“Bafu Bakasangulwa”

“Mwanda ayo mpungi īkavuma, ne bafu bakasangulwa ke bampikwa kubola, ne bātwe tukālamunwa.”​—1 KODINDA 15:52.

LELO kodi kala mufwilwe muntu osenswe? Nanshi kodi muyuke lufu moluletelanga njia. Inoko bene Kidishitu baseñwanga na mulao wa Leza waāpēne kudi mupolofeto Hosea amba: “Nkebakūla ku bukomo bwa Kalunganyembo; nkebakūla ku lufu; a lufu, binzengele byobe bidi kwepi le? a Kalunganyembo, kyonakanya kyobe kidi kwepi le, a?”​—Hosea 13:14.

² Mulangwe wa bafwe kujokela ku būmi umweka ku bantu balakana bu mukomo kwivwanija. Ino Leza Mwinebukomobonso udi na bukomo bwa kulonga kino kingelengele! Mwanda mwine udi’po i shi Yehova usakile kujokeja bafwe ku būmi. Yoba muntu moloke wāipangwile’mba: “Shi muntu afwe, ekale mūmi monka’ni, a?” Kupwa wāleta ano malondololo akankamika’mba: “Shi abe ukēte, nankyo nka kwitaba; nansha ukekalanga ne mutyima wa kuloelelwa ku mīngilo ya obe makasa.” (Yoba 14:​14, 15) Kishima “kuloelelwa” kilombola kusakasaka nansha kwabila. (Enzankanya na Mitōto 84:⁠2.) Eyo, Yehova utele mutyima bininge ku lusangukilo​—uloelelwa kumona monka bantu bakikōkeji bāfwile kala, bōmi mu ñeni yandi.​—Mateo 22:​31, 32.

Yesu Wasokwela Patōka Lusangukilo

³ Bantu ba kala ba lwitabijo pamo bwa Yoba bādi bayukile myanda mityetye pa lusangukilo. Ino Yesu Kidishitu pa kwiya, wāsokwela patōkelela luno lukulupilo lwakutendelwa. Wālombola mwingilo mukatampe waingila aye mwine paānene’mba: “Ino wakwitabija mudi Mwana nabya udi ne būmi bwa kulādila monka nyeke ne nyeke.” (Yoano 3:36) I kwepi kukekalwa na buno būmi? Mu boba balombola lwitabijo, bavule bene bakekala pano pantanda. (Mitōto 37:11) Inoko Yesu wānene bandi bana-babwanga’mba: “Bānwe kaluombe katyetye! Kemukikwatwa moyo, mwanda Shenu i mutōkwe pa mutyima kwimupa bulopwe.” (Luka 12:32) Bulopwe bwa Leza i bwa mūlu. Nanshi uno mulao ushintulula’mba “kaluombe katyetye” i ka kukekala na Yesu momwa mūlu bu bipangwa bya kumushipiditu. (Yoano 14:​2, 3; 1 Petelo 1:​3, 4) I kyepelo kya ntumbo’po kashāa! Yesu wāsokwedile kadi monka mutumibwa Yoano amba “kaluombe katyetye” kakekala ka bantu 144 000 kete.​—⁠Kusokwelwa 14:1.

⁴ Le penepo i muswelo’ka ukatwela ba 144000 mu ntumbo ya mūlu? Yesu “wasokwela būmi patōka, ne kubulwa kubola nako monka, ponka pa myanda-miyampe.” Na mashi andi, wāseba “dishinda dipya dya būmi” ditwala mūlu. (2 Temote 1:​10; Bahebelu 10:​19, 20) Dibajinji wāfwile, monka mwānenene Bible amba ukafwa. (Isaya 53:12) Kupwa, “uno Yesu aye, Leza wamusangula,” pamo na mwāsapwidile mutumibwa Petelo mwenda mafuku. (Bilongwa 2:​32) Yesu kākisangwilwepo kadi mu bungitu. Aye mwine wānene’mba: “Mukate mwine o nkapana ami i mubidi wami, o nkapanina ku būmi bwa [ino ntanda].” (Yoano 6:​51) Kuvwala monka wandi umbidi kwādi kwa kulombola bu kekudipo ne kitapwa kine kyelelwe. O mwanda Yesu wāikele “kwipaībwa mu ngitu, ino wasangulwa mūmi mu mushipiditu.” (1 Petelo 3:18) Enka namino, Yesu wāikala “kwitumwena bukūdi bwa nyeke na nyeke,” ke ba mu “kaluombe katyetye” kadi. (Bahebelu 9:​12) Wātwele kudi Leza mvubu ya būmi bwandi bubwaninine bu kinkūlwa kya bantu babipya-mambo, ebiya boba 144 000 bo babajinji kumwena’mo.

