Kemukikalai Bemvwaniki ba Kīlwa

“Ikalai balongi ba kinenwa, kemukikalai bemvwaniki bitupu, mhm, na kwiongola banwe bene na mifwatakanyo ya bubela.”​—YAKOBA 1:22, NW.

 1. Lelo i bingelengele’ka byēmwenine bene Isalela ba pa kala?

“IBIKOMO ne mwa kwidilwa’byo mwine,” o muneneno mufike’po ulombola mwādi mwikadile bingelengele byālongele Yehova mu Edipito wa kala. Kipupo ne kipupo mu Mpupo Dikumi kyādi kilenga nzuba ya kashā. Byobya binzengele byābutwile bunyongolodi butulumukwa bwa bene Isalela umbukata mwa Kalunga Katyila kakalañanibwe. (Kupituluka 34:10-12) Shi nobe wadi amba wēmwenine byobya binkumenkume, longa na bubine kudipo mwa kwidilwa Mwine wēbilongele. Ino mulembi wa mitōto wāimbile amba: “[Bene Isalela] bavulaminwe Leza umpandiji wabo, walongele bintu bikatakata mu Edipito. Ne mīngilo ya kutendelwa mu ntanda ya Hama, kadi bintu bya malwa pa Dijiba dityila.”​—Mitōto 106:21, 22.

 2. I bika bilombola amba kusangala kwāsangedile bene Isalela bilongwa bya bukomo bya Leza kwādi kwa kitatyi kityetye?

² Bene Isalela pa kupwa kwabuka Kalunga Katyila, bāshilwile “[k]wakamwa Yehova, ne kwitabija bamwitabija.” (Divilu 14:31) Bana-balume bene Isalela bēlunga na Mosesa kebembila Yehova lwimbo lwa bushindañani, Midiamu papo na bana-bakaji bakwabo basakwija na mayamba koku baja. (Divilu 15:1, 20) I bine, bantu ba Leza bātulumukile bilongwa bya bukomo bya Yehova. Ino kusangala kobāsangedile Mwine wālongele bino bilongwa kwādi kwa kitatyi kityetye. Kepāijijepo, mwiendelejo wa bavule wāikala pamo bwa wa bantu badi na kavudi. Bāshilula kutompola ne kwiuningila Yehova. Bakwabo bēkuja mu butōtyi bwa bilezaleza ne mu busekese.—Umbadilo 14:27; 25:1-9.

I Bika Bitufikijanga ku Kwilwa?

 3. Byotudi bantu bakubulwa kubwaninina, i bika byotukokeja kwilwa?

³ Kubulwa kusangela bintu kwa bene Isalela bine kwādi kupwe bunwa. Ino kino kintu kibwanya kwitufikila ne batwe. Na bubine, batwe ketwāmwenepo byobya bingelengele bya Leza. Ino mu kipwano kyetu na Leza mudi bintu bivule byoketukokejapo kwilwa. Bamo umbukata mwetu bavulukanga kitatyi kyobaitabije bubinebine bwa mu Bible. Kepabulwe padi kitatyi kikwabo kya nsangaji i kitatyi kyotwepēne kudi Yehova ne kitatyi kyotwabatyijibwe mu mema bu bene Kidishitu babine. Batwe bavule ketudi bemwene bukwashi bwa Yehova mu byaba kampanda umbūmi bwetu. (Mitōto 118:15) Kutentekela pa bino byonso, tudi kadi na lukulupilo lwa kukapanda kupityila ku lufu lwa bu kitapwa lwāfwile Yesu Kidishitu, Mwanā Leza. (Yoano 3:16) Ino byotudi bantu bakubulwa kubwaninina, kitatyi kyotufikilwanga na bilokoloko bibibibi nansha na bintu bituzumbijazumbijanga mityima mu būmi, i kipēla kotudi netu kwilwa bintu biyampe bitulongelanga Yehova.

4, 5. (a) I muswelo’ka witudyumuna Yakoba kyaka kya kwikala bemvwaniki ba kīlwa? (b) Tukokeja kwingidija namani kifwa kya muntu ne kitalo kyāletele Yakoba?

