A Batutu—kunai Ku Mushipiditu Ne Kubwanya Bisakibwa!

“Yewa ukunine ku Mushipiditu, ukāngulanga būmi bwa nyeke na nyeke.” —NGAT. 6:8.

1, 2. Lelo Mateo 9:37, 38 ufikidilanga namani, ne kino kibalengeja kusakilwe bāni mu kipwilo?

BINE myanda yomusapula i ya nkuo! Mwingilo wēsambile’po Yesu wingilwanga ne pa mfulo. Yesu wānene amba: “Byakwangula umbudimi i bivule bīne, nanshi bakuputuminamo i batyetye. I binebīne, lombelai bidi amba mwine byangulwa alundule bakuputumina mu byangulwa byandi.” (Mat. 9:37, 38) Yehova Leza ulondololanga milombelo idi namino mu muswelo kewamwekele. Mu mwaka wa mingilo wa 2009, kibalwa kya bipwilo bya Batumoni ba Yehova kyelundile’ko, kutamba ku bipwilo 2031, kufika ku bipwilo 105298. Ne mwayene wa bantu 757 badi babatyijibwa difuku ne difuku!

² Kuno kutanta i kulengeje kusakilwe batutu babwenye bisakibwa ba kwimanina bufundiji ne mwingilo wa bukumbi mu bipwilo. (Ef. 4:11) Mu bula bwa makumi a myaka, Yehova watūdile’ko bana-balume ba bwino ba kuvuija bisakibwa bya mikōko yandi, ne tukulupile amba ukendelela kwibatūla’ko. Bupolofeto busonekelwe mu Mika 5:5 bwitukulupija’mba mu mafuku a mfulo, bantu ba Yehova bakekala na “bakumbi basamba-babidi, ne bamfumu ba bantu mwanda,” kino i kibalwa kikatampe kya bana-balume bakomo ba kwibendeja.

 3. Shintulula mwikadile ‘kukuna ku mushipiditu.’

³ Shi wi mwana-mulume Kamoni wa Yehova mubatyijibwe, i bika bikokeja kukukwasha ubwanye bisakibwa bya madyese a Mingilo? Kintu kikatampe i ‘kukuna ku mushipiditu.’ (Ngat. 6:8) Kukuna ku mushipiditu kulomba kwikala na būmi bulengeja mushipiditu sandu wa Leza wingile modi pampikwa kijika. Ikala musumininwe kuleka ‘kukuna ku ngitu.’ Kokaleka būmi bwa maloa, makayo, ne kwipwija mukose bityimpile panshi mutyima obe wa kwielela mu mwingilo wa Leza. Bene Kidishitu bonso bafwaninwe ‘kukuna ku mushipiditu,’ kadi mwenda mafuku, bana-balume balonga namino bakokeja kubwanya bisakibwa pa kwikala na madyese a mingilo mu kipwilo. Kino kishinte kisa kwisambila nakampata pa bana-balume Bene Kidishitu, mwanda kusakilwanga bengidi ba mingilo ne bakulumpe bavule dyalelo. O mwanda, banwe batutu, twimulomba mute mutyima bininge ku kino kishinte.

Bwanyai Bisakibwa bya Mwingilo Muyampe

4, 5. (a) Lelo bana-balume babatyijibwe i bakankamikwe kubwanya bisakibwa bya mingilo’ka mu kipwilo? (b) Le muntu ukabwanya’byo namani?

⁴ Mwana-mulume Mwine Kidishitu kekalangapo mutadi mu kitulumukila. Ufwaninwe kubwanya bisakibwa bya uno “mwingilo muyampe.” (1 Tem. 3:1) Kino kilomba kwingidila banabetu mu lwitabijo na kuta mutyima bya binebine ku bisakibwa byabo. (Tanga Isaya 32:1, 2.) Muntu ubwanya bisakibwa na bitungo biyampe kekalangapo na lwiso. Ino, wikalanga na mutyima wa kulanga kamweno ka bakwabo.