⁵ Yesu kādipo wa kusangwilwa kasuku kandi ku būmi bwa mūlu. Polo wālombwele bengidi nandi bene Kidishitu bādi mu Loma amba bāshingilwe māni a mushipiditu sandu a kwikala bana ba Leza, bampyana pamo na Kidishitu, shi balame kushingwa māni kwabo na kūminina kufika ne ku mfulo. (Loma 8:​16, 17) Polo wāshintulwile kadi amba: “Shi kadi tusambakane nandi mu kyelekejo kya lwandi lufu, nankyo ne mu kusanguka kwandi mwine mo monka.”​—Loma 6:⁠5.

Kulwila Lukulupilo lwa Lusangukilo

⁶ Lusangukilo i kipindi kya “lufundijo lwa bya ngalwilo” bya bwine Kidishitu. (Bahebelu 6:​1, 2, MB) Luno lufundijo lwāikele kupatanibwa mu Kodinda. Bamobamo mu kipwilo, bākokelwe na filozofi ya Bangidiki, kēbanena’mba: “Kekudipo kusanguka kwa mu bafu.” (1 Kodinda 15:12) Mutumibwa Polo pa kwivwana luno lusango, wāshilula kubingija lukulupilo lwa lusangukilo, nakampata lwa bene Kidishitu bashingwe-māni. Tubandaulei binenwa bya Polo bisonekelwe mu 1 Kodinda shapita 15. Tusa kumona’mba kyadi na bukwashi kutanga shapita yense mutuntulu, na mokyasoñanibwe mu kishinte kyabadikile.

⁷ Mu mavese abidi mabajinji a 1 Kodinda shapita 15, Polo ulombwele’mo mutwe wa mwanda wa mīsambo yandi, amba: “Ebiya pano kadi, bānwe bana betu, ki nemuyūkija kadi myanda-miyampe yo nemusapwidile, ne yo mwatambwile, mo mwaimanamo, ne mo mwapandila; . . . poso mwaitabije kitabijeitabije.” Shi bene Kodinda bādi amba bākankelwe kwimanija mu myanda miyampe, longa bāitabije bubinebine byabitupu. Polo wendeleja’ko amba: “Amiwa-mwine-muntu kibajinji kwimufikijija i kyo natambwile nami kya’mba: Kidishitu wafwidile myanda yetu monka umpityile bilembwa: ne kujikwa wajikwa; ne mwāsangukile mu difuku dya busatu monka umpityile bisonekwa; kadi ne mwāmwekele kudi Kefasa, ne kudi badikumi ne babidi. Ebiya wamwekele kudi bāna betu, bakutabuka tutwa tutano pamo’tu kyungwija; abo bene bakidipo ne pano bamobamo bavule bene, bangi abapu kulāla tulo. Ebiya kadi wamwekele kudi Yakoba; kadi wakamwekela kudi batumibwa bonso. Ebiya wafula ko ndi ami kumwekela, pamo ponka na ami umpulumuke.”​—1 Kodinda 15:⁠3-8.

⁸ Ku boba bāitabije myanda miyampe, kukulupila mu lusangukilo lwa Yesu kewādipo mwanda wa kwalakana. Kwādi batumoni bavule bēmwenine na meso bādi balombola’mba “Kidishitu wafwidile myanda yetu” kupwa wāsangulwa. Umo i Kefasa, uyukene bininge bu Petelo. Pa kupwa kutuna Yesu mu bufuku bwaābilwe ne kukwatwa, Petelo wāsengelwe mpata pa kumwekelwa na Yesu. “Badikumi ne babidi,” batumibwa bonso kya pamo, bāpempwilwe na Yesu musangulwe​—kino kyēbapele bukomo bwa kwipwa moyo obādi nao, bāikala batumoni bakankamane ba kusangulwa kwa Yesu.​—Yoano 20:​19-23; Bilongwa 2:⁠32.

