Tufulamikei Mulangilo Onso Ulwa na Buyuki bwa Leza!

 1. Le mutumibwa Polo wālembēle bene Kidishitu bashingwe māni kidyumu’ka?

MUTUMIBWA POLO wādyumwine amba “lekai.” Kuleka bika? “Lekai kwiula ino ngikadilo ya bintu.” (Loma 12:2) Polo wālembēle bene Kidishitu ba mu myaka katwa kabajinji bino binenwa. Mwanda waka wāletele kino kidyumu kikatampe ku bana-balume ne bana-bakaji bādi bepāne kudi Leza kadi bashingwe māni na mushipiditu ujila?​—Loma 1:7.

2-3. Le Satana utompanga kwitupalula kudi Yehova namani, ino i muswelo’ka otubwanya kufundula bintu “bikomejibwe” mu ñeni yetu?

² Polo wādi ulangalanga, mwanda mobimwekela bene Kidishitu bamo bādi batādilwe na milangwe mibi ne na tunangu twa bantu twādi tukankamikwa na ntanda ya Satana. (Ef. 4:17-19) Kino kibwanya kwitufikila ne batwe. Satana, leza wa ino ngikadilo ya bintu byakimbanga kwitupalula kudi Yehova, wingidijanga manwa meshileshile. Manwa amo bidi i a kwingidija milangwe yotubwanya kwikala nayo pa mwanda utala kwisakila nansha kutumba. Ubwanya ne kwingidija kitamina kyetu, bibidiji byetu, ne masomo otufundile mwanda wa tulange mwalangila.

³ Le tubwanya kufundula bintu “bikomejibwe” mu ñeni yetu? (2 Ko. 10:4) Polo ulondolola’mba: “Tufulamikanga milangilo ne kintu kilampe kyo-kyonso kishimikwa mwanda wa kulwa na buyuki bwa Leza, kadi tukwatanga mulangwe o-onso bu musungi mwanda wa kwiufikija ku kukōkela Kidishitu.” (2 Ko. 10:5) Bine, na bukwashi bwa Yehova tubwanya kunekenya milangwe mibi. Pamo na lawa ikalakanya bulembe bwa sumu, Kinenwa kya Leza nakyo kibwanya kwitukwasha tukalakanye lupusa lwa bulembe lwa ntanda ya Satana.

 4. Lelo bavule mu bukata mwetu bashintyile namani pobaitabije bubine?

⁴ Vuluka kushinta kowashintyile kitatyi kyowaitabije bubine bwa mu Kinenwa kya Leza, kupwa wakwata butyibi bwa kwingidila Yehova. Bavule mu bukata mwetu balekele mwiendelejo wabo mubi. (1 Ko. 6:9-11) Bine, tufwijanga’ko Yehova pa kwitukwasha tunekenye bino bilongwa bibi!

 5. Lelo i bintu’ka bibidi bitelelwe mu Bene Loma 12:2?

⁵ Inoko ketufwaninwepo kulanga’mba kubapwididila. Nansha shi twalekele kulonga bubi bukatampe botwadi tulonga kumeso kwa kubatyijibwa, tufwaninwe kulonga bukomo bwa kuleka kintu kyo-kyonso kibwanya kwitulengeja tujokele mu bino bilongwa bya kala. Le tukalonga kino namani? Polo ulondolola’mba: “Lekai kwiula ino ngikadilo ya bintu, ino alamukai na kushinta ñeni yenu.” (Loma 12:2) Nanshi kudi bintu bibidi byotufwaninwe kulonga. Kibajinji, tufwaninwe kuleka “kwiula,” nansha kubumbwa na ino ntanda. Kya bubidi, tufwaninwe ‘kwalamuka’ na kushinta ñeni yetu.

