“Sanswa Mukwenu Mowisanshilwe Abe Mwine”

1, 2. (a) Le Yesu wānene amba mbila ya bubidi itabukile bukatampe mu Bijila i mbila’ka? (b)  Le i bipangujo’ka byotusa kubandaula pano?

PA KUTOMPA Yesu, Mufadiseo umo wāmwipangwile amba: “A Mufundiji, lelo i mbila’ka itabukile bukatampe mu Bijila?” Monka mokilombwedilwe mu kishinte kishele kunyuma, Yesu wāmulondolwele amba, “mbila itabukile bukatampe kadi yo imbajinji” i ya amba: “Sanswa Yehova Leza obe na mutyima obe onso ne na muya obe onso ne na ñeni yobe yonso.” Yesu wābweja’ko amba: “Ya bubidi, iifwene nayo, i ino: ‘Sanswa mukwenu mowisanshilwe abe mwine.’”—Mat. 22:34-39.

² Yesu wānene amba tufwaninwe kusanswa bakwetu motwisanshilwe batwe bene. Mu uno muswelo, i biyampe twiipangule amba: Lelo mukwetu mwine i ani? I muswelo’ka otukokeja kulombola amba tusenswe mukwetu?

3, 4. (a) Le Yesu wālondolwele na kyelekejo’ka ku kipangujo kya amba: “Lelo mukwetu mwine i ani”? (b) Le mwine Samadia wākweshe muntu obāibile, obākupile ne wāshele mupungile namani? (Tala kifwatulo kidi ku ngalwilo.)

³ Tubwanya kulanga’mba mukwetu i muntu udi kubwipi netu, mulunda wa pabwipi kadi witukwashanga. (Nki. 27:10) Ino, tubandaulei byānene Yesu kitatyi kyāmwipangwile muntu umo wādi wimwene bu moloke amba: “Lelo mukwetu mwine i ani?” Yesu pa kumulondolola, wāmupele kyelekejo kya mwine Samadia muyampe. (Tanga Luka 10:29-37.) Tukokeja padi kulanga’mba, mwine Isalela ne mwine Levi bādi bakulonga bintu pamo bwa balondakani bayampe kitatyi kyobāmwene muntu obāibile, obākupile ne wāshele mupungile. Inoko, bāmupityile pakubulwa kumulongela kintu nansha kimo. Uno muntu wākwashibwe na mwine Samadia—wa ku bantu bādi balēmekele Mukanda wa Bijila wa Mosesa mwine wāpelelwe na Bayuda.—Yoa. 4:9.

⁴ Pa kulonga bukomo bwa kumundapa, mwine Samadia muyampe wāmutūtyile māni ne mvinyu pa bilonda. Kwāshele ndenadi ibidi yakupa wa kumulama, mfutwa yādi ifutwa muntu ku mwingilo wa mafuku abidi. (Mat. 20:2) Nanshi i bipēla kuyuka i ani wēlombwele bu mukwabo mwine wa uno muntu mutapwe bilonda. Na bubine, kyelekejo kya Yesu kitufundija kulombola bakwetu lusa ne buswe.

 5. Lelo bengidi ba Yehova balombwele namani amba basenswe bakwabo mu kitatyi kyalongekele kimpengele kya kipangila panopano?

⁵ Divule dine, i bikomo kutana bantu ba lusa pamo bwa mwine Samadia muyampe. Bidi uno muswelo nakampata mu ano “mafuku a mfulo,” mudi bantu bavule bampikwa kisanso kya bu muntu, ba bukalabale bwa malwa ne bampikwa kusanswa buyampe. (2 Tm. 3:1-3) Kimfwa, kukokeja kwikala ngikadilo mibi mu kitatyi kya kimpengele kya kipangila. Tulangulukilei bidi pa byalongekele kitatyi kyapukumine Kimpumpu kya Musenga mu New York City ku mfulo kwa Kweji 10, 2012. Mu kipindi kimo mokyapukumine bininge mu kino kibundi, bangivi bakebile bekadi badi kala basusuka na kubulwa mudilo wa shinga, na kyanga ne na bisakibwa bikwabo. Mu kino kifuko kimo kyonka, Batumoni ba Yehova bateakenye’ko mpangiko yebalengeje bekwashe abo bene na bene ne kukwasha bantu bakwabo. Bene Kidishitu balongele bino bintu mwanda wa buswe bobaswele bakwabo. Le i miswelo’ka mikwabo yotukalombola’mba tusenswe bakwetu?

