Bulwi bwa ba tumoni na baleza babubela

“E mwanenena Yehova namino amba: Banwe mwi bami batumoni, ne mwingidi wami o natonga.”​—ISAYA 43:10.

LEZA wabine lelo i ani? Dyalelo, uno mwanda wamvubu mikatampe utala bantu bonso. Nansha shi bantu batōtanga baleza bavulevule, ino kudi Leza umo kete ukokeja kwitupa būmi ne nsangaji mu mafuku akāya kumeso. Tukokeja kunena pamwanda wa uno Leza Umo yenka amba: “I aye witupele bumi, witupele kujina ne bu muntu.” (Bilongwa 17:​28, MB) Bine, enka Leza umo kete ye ufwaninwe kutōtwa. Nka na mwikinenena tuīmba mu mukanda wa Kusokwelwa amba: “Yō! abe ufwaninwe, Yehova wetu Leza, kupebwa ntumbo, ne buleme ne bukomo, mwanda wapangile bintu byonsololo, kadi i pa mwanda wa kiswa-mutyima kyobe o byadipo, ne kupangibwa’byo.”​—Kusokwelwa 4:11.

² Mu budimi bwa Edena, Satana wāingidije bubela mwanda wa kulombola’mba Yehova kafwaninwepo kutōtwa. Wāingidije nyoka mwanda wa kusapwila Eva amba shi ajilule kijila kya Yehova ne adye bipa bya ku mutyi wājidikilwe na Yehova, ukekala pamo’nka bwa Leza. Wāingidije bino bishima’mba: “Leza uyukile’mba difuku dyo mukadyako ponkapo meso akemuputuka. Kabidi mukekalanga [pamo’nka] bwa Leza, kuyuka biya ne bibi.” (Ngalwilo 3:5) Eva wāitabije byānene nyoka ne wādile kipa kyāpelejibwe.

³ Bine, Satana wābepele. (Yoano 8:44) Kintu kimo kete kilombola’mba Eva wāikele pamo’nka “bwa Leza” kupwa kwa kuluba i kunena’mba wāikele kwityibila mbila aye mwine ya kuyuka kiyampe ne kibi, kintu kyādi ufwaninwe kulekela Yehova. Nansha byābepele Satana, mwenda mafuku Eva wāfwile. Ino, muntu umo kete wāmwenine kamweno mu bubi bwa Eva wādi Satana. Nabubine, kitungo kya Satana kyāpelele kulombola patōka mu muswelo wātakikīle Eva ku bubi kyādi kya kwikala aye mwine ke leza. Kupwa kwa kuluba, Eva wāikele ke mulondi wandi umbajinji, pakubulwa ne kwija kwine, Adama nandi wēlunga kwadi. Bavule mu babo bana kebādipo babutulwa enka ‘mu bubi’ kete ino kadi bādi baponena munshi mwa lupusa lwa Satana, ne kitatyi kityetye pakupitapo, kyāmwekele amba ntanda yonso yāvundamine kudi Leza wabine.​—Ngalwilo 6:5; Mitōto 51:5.

⁴ Mine ntanda’ya yāonakanibwe mu Dilobe. (2 Petelo 3:6) Kupwa kwa dilobe kwātandabukile ntanda mikwabo yāvundamīne Yehova, ne kadi ikidiko ne dyalelo. Pamwanda wa ino ntanda Bible unena’mba: “Panopantanda ponsololo pēne palēle mudi yewa umbi.” (1 Yoano 5:19) Byoipelele kulonda mbila ne nshintulwilo ya bijila bya Yehova, ino ntanda ingidila kamweno ka Satana. Ye leza wayo. (2 Kodinda 4:4) Inoko aye i leza wakubulwa bukomo. Kakokejapo kupa bantu nsangaji nansha būmi bwine; enka Yehova ye ukokeja kwikilonga. Omwanda nanshi, bantu basaka kwikala na būmi budi na mvubu ne kadi mu ntanda milumbuluke bafwaninwe bidi kuyuka’mba Yehova ye Leza wabine kadi balonge ne kiswamutyima kyandi. (Mitōto 37:​18, 27, 28; Musapudi 12:13) Shi kepano, bana-balume ne bana-bakaji badi na lwitabijo basakilwa kupāna bukamoni pakubulwa kwija, nansha kadi kusapula bubinebine butala padi Yehova.

