Tukwashei bantu bafwene kudi Yehova

“Kekudi nansha umo wakukafikila kudi Tata poso ponka pa ami.” —YOANO 14:6.

YESU KIDISHITU wāsoñenye balondi bandi amba endai “mukafundijei mizo yonso ya bantu nabo ke bāna-babwanga, kwibabatyija mu dijina dya Tata, ne dya Mwana, ne dya [mushipiditu sandu].” (Mateo 28:19) Mu ino myaka dikumi, Batumoni ba Yehova bakweshe bantu midiyo isatu ne kupita bafwena kudi Leza, bebabatyija ne kwibabatyija bu kiyukeno kya kwipāna kwabo kudi aye mwanda wa kulonga kiswamutyima kyandi. Bine tudi na nsangaji mpata pa kukwasha bano bafwena kudi Leza!—Yakoba 4:8.

² Mu matanda amoamo mubatyijibwanga bana-babwanga bavule, ino kwilundila’ko kwa basapudi ba Bulopwe kudingakana na buvule bwabo mpika. Eyo bibwanika pa mwanda wa bamo bafwa, kibalwa kya bafwa ku mwaka ne mwaka i kya muntu umo pa katwa. Inoko, mu ino myaka ibala-inga, kibalwa kikatampe i kya bapangwa pa mwanda wa buluji kampanda. Mwanda waka? Kino kishinte ne kikwabo kilonda’ko bikabandaula muswelo ufwenanga bantu kudi Yehova ne buluji bupangilwanga bamo.

Kitungo kya busapudi bwetu

³ Mu kino “kitatyi kya ku mfulo,” bana-babwanga ba Yesu i bapebwe musoñanya wa kusalaja “buyuki bwabine” bwa “ino myanda miyampe ya bulopwe.” (Danyele 12:4,NW; Mateo 24:14,NW) Musoñanya obapelwe i umo onka upelwe ne mwikeulu “wa myanda-miyampe ya nyeke ya kusapwila bēkele panopantanda, ne mizo yonso, ne bisaka byonso, ne ndimi yonso, ne bantu bonso bēne kumo.” (Kusokwelwa 14:6) Mu ino ntanda ipēne mu bya bwine ntanda, muswelo muyampe ne mufike’po otukokeja kukwasha bantu basangele Bulopwe bwa Leza ne kufwena kudi Yehova i kwibalombola lukulupilo lwa kukekala na būmi bwanyeke mu paladisa pano pantanda. Nansha byotwivwanije kino, ino bantu bavule belungile na bantu ba Leza bakimba kukatwela mu Paladisa kebemanijepo pototo mu kashinda katyetye katwala ku būmi.—Mateo 7:13, 14.

⁴ Yesu wānene amba: “Bakuyūke, abe Leza enka wa binebine, ne Yesu Kidishitu o watumine nankyo bo būmi ne būmi bwine bwa kulādila nyeke na nyeke.” (Yoano 17:3) Mwikeulu “wa myanda-miyampe ya nyeke” wipapa mūlu nandi usapwila bonso badi pano pantanda amba: “Akamwai Leza mumutumbike ntumbo; ke-kintu kitatyi kya kidye kyandi kibafika; mutōtei wāpangile diulu, ne ntanda, ne mema, ne pansulo pa mema.” (Kusokwelwa 14:7) Nanshi kitungo kinekine kya busapudi bwa myanda miyampe i kukwasha bantu bafwene kudi Yehova kupityila kudi Yesu Kidishitu.

Kiselwa kyetu mu mwingilo wa Yehova

⁵ Mutumibwa Polo pa kutumina balunda nandi bene Kidishitu bashingwe-māni mukanda, i mwisambile pa “mīngilo ya kipwano,” amba Leza upwananga na bantu kupityila ku kitapwa kya kinkūlwa kya Yesu Kidishitu. Polo unena’mba “Leza usengela padi bātwe; tubemwisashilapo pa ngitu pa Kidishitu’mba: Pwanai na Leza.” Bine uno i mulangwe ukankamika mpata! Twikale bashingwe-māni, “mikendi mwanda wa Kidishitu,” nansha batumwa badi na lukulupilo lwa kwikala pano panshi, ketufwaninwepo kwilwa’ko, uno mwingilo ke wetupo, i wa Yehova. (2 Kodinda 5:18-20) Leza ye ukokanga bantu ne kufundija boba bāya kudi Kidishitu. Yesu wānene’mba: “Nansha umo wakwīla kwami aye mwine, poso’nka Tata wakuntuma amukokele ko ndi, nami nabya nkamusangulanga ku difuku dya mfulo. Kyasonekelwe mu bapolofeto’mba: Bonso [bakafundijibwanga na Yehova, NW]. Ino penepo nanshi, bonso badi bēvwana kudi Tata ne kulombolwa bāyanga kwami.”—Yoano 6:44, 45.