 6. Le mwingilo wetu wa busapudi ulombola namani amba twi balunda bayampe?

⁶ Kwasha bantu ku mushipiditu. Tuloñanga namino na kulonga bukomo bwa kukokela milangwe yabo pa ‘kusengibwa bikunka mutyima na Bisonekwa.’ (Loma 15:4) Na bubine, twikalanga balunda bayampe kitatyi kyotusapwila bakwetu bubinebine bwa mu Bible mu mwingilo wetu wa busapudi. (Mat. 24:14) Dino bine i dyese dyotudi nadyo dya kusapula musapu wa Bulopwe utamba kudi “Leza uleta lukulupilo”!—Loma 15:13.

 7. Lelo Kijila Kitabukile Bulēme i kijila’ka, ne tweselwanga namani mwanda wa kwikilonda?

⁷ Londa Kijila Kitabukile Bulēme. Kino kijila ikilombolwe mu binenwa byānene Yesu mu Busapudi bwandi bwa ku Lūlu amba: “Bintu byonso byomusaka bantu bemulongele, banwe nenu mufwaninwe kwibalongela’byo. Na bubine, e momushintulwila Bijila ne Bapolofeto.” (Mat. 7:12) Shi tumona bakwetu na mwādingidile Yesu, tukalonga bintu kukwatañana na mulangwe ufyeme mu “Bijila” (Ngalwilo kutūla ku Kupituluka mu Bijila) ne mu “Bapolofeto” (mikanda ya bupolofeto ya Bisonekwa bya Kihebelu). Bibamweka patōka kupityila ku bino bilembwa amba, Leza weselanga boba balombola bakwabo buswe. Kimfwa, Yehova wānene kupityila kudi Isaya amba: “Lamai mundudi ne kulonga boloke . . . Ye wadyese yewa muntu ulonga kine kino’ki.” (Isa. 56:1, 2) Na bubine, tweselwanga mwanda tulongelanga bakwetu bintu mu muswelo wa buswe ne boloke.

 8. Mwanda waka tufwaninwe kusanswa balwana netu, ne bikekala namani shi tubebasanswa?

⁸ Sanswa balwana nobe. Yesu wānene amba: “Mwaivwene mokyānenenwe amba: ‘Sanswa mukwenu, shikwa walwana nobe.’ Ino ami nemunena’mba: Sanswai nyeke balwana nenu ne kulombelela boba bemupangapanga, amba mwikale bana ba Shenu udi mūlu.” (Mat. 5:43-45) Mutumibwa Polo wālombwele mwanda wa uno muswelo paāsonekele amba: “Shi walwana nobe udi na nzala, mupe byakudya; shi udi na kyumwa, mupe byakutoma.” (Loma 12:20; Nki. 25:21) Kukwatañana na Mukanda wa Bijila wa Mosesa, muntu wādi unenenwe kukwasha walwana nandi panyongolola nyema wandi wakomenwa kiselwa. (Div. 23:5) Pa kwingidila pamo uno muswelo, balwana ba kala bādi babwanya kwikala balunda bayampe. Batwe bene Kidishitu byotulombolanga buswe, balwana netu bavule betunekeninyanga mutyima. Shi tulombola’mba tusenswe balwana netu—enka ne balwana bamalwa—tukekala na nsangaji pa kumona bamo mu bukata mwabo betabija kutwela mu bwine Kidishitu bwa bine!

 9. Le Yesu wānene bika pa mwanda utala kwikala mu ndoe na banabetu?

⁹ “Londalondai ndoe na bantu bonso.” (Bah. 12:14) Na bubine, mu bano bantu mubadilwa ne banabetu, mwanda Yesu wānene amba: “Shi uleta kyabuntu kyobe ku kisōkelo ino penepa ubavuluka’mba mwanenu udi nobe mwanda, shiya kyabuntu kyobe’nka penepa ku meso a kisōkelo, taluka wende. Dibajinji kapwane bidi na mwanenu, kupwa shi ubajoka, lambula kyabuntu kyobe.” (Mat. 5:23, 24) Shi tusenswe banabetu ne kulonga nabo ndoe bukidibukidi, Leza uketwesela.

10. Mwanda waka ketufwaninwepo kwikala bantu baboya bilubo bya bakwetu?

¹⁰ Kokekala muntu uboya bilubo bya bakwenu. Yesu wānene amba: “Lekai kutyibila ba mambo kutyina’mba nenu mwakatyibilwa mambo, mwanda butyibi bomutyibila bakwenu nenu mukatyibilwa’bo, kadi kipimo kyomupimina bakwenu nenu bakemupimina’kyo. Le penepo, i kika kyotadila kayombo mu diso dya mwanenu ino kuta mutyima ku mulamba mu diso dyobe mpika? Ne kadi le ukokeja namani kunena mwanenu amba, ‘Leka nkutalule kayombo kadi mu diso dyobe,’ inoko abe mwine na mulamba mu diso dyobe? Abe nzazangi! Talula bidi mulamba udi mu diso dyobe, penepa komone biyampe mwa kutalwila kayombo kadi mu diso dya mwanenu.” (Mat. 7:1-5) Bine, uno i muswelo muyampe wa kwitulombola tuleke kufutulula tubilubo tutyetye twa bakwetu, ino padi batwe koku na bilubo bikatampe!

