Endelelai Na Kunangila Mu Dishinda Dya Yehova

“Tengela Yehova, ulamate mu dishinda dyandi, nandi ukakutululanga kupyana ntanda.”​​—MITŌTO 37:⁠34.

“NGYŪKIJE dishinda dyo mfwaninwe kupitamo; ke-ne-muntu ami ntululanga muya wami kudi abe.” (Mitōto 143:⁠8) Bene Kidishitu bapitulukanga dyalelo mu bino binenwa bya Mulopwe Davida na mutyima wabo onso. Babilanga byabinebine kusangaja Yehova ne kunanga mu dishinda dyandi. Le kino kilomba kulonga bika? Kudi Davida kyādi kishintulula kulama bijila bya Leza. Kyādi kilomba kukulupila mudi Yehova pa kyaba kya kusamba bipwano na mizo. Kyabine, kyādi kilomba kwingidila Leza na dikōkeji kupita’ko kwingidila baleza ba mizo yobādi balondakene nayo. Ku bene Kidishitu, kunanga mu dishinda dya Yehova kulomba kulonga bintu bivule.

² Kibajinji bidi, kunanga mu dishinda dya Yehova dyalelo kishintulula kwikala na lwitabijo mu kitapwa kya kinkūlwa kya Yesu Kidishitu, kwitabija amba aye ye ‘dishinda, ne bubinebine, ne būmi.’ (Yoano 3:​16; 14:⁠6; Bahebelu 5:⁠9) Kishintulula kadi ne kulonda ‘kijila kya Kidishitu,’ kya kwiswa umo ne mukwabo, nakampata ku banababo na Yesu bashingwe-māni. (Ngalatea 6:⁠2; Mateo 25:​34-​40) Boba banangila mu dishinda dya Yehova basenswe misoñanya yandi ne mbila yandi. (Mitōto 119:​97; Nkindi 4:​5, 6) Bakwete na mutyika madyese abo malēme a kutambila mu mwingilo wa bwine Kidishitu. (Kolose 4:​17; 2 Temote 4:⁠5) Milombelo nayo i kipindi kya kitatyi kyonso kya būmi bwabo. (Loma 12:​12) Kadi i ‘batūkanye biyampe pa kunanga, ke pamopo bwa bampikwa tunangu, mhm, ino i bwa bantu batunangu.’ (Efisesa 5:​15) Kebasakilepo kujimija bupeta bwabo bwa kumushipiditu pa mwanda wa tumweno twa kungitu twa lupito nansha pa mwanda wa bilokoloko bibi bya ngitu. (Mateo 6:​19, 20; 1 Yoano 2:​15-​17) Ino bintu bya mvubu kobadi i kwikala na dikōkeji kudi Yehova ne kumukulupila. (2 Kodinda 1:⁠9; 10:⁠5; Efisesa 4:​24) Mwanda waka? Mwanda ngikadilo yotudi’mo i midingakane mu bintu bivule na yoya yādi’mo Isalela wa kala.

Kisakilwa Kikulupiji ne Dikōkeji

³ Isalela wādi muzo mutyetye mujokolokwe na balondakani banshikani bādi bepēne mu bisela bya bukobakane bya mutōtelo wa bilezaleza. (1 Bilongwa 16:​26) I enka bene Isalela kete bo bādi bengidila Yehova, Leza umo wabine ne wakubulwa kumweka, wēbasoñenye kwikala na mwikadilo mulumbuluke kutabuka. (Kupituluka 6:⁠4) Ne dyalelo nadyo mo monka, i midiyo mityetye ya bantu itōta Yehova, ino ayo umbukata mwa bantu kubwipi kwa midiyala isamba balonda misoñanya ne milongelo mishile na isaka Yehova. Wivwane tudi mu ino midiyo mityetye, nankyo tufwaninwe kudyumuka ne kwepuka dishinda dityani. Kwepuka’dyo namani? Na kulama dikōkeji ne lwitabijo mudi Yehova Leza, ne kukulupila byabine amba ukafikidijanga milao yandi. (Bahebelu 11:⁠6) Bino biketukinga ku kutūla kikulupiji kyetu mu bintu bikulupile ino ntanda.​​—Nkindi 20:​22; 1 Temote 6:⁠17.