⁵ Yewa usaka kwikala mwingidi wa mingilo ne kubwanya bisakibwa bya mwingilo wa bu mutadi ufwaninwe kwielela’ko kufikila pa bisakibwa bitelelwe mu Bisonekwa. (1 Tem. 3:1-10, 12, 13; Tet. 1:5-9) Shi wi mwana-mulume mwipāne wiipangule amba: ‘Le ntambilanga mu mwingilo wa busapudi bininge, ne kukwasha bakwabo basapule? Le nkankamikanga batōtyi-nami na kuta mutyima bya binebine ku ngikadilo yabo? Lelo bandyukile bu mwifundi muyampe wa Kinenwa kya Leza? Le numbululanga bilondololwa byondeta ku kupwila? Le mvuijanga na bupyasakane mingilo impele bakulumpe?’ (2 Tem. 4:5) Ufwaninwe kulangulukila bininge pa bino bipangujo.

 6. Lelo i kintu’ka kikatampe kilombwa pa kubwanya bisakibwa bya kusela biselwa mu kipwilo?

⁶ Muswelo mukwabo wa kubwanya kusela biselwa pa kipwilo i wa ‘kukomejibwa mu muntu wa munda kudi Mushipiditu wa Leza.’ (Ef. 3:16) Kwikala mwingidi wa mingilo nansha mukulumpe mu kipwilo kya Bwine Kidishitu ke mwandapo wa kuvotwa. Ano madyese apebwanga enka boba batama ku mushipiditu. Le muntu ukokeja namani kutama ku mushipiditu? Muswelo umo bidi i na ‘kunangila mu mushipiditu’ ne kutamija kipa kyao. (Ngat. 5:16, 22, 23) Poenda umwekeja ngikadilo ya ku mushipiditu mine ilombwa pa kupebwa madyese makwabo, ne polonda madingi mwanda wa kulumbulukila’ko, “bantu bonso [bakamona] mōendela utamina.”—1 Tem. 4:15.

Kisakibwa I Kwikala na Mushipiditu wa Kwipāna

 7. Lelo kwingidila bakwetu kulomba bika ne bika?

⁷ Kwingidila bakwabo kulomba kulonga bukomo ne kwikala na mushipiditu wa kwipāna. Myanda ya luombe italanga batadi Bene Kidishitu, mwanda i bakumbi ba ku mushipiditu. Tala mwatengelwe mutumibwa Polo na biselwa bya mwingilo wandi wa bukumbi. Wāsapwidile banababo mu lwitabijo ba mu Kodinda amba: “I monka mu malwa makatampe mene, ne mutyima munda muntumbuke, mo nemusonekele ne impolo mingi ponka; napo ke pa mwanda wa kunena’mba, pa mutyima pemufīte, mhm, nanshi’mba, muyūke lusa lo ndi nalo lutabukile kuvula kudi bānwe.” (2 Kod. 2:4) I kimweke amba Polo wādi utele mutyima ku mwingilo wandi.

8, 9. Leta bimfwa bya mu Bible bya bana-balume bāvuije bisakibwa bya bakwabo.

⁸ Mushipiditu wa kwipāna kyo kiyukeno kya bana-balume bengila pa mwanda wa kamweno ka bengidi ba Yehova. Kimfwa, i bikomo kulangidija Noa anene ba mu njibo yandi amba: ‘Shi mubapu Safini, nankyo munombole nami ngiye kwingila nenu.’ Mosesa nandi kāsapwidilepo Bene Isalela mu Edipito amba: ‘Tusa kwimona pa kalunga katyila. Longai bukomo mufike’ko.’ Yoshua kānenepo nansha dimo amba: ‘Shi mpembwe ya Yediko ibapone, munombolei.’ Kadi Isaya kāfunkilepo muntu ungi na kunena’mba: ‘Au keye! Mutume.’—Is. 6:8.