11, 12. Le tulombolanga’mba tusenswe bakwetu mu muswelo’ka wa pa bula?

¹¹ Tusakanga kulombola’mba tusenswe mukwetu mu muswelo wa pa bula. Pamo bwa Yesu, tusapulanga myanda miyampe ya Bulopwe. (Luka 8:1) Yesu wāpele balondi bandi mwingilo wa kulonga “bana ba bwanga mu bantu ba ku mizo yonso.” (Mat. 28:19, 20) Pa kulonga bukomo bwa kuvuija uno mwingilo, twikankilanga’ko kukwasha bakwetu batambe mu dishinda dikatampe ditwala ku konakanibwa ne kutwela mu kashinda katyetye katwala ku būmi. (Mat. 7:13, 14) Ne kutatana kwine mpika, Yehova weselanga buno bukomo botulonga.

¹² Pamo bwa Yesu, tukwashanga bantu befunde myanda ya Leza. (Mat. 5:3) Ku boba betabija musapu biyampe, tudi na mwingilo wa kuvuija bisakibwa byabo na kwibasapwila “myanda miyampe ya Leza.” (Loma 1:1) Boba bonso betabija musapu wa Bulopwe, bapwananga na Leza kupityila kudi Yesu Kidishitu. (2 Ko. 5:18, 19) Nanshi tulombolanga na bubine’mba, tusenswe bakwetu mu muswelo wa mvubu mpata na kusapula myanda miyampe.

13. Le umonanga mwingilo wetu wa bu basapudi ba Bulopwe namani?

¹³ Kupityila ku kujokela’mo ne ku kufundija bantu Bible ku mobo, tudi na nsangaji ya kukwasha bantu balonde misoñanya myoloke ya Leza. Kino kine kibwanya kukwasha muntu wifunda Bible ashinte mu būmi bwandi. (1 Ko. 6:9-11) Na bubine, i kya nsangaji’po kashā pa kuyuka muswelo ukwasha Leza boba “badi na mutyima muyampe wa kukamona būmi bwa nyeke,” amba bashinte ne kupwana nandi kipwano kya mpwaninine. (Bil. 13:48) Ku bantu bavule, nsangaji ipingakenanga pa kutyumukwa mutyima, kukulupila mudi Tata wetu wa mūlu nako pa kuzumbija mutyima kwampikwa kwendela’mo. Bine, i biyampe’po kumona bapya bendelela ku mushipiditu! Lelo kwitabijepo amba, kulombola bakwetu buswe mu muswelo wa pa bula pamo bwa basapudi ba Bulopwe i dyese?

14. Lombola mu byobe bishima ngikadilo imoimo ya buswe ilombwelwe mu 1 Kodinda 13:4-8.

¹⁴ Kitatyi kyotwikele na bakwetu, kwingidija byobya byāsonekele Polo pa mwanda utala buswe kubwanya kukankaja myanda mivule, kutwala ku nsangaji ne kwituletela madyese a Leza. (Tanga 1 Kodinda 13:4-8.) Tubandaulei bidi mu kīpi byobya byānene Polo pa mwanda utala buswe, ne kumona muswelo otubwanya kwingidija binenwa byandi mu kipwano kyotupwene na bakwetu.

15. (a) Mwanda waka tufwaninwe kwikala na kitūkijetyima ne kanye? (b) Le i bubinga’ka botufwaninwe kwepukila mukao ne kwianya?

¹⁵ “Buswe budi na kitūkijetyima ne kanye.” Leza byalombolanga kitūkijetyima ne kanye mu muswelo waikele na bantu bakubulwa kubwaninina, netu tufwaninwe kwikala na kitūkijetyima kitatyi kilonga bakwetu bilubo ne kulonga bintu pampikwa kulanga nansha na kibengo. “Buswe kebudipo na mukao,” o mwanda buswe bwa bine kebwitulengejangapo twabile bintu bya mukwetu nansha madyese andi mu kipwilo. Kadi shi tudi na buswe, ketukeanyapo nansha kwitatula. Ne kadi, “meso a kibengo ne mutyima wa kwitatula, . . . kinanu [kine] kya babi i bubi.”—Nki. 21:4.

16, 17. Le i muswelo’ka otukalonga bintu kukwatañana na 1 Kodinda 13:5, 6?

¹⁶ Buswe buketulengeja twiendeje na bakwetu mu muswelo muyampe. Ketukebabepelapo, kwibela, nansha kulonga kintu kyo-kyonso kikwabo kikajilula bijila bya Yehova ne misoñanya yandi. Kadi, buswe buketukankaja tuleke kukimba’nka tumweno twa batwe bene pa kyaba kya kuta mutyima ku tumweno twa bakwetu.—Fid. 2:4.