⁴ Mutumibwa Polo wālombwele amba bene Kidishitu bafwaninwe kwikala beshile kulampe kwine na ntanda paāsonekele’mba: “Penepo kadi i kino kyo nēsamba, ne kusapula bu-kamoni mudi Mfumwetu na’mba, pano nanshi, kemukinanga pamo na munangila baJentaila monka mwa [bitupubitupu] mwa mityima yabo, byo badi ne ñeni yabo mibafītyijibwe, balobele mungi ku būmi bwa Leza mpika, mwanda wa bumpikwa ñeni bo badi nabo munda mwabo, kadi ne pa mwanda wa kwiumija mityima yabo.” (Efisesa 4:​17, 18) Yesu ye “mwinya wa bīne.” (Yoano 1:⁠9) Boba bonso bamupela, ne boba betela bu bamwitabije ino abo kukōkela ku ‘kijila kya Kidishitu’ mpika, badi “ne ñeni yabo mibafītyijibwe.” Pa kyaba kya kunanga mu dishinda dya Yehova, abo i “balobele mungi ku būmi bwa Leza mpika.” Nansha shi balanga bu badi na tunangu tutembaulwa na ino ntanda, i bantu ‘bampikwa tunangu munda mwabo’ pa mwanda utala buyuki butwala ku būmi bwa kuyuka Yehova Leza ne Yesu Kidishitu.​​—Yoano 17:⁠3; 1 Kodinda 3:⁠19.

⁵ Bine, mwinya wa bubinebine weñenyanga ntanda yonso! (Mitōto 43:⁠3; Fidipai 2:​15) “Tunangu twenda twila tubobo, mu mikenza monso.” (Nkindi 1:​20, BB) Mwaka wadi’mo, Batumoni ba Yehova bapityije nsaa mudiyala ne bya pangala mu kusapwila bakwabo myanda itala padi Yehova Leza ne Yesu Kidishitu. Bantu tununu tutwa na tutwa baitabile ku luno lwito. Le kudi kya kutulumuka shi bakwabo bavule kebaitabilepo? Mhm. Ke-muntu Polo wēsambile “ne pa mwanda wa kwiumija mityima yabo.” Bamo badi na mityima mitune na kwisakila kobesakilanga ne na kusanswa lupeto. Bakwabo nabo i balubijibwe na mitōtelo ya bubela nansha na mumweno wa bwine ntanda uzambalele pi na pi dyalelo. Kutentekela’po ne bikoleja bya umbūmi bibaalamuna mityima ya bavule, abavundamina kudi Leza. Bakwabo bapela’nka ne kulonda misoñanya ya Yehova ya mwikadilo wanwa. (Yoano 3:​20) Lelo mutyima wa muntu unanga mu dishinda dya Yehova nao ukokeja kutuna ku bintu bya uno muswelo?

⁶ Kino kyo kyāfikile Isalela wa kala, mungya mwālombwedile Polo. Wāsonekele’mba: “Bino byonso bino byadi byakwitutompekeja bātwe, mwanda wa kunena’mba, twakēkala na kilokoloko kya bintu bibibibi, monka mo badi bēkadile abo na kilokoloko, ne kutōta bakishi, pamo bwa bamo bamo ba abo; mo kisonekelwe’mba: Boba bantu bashikete kudya ne kutoma, ino ke bataluka kuzua; ne kulāla busekese pamo bwa bamo bamo ba abo badi balāla busekese, nanshi baponene difuku dimo dyonka bantu tununu makumi abidi ne tununumo tusatu.”​​—1 Kodinda 10:​6-⁠8.

⁷ Polo utela dibajinji kitatyi kyatōtele Isalela kyana kya ñombe munshi mwa Lūlu lwa Shinai. (Divilu 32:​5, 6) Kuno kwādi kubulwa kikōkeji kwa patōkelela ku lubila lwa Leza lobāitabije kukōkela mayenga matyetye kunyuma. (Divilu 20:​4-⁠6; 24:⁠3) Kupwa Polo utela kitatyi kyāfukatyile Isalela kutōta Bala pamo na bana bana-bakaji bene Moabu. (Umbadilo 25:​1-⁠9) Butōtyi bwa kyana kya ñombe bwādi butōtyi bwa bintu bya munyanji, bwa ‘kuzua mazua.’a Mu kutōtwa kwa Bala namo mwādi busekese bwa malwa. (Kusokwelwa 2:​14) Mwanda waka bene Isalela bālongele buno bubi? Mwanda bālekele mityima yabo yālemenenwa “na kilokoloko kya bintu bibibibi” bya butōtyi bwa bilezaleza ne bintu bikobakane byādi bilongwa’po.