⁴ Yakoba, mwanabo na Yesu wa munda mwa inandi, wādyumwine balunda nandi bene Kidishitu kyaka kidi mu kwikala bemvwaniki ba kīlwa. Amba: “[Ikalai balongi ba kinenwa, kemukikalai bemvwaniki bitupu, mhm, na kwiongola banwe bene na mifwatakanyo ya bubela, NW.] Ke-mwi-bantu shi umo ēkale wakwivwana bitupu mwanda, ne kulonga’o mpika, nabya udi pamo bwa muntu utala mpala ya ngitu yandi mu kitalo; mwanda witalanga aye mwine’mba, mfundukepo, kala wēilwa ne muswelo wa mwāikadile.” (Yakoba 1:22-24) Lelo Yakoba wādi ukimba kunena bika?

⁵ Divule potulangukanga lubanga, twitalanga mu kitalo mwanda wa kumona potukokeja kwilongolola. Shi tubashilula kwingila mingilo mishileshile, milangwe yonso papo yaenda ku bintu bingi, twailwa motwadi tubemwena mu kitalo. Ne ku mushipiditu nako monka na monka. Kitatyi kyotwitalanga mu Kinenwa kya Leza, tudingakanyanga motwikadile na musakila Yehova twikale. Tweyuka bukōkekōke bwetu mobwikadile. Pa kupwa kwijingulula, twesendulula mu bumuntu bwetu. Ino poketwiya kutokena mu mingilo ya bukile bukya’pa, twikonda na makambakano, twilwanga’nka ne kulanguluka pa bintu bya ku mushipiditu. (Mateo 5:3; Luka 21:34) Twailwa ne bilongwa bya buswe bitulongēle Leza. Pa kupwa kwilwa’byo, twaikala bapēla kuponena mu bilongwa bibi.

 6. Le i bubandaudi bwa kisonekwa’ka bubwanya kwitukwasha tuleke kwilwa kinenwa kya Yehova?

⁶ Mutumibwa Polo, mu mukanda wandi umbajinji kudi bene Kodinda, wānene myanda ya bene Isalela bāikele na kīlwa mu ntanda mutuputupu. Bene Kidishitu ba mu myaka katwa imbajinji bāmwenine bukwashi buvule mu binenwa bya Polo, ne batwe netu mo monka, kupituluka mu byaāsonekele kubwanya kwitukwasha tuleke kwilwa kinenwa kya Yehova. Nanshi tubandaulei pano 1 Kodinda 10:1-12.

Tufundulei Bilokoloko bya Ino Ntanda

 7. Lelo i bilomboji’ka kebipatanibwapo byēmwenine bene Isalela bilombola amba Yehova wādi wibaswele?

⁷ Byobya binene Polo pangala pa bene Isalela i kidyumu ku bene Kidishitu. Dibajinji, Polo i musoneke amba: “Ino kabidi, bānwe bāna betu, nkisakilepo’mba, mwikale kuyūka mpika, bakulutuba betu bonso byo bādi munshi mwa dikumbi; abo bonso bakapityila pa dijiba dya mema; abo bonso babatyijibwa mudi Mosesa mu dikumbi, ne mu dijiba.” (1 Kodinda 10:1-4) Bene Isalela ba mu mafuku a Mosesa bēmwenine bilomboji bya bukomo bwa Leza, kubadila’mo ne kingelengele kya dilenga dya dikumbi dyādi dyenda dibaludika mu dyuba, dyēbakweshe bāpanda pa Kalunga Katyila. (Divilu 13:21; 14:21, 22) Bine, boba bene Isalela bādi na bukamoni kebupatanibwapo bulombola amba Yehova wādi wibaswele.

