Vuluka Yehova ne Wandi Mwana

LANGA’PO shi muntu wakupe kyabuntu kiyampe bininge. Le ukeivwana namani ku mutyima?—Le ukamufwija’ko’tu bitupu amba Wafwa’ko, kupwa waididilwa’ko ne mwine wakupa’kyo’ni, nansha ukamuvuluka aye ne kine kyakulongēle?—

Yehova Leza i mwitupe kyabuntu kiyampe bininge. Wātumine wandi Mwana pano panshi mwanda wa kwitufwila batwe. Le uyukile mwanda waka Yesu wētufwidile?—Kino i kintu kya mvubu mikatampe kyotufwaninwe kwivwanija.

Pamo’nka na motwefundile mu Shapita wa 23, Adama wālongele bubi pa kujilula kijila kibwaninine kya Leza. Netu twi bapyane bubi kudi Adama, tata wetu batwe bonso. Penepo le ulanga amba tusakilwa bika?—Bine, bitusakila kwikala na tata mupya, wāikele’ko na būmi bubwanine pano pa ntanda. Le ulanga amba uno tata i ani?—I Yesu.

Yehova wātumine Yesu pano pa ntanda amba ekale pamo bwa tata pa kyaba kya Adama. Bible unena amba: “Muntu umbajinji Adama wapangilwe muya mūmi; ino Adama wēfulako i mushipiditu wa kupana būmi.” Le Adama umbajinji i ani?—Bine, i yewa wāpangilwe na Leza ku luvumbi lwa panshi. Le Adama wa bubidi nandi i ani?—I Yesu. Ye mulombwela’kyo Bible poinena amba: “Muntu umbajinji [Adama] i wa nshi ke wa panopantanda, ino muntu wa bubidi [Yesu] aye i Mfumwetu wa mūlu.”—1 Kodinda 15:45, 47; Ngalwilo 2:7.

Leza wāselele būmi bwa Yesu momwa mūlu wēbutundulwila munda mwa mwana-mukaji wa dijina dya bu Madia, o mwanda Yesu kāpilepo bubi nansha bumo bwa kudi Adama. O mwanda mwine Yesu wādi muntu mubwaninine. (Luka 1:30-35) Kadi kyo kyānenene mwikeulu umo kudi bakumbi kitatyi kyābutukile Yesu amba: ‘Dyalelo dino’di kubemubutwilwa Mupandiji.’ (Luka 2:11) Ino le uno mwana wa lukeke Yesu wādi wa kulonga bika dibajinji dya kwikala Mupandiji?—Wādi ufwaninwe bidi kukula, ekale ke muntu mutame, mwādi mwikadile Adama. Penepo Yesu kaikala bu ‘Adama wa bubidi.’

Yesu, Mupandiji wetu, ukekala kadi “Tata wa nyeke.” Ye mumutelela Bible. (Isaya 9:6, 7, NW) Bine, Yesu muntu mubwaninine ukokeja kwikala tata pa kyaba kya Adama, mwanda Adama wāikele ke wampikwa kubwaninina paālongele bubi. Mu uno muswelo tubwanya kutonga kwikala na ‘Adama wa bubidi’ bu tata wetu. Shako, Yesu mwine nandi i Mwanā Yehova Leza.

Byotwayuka myanda itala Yesu, tubwanya pano kumwitabija bu Mupandiji wetu. Lelo ukivulukile i ku bintu’ka kotukapandijibwa?—Eyo, i ku bubi ne ku lufu byotupyene kudi Adama. Būmi bubwaninine bwāpēne Yesu pa mwanda wetu paādi muntu mutame senene bwitwa bu kikūlwa. Yehova wāpēne kikūlwa mwanda wa tulekelwe bubi bwetu.—Mateo 20:28; Loma 5:8; 6:23.

Bine ketusakangapo kwilwa byobetulongēle kudi Leza ne wandi Mwana, mwene i amo?—Yesu wālombwele balondi bandi muswelo umo muyampe bininge wa kwitukwasha tuvuluke kyokya kyaālongele. Twisambile’po bidi.

Fwatakanya’tu bidi bwa abe udi mu kyumba kya pa ngala kya njibo mu Yelusalema. Bufuku pano bubaile. Yesu ne batumibwa bandi badi ku meza. Pa meza padi kana ka mukōko koshe, bipindi bya mikate mipapakane, ne vinyu ityila. Badi na bidibwa bishile na bikwabo. Le uyukile mwanda waka i bishile?—

Bino bidibwa i bya kwibavuluja byālongele Yehova tutwa twa myaka kunyuma, bantu bandi bene Isalela pobādi bapika mu Edipito. Kine kitatyi’kya Yehova wāsapwidile bantu bandi amba: ‘Tapai kana ka mukōko ku kisaka ne kisaka, ne kushinga mashi pa ñunji ya bibelo bya mobo enu.’ Kupwa wānena amba: ‘Twelai mu mobo enu, ne kudila’mo kana ka mukōko.’