⁵ Kungalwilo ya ino ntanda, kwādi bantu bādi na lwitabijo lwa uno muswelo. Mu Bahebelu shapita 11, mutumibwa Polo ulombola majina abo na kwibatela bu “kibumbo kikatakata, kidi namino, kya tumoni.” (Bahebelu 12:1) Abele, mwana wabubidi wa Adama ne Eva ye wādi umbajinji mu mulongo wa bantu bātelelwe na Polo. Enoke ne Noa bādiko kumeso kwa dilobe, nabo bātelelwe. (Bahebelu 11:​4, 5, 7) Muntu mukatampe mwine i Abalahama nkambo wandya muzo wa Bayuda. Abalahama utelwa “bu-mulunda na Leza,” wādi nkambo wandya Yesu “kamoni kalumbuluke ka binebine.”​—Yakoba 2:23; Kusokwelwa 3:14.

Abalahama Upāna Bukamoni Butala pa Bubinebine

⁶ Abalahama wāvuije mwingilo wa bu-kamoni muswelo’ka? I pamwanda wa lwitabijo lwandi lukatampe ne kikokeji kya kulemeka bijila bya Yehova. Pobāmupēle mbila ya kutamba mu kibundi kya Ulu mwanda wa akapityije mafuku āmushadileko mu būmi bwandi mu ntanda ya kulampe, Abalahama wāitabije. (Ngalwilo 15:7; Bilongwa 7:​2-4) Pavule, bantu bekalanga na būmi bwa kuvilukaviluka balekanga ñendo yabo ya kitatyi ne kitatyi ebiya batonga būmi bwa kushikata kijabanda mu kibundi. Omwanda nanshi, pātambile Abalahama mu kibundi, ne wāitabija būmi bwa mu mapema, wālombwele bukamoni bukatampe bwa kikulupiji kyaādi nakyo mudi Yehova Leza. Kikokeji kyandi bwādi bukamoni ku boba bādi bamutala. Yehova wāpadile Abalahama mpalo mivule pamwanda wa lwitabijo lwandi. Nansha byādi ushikata mu mapema, Abalahama wādi na bupeta buvule. Pāselelwe Lota ne kyandi kisaka mu bu-misungi, Yehova wābingije Abalahama wādi wibalonda, wāmupele muswelo wa kwibanyongolola. Mukaja Abalahama wābutwile mwana, mwana-mulume mu bununu bwandi, ne mulao wālailwe Abalahama na Yehova amba ukekala shandya lukunwa wāfikidile. Kupityila kudi Abalahama, bantu bāmwene’mba Yehova i Leza mūmi ufikidijanga milao yandi.​—Ngalwilo 12:​1-3; 14:​14-16; 21:​1-7.

⁷ Pādi kajoka kwāendele kukanyongolola Lota, Abalahama wēsambakene na Melekisedeka, mulopwe wa Saleme (kibundi kyātelelwe mwenda mafuku bu Yelusalema), wātundaile Abalahama amba: “Abalahama eselwe dyese [na] Leza Mwine Mukatakata Mwine.” Mulopwe wa Sodoma nandi wāmusambakene ne wāsakile kumupa byabuntu. Abalahama wāpelele. Mwanda waka? Kādipo usaka bantu bekale kutātana nansha patyetye pamwanda utala Nsulo ya madyese andi. Wānene’mba: “Natulula kuboko kwami kudi Yehova Leza Mwine Mukatakata Mwine, mupangi mwine wa diulu ne ntanda mine, na’mba: Nkikayatakopo nansha kalupambo, nansha kamonji ka bikwabilo, nansha kamo katyetye kene kadi kobe, kutyina’mba wakanena’mba: Amiwa namupeteja Abalahama lupeto.” (Ngalwilo 14:​17-24) Bine Abalahama wādi kamoni mulumbuluke kashaa!

Muzo wa ba Tumoni

⁸ Mosesa, wa ku lukunwa lwa Abalahama, nandi udi mu mulongo wa ba tumoni batelelwe na Polo. Mosesa wāpelele bupeta bwa mu Edipito, mafuku pakupitapo wākesamba na muludiki wa uno umbikalo wādi wingidija lupusa lukatampe mu ino ntanda pakubulwa moyo, mwanda wa kuludikila bana ba Isalela ku bwanapabo. I kika kyāmupele buno bukankamane? I lwitabijo lwandi. Polo unena’mba: “[Mosesa] wakankamene ne kukankamana bwa wamona aye wakubulwa kumweka.” (Bahebelu 11:27) Baleza ba mu Edipito bādi bamonwa, ne bādi batengwa. Nansha dyalelo dine, bankishi ba mu Edipito bākamwijanga bantu. Ino Yehova, nansha byokebamumonangapo, kumeso a Mosesa wādi umweka kupitako boba baleza bonso babubela. Mosesa kādipo upatanya’mba Yehova kekalangakopo ne wādi uyukile’mba upalanga mpalo ku batōtyi Bandi. (Bahebelu 11:6) Mosesa wādi kamoni utulumukwa bininge.