⁸ Polo wālombwele amba tufwaninwe kuboila ñeni ku ino myanda. Kuboila’ko ñeni’ka? Kebidipo mwa kufwatakenya ku mwine Kidishitu kufukatyila kyana kya ñombe nansha leza wa kala wa bene Moabu. Ino le pa mwanda utala busekese nansha bilokoloko bya munyanji napo? Dyalelo bino bintu i bipone kipupo konso, shi tuleke kilokoloko kya kwibyabila kitama mu mityima yetu, nankyo biketusonsolola kudi Yehova. Ku mfulo tukekala pamo ponka bwa batwe batōta bilezaleza​​—balobele mungi, kudi Leza mpika. (Enzankanya na Kolose 3:⁠5; Fidipai 3:​19.) O mwanda Polo ufudija mīsambo yandi ya byobya binkumenkume na kusoñanya balunda nandi betabije amba: “Nyemai kutōta bakishi.”​​—1 Kodinda 10:⁠14.

Bukwashi bwa Kunangila mu Dishinda dya Leza

⁹ Shi binebine twi basumininwe kunanga mu dishinda dya Yehova, tuyukei amba ketubudilwepo mukwashi wa kwabija. Isaya wānene mu bupolofeto bwandi amba: “Matwi obe akevwana kinenwa kunyuma amba: Dine dino’di dyo dishinda, nangaimo; po mwalamuka ku lundyo, ne po mwalamuka ku lunkuso.” (Isaya 30:​21) I muswelo’ka wivwananga ‘matwi etu’ kino ‘kinenwa kunyuma kwetu’? Eyo, i kutupu dyalelo muntu wivwananga diwi nansha musapu kampanda umupa Leza pa bute pa bute. Kino “kinenwa” kyotwivwananga kitufikilanga batwe bonso mu muswelo umo. Dibajinji i kupityila ku Bisonekwa bya ku bukomo bwa mushipiditu bitanwa mu Bible, mudi milangwe ya Leza ne bilembwa bitala pa kipwano kyandi na bantu. Difuku ne difuku, twimwenanga bisela bipupa bantu “balobele mungi ku būmi bwa Leza mpika,” nanshi shi tusaka kwikala bakomo kumushipiditu, tufwaninwe kutanga Bible ne kulanguluka’po kitatyi ne kitatyi. Buno butangi buketukwasha twepuke “byobya bityani,” ino twikale ‘ba bwino bubwaninine, bakumbanye byonso mwanda wa mwingilo onso muyampe.’ (Bilongwa 14:​14, 15; 2 Temote 3:​16, 17 ) Kino kiketukankamika, kwitukomeja ne kwitukwasha ‘tulonge dishinda dyetu ke dilumbuluke.’ (Yoshua 1:​7, 8) Shi ke pano, Kinenwa kya Yehova kitusoñanya’mba: “Ino pano namino bāna bami bana-balume tejai ko ndi; mwanda i bakatōkwe balama mashinda ami. Umvwanai bulombodi, mwikale bañeni, kemukipela’bo.”​​—Nkindi 8:​32, 33.

¹⁰ ‘Kinenwa kunyuma kwetu’ kitufikilanga ne kupityila kudi “umpika wabinebine ne wamanwa,” witupanga “bidibwa pa kitatyi kifwaninwe.” (Mateo 24:​45-​47, NW) Muswelo umo waitupanga bino bidibwa i na kwitulupwila mabuku emanine pa Bible; mu ino myaka bino bidibwa bibavula ke bya ntanda ne miseke. Kifwa, dipepala Kiteba kya Mulami, dyendanga ditutōkejeja mwivwanino wetu wa bupolofeto. Betukankamikanga’mo kwendelela na mwingilo wa kusapula ne kulonga bana-babwanga nansha buñumauma bwa bantu byobwenda buvula, betudyumuna’mo kwepuka makinga, kadi betusoñanya’mo ne kutamija ngikadilo milumbuluke ya bwine Kidishitu. Bine, tukwete makasa abidi bino bidibwa bīyanga pa kitatyi kifwaninwe!