 8. I byamalwa’ka byāponene bene Isalela pa mwanda wa kīlwa kyobāidilwe bintu bya ku mushipiditu?

⁸ “Ino,” ye Polo ukinena, “Leza kaloelelwepo biyampe bamo bamo, bavule bene, mwanda balundwilwe muntanda mutuputupu.” (1 Kodinda 10:5) Bine, i kya bulanda! Bene Isalela bavule bālupukile mu Edipito bēbudije abo bene kutwela mu Ntanda ya Mulao. Bāfwa mu ntanda mutuputupu, mwanda Leza wēbelele pangala pa kubulwa kobabudilwe lwitabijo. (Bahebelu 3:16-19) Lelo i ñeni’ka yotukokeja kuboila ku uno mwanda? Polo unena’mba: “Bino byonso bino byadi byakwitutompekeja bātwe, mwanda wa kunena’mba, twakēkala na kilokoloko kya bintu bibibibi, monka mo badi bēkadile abo na kilokoloko.”​—1 Kodinda 10:6.

 9. Yehova wāpele bantu bandi bintu’ka, ne Isalela wālongele’po kika?

⁹ Bene Isalela bādi na bintu bivule bya ku mushipiditu bya kulanguluka’po kitatyi kyobādi mu ntanda mutuputupu. Bāsambile kipwano na Yehova, bāikala ke muzo mwipāne kwadi. Kadi bāpebwa butobo, bāpebwa tabenakulo bu kité kya butōtyi, ne mingilo ya kwela bitapwa kudi Yehova. Pa kyaba kya kusepelela bino byabuntu bya ku mushipiditu, abo bāleka abo bene mityima yabo ilēmenena ku kushikwa bintu bya ku ngitu byādi bibapa Leza.​—Umbadilo 11:4-6.

10. Mwanda waka tufwaninwe kutūla nyeke Leza mu mityima yetu?

¹⁰ Bantu ba Yehova ba mu ano mafuku i beshile na bene Isalela ba mu ntanda mutuputupu, mwanda abo i betabijibwe na aye. Inoko ku muntu ku muntu, tufwaninwe kulama Leza mu milangwe yetu. Mu uno muswelo, bilokoloko byonso bya kwisakila kebikafityijapo mumweno wetu wa ku mushipiditu. Tufwaninwe kusumininwa “kupela bumpikwa bwine-Leza, ne bya kilokoloko kya panopantanda, ne kwikala bakwilemeka senene, ne bakoloka ne ba bwine-Leza ponka panopantanda.” (Tetusa 2:12) Boba bonso badi umbukata mwetu bāitabije bwine Kidishitu tamba ku bwanuke bwabo, kebafwaninwepo kulanga amba kudi kintu kampanda kilumbuluke kyobabudilwe. Milangwe ya uno muswelo keifwaninwepo nansha kwibāya ku mityima, bafwaninwe kuvuluka Yehova, ne madyese a kutendelwa obetubikile.​—Bahebelu 12:2, 3.

Tutūlei Kikulupiji Kyetu Kyonso Mudi Yehova

11, 12. I muswelo’ka ukokeja muntu kwikala mutōtyi wa bilezaleza pampikilwa kufukatyila’ye bankishi?

¹¹ Polo witupa kidyumu kikwabo amba: “[Ketwakekalai] kutōta bakishi, pamo bwa bamo bamo ba abo; mo kisonekelwe’mba: Boba bantu bashikete kudya ne kutoma, ino ke bataluka kuzua.” (1 Kodinda 10:7) Polo pano wisambila pa bene Isalela kitatyi kyobāningīle Alone kwibalongela kyana kya ñombe kya nsahabu. (Divilu 32:1-4) Nansha byoketukokejapo kutōta bankishi, inoko tukokeja kwikala batōtyi ba bilezaleza shi tuleke bilokoloko byetu bya kwisakila bitulabika pa kyaba kya kutōta Yehova na mutyima wetu onso.​—Kolose 3:5.