 6. Le i ñeni’ka yotuboila ku mulangwe udi mu binenwa bya Yesu bilembelwe mu Mateo 12:43-45?

⁶ Kwalamuka kwisambīle’po Polo i kulonga bivule kupita’ko’tu kushinta mumwekelo wa panja. Kutalanga myanda ya mu būmi bwetu bonso. (Tala kapango kanena’mba “Kwalamuka’ni Nansha Kwiinanya?”) Tufwaninwe kushinta ñeni yetu​—milangwe yetu ya munda, mwiivwanino wetu, ne mifwatakanyo yetu. O mwanda batwe bonso tufwaninwe kwiipangula’mba, ‘Lelo kushinta konshinta mwanda wa kwikala mwine Kidishitu i kwa panja’ni nansha kendi mwine Kidishitu munda mwami?’ Padi kwishila. Mu binenwa bya Yesu bilembelwe mu Mateo 12:43-45, wālombwele’mo byobya byotufwaninwe kulonga. (Tanga.) Mulangwe udi mu bino binenwa ulombola kamweno kadi mu buno bubine: Kufundula’tu milangwe mibi ke kubwenepo; ino tufwaninwe kwiipingakanya na milangwe ya Leza.

 7. Le i muswelo’ka otubwanya kushinta mwine motwikadile munda?

⁷ Le tubwanya kushinta mifwatakanyo yetu nansha mwine motwikadile munda? Kinenwa kya Leza kilondolola’mba: “Kyaba kyonso mufwaninwe kwalamunwa kemudi bapya mu mulangilo wenu mwinemwine, kadi mufwaninwe kuvwala bumuntu bupya bwapangilwe mwendele kiswa-mutyima kya Leza mu boloke ne lulamato lwa binebine.” (Ef. 4:23, 24) Bine, tubwanya kushinta mwine motwikadile munda, ino ke bipēlangapo. Tufwaninwe kulonga bivule kupita’ko’tu kufundula bitupu bya kusakasaka ne bilongwa bibi. Tufwaninwe kushinta ‘mulangilo wetu mwinemwine.’ Kino kilomba kushinta bya kusakasaka byetu, milangwe yetu, ne kukanina kwetu kwa mutyima. Inoko bilombanga kulonga nyeke bukomo.

8-9. Lelo mwanda watene tutu umo ulombola namani amba tufwaninwe kushinta mwine motwikadile munda?

⁸ Twisambilei’ko bidi pa kimfwa kya tutu umo wadi usenswe bya lūma pa kala. Aye pa kuleka kukolwa mālwa ne kwikupila, wabwenye bisakibwa bya kubatyijibwa, ne kuleta bukamoni mu kakibundi katyetye mwaadi ushikete. Inoko difuku dimo kyolwa, aye ukitamba’tu mu kubatyijibwa, watanwa na ditompo mu kitulumukila. Muntu umo mukolwe mālwa waiya kumukolomona ku yandi njibo bekupile lūma. Dibajinji bidi, uno tutu wapela kwikupila. Inoko muntu’wa pa kutuka dijina dya Yehova, uno tutu wakomenwa kūminina. Watamba panja, wakupila muntu’wa. Mwanda waka wamukupile? Nansha byamukweshe kwifunda Bible afundule milangwe ya lūma, wadi kabwenye kushinta mulangilo wandi mwinemwine. Nansha’mba, wadi kashintyile mwine mwaikadile munda.

⁹ Inoko, uno tutu waendelele na kushinta. (Nki. 24:16) Na bukwashi bwa bakulumpe, waendelele biyampe kumeso. Mwenda mafuku wabwanya bisakibwa bya kwikala mukulumpe. Ebiya difuku dimo kyolwa, panja ku Njibo ya Bulopwe, watanwa na mwanda umo onka na wamutene myaka kunyuma. Muntu umo mukolwe wadi ukimba kukupila mukulumpe mukwabo. Le uno tutu walongele’po namani? Na butūkanye ne kwityepeja, walanguluka na muntu mukolwe’wa, wamutalaja bulobo, ne kumukwasha ajokele kwinjibo. Mwanda waka walonga uno muswelo? Mwanda uno tutu wadi kemushinte mulangilo wandi mwinemwine. Wadi kemushinte munda mwandi, ke muntu wa ndoe, mwityepeje​—kadi kino kyatumbije Yehova!

