KIFUNDWA 24

Bubine bwa Mwikadile Bamwikeulu

Kitampe

Yehova usaka tuyuke kisaka kyandi kidi mūlu. Mu kino kisaka mudi ne bamwikeulu, betwa’mba “bana ba Leza.” (Yoba 38:7) Lelo Bible unena bika pa bamwikeulu? Lelo badi na lupusa’ka pa būmi bwa bantu? Lelo bamwikeulu bonso babadilwa mu kisaka kya Leza?

1. Lelo bamwikeulu i bāni?

Yehova wāpangile bamwikeulu kumeso kwa kupanga ntanda. Nabo, i mishipiditu yampikwa kumweka pamo’nka bwa aye, idi momwa mūlu. (Bahebelu 1:14) Kudi midiyo ne midiyo ya bamwikeulu, kadi abo bonso i beshile umo na mukwabo. (Kusokwelwa 5:11) Balondanga “kinenwa [kya Yehova], bakōkela diwi dyandi.” (Ñimbo ya Mitōto 103:20) Mu kitatyi kya kala, Yehova wādi utuma kyaba kimo bamwikeulu kukapāna musapu, kukakwasha bantu, ne kwibapandija. Dyalelo, bamwikeulu baludikilanga bene Kidishitu ku bantu basaka kwifunda myanda ya Leza.

2. Lelo Satana ne bandemona bandi i bāni?

Kudi bamwikeulu bamo kebāshelepo na kikōkeji kudi Yehova. Mwikeulu mubajinji kutomboka, i yewa “witwa bu Dyabola ne bu Satana, mwine ongolanga ntanda yonso ikelwe na bantu.” (Kusokwelwa 12:9) Satana wādi usaka kuludika bakwabo, o mwanda wātonwene bantu babajinji enka ne bamwikeulu bakwabo mwenda mafuku, mwanda wa belunge nandi ku butomboki. Bano bamwikeulu bantomboki betwanga bu bandemona. Yehova wēbapangile mūlu ne kwibēla pano pa ntanda, kadi usa kwibonakanya.—Tangai Kusokwelwa 12:9, 12.

3. Lelo Satana ne bandemona bongolanga bantu namani?

Satana ne bandemona i bongole bantu bavule kupityila ku bundemona nansha ku majende, bino i bilongwa bibi, bya kukimba kwisamba na bibanda. Kimfwa bantu bamo bendanga kwipangula bambuki balonda ñenyenye, bilumbu, bamaleñanya, ne bañanga. Bāngi nabo bendanga kukimba bundapi budi’mo majende. Kadi bantu i bongolwe na kulanga’mba babwanya kwisamba na bafwe. Ino Yehova witudyumuna’mba: “Kemwakalamukilai kudi babuka na bibanda, kadi kemwakepangulai bilumbu.” (Bene Levi 19:31) Witudyumunanga namino mwanda wa kwitukinga kudi Satana ne bandemona. Bano’ba i balwana na Leza, kadi bakimbanga kwitusanshija.

LANGULUKA BININGE

Wifunde myanda miyampe iloñanga bamwikeulu, kadi yuka kyaka kidi mu majende ne muswelo otubwanya kwikinga kudi Satana ne ku bandemona.

Mwikeulu umo uludika Batumoni babidi ba Yehova pobasapula ku njibo ne njibo.

4. Bamwikeulu bakwashanga bantu befunde myanda ya Yehova

Bamwikeulu ba Leza kebasapulangapo ku bantu buntu-ntala. Ino, babwanya kuludikila batōtyi ba Yehova ku bantu basaka kwifunda myanda yandi. Tangai Kusokwelwa 14:6, 7, ne kwisambila pa bino bipangujo:

Mwanda wa bika tusakilwa bukwashi bwa bamwikeulu pa kusapula?
Le ubakankamana pa kuyuka’mba bamwikeulu babwanya kukuludikila ku bantu basaka kuteja myanda ya mu Bible? Mwanda waka?

Bintu palapala bikwatañene na maleñanya ne majende, kubadila’mo ne mwavi, kidisale kijokoloke, tulata twa lubuko, popy wa voodoo, ensense, tukūya, ne sanzo.