⁹ Kupwa kwa kuludikila bene Isalela ku bwanapabo, Mosesa wāingile bu nsenga wa kipwano kya Yehova ne lukunwa lwa Abalahama kupityila kudi Yakoba. Kwālupukile bipa, muzo wa Isalela wāikele ke kintu kyabulēme kya Yehova. (Divilu 19:​5, 6) Wādi musunsa umbajinji wāingidijibwe muzo mutuntulu mwanda wa kupāna bukamoni. Mungya buluji, binenwa bya Yehova kupityila kudi Isaya, kubwipi kwa myaka 800 pakupitapo, byāingidijibwe tamba kitatyi kyābutwilwe uno muzo i bino: “E mwanenena Yehova namino amba: Banwe mwi bami batumoni, ne mwingidi wami o natonga, amba muyukidije ne kungitabija, ne kwivwanija’mba: ami ne aye enka.” (Isaya 43:10) Uno muzo umpya wāingile muswelo’ka bu tumoni twa Yehova? Kupityila ku kikokeji ne lwitabijo lwabo ne kupityila ku bilongwa byebālongele Yehova.

¹⁰ Kubwipi kwa myaka 40 pakupitapo, Isalela wādi kubwipi na kupyāna Ntanda ya Mulao. Bātumine tubedi kukabela kibundi kya Yediko, Lehaba, mwikadi umo wa mu Yediko, wēbakingile. Mwanda waka? Wānene’mba: “Tubaivwana byaumije Yehova mema a kalunga katyila ku meso enu po mwalupukile mu Edipito; kadi ne kyomwalongele ku balopwe babidi ba bene Amole badi bobwa bukila bwa Yodano, kudi Shihone ne Oka mwine, bo mwaonakenye fututu. Penepo kadi panopano ponka po twekivwene’pa, mityima yetu yasungulukile, kabidi ne kwiningija kwa mutyima kekwaikadilepo dikwabo munda mwa muntu, nansha umo mwine, pamwanda wa banwe; ke-muntu Yehova Leza wenu ayewa i Leza wa momwa mūlu mwine ne wa panopantanda pene muno munshi.” (Yoshua 2:​10, 11) Nsekununi isambila pa mingilo yabukomo yālongele Yehova yātonwene Lehaba ne kisaka kyandi batambe mu Yediko ne kushiya baleza babubela bādimo mwanda wa kutōta Yehova na bene Isalela. I kimweke patōka’mba, Yehova wāpene bukamoni bukatampe kupityila ku muzo wa Isalela.​—Yoshua 6:25.

¹¹ Pākidi bene Isalela mu Edipito, Yehova wātumine Mosesa kudi Solomone amba: “Twela mudi Felo, mwanda ami namulemeja mutyima wandi ne mutyima wa bengidi bandi bene, na’mba nkalombole bine bino’bi, biyukeno byami umbukata mwabo. Kadi na’mba ukasapula mu matwi a obe mwana ne munkana obe bino bintu bino’bi byo nalonga pa Edipito, ne biyukeno byami byo nalonga umbukata mwabo, muyuke byo ndi Yehova.” (Divilu 10:​1, 2) Bene Isalela bakikokeji bādi bafwaninwe kusapwila babo bana bilongwa bya Yehova byabukomo. Babo bana nabo, bādi bafwaninwe kwibisekununa kudi babo bana, enka namino, ku nkongo ne nkongo. Mu uno muswelo, bilongwa byabukomo byālongele Yehova bikavulukwa. Dyalelo nadyo, bambutwile badi na kiselwa kya kupāna bukamoni ku babo bana.​—Kupituluka 6:​4-7; Nkindi 22:6.

