Lelo Tata wa Mūlu Udi Namani Binebine?

BAVULE bakokeja kupituluka ku mutwe milombelo ya Tata Wetu, itwa ne bu Lulombelo lwa Mfumwetu, milombelo ya kulondela’po yāfundije Yesu bandi bana ba bwanga. (Mateo 6:9-13) Kyaba kyonso kyobanena ino milombelo, betanga Leza bu “Tata wetu.” Lelo i bantu banga bakokeja kunena’mba bamuyukile senene?

Le abe nobe? I muswelo’ka oyukile Leza senene? Le upwene nandi bulunda, wisamba nandi, ne kumuyukija nsangaji ne makambakano obe? Binebine, kuyuka Leza kushintulula namani?

“Yehova Dyo Dijina Dyandi”

Mwana uyukile enka kwita shandi bu Tata kete. Inoko, paenda utama wajingulula dijina dya shandi, mwatumbile, pakwabo ne kwitemba’ye. Lelo Umpangi wa mūlu witupele būmi nandi le? Lelo uyukile dijina dyandi ne modishintulwila?

Nansha shi bavule bapitulukanga bino bishima amba “Dijina dyobe dijile kijila” pobalombela Lulombelo lwa Mfumwetu, padi kebabwanyapo kulondolola pobebepangula’mba “Dine dijina’dyo i dijina’ka?” Madiulu metoyole ñenyenye, ngulu mikangame, bintu bya kwanwa bidi munshi mwa mema—byonso bino bilombola’mba Leza udi’ko. Shako kebitulombolangapo dyandi dijina. Pa kusaka’mba tuyuke’dyo, i biyampe tunyemene ku Bible. Bible unena patōkelela’mba: “Yehova dyo dijina dyandi.”—Divilu 15:3.

Leza usaka tumuyuke pa dyandi dijina dya bu Yehova. Mwanda waka? Mwanda dijina dyandi dilombola mwaikadile. Dino dijina dishintulula pa bute pa bute “Yewa Wikadija Ke.” Mu muneneno mukwabo, ukokeja kwikala byonso byasaka kwikala mwanda wa kufikidija mpango yandi. Langulukila pa kino kimfwa: Pa kusaka’mba tata alele kisaka kyandi biyampe ufwaninwe kwikala muntu usasakata, mudingidi, mutyibi, nsenga, mulami, ne mufundiji, mungya bisakibwa ne ngikadila ya kyandi kisaka. Mo monka, dijina Yehova ditukulupija’mba Leza udi ne bukomo bwa kufikidija mpango yandi ya kwesela bengidi bandi bonsololo bamwingidila, kwambulwa kubanga bya kumeso.

Tubandaulei pano mingilo palapala ya Leza wetu wa buswe, ikwatañene na buluji bwa dyandi dijina. Kino kikakukwasha uyuke Yehova i Leza wa muswelo’ka ne mokokejeja kufwena kwadi.

“Leza wa Kisanso ne Ndoe”

Mutumibwa Polo wāityile Mulongi wetu amba i “Leza wa kisanso ne ndoe.” (2 Kodinda 13:11) Mwanda waka? Yesu Kidishitu wānene kala amba: “Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.” (Yoano 3:16) Leza wāpēne wandi mwana muswedibwe bu kikūlwa pa mwanda usenswe bantu, amba boba bakumwitabija bakamone būmi bwampikwa mfulo, bwambulwa misongo ne masusu alupukile ku bubi. O mwanda mwine Polo wānene amba: “Mpalo ya bubi i lufu, ino kyabuntu kya Leza i būmi bwa nyeke monka mudi Kidishitu Yesu Mfumwetu.” (Loma 6:23) Mwene kino kifwaninwe kwitutonona tuswe Leza ne kumufwena?

Leza usenswe bantu bonso kya pamo, kadi uswele muntu ne muntu wa kikōkeji. Mosesa wālombwele Bene Isalela ba pa kala bādi batomboka divule dine amba: “Lelo i enka nenki bidi ko kumuloka Yehova, banwe bantu balembakane, ne bambulwa ñeni, a? Lelo ke shobepo kadi wakupota’ni? I aye wakulongele ne kukukomeneja.” (Kupituluka 32:6) Lelo ubaivwanija buluji bwa bino binenwa? Yehova, pamo bwa tata wa buswe, wālelele bano bantu pakubulwa kuta mutyima ku bilubo byabo. Kadi wēbapele byonso byādi bibasakilwa—ku ngitu, mu malango ne ku mushipiditu.