⁹ Yesu Kidishitu i kimfwa kyetu kibajinji kya muntu wālekele mushipiditu wa Leza umwendeje. Wāitabije ne mutyima tō mwingilo wandi wa bu Mukūdi wa kukūla bantu. (Yoa. 3:16) Mutyima wa kwipāna na buswe wa Yesu ubulwe’po kwitukunka netu twipāne? Mukulumpe umo ke mulāle myaka pa kwisambila pa mwamwenine luombe, wanene amba: “Binenwa bya Yesu kudi Petelo—kakumbe mikōko yami—byantonwene mpata. Mu bula bwa myaka, nayukile amba binenwa bya buswe bityetye kete ne bilongwa bityetye bya kanye bikokeja kukankamika muntu. Bukumbi i mwingilo onsangela mpata.”—Yoa. 21:16.

10. I bika bikatonona bana-balume Bene Kidishitu kwiula kimfwa kya Yesu kya kwingidila bakwabo?

¹⁰ Pa mwanda utala luombe lwa Leza, bana-balume bepāne badi mu kipwilo basakilwa bine kumwekeja ngikadilo ya Yesu, wānene amba: “Nkemutukija’byo biyampe.” (Mat. 11:28) Lwitabijo mudi Leza ne mu buswe bwa kuswa kipwilo butononanga bana-balume Bene Kidishitu kubwanya bisakibwa bya kwingila uno mwingilo muyampe, kwakubulwa kulanga’mba i bikomo mpata nansha’mba i bitupite kipimo. Le bikekala namani shi tutu kampanda kasakilepo kubwanya’byo? Le ubwanya kutamija mutyima wa kwingidila kipwilo?

Tamijai Mutyima wa Kwingila

11. Lelo muntu ukokeja kutamija mutyima wa kwingidila bakwabo namani?

¹¹ Shi milangwe ya kwityepelwa ikukankajanga kubwanya bisakibwa, i biyampe ulombe mushipiditu sandu. (Luka 11:13) Mushipiditu wa Yehova ukakukwasha ulwe na kintu kyonso kikukambakanya mu uno mwanda. Mutyima mwine wa kwingila i kyabuntu kya Leza, mwanda mushipiditu wa Yehova o utonona tutu kampanda abwanye bisakibwa, ne kumupa bukomo bwa kwingila mwingilo ukola. (Fid. 2:13; 4:13) O mwanda i kyendele’mo kulomba Yehova akukwashe utamije mutyima wa kwitabija madyese a mwingilo.—Tanga Mitōto 25:4, 5.

12. Lelo muntu ubwanya kumona ñeni mibwane namani mwa kuvuijija biselwa bimupelwe?

¹² Mwine Kidishitu ubwanya padi kuleka kufikila pa bisakibwa, mwanda wamone amba bisakibwa bya luombe bibakole ne i bikutakane. Nansha ubwanya kulanga amba kadipo na ñeni mibwane ya kuvuija biselwa. Shi bidi namino, padi ubwanya kumona ñeni na kwifunda bininge Kinenwa kya Leza ne mabuku esambila pa Bible. Eipangule bidi amba, ‘Lelo nebikilanga’ko kitatyi kya kwifunda Kinenwa kya Leza, ne kulomba ñeni?’ Mwanā bwanga Yakoba wāsonekele amba: “Ino wivwane shi kudi umo wa mwenu wakubulwa ñeni, nankyo alombe kudi Leza, kyaba bulale, wakubulwa ne mitoto mīne; nabya kikamupebwanga.” (Yak. 1:5) Lelo witabije bino binenwa bya ku bukomo bwa mushipiditu? Leza wālondolwele milombelo ya Solomone na kumupa “mutyima wa ñeni ne wa kwivwanija” mwine wāmukweshe ayuke kusansanya biyampe ne bibi patyiba butyibi. (1 Bal. 3:7-14) Bine mwanda wa Solomone i wa pa bula. Inoko, tubwanya kukulupila amba Leza ukapa bana-balume badi na biselwa mu kipwilo ñeni mwanda wa balele mikōko yandi senene.—Nk. 2:6.