¹¹ Umpika wabinebine ne wamanwa witupanga kadi bidibwa kupityila ku kupwila kwetu kwa kitatyi ne kitatyi. Kuno i kupwila kwa pa kipwilo, kupwila kwa misunsa ibidi pa mwaka mu kipindi, ne bitango bikatampe bya pa mwaka. Lelo i mwine Kidishitu’ka wakikōkeji kayukile mvubu idi na kuno kubungakana? Kudi na bukwashi mpata, mwanda kwitupanga bukomo bwa kwendelela na kunanga mu dishinda dya Yehova. Kwitana kwa bene Kidishitu kitatyi ne kitatyi kupāndijanga būmi, mwanda bavule bapityijanga kitatyi kilampe ku mingilo nansha ku kaji na bantu bokebadipo nabo lwitabijo lumo. Kupwila kuletanga mukenga wa ‘kwisombela batwe bonso ku buswe ne ku mingilo milumbuluke.’ (Bahebelu 10:​24) Tuswele banabetu, tuswele kadi ne kwinangila nabo.​​—Mitōto 133:⁠1.

¹² Bino bidibwa bya kumushipiditu bipanga bantu kubwipi kwa midiyo isamba bukomo bwa kunangila mu dishinda dya Yehova, kadi midiyo mikwabo nayo ifundanga Bible mwanda wa kuyuka mwa kunangila’mo. Lelo i bazozejibwe nansha kupungila amba mwanda’po i batyetye bapitwe na midiyala ya bantu basakanya pa ino ntanda? Nansha dimo! I basumininwe kwendelela na kwivwana ‘kinenwa kunyuma kwabo’ balonga nyeke kiswamutyima kya Yehova. Pa kusaka kulombola kuno kusumininwa kwabo patōka, boba bakatenwe ku Bitango bya Distrike Kadi bya Matanda “Dishinda dya Leza dya Būmi,” byalongelwe mu 1998/1999, batyipile na mutyima umo lukwembo lulombola mwimanino wabo. Bilembwa bine bya luno lukwembo i bino bilonda’ko.

Lukwembo

¹³ “Batwe Batumoni ba Yehova babungakenine pamo ku kino Kitango ‘Dishinda dya Leza dya Būmi,’ tubaitabija na mutyima onso amba dishinda dya Leza dyo dishinda dya būmi ditabukile buya mashinda onso. Eyo, twi bayuke amba bantu bavule dyalelo bamwene bintu mu muswelo mukwabo. Bitango bya bantu ke bitompe milangwe mivule, mafilozofi, ne milangilo ya mitōtelo itala pa dishinda dya būmi diyampe kupita onso. Ino kunena na bubine, mānga ya muntu ne ngikadilo ya ntanda yotudi’mo dyalelo ilombola patōka’mba bino binenwa bya Leza bisonekelwe mu Yelemia 10:​23 i byabine: ‘Kekidipo mu muntu unañanga kolola matabula andi.’

¹⁴ “Difuku ne difuku twimwenanga patōka bubine bwa bino binenwa. Mwanda bantu bavule kebatelepo mutyima ku dishinda dya Leza dya būmi. Balonga byobamwene bu byoloke mu meso abo. Bipa bilupuka’ko i byamalwa byonka​​—kupomoka kwa būmi bwa kisaka, kushiya bana bakubulwa mudingidi; kwipeneneka na kulondalonda byabupeta, mfulo yabyo i kupanga luvula bitupu ne kwialakanya; bupolapola ne bukalabale bwambulwa kafuku, bupitula bantu kebabadika; ñuma ne mavita elwa tubila ne tubila, bikubija tununu ne tununu twa myuya ya bantu; busekese bwandabile konso, bwaleta bipupo bya mba isambuka ku buladi. Ino i myanda ibala-inga’tu yayatwa mu makambakano mavule madyambakane avutakenyanga bantu nsangaji, ndoe ne mutyima-ntenke.

¹⁵ “Byotwamona ngikadilo ya bulanda idi’mo bantu ne kufwena kwafwena ‘divita dya difuku dikatakata dya Leza, Mwinebukomobonso’ ditelwa bu Amakedona (Kusokwelwa 16:​14, 16), batwe Batumoni ba Yehova tubatyipe lukwembo amba:

¹⁶ “Kintu Kibajinji: Twiyukile amba tutelelwa Yehova Leza, umo ne umo umbukata mwetu i mwipāne aye mwine kwadi pampikwa kuningilwa, kadi tulamine lwitabijo lwambulwa kutelententa mu mpango ya Yehova ya kinkūlwa yāfikidijibwe kupityila kudi wandi Mwana Yesu Kidishitu. Twi basumininwe kunangila mu dishinda dya Leza dya būmi, kumwingidila bu Batumoni bandi ne kukōkela ku bubikadi bwandi monka mobulombwelwa na buludiki bwa Yesu Kidishitu.