⁶ Yehova ukokanga namani bantu bāya kwadi mu ano mafuku a mfulo, ne wibashitwilanga “kibelo kya lwitabijo” namani? (Bilongwa 14:27; 2 Temote 3:1) Nakampata i na busapudi busapulanga Batumoni bandi musapu wandi wa lupandilo ne wa butyibi bwasa kutyibila ino ngikadilo imbi ya bintu. (Isaya 43:12; 61:1, 2) Luno lubila lwelwa ntanda yonso i kutenkanibwa kwa mizo—kiyukeno kya butyibi bwa kanketenkete busa kwiya panopano ponka. Papo, bantu bamonwa bu “kya bulēme” ku meso a Leza bakokelwanga kwadi, batamba mu ino ngikadilo ya bintu ne kutana mutyima-ntenke mu “njibo” yandi ya butōtyi bwabine. Enka namino, Yehova wenda ufikidija binenwa byandi bya bupolofeto byāsonekelwe na Hakai amba: “Nkatenkenya mizo yonsololo, ne bintu bisaka mityima bya mizo yonso bikāyanga; penepo nkayuja ino njibo ino’i ne ntumbo.”—Hakai 2:6, 7; Kusokwelwa 7:9, 15.

⁷ Yehova ushitulanga mityima ya boba bakaminwe Leza—batelwa bu “bintu bitongwe bya mizo yonso”—mwa kutela’bo mutyima “konka ku binenwa bīsambwa” na Batumoni bandi. (Hakai 2:7, Jewish Publication Society; Bilongwa 16:14) Kyaba kimo, Yehova wingidijanga bamwikeulu bandi baludikila Batumoni bandi ku bantu ba mityima myoloke bamwabija, pamo bwa mu myaka katwa imbajinji. (Bilongwa 8:26-31) Bano bantu bakokwanga na buswe bwa Yehova pa kuyuka mpango ya kutendelwa yakwete ya kwibakūla kupityila kudi wandi Mwana, Yesu Kidishitu. (1 Yoano 4:9, 10) Bine, Leza ukokanga bantu bāye kwadi ne kudi Mwanandi na “kanye ka lusa” lwandi ne na “buswe bwa dikōkeji.”—Yelemia 31:3, NW, kunshi kwa dyani.

Lelo Yehova ukokanga bāni?

⁸ Yehova ukokelanga kwadi ne kudi wandi Mwana boba bamukimba. (Bilongwa 17:27) Mu bano bantu mubadilwa ne boba “babinza ne batompola pangala pa bilongwa byonso bya munyanzi bilongwa” mu Bipwilo bya Ki-kidishitu ne byobya bilongwa ntanda yonso. (Ezekyele 9:4, BB) Bano bo “bakulandapala pa mutyima.” (Mateo 5:3) Eyo, bo abo “bakōkele [“betyepeje,” kunshi kwa dyani mu NW] bapanopanshi,” bakapyananga paladisa pano pantanda ne kwikala’mo nyeke.—Zefenia 2:3.

⁹ Yehova utañanga bidi mu mutyima wa muntu. Mulopwe Davida wāsapwidile mwanandi Solomone amba: “Yehova usaatanga mityima yonso, wivwanija milangwe yonsololo ya mifwatakanyo; shi umukimba, ukatanwa kōdi.” (1 Bilongwa 28:9) Mungya mutyima wa muntu ne muntu ne mushipiditu wandi, ko kunena’mba mwikadilo utādile muntu’wa, Yehova ukokeja kumona i ani ubwanya kusolokwa mutyima wa kwitaba ku mpango yandi ya kulekelwa bubi ne ya lukulupilo lwa kukekala na būmi bwanyeke mu ngikadilo impya ya Leza ya boloke. (2 Petelo 3:13) Ne kadi Yehova ukokelanga kwadi ne kudi wandi Mwana ‘boba badi mu ngikadilo ya kukamona būmi bwanyeke’ na Kinenwa kyandi kisapulwa ne kufundijibwa na Batumoni bandi, enka namino, nabo ‘baikala ke betabije.’—Bilongwa 13:48.