¹² Yehova wādi upala bene Isalela mpalo pobādi bavuija na kikokeji mwingilo wa kulombola bukamoni ku mizo yādi ibajokolokele. Nka na mwānenene Mosesa kupwa kwa kupituluka mu madyese ālaile Yehova amba: “Bantu bonsololo ba panopanshi bakamona byodi wityilwa pa dijina dya Yehova; kadi bakakukwatwa moyo.” (Kupituluka 28:10) Solomone wāpelwe tunangu ne bupeta pamwanda wa lwitabijo lwandi. Mu buludiki bwandi, muzo wādi mu ntudubuko ne wāloelelwe ndoe umbula bwa kitatyi kilampe. Pamwanda utala kine kitatyi’kya tutanga’mba: “Kwadi kwiya bantu bonsololo, kwivwana [tunangu twa, NW] Solomone, ku mitamba yonso ku balopwe bonso ba panopantanda, badi bomvwana [tunangu twandi, NW].” (1 Balopwe 4:​25, 29, 30, 34) Muntu mukatampe mu boba bākatadile Solomone wādi mulopwe mukaji wa ku Sheba. Kupwa kwa kwimwena aye mwine madyese āpele Yehova ku muzo ne ku mulopwe wabo, uno mulopwe mukaji wānene’mba: “Atōtwe Yehova Leza obe, ye waloelelwa mudi abe kukubīka pa lupona lwandi, kubikala bulopwe bwa Yehova Leza obe; ke-muntu Leza obe wasenswe Isalela.”​—2 Bilongwa 9:8.

¹³ Pakwabo kadi, mutumibwa Polo wālombwele bukamoni bwāpene bene Isalela bukatampe kutabuka bukamoni bonso. Pādi wisambila pa Isalela wa kungitu mu kipwilo kya bwine-Kristu mu Loma, wānene’mba: “Balobekelwe ne binenwa bya aye Leza.” (Loma 3:​1, 2) Kushilwila pa Mosesa, bene Isalela bamo-bamo bakikokeji bāpelwe mushipiditu sandu mwanda wa kusoneka muswelo wāpwene Yehova na bene Isalela, pamo ne madingi andi, mbila yandi ne bupolofeto bwandi. Kupityila ku bino bilembwa bano basonekeji bapakala bāpele bukamoni ku nkongo yonso ya ku mafuku akāya kumeso​—kufika ne ku ano etu mafuku​—amba kudi Leza umo yenka kete, ne dijina dyandi i Yehova.​—Danyele 12:9; 1 Petelo 1:​10-12.

¹⁴ Kyabulanda, pavule, Isalela wādi ukomenwa kulombola lwitabijo, ebiya Yehova wātumine ba tumoni ku muzo wandi. Bavule umbukata mwabo bādi bapangwapangwa. Polo wānene’mba bamo-bamo “batompelwe ne byakibengo, ne bikupilwa kutentekelwapo, ne nkano, ne bifungo.” (Bahebelu 11:36) Bine bādi ba tumoni bakikokeji! I kyabulanda pakuyuka’mba pavule, kupangwapangwa kwabo kwādi kutamba ku balunda nabo ba mu muzo mutongibwe na Yehova! (Mateo 23:​31, 37) Kyabine, bubi bwālongele muzo bwādi bukatampe bininge, omwanda mu mwaka wa 607 K.K.K., Yehova wāpele dishinda ku bene Babiloni bonakanye Yelusalema ne tempelo wabo mwine kumo kadi bāselele kipindi kikata kya bene Isalela basheleko mu bu-misungi. (Yelemia 20:4; 21:10) Lelo ino yo yādi mfulo ya bukamoni bwa dijina dya Yehova bwādi bupāna uno muzo? Ke amopo.

Bilezaleza Bibatompibwa

¹⁵ Nansha byobādi mu Babiloni mobāselelwe bu misungi, bantu bakikokeji bādi mu uno muzo kebālekelepo kupāna bukamoni pamwanda utala Yehova amba ye Leza, ne kwisambila pa bukomo bwandi. Kimfwa, Danyele wāshintulwile bilotwa bya Nebukaneza pakubulwa moyo, wāshintulwile bilembwa byāsonekēlwe Beleshazale ku lubumbu, ne wāpelele kutuna lwitabijo lwandi kumeso a Dadiusa pamwanda utala milombelo. Bayuda basatu nabo bapēle Nebukaneza bukamoni bukatampe pobāpelele kufukatyila nkishi.​—Danyele 3:​13-18; 5:​13-29; 6:​4-27.