⁹ Kidishitu wāmwekele kadi ne ku kisumpi kikatampe, “bāna betu, bakutabuka tutwa tutano.” Byaādi na balondi bavule uno muswelo enka mu Ngadilea, bibwanika wēbamwekele kyaba kitelelwe mu Mateo 28:​16-​20, kyaāletele musoñanya wa kulonga bana-babwanga. Bine bano bantu bādi ba kupāna bukamoni bukomokomo! Bamo bādi bakidi bōmi mu 55 K.K. pātumine Polo uno mukanda umbajinji kudi bene Kodinda. Ivwana pano, boba bafwile abatelwa bu bapwile “kulāla tulo [twa lufu].” Bādi kebasangwilwe mwa kukatambwila mpalo yabo ya mūlu.

¹⁰ Kamoni mukwabo kalakanwa wa lusangukilo lwa Yesu i Yakoba, mwanā Yosefa ne Madia, inandya Yesu. Mobimwekela Yakoba kādipo mwitabije kumeso kwa lusangukilo. (Yoano 7:⁠5) Ino kupwa kumwekelwa na Yesu, Yakoba wāikala ke mwitabije, dimodimo wākweshe mu kwalamuka pa mutyima kwa banababo bakwabo. (Bilongwa 1:​13, 14) Yesu pa kwitana kwandi kwamfulo na bandi bana-babwanga, kumeso kwa kukanda’ye mūlu, wēbapele musoñanya wa “[kuka]sapula . . . ne kulampe kwine kumfulo kwa ntanda.” (⁠Bilongwa 1:​6-11) Mwenda mafuku, wāmwekela Solo wa ku Tasusa, wādi upangapanga bene Kidishitu. (Bilongwa 22:​6-8) Yesu wāmwekēle Solo “pamo ponka na [kudi muntu] umpulumuke.” Ulanga’mba Solo wādi kala ke musangulwe ku būmi bwa kumushipiditu, ubwanya kumona Mfumwetu mutumbijibwe ntumbo myaka tutwa kumeso kwa luno lusangukilo kwikala’ko. Uno mwanda wāikele kukala Solo ponka na ponka mu lwendo lwandi lwa kukepaya ne kukakalakanya kipwilo kya bwine Kidishitu, wāmulengeja alamuke byabinebine. (Bilongwa 9:​3-9, 17-19) Solo wāikala ke mutumibwa Polo, umo wa mu babingiji bakatampe ba lwitabijo lwa bwine Kidishitu.​—1 Kodinda 15:​9, 10.

Kwikala na Lwitabijo mu Lusangukilo Kudi na Mvubu

¹¹ Kusangulwa kwa Yesu wādi nanshi mwanda mulombolwe senene. Polo unena ukoma’mba: “Shi Kidishitu wasapulwa’mba, wasangulwa ku lufu, le penepo kadi, i kika kinenena bamo bamo ba umbukata mwenu’mba: Kekudipo kusanguka kwa mu bafu, a?” (1 Kodinda 15:12) Bano bantu kebādipo balakana mu mityima bitupu nansha kwiipangula bipangujo bitala pa lusangukilo, ino bādi banenenena’tu patōka’mba kebakulupilepo mu lusangukilo. O mwanda Polo usokwela patōka bubela bwa milangwe yabo. Amba shi Kidishitu kāsangwilwepo, nabya musapu wa bwine Kidishitu i wa bubela, ne boba bādi baleta bukamoni bwa kusanguka kwa Kidishitu bādi “batumoni ba Leza ba bubelabubela.” Shi Kidishitu kāsangwilwepo, nankyo i kutupu kinkūlwa kyāfutyilwe Leza; ne bene Kidishitu bonso ‘bākidi mu bubi bwabo.’ (1 Kodinda 15:​13-19; Loma 3:​23, 24; Bahebelu 9:​11-14) Ne bene Kidishitu ‘bāponene mu tulo [twa lufu]’ bene, bakwabo bāipailwe pangala pa lwitabijo lwabo, nabo i boneke bampikwa lukulupilo lwabine. Shi buno būmi bo bonka bwādi bwikulupije bano bene Kidishitu, nankyo i kya bulanda kobadi! I bengile mingilo ya bitupu.