¹⁷ “Kya Bubidi: Tukendelela nyeke na kulamata ku mwikadilo mulumbuluke ne ku misoñanya ya kumushipiditu idi mu Bible. Twi basumininwe kwishisa kunanga munangila mizo mu bintu byabituputupu bya mwendele ñeni yayo. (Efisesa 4:​17-​19) Twi batyipe lukwembo kwikala nyeke batōka ku meso a Yehova, bampikwa kiko kya ku ino ntanda.​​—Yakoba 1:⁠27.

¹⁸ “Kya Busatu: Tukekala nyeke balame pototo mwimanino wetu wa mu Bisonekwa utala pa bu bana na bana bwa bwine Kidishitu kujokoloka ntanda yonso. Tukalama nyeke mwimanino wetu wa bwine Kidishitu wa kupela kwikuja mu bimyanda bya mizo, kutupu kupya mu dikinga dya mushikwa ne kwilalulula kwa misaka, kwa mizo ne tubila.

¹⁹ “Kya Buná: Batwe bambutwile, tukendelela nyeke na kukomeneja dishinda dya Leza mu betu bana. Tukebapa kifwa kya būmi bwa bwine Kidishitu, na kulonda na mutyima onso butangi bwa Bible kitatyi ne kitatyi, kifundwa kya kisaka, mingilo ya pa kipwilo kya bwine Kidishitu, ne mwingilo wa budimi.

²⁰ “Kya Butano: Batwe bonso tukekankila’ko kutamija ngikadilo ya bwine Leza yotupelwe kifwa na Umpangi wetu, ne tukalonga bukomo bwa kwiula bumuntu bwandi ne mashinda andi, pamo na mwāmwiwidile Yesu. (Efisesa 5:⁠1) Twi batyipe lukwembo kulonga bintu byonso na buswe, mwanda bo bwituyukilwanga’po bu bana-babwanga ba Kidishitu.​​—Yoano 13:⁠35.

²¹ “Kya Busamba: Tukendelela nyeke pampikwa kukōka na kusapula myanda miyampe ya Bulopwe bwa Leza, kulonga bana-babwanga, kwibafundija dishinda dya Leza dya būmi ne kwibakankamika bapebwe bufundiji bukwabo ku kupwila kwa pa kipwilo.​​—Mateo 24:​14; 28:​19, 20; Bahebelu 10:​24, 25.

²² “Kya Busamba-Bubidi: Tukatūla nyeke kiswamutyima kya Leza pa kifuko kibajinji, umo ne umo, ne batwe bonso kikonge babundile buno bulongolodi bwa mutōtelo. Tukalonda Bible, Kinenwa kyandi, bu ketu kalombwe, ketukasasukilapo pafula, shi ku lunkuso, shi ku lundyo, ehe, mwanda tukulupile amba dishinda dya Leza dyo ditabukile kunengela mashinda onso a ino ntanda. Twi basumininwe kulonda dishinda dya Leza dya būmi​​—pototo pō ne na kikōkeji, pano ne nyeke ne nyekeke!

²³ “Tubatyipe luno lukwembo mwanda tutūdile kikulupiji kyetu kyonso mu mulao wa buswe wa Yehova witulaile amba, yewa ulonga kiswamutyima kya Leza ukalādilanga nyeke. Tubatyipe luno lukwembo mwanda tusumininwe amba kwikala na būmi bukwatañene na misoñanya, na madingi ne na bidyumu bya mu Bisonekwa ko kulumbulula dishinda dya būmi mu ano mafuku, kadi ko kwala kyalwilo kiyampe kya būmi bwa kumeso, amba twikale bakwate na makasa abidi būmi bwinebwine. (1 Temote 6:​19; 2 Temote 4:7b, 8) Kutabukidila bino byonso, tubatyipe luno lukwembo mwanda tuswele Yehova Leza ne mutyima wetu onso, ne muya wetu onso, ne ñeni yetu yonso, ne bukomo bwetu bonso!

²⁴ “Banwe bonso batenwe ku kino kitango betabije kutyipa luno lukwembo, tubemulombe mwitabije amba EYO!”

²⁵ Tutwa na tutwa twa biwanza ne bipaka kujokoloka ntanda yonso byatenkene palondolwele bemvwaniki bonso na kupukija’mba “EYO!” Na bubine Batumoni ba Yehova bakendelela nyeke kunangila mu dishinda dya Yehova. Bakulupile mudi Yehova ne kutūla lwitabijo mwadi amba ukafikidija milao yandi. Nansha namani, bakashala nyeke bamukōkele. Mwanda i basumininwe kulonga kiswamutyima kyandi.