¹⁶ Inoko, Yehova wātungile’mba kukekala muzo mukwabo ukapāna bukamoni mu ntanda ya Isalela. Ezekyele, wātobele butobo umbukata mwa Bayuda bāselelwe bu misungi mu Babiloni, wāyukije mbila yātyibile Yehova na kusumininwa konso pamwanda wa ntanda yāonakanibwe amba: “Nkavudija bantu po mudi, njibo yonsololo ya Isalela, ke yonsololo’tu kadi; ne bibundi bikekalwamo, ne maputu akashimikululwa monka.” (Ezekyele 36:10) Mwanda waka Yehova wādi usaka kulonga namino? Dibajinji, mwanda wa kupāna bukamoni pamwanda wa dijina dyandi. Wānene kupityila kudi Ezekyele’mba: “Ami nkilongelepo kine kino’ki pa mwanda wa banwe’bo, a njibo ya Isalela, ehe; i pa mwanda wa dijina dyami dikola dyajilulwa umbukata mwa mizo’ya ko mwendele.”​—Ezekyele 36:22; Yelemia 50:28.

¹⁷ Pādi utoba butobo bwa kutamba kwa bene Isalela mu Babiloni mobāselelwe bu-misungi, mupolofeto Isaya wāsonekele ku bukomo bwa mushipiditu binenwa bidi mu Isaya 43:​10, amba bene Isalela bādi ba tumoni twa Yehova, bengidi bandi. Mu Isaya shapita 43 ne 44, Yehova utelwamo bu Umpangi wa Isalela, Umbumbi, Leza, Mwine Ujila, Mupandiji, Mukūdi, Mulopwe, ne Mulongi. (Isaya 43:​3, 14, 15; 44:2) Yehova wāitabije bene Isalela baselwe bu misungi mwanda misunsa mivule uno muzo wākankelwe kumutumbija pamwanda wa bino bitenta byandi. Inoko, bākidi nyeke bantu bandi. Yehova webāsapwidile amba: “Kokakwatwapo moyo, mwanda nakukūla; nakwite pa dijina dyobe, abe wi wami.” (Isaya 43:1) Bu-misungi bwāselelwe bene Isalela mu Babiloni bwādi bufwaninwe kufula.

¹⁸ Kyabine, kunyongololwa kwa bene Isalela mu Babiloni na Yehova kwātudile bilezaleza mu matompo. Wākolomwene baleza babubela ba mizo bālombole ba tumoni babo, ne wāinika Isalela dijina dya bu tumoni twandi. (Isaya 43:​9, 12) Pānyongolwele bene Isalela mu bu-misungi, Yehova wālombwele amba baleza ba mu Babiloni bādi ba dijina bitupu, kadi wālombwele’mba aye kasuku kandi ye Leza, umo yenka kete. (Isaya 43:​14, 15) Kubwipi kwa myaka 200 kumeso kwa kulongeka uno mwanda mukatampe, wātelele Shilusa mwine Peleshia amba ye ukekala mwingidi wandi wakengidija mwanda wa kunyongolola Bayuda, pa kino, wālombwele bukamoni bukwabo bwa bu-Leza bwandi. (Isaya 44:28) Isalela wādi ufwaninwe kunyongololwa. Mwanda waka? Yehova ushintulula’mba: “[Bene Isalela] bādi bafwaninwe kumutendela.” (Isaya 43:​21, NW) Kyāletele muswelo wa kupāna bukamoni bukatampe.

¹⁹ Kitatyi pokyābwene, Shilusa mwine Peleshia wātūtyile Babiloni enka mokyātobelwe mu bupolofeto. Nansha Shilusa byādi mujentaila, wāyukije bu-Leza bwa Yehova pāsapwidile Bayuda mu Babiloni amba: “Enselele udi mubukata mwenu wa bantu bandi bonsololo, shi ani, shi ani, Leza wandi ekale nandi, ino akande ku Yelusalema mu Yuda, kūbaka njibo ya Yehova Leza wa Isalela’wa [aye i Leza wabine wādi] mu Yelusalema.” (Ezela 1:3) Bayuda bavule bāitabije. Bākutyile lwendo lulampe, bājokela mu Ntanda ya Mulao ne bāubakile mandabahu pa kifuko pādi tempelo wakala. Nansha byobādi bapangwapangwa ne kulengejibwa moyo, bāfudile na kushimikulula tempelo pamo ne kibundi kya Yelusalema. Yehova aye mwine wānene’mba bino byonso byāfikidile, “ke pa bukomopo bwa [bashidika], ponso’nka pa Mushipiditu wami.” (Zekadia 4:6) Kuno kufikidila kwāletele bukamoni bukatampe amba Yehova ye Leza wabine.