¹⁷ Buswe bwa bine kebukelwangapo bulobo kadi “kebubalangapo bibi bilongelwe,” nansha shi muntu wetulongela bintu pakubulwa buswe ketulobengapo bukidibukidi. (1 Te. 5:15) Kitatyi kyotufītwa bininge, ketukasangajapo Leza, kadi bine tukatompa kwakija mudilo ubwanya kulakuka lubimbi ne kwitusanshija batwe bene ne bakwetu. (Levi 19:18) Buswe bwitulengejanga tusangele bubinebine, ino kebuketulengejapo ‘tusangele bukondame,’ nansha shi muntu witushikilwe ususuka na bukondame.—Tanga Nkindi 24:17, 18.

18. Lelo buswe butelelwe mu 1 Kodinda 13:7, 8 bwitufundija bika?

¹⁸ Tulangulukilei bidi pa shintulwilo mikwabo ishintulwilwe buswe na Pollo. Wānene amba buswe “butyumwinanga byonso mu manwi.” Shi muntu wetulubila ino walombe kufwilwa lusa, buswe buketutonona tumulekele. Buswe “bwitabijanga byonso” bidi mu Kinenwa kya Leza ne kwitulengeja tufwije’ko pangala pa byakudya bya ku mushipiditu byobetupa. Buswe “bukulupilanga byonso” bisonekelwe mu Bible ne kwitutonona tulombole bakwetu bubinga botwikadile na lukulupilo. (1 Pe. 3:15) Kadi tulombelanga ne kukulupila bipa biyampe bikalupuka ku ngikadilo ya matompo. Buswe “būmininanga byonso,” ekale bubi bobetulubile, kupangwapangwa nansha ke matompo makwabo. Kadi “buswe kebukankalwangapo.” Bukalombolwa na bantu ba kikōkeji mu bula bwa myaka yonso nyeke.

19, 20. Le i madingi’ka a mu Bisonekwa afwaninwe kwitutonona tulombole nyeke buswe ku mukwetu?

¹⁹ Tubwanya kwendelela kulombola bakwetu buswe shi twingidija madingi a mu Bible. Bantu bonso bafwaninwe kulombolwa buno buswe, ke’nkapo bantu ba ketu kabila. Kadi tufwaninwe kuvuluka byānene Yesu amba: “Sanswa mukwenu mowisanshilwe abe mwine.” (Mat. 22:39) Ba Leza ne Kidishitu betusakilanga tusanswe bakwetu. Shi ketuyukilepo bya kulonga mu mwanda kampanda wa mukwetu, tulombei Yehova etuludike kupityila ku mushipiditu ujila. Kulonga namino kuketulengeja tweselwe na Yehova kadi kuketukwasha tulonge bintu na buswe.—Loma 8:26, 27.

²⁰ Musoñanya wa kusanswa bakwetu na motwisanswilwe, witwanga bu “kijila kya bulopwe.” (Yak. 2:8) Polo pa kupwa kwisambila pa mbila imoimo ya mu Mukanda wa Bijila wa Mosesa, wānene amba: “Nansha shi kwikale mbila’ka, yonso i mikongelwe pamo mu bino binenwa’mba: ‘Sanswa mukwenu mowisanshilwe abe mwine.’ Buswe kebuloñangapo mukwabo bibi; nanshi buswe ko kufikidila kwa bijila.” (Loma 13:8-10) Nanshi, tufwaninwe kulombola nyeke buswe ku bakwetu.

21, 22. Mwanda waka tufwaninwe kusanswa Leza ne mukwetu?

²¹ Kitatyi kyotulangulukila pa kine kyotufwaninwe kulombwela bakwetu buswe, i biyampe kulangulukila pa binenwa bya Yesu bya amba, Shandi “utambijanga dyuba dyandi ku babi ne ku bayampe kadi unokejanga mvula ku boloke ne ku bakondame bene.” (Mat. 5:43-45) Tufwaninwe kulombola mukwetu buswe, ekale moloke nansha wampikwa koloka. Monka motwanenanga ku ngalwilo, muswelo muyampe wa kulombola buno buswe i wa kumusapwila musapu wa Bulopwe. Bine, kudi madyese abikīlwe mukwetu shi asangele myanda miyampe bya binebine!

²² Tudi na bubinga buvule bwa kuswila Yehova pampikwa kwilea. Kudi kadi miswelo mivule yotukokeja kulombola buswe botuswele mukwetu. Shi tulombola buswe botuswele Leza ne mukwetu, tulombolanga’mba tulēmekele byobya byānene Yesu pa ino myanda ya mvubu. Kadi, tusangajanga Yehova Tata wetu wa buswe udi mūlu.