10. Le tufwaninwe kulonga bika pa kushinta mwine motwikadile munda?

¹⁰ Kuno kushinta kekulongekangapo na mu kukopa kwa diso nansha mu kitulumukila. Tufwaninwe padi ‘kutakamana bininge’ mu bula bwa myaka. (2 Pe. 1:5) Kuno kushinta kekulongekangapo mwanda’po’tu ketudi balonge kitatyi kilampe mu “bubine.” Ino tufwaninwe kulonga bukomo bwa kushinta mwine motwikadile munda. Kudi bintu bivule bya kamweno bibwanya kwitukwasha tushinte uno muswelo. Twisambilei’ko bidi pa bimo.

11. Le milombelo itukwashanga namani tushinte mulangilo wetu mwinemwine?

¹¹ Milombelo i kintu kibajinji kya mvubu. Tufwaninwe kulombela na mwālombedile mulembi wa mitōto amba: “Panga mondi mutyima utōka, a Leza, kadi tūla munda mwami mushipiditu mupya, wa kininga.” (Ñim. 51:10) Tufwaninwe kwitabija’mba tusakilwa kushinta mulangilo wetu mwinemwine ne kulomba Yehova etukwashe. Le i muswelo’ka otubwanya kukulupila’mba Yehova uketukwasha tushinte? Tubwanya kukankamikwa na mulao wa Yehova waālaile bene Isalela ba mutyima mūmu ba mu mafuku a Ezekyele amba: “Nkebapa mutyima mwikutyile mu bumo, kadi nkatūla mushipiditu mupya mobadi . . . ne kwibapa mutyima wa mwita, [ko kunena’mba, witabija buludiki bwa Leza].” (Ezk. 11:19; kunshi kwa dyani) Yehova wāitabije kukwasha bene Isalela bashinte, kadi witabije kwitukwasha ne batwe.

12-13. (a) Mungya Ñimbo ya Mitōto 119:59, le i bika byotufwaninwe kulangulukila’po? (b) Le i bipangujo’ka byofwaninwe kwiipangula?

¹² Kulanguluka i kintu kya bubidi kya mvubu. Potutanga Kinenwa kya Leza difuku ne difuku, tufwaninwe kwitūdila’ko kitatyi kya kulanguluka, nansha kulanga bininge pa milangwe ne mwiivwanino otufwaninwe kushinta. (Tanga Ñimbo ya Mitōto 119:59; Bah. 4:12; Yak. 1:25) Tufwaninwe kujingulula milangwe yo-yonso yotubwanya kwikala nayo itādilwe na tunangu twa bantu. Tufwaninwe kwitabija pampikwa budimbidimbi amba tudi na kabuzoze ne kulonga bukomo bwa kwikafundula.

¹³ Kimfwa, wiipangule amba: ‘Lelo mu mutyima wami mudi bya kwabilaabila nansha mukao?’ (1 Pe. 2:1) ‘Le mona’mba netatwilanga kontambile, masomo omfundile, nansha lupeto londi nalo?’ (Nki. 16:5) ‘Lelo mfutululanga bakwetu kebadipo na bintu na byondi nabyo nansha ba lukoba lungi?’ (Yak. 2:2-4) ‘Lelo bintu bibeleñenya ntanda ya Satana binkokanga?’ (1 Yo. 2:15-17) ‘Le nsangelanga makayo a disubi ne a bya lūma?’ (Ñim. 97:10; 101:3; Amo. 5:15) Malondololo a bino bipangujo abwanya kulombola pantu pofwaninwe kushinta. Shi tunekenye milangwe ‘mikomejibwe’ mu mityima yetu, tukasangaja Tata wetu wa mūlu.​—Ñim. 19:14.