²⁰ Yehova wāendelele kwingidija muzo wa Isalela bu ba tumoni bandi nansha byobādi bantu bakubulwa kubwaninina, ne bādi bamutombokela kitatyi kimo-kimo. Mu ntanda yādiko kumeso kwa Kristu, uno muzo, pamo ne tempelo wao ne mwingilo wao wa bu kisaka kya bitobo, wādi kitako kya mutōtelo wabine mu ntanda yonso. Muntu yense utanga bilongwa byālongelwe bene Isalela na Yehova mu Bisonekwa bya Kihebelu kakokejapo kupatanya amba kudi Leza wabine umo kete, ne dijina dyandi i Yehova. (Kupituluka 6:4; Zekadia 14:9) Inoko, bukamoni bukatampe nakampata bufwaninwe kupebwa pamwanda utala dijina dya Yehova, ne tukabandaula uno mwanda mu kishinte kilondako.

[Bipangujo]

1. Leza wabine i ani, ne i myanda’ka ilombola’mba aye udi peulu pa kibumbo kya baleza batōtwa dyalelo?

2, 3. (a) Satana wābepele muswelo’ka amba Yehova kafwaninwepo kutōtwa? (b) Bubi bwa Eva bwālupwile bipa’ka kudi aye mwine ne kudi bandi bana, ne i kika kyāmweninemo Satana?

4. (a) Leza wa ino ntanda i ani? (b) I mwanda’ka ufwaninwe kulongwa pakubulwa kwija?

5. I ‘kibumbo’ka kikatakata kya ba tumoni’ bātelele Polo? Tela bantu bamo-bamo bātelele.

6, 7. Būmi ne bilongwa bya Abalahama byālombwele muswelo’ka bukamoni amba Yehova ye Leza wabine?

8. Mosesa wālombwele lwitabijo lukatampe lwādi nalo mudi Yehova muswelo’ka?

9. Muzo wa Isalela wāingidile Yehova muswelo’ka?

10. Bilongwa byabukomo byālongelwe bene Isalela na Yehova byāpēne bukamoni muswelo’ka, ne kwālupukile bipa’ka?

11. Bambutwile bonso bene Isalela bādi na kiselwa’ka kitala pa kupāna bukamoni?

12. Madyese āeselwe Solomone ne Isalela na Yehova ālombwele bukamoni muswelo’ka?

13. I bukamoni’ka bukatampe bwāpene Isalela, ne i muswelo’ka otwendelela na kumwenamo kamweno?

14. Mwanda waka bantu bamo-bamo bādi bapāna bukamoni pamwanda wa Yehova bādi bapangwapangwa?

15. Bukamoni bwāpenwe muswelo’ka mu Babiloni mwāselelwe bene Isalela bu misungi?

16. I muswelo’ka wātobele Yehova butobo butala pa kujoka kwa bene Isalela mu yabo ntanda, ne pādi pamwanda wa mpango’ka?

17. I kitatyi’ka kyāsonekelwe bishima bidi mu Isaya 43:10?

18. Kunyongololwa kwa bene Isalela mu Babiloni kwālombwele muswelo’ka amba Yehova ye Leza wabine umo kete?

19. I bukamoni’ka bwāpēne Shilusa mu lwito lwandi pādi usoñanya bene Isalela amba bajokele mu Yelusalema, ne mu bilongwa bya Bayuda bakikokeji kupwa kwa kujoka kwabo?

20. Nansha bene Isalela byobādi bakōkekōke, i kika kyotukanena pamwanda utala muswelo wabo wa kupāna bukamoni butala pa dijina dya Yehova mu ntanda yakala?

[Bilembwa bya pa Bifwatulo]

Kupityila ku lwitabijo ne kikokeji kyandi, Abalahama wāpene bukamoni butulumukwa amba Yehova ye Leza wabine

Lelo Ukivulukile’byo?

◻ Abalahama wāpene bukamoni muswelo’ka amba Yehova ye Leza wabine?

◻ I ngikadila’ka itulumukwa yādi na Mosesa yāmuyukenye bu kamoni wakikokeji?

◻ Muzo wa Isalela onso mutuntulu wāpene bukamoni butala padi Yehova muswelo’ka?

◻ Kunyongololwa kwa bene Isalela na Yehova kutamba mu Babiloni kwālombwele muswelo’ka amba Yehova ye Leza wabine umo kete?