¹⁰ Lelo Yehova utungīle bamo kitungo kya kwibakokela kwadi ino bakwabo kwibatūngila’kyo mpika? Mhm! Leza ukokelanga bantu kwadi mungya kwabila kwa bantu bene. Ulēmekele bwanapabo bwabo bwa kwitongela. Yehova utūdile ku meso a bekadi bonso ba pano panshi butongi bumo bonka bwaātūdile ku meso a bene Isalela myaka 3 000 kunyuma, pānene Mosesa amba: “Monapo bidi, dyalelo dino’di nakubikila ku meso obe bumi ne buyampe, kadi lufu ne bubi; . . . Naite diulu ne ntanda bu-kamoni padi banwe dyalelo dino’di, na’mba: Nakubikila ku meso obe bumi ne lufu, dyese ne mafingo, ino tonga bidi bumi amba wikale mumi, abewa ne lukunwa lobe lwine; mu kusanswa Yehova Leza obe, mu kukōkela diwi dyandi, ne mu kumūminina; mwanda ayewa bo bobe bumi, ne bula bwa obe mafuku.”—Kupituluka 30:15-20.

¹¹ Yuka kino, bene Isalela bādi ba kutonga būmi na ‘kusanswa Yehova, na kuteja diwi dyandi ne na kumūminina.’ Pānenwe bino binenwa, bene Isalela bādi kebayete Ntanda ya Mulao bu ya kishi kyabo. Bādi bakidi mu Misanza ya Moabu, bātengele kwabuka Munonga wa Yodano ne kutwela mu Kenani. Eyo, kebādipo mwa kubudilwa kulanga yoya “ntanda miyampe [ne] imbaye” “ikukanga mabele ne būki” yobādi kebasa kutambula, inoko kutwela kwabo mu ino ntanda yobādi balāla balota kwādi kwimanine pa buswe bwabo padi Yehova, pa kuteja diwi dyandi ne pa kumūminina. (Divilu 3:8) Mosesa wēbemvwanije kino amba: “[Shi uteje mbila ya Yehova Leza obe monakusoñaninya] ami dyalelo dino’di, kusanswa Yehova Leza obe, kunanga mu mashinda andi, ne kulama bijila byandi ne bitungo byandi, ne misoñanya yandi, amba wikale mumi ne kwivudija bungi bungi, kabidi amba Yehova Leza obe akwesele dyese mu ntanda’ya kotwela kutambula ya bu-kishi kyobe.”—Kupituluka 30:16.

¹² Mwene kino kifwaninwe kwitufundija kintu kampanda pa wetu mwingilo wa busapudi ne wa bufundiji otwingila mu kino kitatyi kya ku mfulo? Tulañanga Paladisa ya pano pantanda īya kumeso, twisambila’po ne kwisambila mu busapudi. Ne batwe, ne bana-babwanga botulonga, ketukamonepo kufikidila kwa uno mulao shi twingidilanga Leza pa mwanda wa kamweno ka kwisakila. Ne botufundija, ne batwe, tufwaninwe kwifunda ‘kuswa Yehova, kuteja diwi dyandi, ne kumūminina’ bwa mwāsoñanibwe bene Isalela. Shi twikale kuvuluka kino potwingila mwingilo wetu, tukengila pamo na Leza mu kufwenya bantu kwadi.

Bakwingila mingilo pamo na Leza

¹³ Polo uletele kifwa kiyampe kilombola motwingidila mingilo ya budimi pamo na Leza. Wāsonekele’mba: “Ino Apolosa nandi i waka? Ne Polo nandi waka? Nabo ke bengidi bonka, ko mwaitabija, monka mwebapelele Mfumwetu, muntu ne yandi, muntu ne yandi. Ami nakunine, Apolosa nandi wasangilepo mema, nanshi i Leza mwine watamija’yo. Kadipo ne mwanda yewa wākunine, nansha yewa wāsangilepo mema, ehe, poso’nka Leza mwine watamija’yo. Ke-muntu wakukuna, ne wakusangila mema, i bamo bonka, ino bonso bakapadibwa, muntu ne yandi mpalo, muntu ne yandi mpalo, monka mwendele mīngilo yandi, mwanda tudi bakwingila mīngilo pamo na Leza; mwi budimi bwa Leza [budimwa, NW].”—1 Kodinda 3:5-9.