14. Mwanda waka kutonga balunda bayampe kudi na mvubu mikatampe?

¹⁴ Kutonga balunda bayampe i kintu kya busatu kya mvubu. Twikale tuyukile nansha kuyuka mpika, boba botupwene nabo badi na lupusa lukatampe potudi. (Nki. 13:20) Ku kaji nansha ku masomo, twikalanga’ko na bantu kebabwanyapo kwitukwasha twikale na milangwe ya Leza. Inoko tubwanya kutana balunda bayampe ku kupwila kwetu kwa bwine Kidishitu. Kwine kotubwanya kwikankamika, nansha kwisombela “ku buswe ne ku mingilo milumbuluke.”​—Bah. 10:24, 25, kunshi kwa dyani.

15-16. Le Satana utompanga kushinta mulangilo wetu namani?

¹⁵ Inoko vuluka’mba Satana i musumininwe kushinta mulangilo wetu. Wingidijanga milangwe mishileshile mwanda wa kukalakanya lupusa ludi na bubine bwa mu Kinenwa kya Leza.

¹⁶ Satana ukyendelela kwipangula kipangujo kimo kyonka na kyawāipangwile Eva mu budimi bwa Edena amba: “Le bine Leza wanenene amba . . . ?” (Ngo. 3:1) Mu ino ntanda iludikwa na Satana, divule twivwananga bipangujo bilengeja tutatane, kimfwa amba: ‘Le bine Leza ketabijepo busongi bwa bantu ba ngitu imo? Le bine Leza kasakengapo ufete Noele ne kuvuluka difuku dyobe dya kubutulwa? Le bine Leza obe usakanga upele kwelwa mashi? Le bine Leza wa buswe usakanga uleke kupwana na bantu bosenswe bapangwe?’

17. Le i bika byotufwaninwe kulonga shi abetwipangula bipangujo bilengeja tutatane nkulupilo yetu, ne Bene Kolose 2:6, 7 ulombola bika bibwanya kulupuka’ko?

¹⁷ Tufwaninwe kunekenibwa na nkulupilo yetu. Shi tuleke kulondolola bipangujo bikatampe bidi mu ñeni yetu, bibwanya kwitulengeja tutatane. Mwenda mafuku kuno kutatana kubwanya kunyengakanya mulangilo wetu ne kona lwitabijo lwetu. Le penepa tufwaninwe kulonga bika? Kinenwa kya Leza kitunena tushinte ñeni yetu, amba tujingulule batwe bene “kiswa-mutyima kya Leza kiyampe, kitabijibwe ne kibwaninine.” (Loma 12:2) Tubwanya kujingulula batwe bene bubine botwifunda mu Bible na kutanga kitatyi ne kitatyi. Tubwanya kukulupila’mba misoñanya ya Yehova i myoloke. Penepa, pamo bwa mutyi udi na miji mikomo, tukekala bāle miji kadi “bemanije mu lwitabijo.”​—Tanga Bene Kolose 2:6, 7.

18. Le i bika biketukwasha tukalakanye lupusa lwa bulembe lwa ntanda ya Satana?

¹⁸ I kutupu muntu ubwanya kukomeja lwitabijo lobe pa kyobe kyaba, o mwanda endelela kulumbulula mulangilo obe mwinemwine. Lombela kitatyi kyonso; zenza Yehova akukwashe na mushipiditu wandi. Languluka bininge; endelela kubandaula mulangilo obe ne kukanina kobe kwa mutyima. Kimba balunda bayampe; bantu bakakukwasha ushinte mulangilo obe. Shi ulonge namino, nabya ukakalakanya lupusa lwa bulembe lwa ntanda ya Satana kadi ukabwanya kufulamika “milangilo ne kintu kilampe kyo-kyonso kishimikwa mwanda wa kulwa na buyuki bwa Leza.”​—2 Ko. 10:5.