Bipangujo Bya Batangi

Aa, mwanda Bible ne mānga kebilombolapo amba kino kyālongekele.

Muswelo walamwinwe kino kisonekwa mu Mabible mavule, ulengejanga bantu bamo balange amba mu mafuku a Polo kudi bantu bābatyijibwe pa kyaba kya bantu bafwe. Kimfwa’mba: “Shi bafu kebakasangukapo, le penepa kyo babatyijibwa pa kyaba kyabo i kika?”​—Dibuku Dijila.

Inoko, tala binena bafundi ba Bible babidi. Dokitele Gregory Lockwood wanenene amba, “mu Bible ne mu mānga i mutupu bubinga nansha bumo bulombola’mba kudi muntu wābatyijibwe pa kyaba kya muntu mufwe.” Polofesele Gordon Donald Fee nandi walembele amba: “Mu mānga ne mu Bible i kutupu potutana luno lubatyijo. Kipwanino Kipya kekinenenepo kintu pa luno lubatyijo; kadi i kutupu bubinga bulombola’mba lwādi’ko mu kipwilo kibajinji kya bwine Kidishitu ne bipwilo bikwabo byāikele’ko pa kupwa kufwa kwa batumibwa.”

Bible unena’mba, balondi ba Yesu bādi bafwaninwe kulonga ‘bana ba bwanga mu bantu ba ku mizo yonso, kwibabatyija mu dijina dya Tata ne dya Mwana ne dya mushipiditu ujila, kwibafundija balame byonso’ byāebasoñenye. (Mat. 28:19, 20) Kumeso kwa muntu kwikala mwanā bwanga mubatyijibwe, wādi ufwaninwe kwifunda myanda ya Yehova ne wandi Mwana, kwibakulupila ne kwibakōkela. Muntu ke mufwe kala, wikele mu kibundu, kādipo ubwanya kulonga namino, nansha ke mwine Kidishitu mūmi kumulongela’byo pa kyandi kyaba.​—Mus. 9:5, 10; Yoa. 4:1; 1 Ko. 1:14-16.

Penepa, Polo wādi ukimba kunena bika?

Bene Kodinda bamo bādi bapela mulangwe wa amba bantu bafwe bakasanguka. (1 Ko. 15:12) Polo wālombwele amba badi mu kilubo. Kimfwa wānenene amba ‘difuku ne difuku wādi ukimba’nka kufwa.’ Na bubine, aye wādi ukidi mūmi. Ino nansha byaādi utanwa mu byaka, wādi ukulupile amba nansha shi wafu ukasangwilwa mūlu na mwāsangwidilwe Yesu.​—1 Ko. 15:30-32, 42-44.

Bene Kodinda bādi bafwaninwe kuyuka’mba, byobādi bene Kidishitu bashingwe māni, bādi ba kutompibwa difuku ne difuku, enka ne kufwa kumeso kwa abo kusangulwa. Byobābatyijibwe “mudi Kidishitu Yesu,” bābatyijibwe ne “mu lufu lwandi.” (Loma 6:3) Lubatyijo lwabo lwa kyelekejo lwādi lubwanya kwibatwala ku lufu ne ku kusangwilwa mūlu.

Myaka ibidi ne musubu pa kupwa kwa Yesu kubatyijibwa, wāsapwidile batumibwa bandi amba: “Lubatyijo lombatyijibwa’lu, mukabatyijibwa’lo.” (Mako 10:38, 39) Yesu wādi kabatyijibwe mu mema. Wādi ukimba kunena’mba, bululame bwandi bwādi bwa kumutwala ku lufu. Polo nandi wālembele amba bashingwe māni bakasusuka “bidi pamo nandi amba [batumbijibwe] ne ntumbo pamo nandi.” (Loma 8:16, 17; 2 Ko. 4:17) Nanshi bādi bidi ba kufwa kupwa kebasangwilwa mūlu.

Shi ke pano, binenwa bya Polo bibwanya kwalamunwa biyampe amba: “Shi bitupu, le boba babatyijibwa mwanda wa kwikala bafwe bakalonga namani? Shi bafwe kebakasangulwangapo nansha dimo, i kika kyobabatyijibwa mwanda wa kwikala bafwe?”