13, 14. (a) Shintulula muswelo wātengelwe Polo na “lusa [buswe] lwa Kidishitu.” (b) Lelo “lusa lwa Kidishitu” lufwaninwe kwitukunka namani?

¹³ Bukwashi bukwabo bwa mwa kutamijija mutyima wa kwingidila bakwabo i kulangulukila bininge pa byonso bitulongele Yehova ne wandi Mwana. Kimfwa, tala 2 Kodinda 5:14, 15. (Tanga.) Lelo “lusa [buswe] lwa Kidishitu lwituningilanga” namani? Buswe bwālombwele Kidishitu pa kwitupānina būmi bwandi mungya kiswa-mutyima kya Leza i bukatampe bulengeja tutamije mutyima wetu wa kufwija’ko, ke-pantu, ao, ubakunkwa bininge. Buswe bwa Kidishitu bwādi buludika Polo. Bwāmukankeje aleke kwisakila ne kumukwasha etungile bitungo enka bya kwingidila Leza ne bantu-nandi ba munda ne ba panja pa kipwilo.

¹⁴ Kulangulukila pa buswe bwa Kidishitu ku bantu kulangulanga mutyima wa kufwija’ko motudi. Ku mfulo, twajingulula’mba kekifwaninwepo batwe kwendelela ‘kukuna ku ngitu’ na kulondalonda bitungo bya batwe bene ne kwisangaja. Ino, tujadikanga bintu mu būmi mwa kutūdila pa kifuko kibajinji mwingilo wa Leza otupelwe kwingila. Twi batononwe “kwīngidila” banabetu ku lusa. (Tanga Ngalatea 5:13.) Shi twimone batwe bene bu bapika ba kwingila na kwityepeja pangala pa bengidi ba Yehova bepāne, tukebamona na bulēmantu ne bulēme. Na bubine ketukeulapo mushipiditu wa kutopekatopeka, ne wa kufwatakenya bantu bingi uletwa na Satana.—Kus. 12:10.

Bukomo Bulonga Kisaka

15, 16. Lelo bantu ba mu kisaka badi na mwingilo’ka pa kusaka’mba mwana-mulume abwanye bisakibwa bya kutongwa bu mwingidi wa mingilo nansha bu mukulumpe?

¹⁵ Shi tutu i mwana-mulume musonge udi na bana, mwikadilo wa kisaka kyandi ubandaulwanga pa kuyuka shi i mubwanye bisakibwa bya kwikala mwingidi wa mingilo nansha mukulumpe. Na bubine, ngikadilo ya ku mushipiditu ya kisaka kyandi ne mwikimwena bantu bidi na mwanda pa kutongwa kwandi. Kino kikoma mvubu ya mwingilo wa kisaka mu kukwatakanya mulume nansha mbutwile ukimba kwingidila kipwilo bu mwingidi wa mingilo nansha mukulumpe.—Tanga 1 Temote 3:4, 5, 12.

¹⁶ Yehova usangalanga shi bantu ba mu kisaka kya Bwine Kidishitu bengidila pamo. (Ef. 3:14, 15) Mutwe wa kisaka ufwaninwe kwikala na ndiñamano pa kusela biselwa bya kipwilo ne kwendeja njibo yandi “biyampe byonka.” Nanshi i biyampe mukulumpe nansha mwingidi wa mingilo efunde Bible na wandi mukaji ne bandi bana amba bonso bamwene mu Butōtyi bwa Kisaka bwa yenga ne yenga. Ufwaninwe kusapula nabo kitatyi kyonso. Pa uno mwanda umo onka, i kyendele’mo bantu ba mu kisaka balunge kuboko ku bukomo bulonga mutwe wa njibo.

Ubulwe’po Kwingila Monka?