¹² Polo wāsonekele pakwabo pa mwanda utala bantu bādi bepeneneka’nka na kukimba bintu bya ku ngitu, ino kukimba bya ku mushipiditu mpikila. Ebiya wēsambila pa bano bantu bādi ‘bananga bu balwana na mutyi wa masusu wa Kidishitu,’ amba: “Mfulo yabo i konakanibwa, leza wabo i difu.” (Fidipai 3:18, 19) Kilezaleza kyobādi batōta ke nkishipo musongwe. I kilokoloko kyabo kya bintu bya ku ngitu. Kunena na bubine, ke bintupo byonso bisakwa bibipile. Yehova wētupangile na byaka ne na bukomo bwa kwisangaja na bintu bishileshile. Ino boba bemanine enka pa kulondalonda bya kwisangaja, bailwa ne kipwano kyobapwene na Leza, i batōtyi ba bilezaleza.​—2 Temote 3:1-5.

13. I ñeni’ka yotwaboila ku nsekununi ya kyana kya ñombe kya nsahabu?

¹³ Bene Isalela pa kupwa kutamba mu Edipito bātōtele kyana kya ñombe. Pa kino kidyumu kya kwepuka kutōta bilezaleza, padi kadi ne ñeni ya mvubu yotufwaninwe kuboila ku ino nsekununi. Bene Isalela bābudilwe patōkelela kukōkela ku buludiki bwa Yehova. (Divilu 20:4-6) Inoko kebādipo na mulangwe wa kupela Yehova amba kakidipo Leza wabo. Bāelele bitapwa ku kyana kya ñombe kisungululwe, amba i ‘masobo a Yehova.’ Bine bādi beongola abo bene amba Leza kakatepo mutyima ku kubulwa kikōkeji kwabo. Uno wādi mutonko wādi utukwa Yehova, o mwanda byāmukalabeje bininge.​—Divilu 32:5, 7-10; Mitōto 106:19, 20.

14, 15. (a) I kika kinenenwa amba bene Isalela kebādipo na bubinga bwa kwikadila bemvwaniki ba kīlwa? (b) Shi tusumininwe kuleka kwikala bemvwaniki ba kīlwa, tukalonga bika na mbila ya Yehova?

¹⁴ Kumona Kamoni wa Yehova ukelunga ku mutōtelo wa bubela i kintu kekimwekangamwekangapo. Inoko, bamo bakokeja kupela buludiki bwa Yehova, abo monka mu kipwilo. Bene Isalela kebādipo na bubinga bwa kwikadila bemvwaniki ba kīlwa. Bāivwene Mbila Dikumi, mwanda bādi ponka pādi pebalombola Mosesa lubila lwa Leza lunena’mba: “Kemukakolwa kulonga baleza bangi bakwabo po ndi, mhm, nansha baleza ba ndalama nansha baleza ba nsahabu, kemukakolwa kukalonga ko mudi.” (Divilu 20:18, 19, 22, 23) Ino bene Isalela bātōta kyana kya ñombe kya nsahabu.

¹⁵ Ne batwe netu monka na monka, ketudipo na bubinga bwa kwikadila bemvwaniki ba kīlwa. Bisonekwa bitulombolanga buludiki bwa Leza mu myanda mivule ya umbūmi. Kifwa, Kinenwa kya Yehova kipeleja patōkelela kwapula mapu pampikwa kwaluja. (Mitōto 37:21) Bana banenwe kukōkela bambutwile babo, bashabana nabo kutamija babo bana mungya “madingi, ne mu lufundijo lwa Mfumwetu.” (Efisesa 6:1-4) Bene Kidishitu bankunga bafwaninwe kusonga “monka mudi Mfumwetu,” bengidi ba Leza besonge nabo i basoñanibwe amba: “Kusonga nako kulemekibwe ku bonsololo, ne butanda nabo bwikale senene, biyampe, tō; ino babusekese ne bampongoloki Leza ukebatyibilanga mambo abo.” (1 Kodinda 7:39; Bahebelu 13:4) Shi tusumininwe kuleka kwikala bemvwaniki ba kīlwa, i bine ketukabulwepo kukakwata na mutyika ino misoñanya ne mikwabo yonso itambile kudi Leza ne kulongela monka.

