwikalanga na kitungo kya binebine.

Kimfwa, tala bidi uno musoñanya wa mu Bible: “Nsangaji ya kupāna itabukile ya kupebwa.” (Bilongwa 20:35) Le ubavuluka kitatyi kyowakweshe muntu wadi usakilwa bukwashi na tubintu kampanda? Nansha padi le wetūdile’ko kitatyi kya kuteja mulunda nobe paadi ukusapwila myanda imudi ku mutyima? Lelo kwaloelelwepo mpata pa kulengeja uno muntu ekale na nsangaji mu dine difuku’dya?

Twikalanga na nsangaji mikatampe shi tupāna pampikwa mutyima wa kwalwijibwa. Mulembi umo wanenene amba: “Na bubine ukapebwa bintu bivule kupita byopāna​—shi upāna pampikwa mulangwe wa kwalwijibwa.” Shi tupāna​—nakampata ku bantu bafudilwe kebabwanyapo kwitwalwija kintu kampanda​—nabya tukapalwa mpalo. Twiivwananga biyampe. Na bubine, twingilanga kakasa kwa kakasa na Umpangi wetu, mwine umonanga bino bilongwa bya kanye bu ndeni yotumwapwija. (Nkindi 19:17) Umwene na mvubu mpata byonso byotulongela boba bafudile, kadi ulaile kwitupala mpalo ya kintu kya mvubu mpata, ke būmi bwa nyeke kadi mu Paladisa pano pa ntanda​—na bubine luno i lukulupilo lwa nsangaji lwa mu mafuku a kumeso!​—Ñimbo ya Mitōto 37:29; Luka 14:12-14.a

Kya mvubu nakampata, Bible witufundija’mba tubwanya kwikala na būmi bwa kitungo na kutōta Leza wa bine, Yehova. Kinenwa kyandi kitukankamikanga tumutendele, tumukōkele ne kumupa bulēme bumufwaninwe. (Musapudi 12:13; Kusokwelwa 4:11) Shi tulonge uno muswelo, nabya tubalonga kintu kya mvubu mpata: Ke kusangaja Umpangi wetu kadi. Witusoñanyanga’mba: “Wikale wañeni ne kusangaja mutyima wami.” (Nkindi 27:11) Bine​—shi tukwata butyibi bwa tunangu bwimanine pa misoñanya ya mu Bible, nabya tusangajanga mutyima wa Tata wetu wa buswe udi mūlu. Mwanda waka? Mwanda witutele mutyima kadi witusakilanga tumwene mu kulonda buludiki bwandi. (Isaya 48:17, 18) Bine, le kudi kitungo kipityile kutōta Mubikadi wa diulu ne ntanda ne kwikala na mwiendelejo umusangaja?

Kadi Bible witufundija tupwane na Umpangi wetu. Bisonekwa binena’mba: “Fwenai kudi Leza, nandi ukemufwena.” (Yakoba 4:8) Kyaba kimo tubwanya kutatana shi bine tubwanya kwikala balunda na Umpangi Mwinē Bukomo Bonso. Inoko Bible witukulupija’mba shi ‘tukimbe Leza,’ nabya ‘tukamusokola binebine’ mwanda kadipo “kulampe na batwe bonso.” (Bilongwa 17:27) Bine, madingi a Bible a kupwana na Leza i a kamweno mpata ne mu būmi bwetu bwa kumeso. Muswelo’ka?

Tala bidi uno mwanda: Nansha shi tulonge namani, i kutupu muntu nansha umo ubwanya kwinyongolola mu lufu​—walwana netu mukomokomo. (1 Kodinda 15:26) Inoko, Leza udi’ko nyeke. Kakafupo nansha dimo, kadi usakilanga balunda nandi bekale’ko nyeke ne nyeke. Bible ulombola byobya bisakila Yehova boba bamukimba na kwingidija bino binenwa bilumbuluke bya amba: “Mutyima obe wikale wa būmi bwa nyeke.”​—Ñimbo ya Mitōto 22:26.

Lelo i muswelo’ka obwanya kwikala mu kipwano kya nyeke na Leza? Endelela nyeke na kwifunda myanda yandi mu Kinenwa kyandi Bible. (Yoano 17:3; 2 Temote 3:16) Mulombe akukwashe wivwanije Bisonekwa. Bible witukulupija’mba shi tulomba tunangu “nyeke kudi Leza,” nabya nandi uketupa’to.b (Yakoba 1:5) Shi ke pano, longa bukomo bwa kwingidija byobya byowifunda, leka Kinenwa kya Leza kikwikadile bu “kinanu kya ku maulu [obe]” ne bu “kitōkeji kya mu dishinda [dyobe]”​—tamba’nka dyalelo ne nyeke ne nyekeke.​—Ñimbo ya Mitōto 119:105.