¹⁴ Byotudi bakwingila pamo na Leza, twi ba kukuna nyeke “mwanda wa bulopwe” mu mityima ya bantu, kupwa ketusangila mema, pa kakintu ko-konso kalombola amba kudi kusepelela, na kulonga kujokela’mo kupya kuteakanibwe biyampe ne na kwendeja bifundwa bya Bible. Shi nshi, ko kunena’mba mityima, i miyampe, Yehova ukavuya mwingilo wandi na kutamija lukunwa lwa bubinebine bwa mu Bible lwikale ke mutyi ukunga bipa. (Mateo 13:19, 23) Ukakokela muntu’wa kwadi ne kudi wandi Mwana. Nanshi Yehova ye mwinē mwingilo wa kutenga mityima ya bantu benda belundila ku kibalwa kya basapudi ba Bulopwe, utamija nkunwa ya bubinebine ne kukokela bano bonso kwadi ne kudi wandi Mwana.

Mwingilo wa kushimika ukalāla mafuku

¹⁵ Eyo tusepelelanga potumonanga kwilundila’ko, ino kikatampe kinekine kyotusakanga i kumona bantu bendelela nyeke na kuswa Yehova, na kuteja diwi dyandi ne na kumūminina. Tufītwanga potumonanga bamo benda batalala kufika ne ku kupangwa. Le tubulwe’po kulonga’po kintu kampanda kya kwepuka kino? Mu kifwa kikwabo, Polo ulombola muswelo otukokeja kukwasha bakwetu nabo batamije lwitabijo. Amba: “Nansha umo, uyūkile kwalula kyalwilo kingi, ehe, poso kyonka kyālwilwe kala, ke Yesu Kidishitu kadi. Ino kadi, shi muntu ushimika pa kyalwilo kya nsahabu, nansha ndalama, nansha mabwe a buleme, nansha kya mutyi, nansha biyombo, nansha kya bityakuku, nankyo mīngilo ya bantu bonso, wa yandi, wa yandi, īkasokokela patōka, ke-dintu dyodya difuku dikasokolanga’yo, ke-mintu i misokolwe na mudilo; kadi ne mudilo ukatompa mīngilo ya bantu bonso wa yandi, wa yandi, shi wa muswelo ka, shi wa muswelo ka.”—1 Kodinda 3:11-13.

¹⁶ Mu kifwa kya Polo kya budimi, kutama kwa nkunwa kwimanine pa kudima na mutyima umo, pa kusangila mema kitatyi ne kitatyi ne pa kweselwa na Leza. Kifwa kikwabo kya mutumibwa kikokela milangwe pa kiselwa kidi na mwingidi mwine Kidishitu pa mwingilo wandi wa lūbako. Lelo ushimikanga na bya lūbako bikomo pa kyalwilo kishimatyije? Polo udyumuna’mba: “Nanshi ne bonsololo batūkanye nabo mo bashimikila.” (1 Kodinda 3:10) Potusamunanga kusepelela kwa muntu na kumulombola lukulupilo lwa būmi bwanyeke bukekalwa nabo mu Paladisa, lelo twimaninanga mu bufundiji bwetu’nka pa buyuki bwa Bisonekwa bya kyalwilo, ebiya ketutyityija byafwaninwe kulonga akamone būmi bwanyeke? Le bufundiji bwetu bukadikilanga’nka pa kunena’mba: ‘Shi usaka kukamona būmi bwanyeke mu Paladisa ufwaninwe kufunda, kupwila, ne kutambila mu mwingilo wa busapudi’? Shi ye pobukadikilanga, nankyo ketushimikangapo lwitabijo lwa muntu pa kyalwilo kikomo, ne byotushimika bine kebikopokapo mu mudilo nansha kulāla’byo mafuku mavule. Kukimba kufwenya bantu kudi Yehova na kwibapa lukulupilo lwa būmi mu Paladisa pangala pa mingilo ya kumwingidila mu myaka ibala-inga kudi pamo bwa kūbaka na “mutyi, nansha biyombo, nansha [na] bityakuku.”