17, 18. (a) Shi tutu kabwenye bisakibwa pa kutongwa, lelo usakilwa padi bika? (b) Lelo tutu waingile kala bu mukulumpe nansha bu mwingidi wa mingilo, ukekala na mumweno’ka wa bintu?

¹⁷ Padi kitatyi kimo wadi mukulumpe nansha mwingidi wa mingilo, ino pano kukidi’bopo. Usenswe Yehova ne ukulupile amba ukutele mutyima. (1 Pet. 5:6, 7) Lelo bakulombwele amba kudi pofwaninwe kwisendulula? Ikala na mutyima wa kwitabija kilubo ne kulonga’po kintu na bukwashi bwa Leza. Epuka mutyima wa nsungu. Kimba ñeni, ne kumona bintu mu muswelo muyampe. Tutu umo waingile myaka mivule bu mukulumpe ino ke mujimije madyese a mwingilo, unena’mba: “Nasumininwe kwendelela kupwila, kusapula, ne kutanga Bible enka na monadi nongelanga ponadi mukulumpe—nabwenye kufikidija’byo. Nefundile kitūkijetyima mwanda nadi nanga amba basa kunjokeleja madyese mu mwaka umo nansha ibidi, ino papityile myaka isamba-ibidi ebiya keñingila monka bu mukulumpe. Mu kine kitatyi’kya madingi a amba, kokakōka, endelelela nyeke kubwanya bisakibwa, ankwenshe bininge.”

¹⁸ A tutu, shi udi mu ngikadilo na yanenwa’i, kokatyumuka mu bidyoma. Tala muswelo ukwesela Yehova mu mwingilo ne mu kisaka. Komeja kisaka kyobe ku mushipiditu, pempula babela, ne kukankamika bakōkekōke. Kutabukidila, byodi Kamoni wa Yehova, sanswa madyese obe a kutendela Leza ne kusapula myanda miyampe ya Bulopwe.a—Mit. 145:1, 2; Is. 43:10-12.

Langulukai’po

19, 20. (a) Lelo bana-balume bonso babatyijibwe i basoñanibwe kulonga bika? (b) Le i bika bikesambilwa’po mu kishinte kilonda’ko?

¹⁹ Dyalelo kusakilwa bininge batadi ne bengidi ba mingilo kutabuka mafuku a kunyuma. O mwanda tukankamika bana-balume bonso babatyijibwe kulangulukila pa ngikadilo yabo ne kwiipangula’mba, ‘Shi nkidipo mwingidi wa mingilo nansha mukulumpe, le ngidi na bubinga bonkikadile’bopo?’ Itabija mushipiditu wa Leza ukukwashe ulangulukile senene pa uno mwanda wa mvubu.

²⁰ bantu bonso badi mu kipwilo basakanga kumwena mu bukomo bulonga banababo mu lwitabijo bepēne mu bwine Leza. Shi twipāne na kanye mu bilongwa byampikwa kwisakila, tukamona nsangaji itamba mu kwingidila bakwetu ne mu kukuna ku mushipiditu. Inoko, ketufwaninwepo kufityija mushipiditu sandu wa Leza mutyima, monka musa kwikilombwela kishinte kilonda’ko. Le tukepuka namani kwiufityija mutyima?

[Kunshi kwa dyani]

Usa Kulondolola Namani?

• Lelo bupolofeto budi mu Mika 5:5 bwitukulupija bika?

• Shintulula bilombwa pa kwikala na mushipiditu wa kwipāna.

• Le i muswelo’ka ukokeja muntu kutamija mutyima wa kwingidila bakwabo?

• I kika kinenenwa amba i biyampe kisaka kingidile pamo shi tutu usaka kubwanya bisakibwa bya kwingila bu mwingidi wa mingilo nansha bu mukulumpe?

[Bifwatulo pa paje 25]

Lelo i bika byokalonga pa kubwanya bisakibwa?