Kulēmeka Lupusa—Mwanda Waka I kwa Kamweno?

LELO kudi utunyanga kufwija’ko bampulushi pa lupusa lobadi nalo lwa kukwata batubwalāla bebanga bintu byetu nansha bakimba kutamba kyetu kisaka? Mwene tusangelanga bīmu pobidi na lupusa lwa kupa batubwalāla mfuto mwanda wa kukinga bantu mu kibundi?

Kudi mingilo mikwabo ikwasha bantu yobwanya padi kuvuluka, kifwa kulongolola mashinda, byundapilo, ne masomo—yonso ino ifutwanga na bitanshi bilombanga balungu balupusa. Bene Kidishitu babine bekalanga babajinji ku kwitabija amba kulēmeka boba bapelwe lupusa i kwa kamweno. Ino bulēme bwa uno muswelo bufwaninwe kukadikila pa ludingo’ka? Ne i mu bintu’ka bya umbūmi mwitusakila kwikala na bulēme ku balupusa?

Lupusa mu Kibundi

Bible ulombola bantu bonso, betabije ne bakubulwa kwitabija, amba bafwaninwe kulēmeka balupusa balela ntanda, bengidila kibundi mingilo miyampe. Pa uno mwanda, Polo mutumibwa mwine Kidishitu wātumīne balunda nandi betabije ba mu Loma mukanda, wēbalombola bintu bisonekelwe mu Loma 13:1-7, bibwanya kwitukwasha shi netu twikale kwibibandaula.

Polo wādi mwanā kibundi kya Loma, papo Loma ukidi umbikalo utādile ntanda. Polo wāsonekele mukanda kubwipi mu mwaka wa 56 K.K., wādingila bene Kidishitu kwikala bana ba kibundi bifwa biyampe. Amba: “Muya o-onso wikale kukōkela bakatampe balupusa, mwanda kekudipo walupusa nansha umo udi’ko shi ke pa mwandapo wa Leza; balupusa badi’ko badi pa bitenta byabo bishile bimo na bikwabo pa mwanda wa Leza.” (NW).

Polo ushintulula pano amba kekudipo lupusa lwa muntu ye-yense lubwanya kwikala’ko shi Leza ketabijepo. Buno bo buluji bwilondela bitenta bimo na bikwabo mungya mpango ya Leza. O mwanda i kinenwe amba ‘yewa utūla lupata na walupusa, nabya utūlanga lupata na mpangiko ya Leza.’

Bano balupusa, nansha byobatendelanga bana ba kibundi balonga biyampe, ino badi ne na lupusa lwa kupāna mfuto ku bonso banonga-bibi. Boba balonga bibi badi na bubinga bwa kuzakela lubila lwa balupusa bengila bu mulubudi “wa kinongo,” ke-pantu bambikavu bengilanga bu mwingidi wa “mīngilo ya Leza.”

Polo ufudija milangwe yandi miluji namino amba: “Po pa mwanda wimufwanine’mba, mukōkele; kadi ke ponka pa mwanda wa bukalabale ponka, ehe; i ne pa mwanda wa mutyima wa mundamunda. Ino i pa uno mwanda uno’u o musonkanga ne musonko; ke-bantu nabo i ba mīngilo ya Leza; batele mityima nyeke ku kyonka kino’ki.”

Kiselwa kya kuludika myanda ya bitanshi kidi mu makasa a bakatampe balupusa, ke mu a yewapo usonka. Mwine Kidishitu i mwana wa kibundi wakubulwa budimbidimbi, unenwe kulama mutyima wa mundamunda muyampe. Uyukile amba ufwaninwe kukōkela bakulumpe balupusa ne kusonka musonko, kadi kafwaninwepo enka kulonda mbila ya kibundi mwashikete, ino ufwaninwe kwikala ne na būmi bukwatañene na byobya bisaka Leza.

Kisaka ne Lupusa

Lelo pa mwanda utala lupusa mu kisaka napo? Ku ngalwilo ngalwilō ya būmi bwa mwana wa ku kyadi, wikalanga divule ulomba bamute mutyima, pamo na kudila, pakwabo na kwela ñanji. Ino mbutwile wa tunangu ujingululanga bisaka mwana wa ku kyadi, kupita’ko kukalabela muyaya wa mwana. Bana bamo, pa kutama, bekalanga balelemunwa, bebaleka balonga byobasaka. Ke biyampepo, kubulwa kupotolola bintu kukokeja kwibafikija ku bupolapola nansha ku byabulongelonge bikwabo, bileta nkalañani mu kisaka ne mu kibundi, monka muyukile’kyo ne balupusa balela bibundi.