Shimika buswe bwa kuswa Leza ne kidishitu

¹⁷ Kulādila kwa lwitabijo i kushimikwa’lo pa kipwano kya mpwaninine na Yehova Leza kupityila kudi Yesu Kidishitu. Byotudi bantu bakubulwa kubwaninina, tukokeja kufikila pa kino kipwano kya ndoe enka kupityila kudi wandi Mwana. (Loma 5:10) Vuluka, Yesu wānene amba: “Kekudi nansha umo wakukafikila kudi Tata poso ponka pa ami.” Mu kukwasha bakwetu nabo bekale kushimika lwitabijo i “kutupu, nansha umo, uyūkile kwalula kyalwilo kingi, ehe, poso kyonka kyālwilwe kala, ke Yesu Kidishitu kadi.” Kino kishintulula kulonga bika?—Yoano 14:6; 1 Kodinda 3:11.

¹⁸ Kushimika kyalwilo padi Kidishitu kishintulula kufundija befundi ba Bible mu muswelo obakokeja kutamija buswe bwa mushike padi Yesu na buyuki butuntulu bwa mwingilo Wandi wa bu Mukūdi, bu Mutwe wa kipwilo, bu Kitobo Mukatampe wa buswe, ne bu Mulopwe ubikele. (Danyele 7:13, 14; Mateo 20:28; Kolose 1:18-20; Bahebelu 4:14-16) Kishintulula kwibakwasha bamone Yesu bu muntu udi’ko binebine, wikele mu mityima yabo. Milombelo yetu pobadi ifwaninwe kwikala pamo bwa yālombele Polo pangala pa bene Kidishitu ba mu Efisesa. Amba: “Po pa mwanda o nafukamina manwi ami kudi [Tata] . . . na’mba, ēmupe . . . Kidishitu ēkale monka mu mityima mwenu pa kwitabija, napo kadi i pa mwanda wa kunena’mba, mushimatyijibwe bwa miji, ne kuningijibwa panshi mu lusa.”—Efisesa 3:14-17.

¹⁹ Shi tushimike mu uno muswelo na kutamija buswe bwa kuswa Kidishitu mu mityima ya botwifunda nabo, ne buswe bwa kuswa Yehova Leza bukekala mobadi. Buswe, mwiuvwanino ne lusa lwa Yesu i kifwa kīsokwele kya ngikadilo milumbuluke ya Yehova. (Mateo 11:28-30; Mako 6:30-34; Yoano 15:13, 14; Kolose 1:15; Bahebelu 1:3) Shi bantu bekale kufikila pa kuyuka Yesu ne pa kumuswa, nankyo abafikila ne pa kuyuka Yehova, ne pa kumuswa.a (1 Yoano 4:14, 16, 19) Tufwaninwe kufundija befundi ba Bible amba Yehova ye nsulo kutambanga byonso biloñanga Kidishitu, byalongelanga bantu; nanshi ye Aye wa kufwijibwa’ko, kutendelwa ne kutōtwa, ke-muntu ye ‘Leza wa lupandilo lwetu.’—Mitōto 68:19, 20; Isaya 12:2-5; Yoano 3:16; 5:19.

²⁰ Byotudi bakwingila mingilo pamo na Leza, tukwashei nanshi bantu, nabo bafwene kwadi ne kudi wandi Mwana, batamije buswe ne lwitabijo mu mityima yabo. Mu uno muswelo bakamona Yehova amba i muntu udi’ko binebine. (Yoano 7:28) Bakapwana kipwano kya mpwaninine na Leza kupityila kudi Kidishitu, kadi bakamuswa ne kumulamatyidila pototo. Ne kebaketungilapo bitatyi kampanda bya kukadikila’po mu mwingilo wabo obamwingidila na buswe, mwanda mu lwitabijo lwabo bakulupile amba milao ya Yehova ya kutendelwa ikafikidila mu kitatyi kyayo kitungwe. (Madilo 3:24-26; Bahebelu 11:6) Eyo, tukwashei bakwetu nabo batamije lwitabijo, lukulupilo ne buswe, koku netu tushimatyija lwitabijo lwetu pamo bwa kyombo kikatampe kikoma kulobejibwa na bimpumpu bya mwela bikomokomo. Kino kyo kyotukabandaula mu kishinte kilonda’ko.