Batwe bonso tutanwanga na biya ne bibi umbūmi pakwabo twaivwana ne njia, pamo ne mutyima kupepa. Tukimbanga muntu wa kwitukwasha twivwanije ino ngikadila ne makambakano etutana. Lelo i ani ukokeja kwitukwasha? Kupityila mu Kinenwa kyandi, Bible, Yehova i mwilombole bu Mudingidi ne Muledi wa buswe. Mukanda Ukola ushintulula mwanda waka tususuka ne mwa kunekenenya masusu. Monka muboilanga mbutwile wa buswe wandi mwana wapona ne kwisanshija, Yehova ubandamanga ne kwitukwasha. Bine, kuboko kwa Yehova ke kwīpipo ku boba bamwitabije.—Isaya 59:1.

Buswe bwituswele Leza i bumweke kadi mu ‘kwivwana kulombela’ kwetu. (Mitōto 65:2) Namani? Mutumibwa Polo ushintulula’mba: “Kemukizumbazumba, nansha pamo pene; ino mu byonso byo musaka muyūkije’byo kudi Leza monka mu kulombela, ne mu kumwisashilapo, ne kumufwija ponka. Ino ndoe ya Leza, ya kutabuka ñeni yonso, īkalama mityima yenu, ne kufwatakanya kwenu kwine kumo mudi Kidishitu Yesu.” (Fidipai 4:6, 7) Shi uvundamukile kudi Leza na kulombela ne kulonda na mutyima onso buludiki budi mu Kinenwa kyandi, nabya ukamona “ndoe ya Leza, ya kutabuka ñeni yonso.”

“Leza wa Kuyukidija”

Bible utela Yehova Leza bu “mubwaninine wamukuyukidija.” Byadi “Leza wa kuyukidija,” uyukile kipangila ne bisakibwa bya bantu kupita muntu ye-yense. (Yoba 36:4; 1 Samwele 2:3) Wānene kupityila kudi mwingidi wandi Mosesa amba “muntu nanshi kamwenepo bumi ku bidibwa byonka, mhm, muntu umona bumi poso’nka ku byonso bitambanga mu kyakanwa kya Yehova.” (Kupituluka 8:3; Mateo 4:4) Ko kunena’mba pa kuloelelwa binebine umbūmi, ketusakilwapo enka bintu bya ku ngitu kete.

Umpangi wetu witupanga buludiki bwa kamweno ne madingi kupityila ku Bible, Kinenwa kyandi. Shi twifunda Bible ne kulonda madingi umbūmi bwetu, tumwenanga mu “byonso bitambanga mu kyakanwa kya Yehova.” Kimfwa, mwana-mukaji umo Mwine Kidishitu witwa dya bu Zuzanna wanenene pa kisaka kyandi amba: “Busongi bwetu i buninge mwanda tutañanga Bible pamo, tupwilanga pamo, ne kulombola bakwetu byobya byotwifunda. Pa mwanda wa bufundiji bwa ku mushipiditu bwitufundija Leza, tudi na bitungo bimo kadi twi bakomeje busongi bwetu.”

Le usaka kumwena mu madingi ne mu buludiki bwa Leza? Na kwifunda Bible kitatyi kyonso ne kwingidija madingi andi, ukeselwa madyese mavule atamba kudi Leza.—Bahebelu 12:9.

“Leza wa Lupandilo”

Dyalelo ntanda i miyule malwi. Bantu bekele nyeke mityima kūlu. Shi udi mu ntanda mudi bulwi, padi wabilanga ndoe. Mu bifuko bikwabo, bantu bakaminwe butapani ne bikandangobo, kupona kwa lupeto, ne kutambwa na batumbula. Le i ani uketukūla ku byonso bino’bi? Pano po pene muzo wa muntu usakanga kukingwa ne kunyongololwa.