“Bambutwile bapanga bana madingi ke mungya kala,” ye munenena Rosalind Miles, mulembi wa dibuku dimo (Children We Deserve). “Kyaba kifwaninwe kushilula i kitatyi kikibutulwabutulwa mwana.” Wivwane tamba ku ñanjilo bambutwile banena na diwi dya kanye, balombola lupusa lwabo, pakubulwa kwalamukaalamuka mu byobalonga, babo bana kebakejepo kwifunda kwitabija luno lupusa ne madingi a buswe alupuka’ko.

Bible udi na myanda mivule itala pa lupusa mu kisaka. Mu mukanda wa Nkindi, Solomone mwana-mulume wa tunangu ukokela milangwe pa bumo bufwaninwe kwikala pa bukata bwa bambutwile bakaminwe Leza ku meso a babo bana, amba: “Wami mwana, ivwana bulombodi bwa shobe; kadi kokazobololapo lufundijo lwa inobe.” (Nkindi 1:8) Shi bambutwile bomvwañana ku meso a babo bana, ne bana nabo bakayuka byobya bisaka bambutwile babo. Bana bakokeja kuleta nkalañani na kubipija mbutwile umo ku meso a mukwabo mu bukomo bobalonga bebashile kyaba kya kulonga byobasaka, ino lupusa lwa bambutwile bekutyile umbumo lukwatakanyanga bana batyetye.

Bible ushintulula amba mulume ye mwinē kiselwa kya kulama būmi bwa ku mushipiditu bwa bana ne bwa mukaji wandi. Buno bo bumutwe. Lelo buno bumutwe i bwa kwingidija muswelo’ka? Polo unena amba monka mwikadile Kidishitu bu Mutwe wa kipwilo, mo monka ne mwana-mulume nandi ye mutwe wa mukaji wandi. Kupwa Polo ubweja’ko amba: “Balume nenu sanswai bakaji benu, monka musanshilwe Kidishitu kipwilo [wandi mukaji wa ku mushipiditu], wēpanine ponka pa akyo.” (Efisesa 5:25) Shi mwana-mulume alonde kino kifwa kya Yesu kya kwingidija bumutwe bwandi na buswe, kakabulwepo kupebwa ‘bulēme bukatampe’ na mukajandi. (Efisesa 5:33) Bana badi mu njibo ya namino nabo bakamona mvubu ya lupusa lobapele babo bambutwile kudi Leza, ne kwitabija baketabija’lo.—Efisesa 6:1-3.

Lelo bambutwile balela bana kasuku, ne boba bafwidilwe bene pabo, bakokeja kulonga namani pa uno mwanda? Bekale bashabana nansha bainabana, bakokeja kunyemena ku lupusa lwa Yehova Leza ne Yesu Kidishitu. Yesu wādi wisamba nyeke na lupusa—lwa Shandi ne lwa Bisonekwa bya ku bukomo bwa mushipiditu.—Mateo 4:1-10; 7:29; Yoano 5:19, 30; 8:28.

Bible udi na misoñanya mivule ya kamweno itala pa makambakano ekoka nao bana. Shi mbutwile uyukile ino misoñanya, ulonda’yo ne kulonda, kakakolelwapo kupa bana madingi mayampe a kwibakwasha. (Ngalwilo 6:22; Nkindi 13:20; Mateo 6:33; 1 Kodinda 15:33; Fidipai 4:8, 9) Bambutwile bakokeja kadi kunyemena ku mabuku emanine pa Bible alupwidilwe nakampata kwibakwasha mu kufundija babo bana nabo bayuke kusangela tumweno tudi mu kulēmeka lupusa ludi na Bisonekwa.a

Kipwilo kya Bwine Kidishitu ne Lupusa

“Uno i wami Mwana o nsenswe, untōkele mutyima, mwikale kumwivwana.” (Mateo 17:5) Kuno kunena kwānene Yehova Leza aye mwine kulombola patōka amba Yesu wāpelwe kishima kya kwisamba na lupusa lwa Leza. Bintu byaānene i bisonekwe mu nsekununi idi mu Maevanjile aná otukokeja batwe bonso kutanga.