¹² Ino kekidipo uno muswelo. Polo wendeleja’ko amba: “Kidishitu wasangulwa mu bafu.” Kyo “kipa kibajinji kya boba balāla mu tulo [twa lufu].” (1 Kodinda 15:20) Bene Isalela bakikōkeji pobādi bapa Yehova bipa bibajinji bya mulakisho wabo, Yehova wādi wibesela na mwangulo muvule. (Divilu 22:​29, 30; 23:19; Nkindi 3:​9, 10) Polo pa kutēla Kidishitu bu “kipa kibajinji,” bilombola’mba kudi mwangulo mukwabo wa bantu basa kusangwilwa kukekala mūlu. Polo unena’mba: “Ke-luntu lufu byo lwatwelele pa muntu, ne kusanguka kwa bafu nako mo monka, kubatwelela pa muntu. Ke-twi-bantu mo tufwila bātwe bonso mudi Adama, mo monka mo tukamwena ne būmi, bātwe bonso, mudi Kidishitu.” (1 Kodinda 15:​21, 22) Yesu i mulete lusangukilo pa kupāna būmi bwandi bwa bu muntu mubwaninine bu kinkūlwa, washitwila bantu dishinda dya kunyongololwa ku bupika bwa bubi ne lufu.​—Ngalatea 1:4; 1 Petelo 1:​18, 19.a

¹³ Polo wendeleja’ko amba: “Ino nanshi bonso, monka mo bēlondela, wa pandi, wa pandi; Kidishitu i kipa kibajinji; kadi ne boba badi bā Kidishitu pa [kwikala’po, NW] kwandi.” (1 Kodinda 15:23) Kidishitu wāsangwilwe mu 33 K.K. Inoko, balondi bandi bashingwe-māni​—“boba badi bā Kidishitu”​—bādi ba kwilaija bityetye kupwa kwa Yesu kushilula kwikala’po kwandi mu bulopwe, kulombwelwe na bupolofeto bwa Bible amba kwāshilwile mu 1914. (1 Tesalonika 4:​14-​16; Kusokwelwa 11:18) Lelo boba bādi ba kutanwa bōmi mu bula bwa kwikala’po kwandi nabo? Polo unena’mba: “Talaipo, bidi, byo nemusokwela kifībwe; ketukalālanga[po] mu tulo [twa lufu] bātwe bonso, ehe, nanshi tukālamunwanga bātwe bonso. Bukidibukidi bonka, na kukopa dīso, ponka pa mpungi ya kufulako; mwanda ayo mpungi īkavuma, ne bafu bakasangulwa ke bampikwa kubola, ne bātwe tukālamunwa.” (1 Kodinda 15:​51, 52) I kimweke patōka, ke bashingwe-māni bonsopo bakalāla mu bibundu kutengela lusangukilo. Boba bafwa mu bula bwa kwikala’po kwa Kidishitu bālamunwanga ponka na ponka.​—Kusokwelwa 14:13.

¹⁴ “Wivwane, shi kenankyopo,” ye Polo wipangula, “le bakalonga namani boba bakubatyijibwa [pa mwanda wa kwikala bafwe]? Shi bafu kebasangulwangakopo, nansha patyetye, le bika kadi byo babatyijibwa [mwanda wa kwikala namino], a? Kadi le i mwanda ka bātwe o twimanina mu kyakanwa kya lufu nyeke ne nyeke mafuku onso, a?” (1 Kodinda 15:​29, 30) Mungya munenena Polo, bantu bōmi kebādipo babatyijibwa mwanda wa bafwe bamwene’mo biyampe, pamo na mwikilombwela bwalamuni bwa Mabible amoamo. Shi ke pano, lubatyijo lwimanine pa kwikala mwanā-bwanga mwine Kidishitu, ayo myuya mifwe nayo keikokejapo kwikala bana-babwanga. (Yoano 4:1) Nanshi Polo wādi wisambila pa bene Kidishitu bōmi, bavule, pamo bwa Polo mwine, bādi batūla būmi bwabo “mu kyakanwa kya lufu nyeke.” Bene Kidishitu bashingwe-māni bādi ‘babatyijibwe mu lufu lwa Kidishitu.’ (Loma 6:3) Tamba kushingwa māni kwabo, bādi ‘babatyijibwe’ mu lwendo lwa kwibatwala ku lufu monka mokyāikadile kudi Kidishitu. (Mako 10:35-​40) Bādi ba kufwa na lukulupilo lwa lusangukilo lwa ntumbo lwa kwenda mūlu.​—1 Kodinda 6:​14; Fidipai 3:​10, 11.