“Leza I Wetu”

²⁶ Batumoni ba Yehova bavulukanga byānene mulembi wa mitōto amba: “Tengela Yehova, ulamate mu dishinda dyandi, nandi ukakutululanga kupyana ntanda.” (Mitōto 37:​34) Kebelwangapo binenwa bikankamika byānene Polo amba: “Shi Leza i wetu, nankyo uketulonga bubi i ani? Aye nanshi wakubulwa kwelela Mwana kunyuma wa aye mwine, ino wamusokwela padi bātwe bonso, ino abulwe namani kwitupa bintu byonso ke byabuntu ponka padi aye?” (Loma 8:​31, 32) I amo, wivwane twendelele na kunangila mu dishinda dya Yehova, uketupa “bintu byonso bya ntanda ne miseke byakuloelelwa monka.” (1 Temote 6:​17) Kekudipo pantu panengele bwa pano potudi​​—tunanga mu dishinda dya Yehova, pamo na batutu ne bakaka baswedibwe. Yehova byadi ku mutamba wetu, tusumininwei nanshi kushala’mo ne kūminina kufika ne ku mfulo, koku tukulupile’mba pakabwana kitatyi, tukemwena pakafikidija nseke ya nkonka ya mu milao yandi.​​—Tetusa 1:⁠2.

[Footnotes]

[Questions]

1, 2. Kunanga mu dishinda dya Yehova kyādi kishintulula bika kudi Mulopwe Davida, le kudi batwe netu ba dyalelo kishintulula bika?

3. Mwanda waka dikōkeji, lwitabijo ne kikulupiji biketulama tunangile mu dishinda dya Yehova?

4. Mwanda waka bantu ba mizo badi na “ñeni yabo mibafītyijibwe”?

5. Mwanda waka mityima ya bavule keitabapo nansha byokudi mwinya wa bubinebine weñenya mu ino ntanda?

6, 7. Nansha bene Isalela byobādi batōtyi ba Yehova Leza, i bitatyi’ka bimobimo byobāponene, ne mwanda waka?

8. I ñeni’ka yotukokeja kuboila ku byāfikile Isalela?

9. (a) I bukwashi’ka botukwashibwanga mwanda wa twendelele nyeke na kunangila mu dishinda dya Yehova? (b) I muswelo’ka umo otwivwananga ‘kinenwa kunyuma kwetu’?

10. I muswelo’ka wa bubidi otwivwananga ‘kinenwa kunyuma kwetu’?

11. Shintulula muswelo wa busatu otwivwananga ‘kinenwa kunyuma kwetu.’

12. I kusumininwa’ka kusumininwe Batumoni ba Yehova, ne i muswelo’ka obekulombwele panopano?

13, 14. Batumoni ba Yehova badi na mumweno’ka mujalale utala pa ngikadilo ya ino ntanda?

15, 16. Pangala pa dishinda dya Leza dya būmi, i kusumininwa’ka kwalombwelwe mu lukwembo?

17, 18. I mwimanino’ka ukalama nyeke Batumoni ba Yehova mu myanda itala mwikadilo mulumbuluke ne bu bana na bana bwabo bwa bwine Kidishitu?

19, 20. (a) Bambutwile bene Kidishitu bafwaninwe kulonga bika? (b) I muswelo’ka ukendelela bene Kidishitu babine kwiyukanya bu bana-babwanga ba Kidishitu?

21-23. Batumoni ba Yehova bakendelela na kulonga bika, ne i bakulupile mu bika?

24, 25. I malondololo’ka aletelwe ku lukwembo lwatyipilwe, ne i kusumininwa’ka kusumininwe boba bananga mu dishinda dya Yehova?

26. I ngikadilo’ka ya nsangaji idi’mo boba bananga mu dishinda dya Yehova?

[Caption on page 18]

Lukwembo lusumininwe lwatyipilwe ku Bitango bya Distrike Kadi bya Matanda “Dishinda dya Leza dya Būmi”

[Review on page 20]

Lelo Ukivulukile?

◻ I bika bilombwa ku mwine Kidishitu shi usaka kunangila mu dishinda dya Yehova?

◻ Mwanda waka tufwaninwe kutamija kikulupiji ne dikōkeji dyetu kudi Yehova?

◻ I bukwashi’ka botudi nabo pano potunangila mu dishinda dya Yehova?

◻ Tela myanda imoimo mikatampe ya lukwembo lwatyipilwe ku Bitango “Dishinda dya Leza dya Būmi.”