5. Pela majende

Satana ne bandemona i balwana na Yehova. Kadi i balwana netu. Tangai Luka 9:38-42, ne kwisambila pa kino kipangujo:

Lelo bandemona baloñanga bantu bika?

Ketufwaninwepo kwitabija bandemona mu bwetu būmi. Tangai Kupituluka mu Bijila 18:10-12, ne kwisambila pa bino bipangujo:

Le bandemona batononanga bantu ne kwisamba nabo mu miswelo’ka? I bilongwa’ka bivudile kulonga bantu koshikete?
Molangila, Yehova udi na bubinga bwa kupeleja majende? Mwanda waka?

Talai VIDEO, ne kwisambila pa bino bipangujo:

VIDEO: “Lwai na Dyabola” (5:02)

Le ulanga kamutolo kadi kavwikilwe mwanā Palesa kadi na kyaka? Mwanda waka?
Le Palesa wadi ufwaninwe kulonga bika pa kwikinga ku bandemona?

Bene Kidishitu ba bine balwanga nyeke na bandemona. Tangai Bilongwa 19:19 ne 1 Bene Kodinda 10:21, ne kwisambila pa kino kipangujo:

Mwanda waka i kya mvubu kusōka kintu kyonso kikwatañene na majende?

Mwana-mukaji umo onakanya bintu palapala bikwatañene na majende na kwibisōka.

6. Nekenya bulwi bolwa na Satana ne bandemona bandi

Bandemona baludikwanga na Satana. Ino bamwikeulu ba kikōkeji abo baludikwanga na Mikele, mwikeulu mukatampe, ke dyo dijina dikwabo dya Yesu kadi. Lelo i bukomo’ka budi na Mikele? Tangai Kusokwelwa 12:7-9, ne kwisambila pa bino bipangujo:

Lelo Mikele ne bamwikeulu bandi, koku nako Satana ne bamwikeulu bandi, le bakomo’po i bepi?
Le ulanga balondi ba Yesu bafwaninwe kwivwana moyo wa Satana ne bandemona?

Ubwanya kunekenya bulwi bolwa na Satana ne na bandemona. Tangai Yakoba 4:7, ne kwisambila pa kino kipangujo:

Le ubwanya kwikinga namani kudi Satana ne bandemona?

BANTU BAMO BANENANGA’MBA: “Kukaya makayo nansha kutala mavideo alombola bya majende kekudipo na mwanda, i makayo bitupu.”

Mwanda waka kulanga namino i kwitūla mu kyaka?

MU KĪPI

Bamwikeulu ba kikōkeji betukwashanga. Satana ne bandemona bandi i balwana na Yehova, kadi bengidijanga majende mwanda wa kongola bantu.

Pitulukai’mo

Lelo bamwikeulu ba Yehova bakwashanga namani bantu befunde myanda yandi?
Satana ne bandemona i bāni?
Mwanda waka i biyampe wiepeje na majende?

Lemba difuku dyapwa kifundwa:

Witungile Kitungo

Bandaula bintu byonso byodi nabyo umone shi kudi nansha kimo kikwatañene na majende, kupwa lomba Yehova tunangu mu milombelo mwanda wa uyuke bya kulonga kino kintu.

Kitungo Kikwabo:

Your other goal

KIMBA

Kimba bukamoni bulombola’mba Yesu ye Mikele, mwikeulu mukatampe.

“Le Mikele Mwikeulu Mukatampe I Ani?” (Kishinte kya pa Entelenete)

Kimba bintu bilombola’mba Dyabola ke mulangwepo’tu nansha ngikadila ya bubi idi munda mwetu, aa.

“Le Dyabola Udi’ko Bine?” (Kishinte kya pa Entelenete)

Tala mwana-mukaji umo wenyongolwele mu lupusa lwa bandemona.

“Watana Kitungo Umbūmi” (Kiteba kya Mulami, 1 Kweji 7, 1993)

Wifunde umone muswelo wingidija Satana majende mwanda wa kongola bantu.

“Bubine Butala pa Majende, Bukinda, ne Bufwityi” (Dishinda Ditwala ku Būmi bwa Nyeke, kipindi 5)