¹⁵ Polo ushintulula pano amba ne aye mwine wādi mu kyakanwa kya lufu, o mwanda wānene’mba: “Mfwanga mafuku onso nyeke, mo bukīla, mo bukīla.” Polo pa kutyina’mba bamo bakanena’mba wāpityija’byo, wābweja’ko amba: “Nsumininwe, bānwe bāna betu, pa kwimutendela kwenu ko ndi nako mudi Kidishitu Yesu Mfumwetu.” Mu Myanda Miyampe ku Bonso uno vese walamwinwe amba: “Bine, a banabetu, mafuku onso ngikalanga’nka kubwipi ne kufwa. Bino’bi nemusapwila’byo mwanda nemusangedile mudi Kidishitu Yesu Mfumwetu.” Kifwa kimo kya kyakanwa kya lufu kyādi’mo Polo i ‘kulwa na banyema mu Efisesa’ kwatelele mu vese 32. Bene Loma bādi bepaya divule batubwalala na kwibela mu banyema ba budyani mu bizuilo. Wivwane Polo wāuminine mu bulwi bwa kūmana na banyema babudyani, nankyo wāpandile’mo na bukwashi bwa Yehova. Na bubine, pambulwa lukulupilo lwa lusangukilo, kutonga būmi butwala mu byakanwa bya lufu uno muswelo i bulembakane kashāa. Shi lukulupilo lwa būmi bwiya kumeso lwadi amba i kutupu’lo, longa kūminina byamalwa ne kwipāna mu kwingidila Leza i kufwa kondo bitupu. Polo unena’mba: “Shi bafu kebasangulwangakopo, nabya tudye, tutome, ke-twi-bantu dyakesha tufwa.”​—1 Kodinda 15:31, 32; tala kadi 2 Kodinda 1:​8, 9; 11:23-​27.

¹⁶ Padi Polo wādi utela kisonekwa kya Isaya 22:​13, kilombola mwikadilo wa kyaka wāikele nao bekadi ba Yelusalema bakubulwa kikōkeji. Pakwabo kadi wādi uvuluka nkulupilo ya bene Epikyulea, bādi bafutulula lukulupilo lo-lonso lwa būmi bwa pa kupwa kufwa, bakulupile amba kwisangaja kwa ngitu kyo kintu kya kamweno mu būmi. Nansha kikale namani, filozofi ya “tudye, tutome” keyādipo ya bwine Leza. O mwanda Polo udyumuna’mba: “Kemukyongolwai; kwinangila kubi kuboleja miswelo milumbuluke.” (1 Kodinda 15:33) Kwisoba na boba bapela lusangukilo i bulembe. Padi kadi kisense kya uno muswelo kyo kishina kya bimyanda byonso byādi mu kipwilo kya Kodinda byādi bikimba Polo kupwija, bya busekese, kwilalulula, kwitwala mu bidye, ne kubulwa bulēme ku Bidibwa bya ku Kyolwa bya Mfumwetu.​—1 Kodinda 1:​11; 5:1; 6:1; 11:​20-​22.

