KIFUNDWA 21
Lelo Myanda Miyampe Isapulwanga Namani?
Yehova usa kufudija panopano ponka makambakano etu onso kupityila ku Bulopwe bwandi. Ino nayo i myanda miyampe mpata yoketubwanyapo kwilamina batwe bene. Yesu wāsoñenye balondi bandi basapwile’yo bantu bonso! (Mateo 28:19, 20) Lelo Batumoni ba Yehova i betabe namani ku uno musoñanya wa Yesu?
1. Lelo Mateo 24:14 ufikidilanga namani dyalelo?
Yesu wālaile amba: “Ino myanda miyampe ya Bulopwe ikasapulwa pa ntanda yonso ikelwe na bantu.” (Mateo 24:14) Batumoni ba Yehova i basangele kwingila uno mwingilo wa mvubu mpata. Tusapulanga myanda miyampe ntanda yonso mu ndimi 1 000 ne kupita! Uno mwingilo mukatampe ulombanga bukomo bwa pa bula ne bulongolodi. Keubwanikapo pampikwa bukwashi bwa Yehova.
2. Le i manwa’ka otukwete pa kufikila bantu?
Tusapulanga konso kotubwanya kutana bantu. Pamo’nka bwa bene Kidishitu ba mu myaka katwa kabajinji, netu tusapulanga “ku njibo ne njibo.” (Bilongwa 5:42) Ano manwa etukwashanga tufikile midiyo ne midiyo ya bantu mwaka ne mwaka. Bantu bakwabo byokebekalangapo ku mobo, o mwanda tusapulanga ne mu bifuko mutanwa bantu bavule. Tukimbanga nyeke mikenga ya kusapwila bantu myanda ya Yehova ne mpango yandi.
3. Le i ani udi na kiselwa kya kusapula myanda miyampe?
Bene Kidishitu bonso ba bine badi na kiselwa kya kusapwila bantu myanda miyampe. Tukwete na bulēme uno mwingilo. Tusapulanga bininge mungya ngikadilo yetu, mwanda tuyukile amba būmi bwa bantu budi mu kyaka. (Tangai 1 Temote 4:16.) Ketufutwangapo potwingila uno mwingilo, mwanda Bible unena’mba: “Mubatambula ku bitupu, nenu pānai ku bitupu.” (Mateo 10:7, 8) Ke bonsopo betabijanga musapu wetu. Inoko batwe twendelelanga’nka na kusapula, mwanda kusapula kubadilwa mu butōtyi bwetu kadi kusangajanga Yehova.
LANGULUKA BININGE
Bandaula bukomo bulonga Batumoni ba Yehova bwa kusapula ntanda yonso, kadi umone ne muswelo witukwasha Yehova.
Tusapulanga ntanda yonso: (A) Kosita Rika, (B) États-Unis, (C) Bénin, (D) Tailande, (E) Yape, (F) Suede
4. Tuloñanga bukomo bwa kufikila bantu bonso
Batumoni ba Yehova baloñanga bukomo bwa pa bula mwanda wa kusapula myanda miyampe ku bantu ba mu bifuko byonso. Talai VIDEO, ne kwisambila pa kino kipangujo:
Le i bika byakutulumuna pa bukomo bulonga Batumoni ba Yehova bwa kusapula?
Tangai Mateo 22:39 ne Bene Loma 10:13-15, ne kwisambila pa bino bipangujo:
Le mwingilo wetu wa busapudi ulombola namani amba tusenswe bakwetu?
Lelo Yehova umonanga namani boba basapula myanda miyampe?—Tala vese 15.
5. Twi bengidi bengila pamo na Leza
Myanda mivule mimweke ilombola’mba Yehova ye wendeja mwingilo wetu. Kimfwa mu Nuvele-Zelande tutu Paul paadi usapula ku njibo ne njibo mu dyuba kapuwe, watene mwana-mukaji umo. Lubanga, uno mwana-mukaji walombele kudi Leza na kutela dijina dya Leza, Yehova, mwanda wa muntu umo āye amupempule. Tutu Paul unena’mba, “Mansá asatu pa kupita’po, nami nafika ku njibo yandi.”
Tangai 1 Bene Kodinda 3:9, ne kwisambila pa kino kipangujo:
Lelo myanda mimweke pamo bwa uno wa mu Nuvele-Zelande, ilombola namani amba Yehova wendejanga mwingilo wa busapudi?
Tangai Bilongwa 1:8, ne kwisambila pa kino kipangujo:
Mwanda waka tusakilwa bukwashi bwa Yehova pa kuvuija mwingilo wetu?
Le wadi uyukile?
Yenga ne yenga, ku kupwila kwetu kwa mu bukata bwa yenga, betwibidijanga’ko mwa kusapwila. Shi watenwe’ko dimo, le wamwene namani bufundiji bwadi’ko?
6. Tukōkelanga musoñanya wa Leza wa kusapula
Mu myaka katwa kabajinji, balwana bādi bakankaja balondi ba Yesu baleke kusapula. Bene Kidishitu babajinji bālwidile bwanapabo bwa kusapula ‘myanda miyampe ne kuningija’yo ku meso a ba lupusa.’ (Bene Fidipai 1:7) Byo bilonga ne Batumoni ba Yehova dyalelo.a
Tangai Bilongwa 5:27-42, ne kwisambila pa kino kipangujo:
MUNTU UBWANYA KWIPANGULA’MBA: “Mwanda waka Batumoni ba Yehova bendanga ku njibo ne njibo?”
Le ukamulondolola namani?
MU KĪPI
Yesu wāsoñenye balondi bandi basapule myanda miyampe ku mizo yonso. Yehova ukwashanga bantu bandi bengile uno mwingilo.
Pitulukai’mo
Lelo myanda miyampe isapulwanga ntanda yonso namani?
Mwingilo wetu wa kusapula ulombolanga namani amba tusenswe bantu-netu?
Le ulanga kusapula i mwingilo usangaja? Mwanda waka ubanena nankyo?
KIMBA
Tala muswelo usapula Batumoni ba Yehova ku bantu badi mu bibundi bikatampe.
Bukamoni bwa pa Bula mu Bifuko bya Bantu Bavule mu Paris (5:11)
Le Batumoni ba Yehova i basapule namani ku balefije?
Teja binena muntu umo pa mwawaikadile na nsangaji pa kupityija būmi bwandi mu mwingilo wa kitatyi kyonso.
Tala bushindañani bumobumo bwa mu bidye mobwaendeleje kumeso busapudi bwa myanda miyampe.
“Basapudi ba Bulopwe Abakasamba mu Kidye” (Bulopwe bwa Leza Buludikanga!, shapita 13)
a Leza ye witupele lupusa lwa kwingila uno mwingilo. Nanshi Batumoni ba Yehova kebasakilwapo kupebwa lupusa na muntu kampanda lwa kusapula myanda miyampe.