Yesu, kumeso’tu kwa kukanda mūlu, wālombwele bandi bana-babwanga’mba: “Lupusa lonsololo napebwa’lo lwa mūlu ne panopantanda pene.” (Mateo 28:18) Byadi Mutwe wa kipwilo, kādipo enka utala balondi bashingwe-māni balonda mu lwayo lwandi pano panshi, ino wibengidijanga ne bu mukola wa kupānina’mo bubinebine, bu “umpika wabinebine ne wamanwa,” tamba kitatyi kyāpungulwilwe mushipiditu sandu mu dya Pentekosa 33 K.K. (Mateo 24:45-47, NW; Bilongwa 2:1-36) Lelo i bika byaālongele pa kuvuija bino byonso bya kukankamika nabyo kipwilo kya bwine Kidishitu? ‘Pa kukanda mūlu . . . , wāpēne bantu bu byabuntu.’ (Efisesa 4:8) Bano ‘bantu bu byabuntu’ i bakulumpe bene Kidishitu, batongelwe na mushipiditu sandu ne kupebwa lupusa lwa kukwatakanya tumweno twa ku mushipiditu twa balunda nabo betabije.—Bilongwa 20:28.

Pa kino, Polo witudingila’mba: “Vulukai kadi batangidiji benu bemusapwidile Myanda Miyampe. Langai bidi mo baikadile, iulai lwitabijo lwabo.” Bano bana-balume bakikōkeji balondanga mu lwayo lwa Yesu, nanshi i kiyampe kwiula lwitabijo lwabo. Kupwa Polo ubweja’ko amba: “Kokelai bemutangidile, mwibakokelelelei tu, [“endelelai na kuyuka lupusa lwabo pomudi,” The Amplified Bible] mwanda i abo batala mityima yenu’mba ikale biyampe, mwanda abo bakeshintulwila mingilo yabo kudi Leza. Shi mwikale senene, nabya bakengila biyampe ne nsangaji yonso, ino shi bitupu, bakengila ne mityima fututu, nankyo nenu kemukamwena’mopo kantu.”—Bahebelu 13:7, 17, MB.

Lelo kikekala namani shi buludiki bwa uno muswelo bufutululwa? Bantu bamo mu kipwilo kibajinji kya bwine Kidishitu bādi bafutulula’bo, bāikala ke batupondo. Kifwa ba Himeneusa ne Filetusa, i batelwe bu bana-balume bādi bavutakanya lwitabijo lwa bakwabo ne amba imbotakanya yabo ‘yādi ijilula byobya bikola.’ Kifwa, mulangwe wabo umo wādi wa amba lusangukilo ke lupwe kala kulongeka, shi lwādi lwa ku mushipiditu, shi lwādi lwa kyelekejo, kebiyukenepo, kadi amba kekwādipo lusangukilo lukwabo lukekala’ko mu Bulopwe bwa Leza.—2 Temote 2:16-18.

Dyese, bana-balume bāpelwe lupusa bākūkila’ko. Bakulumpe bene Kidishitu bāfundula bimyanda bya uno muswelo mwanda bādi bantunguluji ba Yesu Kidishitu, bāingidija lupusa lwa Bisonekwa. (2 Temote 3:16, 17) Ye monka mulongelwanga ne mu kipwilo kya bwine Kidishitu dyalelo, o mwanda kitelwa bu “kipanda, ne kyalwilo kya [bu]binebine.” (1 Temote 3:15) Bufundiji bwa bubela kebukalekwapo nansha dimo bonakanya “kyelekejo kya myanda mikomo,” kyotulobekelwe bu kilobekwa kilumbuluke mu Bible.—2 Temote 1:13, 14.

Nansha bulēme bwa kulēmeka lupusa byobwenda bujimina lubilo lubilo mu ino ntanda, batwe bene Kidishitu tuyukile amba kitūdīlwe’ko luno lupusa luyampe namino mu kibundi, mu kisaka, ne mu kipwilo kya bwine Kidishitu i kamweno kotudi. Kulēmeka lupusa i kwa kamweno mu būmi bwetu, ku ngitu, mu malango, ne ku mushipiditu. Shi twitabije ne kulēmeka lupusa lupāna Leza, i bine tukakingwa na balupusa bene bakatakata—ba Yehova Leza ne Yesu Kidishitu—mwanda wa biyampe byetu byaendaenda.—Mitōto 119:165; Bahebelu 12:9.

[Kunshi kwa dyani]

[Bushintuludi pa paje 5]

Bible udi na myanda mivule itala pa lupusa mu kisaka

[Kifwatulo pa paje 6]

Bambutwile balela bana kasuku bakokeja kunyemena ku lupusa lwa Yehova Leza ne Yesu Kidishitu

[Bifwatulo pa paje 7]

Bene Kidishitu abo bayukile amba kitūdīlwe’ko lupusa luyampe namino mu kibundi, mu kisaka, ne mu kipwilo kya bwine Kidishitu i kamweno kabo.

[Kutambile Kifwatulo pa paje 4]

Foto mikwatwe na Josh Mathes, Collection of the Supreme Court of the United States