FWENAI KUDI LEZA

‘Ngikadilo Yandi Yampikwa Kumweka Idi Padi Tō’

Le ukulupile mudi Leza? Shi i amo, le ubwanya kuleta bukamoni bulombola’mba udi’ko? Bubinebine i buno’mba, tujokolokelwe na bukamoni bwa Umpangi wa tunangu, bukomo ne buswe. Le buno i bukamoni’ka ne kebupatanibwapo namani? Pa kulondolola, bandaula binenwa bya mutumibwa Polo bisonekelwe mu mukanda waātumine bene Kidishitu ba mu Loma.

Polo wānene amba: ‘Ngikadilo ya Leza yampikwa kumweka, ku kupanga kwa pano pa ntanda i mimwekelele’tu, padi tō, pa kuyūkanibwa pa bintu bipangibwe, ke bukomo bwandi bwa nyeke, ne bu-Leza bwandi kadi; ponka’po abo ne mwa kwikañenya mwabulwa.’ (Loma 1:20) Umpangi i mushiye kayukeno pa mwingilo wandi onso, monka mulombwedile’kyo Polo. Tubandaulei’ko bidi binenwa bya Polo.

Polo unena’mba, ngikadilo ya Leza ibwanya kumweka “ku kupanga kwa panopantanda.” Mu bino binenwa, kishima kya Kingidiki kyalamwinwe bu ‘ntanda’ kekifunkilangapo pa umbuo wa Ntanda. Ino, kifunkilanga pa bantu.a Nanshi, Polo pano unena’mba kitatyi kyāpangilwe bantu, bādi babwanya kumona bukamoni bwa ngikadilo ya Umpangi mu bintu byapangile.

Buno bukamoni i byonso bitujokolokele. Kebifyemepo mu bupangi ino bidi “padi tō.” Bupangi bukatakata ne butyetye bulombola patōkelela amba kudi Umpangi ne amba udi na ngikadilo ya kutendelwa. Lelo bipangwa bya ñeni bimweka mu bupangi kebilombolapo tunangu twa Leza? Lelo madiulu atoywele ñenyenye ne makumbi kebilombolapo bukomo bwandi? Lelo kwishila kwa bidibwa bisangaja kilango kyetu ne buya bwa kutamba ne kupona kwa dyuba, kebilombolapo buswe bwaswele bantu?​—Mitōto 104:24; Isaya 40:26.

Mwene bukamoni budi padi tō? Bibamweka patōka’mba, boba kebebumwenepo ne boba bapela kukulupila mudi Leza kebadipo “mwakwikañenya.” Mufundi umo welekeja’kyo uno muswelo amba: Langa’po bidi shi shofele kayukilepo kiyukeno kilombola’mba, “Joka​—Tonta ku Lunkuso.” Komanda wa bampulushi wamwimika kamulembela kakanda ka kufuta lupeto. Shofele watompa kutoloma’mba nkyadipo mwene kiyukeno. Ino komanda wapele kumufwila lusa mwanda kiyukeno kidi padi tō, kadi shofele kabelangapo meso. Kutentekela pa bu shofele, udi na kiselwa kya kutala ne kuta mutyima ku bino biyukeno. Mo mobikadile ne na bukamoni bwa Leza budi mu bupangi. Kino “kiyukeno” kidi padi tō. Byotudi bipangwa bilanguluka, tubwanya kumona kino kiyukeno. Kekudipo bubinga bwa kulekela kwikiyuka.

Na bubine, dibuku dya bupangi dilombola bivule padi Umpangi wetu. Ino kudi ne dibuku dikwabo dilombola bivule kutabuka padi Leza​—ke Bible kadi. Kupityila ku bisonekwa bidi’mo, tubwanya kuyuka malondololo a kino kipangujo kya mvubu kya amba: Lelo Leza udi na mpango’ka itala ino ntanda ne bantu badi’po? Kuyuka malondololo a kino kipangujo kubwanya kukukwasha ufwene kudi Leza wa ‘ngikadilo yandi yampikwa kumweka idi padi tō’ mu ntanda itujokolokele.