Mo mwālongele bene Isalela. Ne kadi mu bwine bufuku’bwa, mwikeulu wa Leza wāpita mu ntanda ya Edipito. Mwikeulu wāipaya mwana umbedi yense mu mobo mavule. Ino mwikeulu paādi umona mashi a kana ka mukōko pa ñunji ya kibelo, wādi upita peulu pa mine njibo’ya. Mu mene mobo’a, kemwādipo mufwa mwana nansha umo. Felo, mulopwe wa Edipito, wākwetwe moyo pa kyālongele mwikeulu wa Yehova. Penepo Felo kāsapwila bana ba Isalela amba: ‘Pano mudi na bwanapabo bwa kwenda. Tambai mu Edipito!’ Penepo kala kebakute bitundu byabo pa bangamedia babo ne pa bimbulu ne kutaluka kebataluka’mo.

Yehova kāsakilepo bantu bandi belwe muswelo wāebakūdile. O mwanda wēbanene amba: ‘Musunsa umo pa mwaka pa mwaka mukadya bidibwa na byomwadile mu kine kyolwa’kya.’ Bāityile bino bidibwa bishile na bikwabo bu Pashika. Le uyukile kyobēbityile nabya?—Mwanda mu bwine bufuku’bwa mwikeulu wa Leza “wāpityile peulu” pa mobo mashingwe mashi.—Divilu 12:1-13, 24-27, 31.

Yesu ne balondi bandi balangulukilanga pa uno mwanda pobadya bidibwa bya Pashika. Kupwa papo, Yesu walonga’po kintu kya mvubu mikata. Ino, kumeso kwa kwikilonga, Yudasa mwanā bwanga wampikwa kikōkeji watambe’mo. Kupwa Yesu wayata kipindi kimo kya ku mikate yashalanga, walombelela’kyo, wekityumuna, watambika’kyo bandi bana ba bwanga. Kaebanena’mba: “Yatai, mudyei.” Kupwa webasapwila’mba: ‘Uno mukate i kyelekejo kya umbidi wami onkapāna pa kwimufwila.’

Ebiya kadi Yesu wayata kitomeno kya vinyu ityila. Pa kupwa kufwija’ko monka mu milombelo, wekipityija kobadi, kanena’mba: ‘Tomai banwe bonso.’ Kadi webanena monka’mba: ‘Ino vinyu i kyelekejo kya mashi ami. Nkamwanga’o panopano ponka mwanda wa kwimulekela mambo enu. Endelelai kulonga’kyo pa kumvuluka.’—Mateo 26:26-28; 1 Kodinda 11:23-26.

Lelo kubamone’po amba Yesu wānene amba bafwaninwe kwendelela kulonga kino pa kumuvuluka?—Kebādipo kadi bafwaninwe kudya bidibwa bya Pashika. Ino bādi bafwaninwe kudya bino bidibwa bishile na bikwabo bya kuvuluka Yesu ne lufu lwandi musunsa umo ku mwaka. Bino bidibwa bitwa bu Bidibwa bya ku Kyolwa bya Mfumwetu. Pavule pene dyalelo twibitanga bu Kivulukilo. Mwanda waka?—Mwanda bituvulujanga mu ñeni kyokya kyētulongēle Yesu ne Shandi Yehova Leza.

Mukate wituvuluja umbidi wa Yesu. Wāsakile na mutyima umo kupāna uno umbidi mwanda wa twikale na būmi bwa nyeke. Le vinyu ityila nayo?—Nayo ituvuluja mvubu ya mashi a Yesu. Adi na bulēme mpata kutabuka mashi a kana ka mukōko ka Pashika wādilwe mu Edipito. Le uyukile byoekadile na bulēme kutabuka?—Bible unena amba mashi a Yesu abwanya kwitulengeja tulekelwe bubi bwetu. Kadi potukatalulwa bubi bonso, ketukabelapo dikwabo, ketukanunupapo, nansha kufwa kwine mpika. Tufwaninwe kulanga bino bintu ponso potutanwa ku Kivulukilo.

Lelo i bantu bonso bafwaninwe kudya mukate ne kutoma vinyu ku Kivulukilo?—Tala, Yesu wānene boba ba kudya ne kutoma amba: ‘Mukekala umbulopwe bwami ne kutentama ponka pa bipona pamo nami momwa mūlu.’ (Luka 22:19, 20, 30) Kino kyādi kishintulula amba bakendanga mūlu kukekala bu balopwe pamo na Yesu. Nanshi enka boba badi na lukulupilo lwa kubikala pamo na Yesu momwa mūlu bo abo kete bafwaninwe kudya mukate ne kutoma vinyu.

Inoko ne boba kebadyangapo mukate nansha kutoma vinyu kwine bafwaninwe kutanwa ku Kivulukilo. Le uyukile i mwanda waka?—Mwanda Yesu wāpēne būmi bwandi ne pa mwanda wetu. Kitatyi kyotwenda ku Kivulukilo, tulombolanga amba ketwidilwe’kopo, ehe. Tuvulukanga kyabuntu kya kutendelwa kya Leza.