¹⁷ Pa bino byonso, Polo upāna ano madingi mayampe kudi bene Kodinda: “Langukilai ku boloke, ne kupya mambo mpika, ke-mwi-bantu bamo bamo kemudipo na ñeni ya Leza; nanena namino mwanda wa kwimufwija bumvu.” (1 Kodinda 15:34) Mumweno mutyani wa lusangukilo wātwele bamo ku mukunukunu wa kumushipiditu, pamo bwa bakolwe. Bādi basakilwa kulangulwa, bashale bajalale. Bene Kidishitu bashingwe-māni dyalelo nabo bafwaninwe kulanguka kumushipiditu, kutyina’mba bakatādilwa na mimweno ya kwalakana ya ino ntanda. Bafwaninwe kushala balamatyije ku lukulupilo lwabo lwa lusangukilo lwa kwenda mūlu. Ino kukidi bipangujo bishele​—ku bene Kodinda ne ku batwe netu. Kifwa, i mu muswelo’ka usangulwa ba 144000 kwenda mūlu? I kika kikanenwa pa midiyo ya bakwabo bakilēle mu bibundu ne pano, bambulwa lukulupilo lwa kwenda mūlu? Lusangukilo lukashintulula bika ku bano bantu? Tukabandaula mīsambo yāshala’ko ya Polo itala pa lusangukilo mu kishinte kyetu kilonda’ko.

[Kunshi kwa dyani]

[Bipangujo]

1, 2. (a) I mulao’ka usenga wāletelwe kupityila kudi mupolofeto Hosea? (b) Tuyukile namani amba Leza usaka kujokeja bafwe ku būmi?

3, 4. (a) I bika byāsokwele Yesu patōka bitala pa lukulupilo lwa lusangukilo? (b) I kika kinenenwa’mba Yesu wāsangwilwe bu mushipiditu, ke mu bungitupo?

5. I lukulupilo’ka lwātandabukile ku balondi ba Yesu ba mu myaka katwa imbajinji?

6. Mwanda waka lukulupilo lwa lusangukilo lwāikele kupatanibwa mu Kodinda, ne mutumibwa Polo wālondolwele’po muswelo’ka?

7. (a) Polo wāimanine pa mwanda’ka mukatampe? (b) I bāni bāmwene kusangulwa kwa Yesu?

8, 9. (a) Kukulupila mu lusangukilo kudi na mvubu mikatampe namani? (b) Mobimwekela i mu kyaba’ka mwāmwekele Yesu ku banabetu “bakutabuka tutwa tutano”?

10. (a) Kwitana kwa mfulo kwa Yesu na bandi bana-babwanga kwādi na lupusa’ka? (b) Yesu wāmwekele Polo namani pamo bwa kudi “umpulumuke”?

11. Polo wālombwele muswelo’ka bulube bwa kinenwa kya amba “Kekudipo lusangukilo”?

12. (a) Kwita Kidishitu bu “kipa kibajinji kya boba balāla mu tulo [twa lufu]” kilombola kika? (b) Kidishitu wāshitwile dishinda dya lusangukilo namani?

13. (a) Lusangukilo lwa kwenda mūlu lwāshilwile kitatyi’ka? (b) Bashingwe-māni bamobamo ‘kebalālangapo mu tulo twa lufu’ muswelo’ka?

14. Bashingwe-māni ‘babatyijibwanga pa mwanda wa kwikala bafwe’ mu muswelo’ka?

15. I mu byakanwa’ka bya lufu mwādi Polo, ne lwitabijo lwandi mu lusangukilo lwāmukweshe namani ekale kūminina’mo?

16. (a) Muneneno wa’mba “tudye, tutome, ke-twi-bantu dyakesha tufwa” udi bwa wātambile kwepi? (b) Le i byaka’ka byādi mu kwitabija uno mulangilo?

17. (a) I madingi’ka āpene Polo kudi bene Kodinda? (b) I bipangujo’ka byāshala bifwaninwe kulondololwa?

[Kifwatulo pa paje 23]

Nsongwakaji wa Yelusa i bubinga bulombola’mba lusangukilo ludi’ko

[Kifwatulo pa paje 24]

Shi kekwadipo lukulupilo lwa lusangukilo, longa kufwila lwitabijo kwa bene Kidishitu bakikōkeji kekudipo na mvubu

Lelo Ukivulukile’byo?

◻ I bika byāsokwele Yesu patōka bitala pa lusangukilo?

◻ I bāni bamobamo bāikele batumoni ba lusangukilo lwa Kidishitu?

◻ Mwanda waka lufundijo lwa lusangukilo lwāpatenwe, ne i kika kyālondolwele’po Polo?

◻ Mwanda waka lwitabijo mu lusangukilo lwādi na mvubu ku bene Kidishitu bashingwe-māni?