16. I byamalwa’ka byātambile ku butōtyi bwa kyana kya ñombe kya nsahabu?

¹⁶ Yehova kāitabijepo bene Isalela bādi bakimba kumutōta mobasakila. Bantu 3 000 bāipailwe, kepabulwe padi yo yādi mitwe ya butomboki bwa kutōta kyana kya ñombe kya nsahabu. Banonga-bibi bakwabo nabo bāfwa ku kipupo kyātambile kudi Yehova. (Divilu 32:28, 35) Bine, buno i bufundiji bukatampe ku boba bonso batanga Kinenwa kya Leza, ino koku betongela bintu byobasaka kukōkela’ko!

‘Tunyemei Busekese’

17. Lelo 1 Kodinda 10:8 wisambila pa kinkumenkume’ka?

¹⁷ Mwanda mukwabo witukokanga’mo bilokoloko bya ngitu twikale ba kīlwa ku bintu bya ku mushipiditu i uno obatelele kudi Polo amba: “[Ketukikala] kulāla busekese pamo bwa bamo bamo ba abo badi balāla busekese, nanshi baponene difuku dimo dyonka bantu tununu makumi abidi ne tununumo tusatu.” (1 Kodinda 10:8) Polo pano wisambila pa kinkumenkume kyātene bene Isalela mu Malungu a Moabu, ku mvuyo ya lwendo lwabo lwa myaka 40 lobādi benda balumbakana mu ntanda mutuputupu. Bene Isalela bādi bakipwapwapwa kupebwa na Yehova bushindañani pa matanda a kutunduka kwa Yodano, ino bavule bāikala bantu ba kīlwa, bampikwa kubanga biyampe byēbalongēlwe. Bēkuja mu busekese ne mu butōtyi bwa munyanji bwa Bala Peole, abo papo kebalumba ku mukalo wa Ntanda ya Mulao. Bantu kubwipi kwa 24 000 bāfwa, kubadila’mo ne banenga-myanda 1 000.​—Umbadilo 25:9.

18. Le i mwiendelejo wa muswelo’ka ufikijanga bamo ku busekese?

¹⁸ Bantu ba Yehova dyalelo i bayukane pangala pa mwiendelejo wabo wanibwa. Ino bene Kidishitu bamo, pobatompibwanga na kyongo kya busekese, belwanga Leza ne misoñanya yandi mine. Baalamuka ke bemvwaniki ba kīlwa. Dibajinji, kyongo kekikalangapo kala busekese bwine. Padi i kwitobwa’tu kutala bifwatulo bya bantu badi mutaka, pamo i kwiselembeja, nansha majeste ambulwa kwendela’mo, pakwabo i kisense na bantu ba mwiendelejo moneke. Byonso bino kebyo kufikija bene Kidishitu ku kuponena mu bubi.​—1 Kodinda 15:33; Yakoba 4:4.

19. I madingi’ka a mu Bisonekwa etusoñanya ‘kunyema busekese’?

¹⁹ Nansha shi tubatompibwa na mwikadilo umbi, ketufwaninwepo kwilwa Yehova. Ino tufwaninwe kulonda bivulujo bidi mu Kinenwa kyandi. (Mitōto 119:1, 2) Bene Kidishitu bavule umbukata mwetu baloñanga bukomo bwa kushala batōka mu mwikadilo, ino kulonga byoloke ku meso a Leza kulomba bukomo bwa endaenda. (1 Kodinda 9:27) Polo wātumīne bene Kidishitu bādi mu Loma mukanda amba: “Kikokeji kyenu i kiyukwe na bonso. E kyo nsepelela padi banwe, nsaka’mba mwikale batunangu twa kulonga biyampe ne bampikwa kwiela mu bibibibi.” (Loma 16:19, MB) Panopano ponka, ba busekese ne banonga-bibi basa kutyibilwa nsambu na Yehova, monka mwāipailwe boba bene Isalela 24 000 pa mwanda wa bubi bwabo. (Efisesa 5:3-6) O mwanda nanshi, pa kyaba kya kwikala bemvwaniki ba kīlwa, twendelelei na ‘kunyema busekese.’​—1 Kodinda 6:18, MB.