[Footnote]

Kupituluka’mo

◻ I muswelo’ka umo mufike’po otukokeja kukwasha bantu basangela musapu wa Bulopwe, ino i makambakano’ka adi’po?

◻ Yehova ukokelanga kwadi ne kudi wandi Mwana bantu ba muswelo’ka?

◻ I bika byādi bifwaninwe kulonga bene Isalela pa kusaka kutwela mu Ntanda ya Mulao?

◻ I mwingilo’ka otwingila wa kukwasha bantu bafwene kudi Yehova ne kudi wandi Mwana?

[Study Questions]

1. I musoñanya’ka wāpene Yesu musanguke ku bandi bana babwanga, ne i bika bilupukanga’ko pakōkelanga Batumoni ba Yehova ku uno musoñanya?

 2. Nansha bapya bavule byobabatyijibwa, ino i bika byotumonanga?

3. (a) I kika kinenenwa’mba musoñanya upelwe bana-babwanga ba Yesu i umo onka udi ne na mwikeulu utelelwe mu Kusokwelwa 14:6? (b) I muswelo’ka umo mufike’po otukokeja kukwasha bantu nabo basangele musapu wa Bulopwe, ino i makambakano’ka adi’po?

 4. Mungya kunena kwa Yesu ne kwa mwikeulu wipapa mūlu, mwingilo wetu wa busapudi udi na kitungo’ka?

 5. I binenwa’ka byānene ba Yesu ne Polo bilombola amba mwingilo otwingila i wa Yehova ke wetupo?

 6. Yehova utenkenyanga mizo dibajinji na muswelo’ka, ne i bāni mu kitatyi kimo kyonka beshikatyile na mutyima ntenke mu “njibo” yandi ya butōtyi’?

 7. I muswelo’ka ushitulanga Yehova mityima ya bantu ne kwibafwenya kwadi ne kudi wandi Mwana?

 8. I bantu ba muswelo’ka bakokwanga na Yehova?

 9. Yehova umonanga namani shi bantu ‘badi mu ngikadilo ya kukamona būmi bwanyeke,’ ne i muswelo’ka waibakokanga?

10. I bika bilombola amba kukoka kukokelanga Yehova bamo kwadi ino bakwabo kwibakoka mpika kebishintululapo kutungilwa’byo?

11. Bene Isalela bādi ba kulonga bika bilombola amba abatonge būmi?

12. Kifwa kya bene Isalela kifwaninwe kwitufundija bika pa mwingilo wetu wa kusapula ne kufundija?

13, 14. (a) Kukwatañana na 1 Kodinda 3:5-9, i muswelo’ka otwingilanga mingilo pamo na Leza? (b) I ani ufwaninwe kupebwa ntumbo ya kwilundila’ko ko-konso, ne mwanda waka?

15. I kifwa’ka kyāingidije Polo kilombola muswelo otukokeja kutamija lwitabijo lwa bakwetu?

16. (a) Bitungo i bishile namani mu bifwa bibidi byāingidije Polo? (b) Mwingilo wetu wa kushimika ukokeja kwikala namani muyayate ukomenwa kopoka mu mudilo?

17, 18. (a) I kintu’ka kisakibwa pa kusaka lwitabijo lwa muntu lwikale lwa kulādila? (b) I muswelo’ka otukokeja kukwasha muntu pa kunena amba Kidishitu ekale mu mutyima wandi?

19. Kushimika buswe bwa kuswa Kidishitu mu mityima ya botwifunda nabo Bible kufwaninwe kulupula bika, ne i bika bifwaninwe kufundijibwa?

20. (a) I muswelo’ka otukokeja kukwasha bantu bafwene kudi Leza ne kudi wandi Mwana? (b) I bika byotukabandaula mu kishinte kilonda’ko?

[Picture on page 10]

Kitungo kyetu kikatampe i kufwenya bantu kudi Yehova nansha byotupāna ku bantu bakwetu lukulupilo lwa būmi bwanyeke mu Paladisa

[Picture on page 14]

Shi twiteakanya senene, kujokela’mo kupya kwetu kukekala kufike’po