Tusangelei Bintu Byonso Bitulongela Yehova

20. Lelo bene Isalela bātūdile Yehova pa ditompo namani, penepo byāfula kwepi?

²⁰ Bene Kidishitu bavule bene kebaponenangapo mu busekese. Ino tufwaninwe kudyumuka, kutyina amba twakalondalonda mwiendelejo ukolomona miuningo ileta kupelwa na Leza. Polo witudyumuna’mba: “[Ketwakekalai] kutompa Mfumwetu, pamo bwa bamo bamo ba abo badi bamutompa, ino baonekele ku banyoka; ne kumwiuningila, pamo bwa bamo bamo ba abo, kadi baonekele kudi wakyonakanya.” (1 Kodinda 10:9, 10) Bene Isalela bādi beuningila Mosesa ne Alone​—eyo, beuningila ne Leza mwine​—batompola pangala pa mana ādi ebapebwa mu kingelengele. (Umbadilo 16:41; 21:5) Lelo kufitwa mutyima kwāfityilwe Yehova pa mwanda wa miuningo yabo kwādi kutyetye kupita kokwa kwaāfityilwe pa busekese bwabo? Nsekununi ya mu Bible ilombola amba bantu bavule bēuningile bāfwile lwa banyoka. (Umbadilo 21:6) Dibajinji bidi, bantu 14 700 bātombokele na miuningo bāipailwe bonso. (Umbadilo 16:49) Shi ke pano, tulekei kutūla kitūkijetyima kya Yehova pa ditompo na kupēlula mpangiko yandi.

21. (a) Lelo i binenwa’ka bya kwisāshila byālembele Polo ku bukomo bwa mushipiditu? (b) Kukwatañana na Yakoba 1:25, i muswelo’ka otukokeja kumona nsangaji yabinebine?

²¹ Polo wāfudije mulongo wa bidyumu byādi mu mukanda waātumīne banababo bene Kidishitu na kwibesāshila’mba: “Bino bintu byonso bino byebafikile mwanda wa kyelekejo; ebiya nabyo byalembelwe mwanda wa kwitudyumuna bātwe bakufikilwa na pa mfulo ya panopantanda. Penepo nanshi po pa mwanda mwine mwine wa yewa ufwatakanya’mba: Naimana; atūkanye pa kutyina’mba, wakapona.” (1 Kodinda 10:11, 12) Ne batwe netu monka na monka, tweselwanga madyese mavule atamba kudi Yehova pamo bwa oa ādi eselwa bene Isalela. Inoko batwe twishilei nabo, ketwakekalai nansha dimo bantu ba kīlwa, baleka kusangela biyampe bitulongela Leza. Nansha shi tubatanwa na bintu bituzumbijazumbija mityima umbūmi, tulangulukei pa milao ya kutendelwa idi mu Kinenwa kyandi. Tuvulukei nyeke amba kipwano kyotupwene na Yehova i kilēme, koku twendelela na kwingila mwingilo wa kusapula myanda ya Bulopwe witupelwe. (Mateo 24:14; 28:19, 20) Kulonga namino kuketuletela nsangaji yabinebine, ke-bintu Bisonekwa bitulaile amba: “Aye wakutadija, talē, monka mu kijila kibwa[nini]ne kya bu-mwana-pabo ukeselwako dyese dya pa bilongwa byandi, ke-muntu aye kadipo wakwivwana wavulaminwa, mhm, i wakulonga wa mīngilo.”​—Yakoba 1:25.

Usa Kulondolola Namani?

• I bika bikokeja kwitwikadija bemvwaniki ba kīlwa?

• Mwanda waka kukōkela Leza mu byonso kudi na kamweno?

• I muswelo’ka otukokeja ‘kunyema busekese’?

• Le tufwaninwe kumona namani mpangiko itūdile’ko Yehova?

[Kifwatulo pa paje 11]

Bene Isalela bāidilwe bilongwa bya bukomo byēbalongēle Yehova

[Kifwatulo pa paje 12]

Bantu ba Yehova i basumininwe kulama mwiendelejo wanibwa