Bible unena’mba: “Dijina dya Yehova i bu-kitēba kikomokomo: Moloke unyemenamo ne kupanda wapanda.” (Nkindi 18:10) Kuyuka ne kukulupila mu dijina dya Leza kwituvuluja byakadi kala mulonge ne byakalonga mwanda wa kunyongolola boba bamwitabije. Yehova Leza i mwilombole kwakubulwa ne kutatana kwine amba ubwanya kunyongolola bantu bandi. Kimfwa, wāpandije Isalela na kutukija makalo a bulwi a Felo ne basola bandi. Yehova bine i Leza wa binebine, Leza uvuluka ba mityima mityumuke kadi usaka kwibakwasha.—Divilu 15:1-4.

Tukamona būmi bwa nyeke mu mafuku a kumeso shi enka twitabije mudi Yehova Leza bu Mupandiji. Davida Mulopwe wa Isalela wa kala, wālwile na makambakano mavule, wādi na lwitabijo lwa uno muswelo paālembele bitala padi Yehova amba: “Abe wi Leza wa lupandilo lwami.” (Mitōto 25:5) Mutumibwa Petelo wānenene na kikulupiji kyonso amba: “Yehova uyūkile mwakunyongolwela boba ba bwine-Leza mo batompibwa.”—2 Petelo 2:9.

Leza i mulaye yewa ukimba bukwashi kwadi amba: ‘Nkamukinga mwanda uyukile dijina dyami.’ (Mitōto 91:14, Bisonekwa Bitokele) Bengidi ba Leza ba mu ano etu mafuku i bemwene bubinebine bwa uno mulao. Henryk wa mu Polonye waingidile Yehova na kikōkeji mu bula bwa myaka 70, nansha byaatenwe na byamalwa ne kupangwapangwa. Padi pakidi Henryk na myaka 16, shandi watwejibwa mu komponi ka malwa. Henryk ne tutu wandi batūdilwe mu kifungo kya banuke. Kupwa, badi bamutundululatundula, wadi mu kano komponi ka malwa ke mu kakwabo. Henryk uvuluka pa byamutene mu oa mafuku amba: “Yehova kaungelelepo mu matompo ami onso auntene. Waunkweshe nyeke ndame kikōkeji, nansha byonadi ntanwa divule dine mu kyakanwa kya lufu.” Bine, Yehova upanga bengidi bandi lwitabijo ne bukomo bwa kūminina.

Panopano ponka, Leza ukapandija boba bonso bamwitabije ne bakulupile kunyongololwa na aye. Unena amba: “Amiwa, ke ami, amiwa Yehova kadi; ino po ndi mupandiji ungi patupu’ye, nansha umo mwine.” (Isaya 43:11) Ukatukija babi pano pa ntanda ne kunyongolola boloke ku “divita dya difuku dikatakata dya Leza, Mwinebukomobonso.” (Kusokwelwa 16:14, 16; Nkindi 2:21, 22) Yehova witukulupija’mba: “Bakikōkeji bakapyananga ntanda; kadi bakēsangaja mu bungi bwa ndoe.”—Mitoto 37:11.

Kwikala “Bāna ba Leza”

Mu mafuku a mupolofeto Malaki, Bene Isalela bādi banena’mba Yehova ye Shabo. Ino, pa mwanda utala kumupa bulēme ne kumulamata, bādi bamulambula bitapwa bya mukate wa disubi ne banyema basabike meso ne basunkuta. O mwanda Yehova wēbepangwile amba: “Shi penepo ami ne shabantu, lelo bulēme bwami budi kwepi, a?”—Malaki 1:6.

Kokikolwa kuponena mu kilubo na kyāponene’mo Bene Isalela bantomboki. Inoko tubakukankamika wifunde kuyuka Yehova Leza ne kufwena kwadi. Mwanā bwanga Yakoba witusoñanya’mba: “Fwenai kudi Leza, nandi ukemufwena.”—Yakoba 4:8.

Kwita Yehova bu Tata kuletanga biselwa. Shi ulonge bukomo bwa kulēmeka Yehova na kulama misoñanya yandi na dikōkeji mu būmi bobe, kakavulaminwapo nansha dimo bukomo bolonga. Inoko, ukakukwasha unangile mu dishinda ditwala mu ntanda impya yalaile, “lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.” (Kusokwelwa 21:4) Mu kine kitatyi’kyo, ba kikōkeji bonso ‘bakakūlwanga ku bupika bwa kubola, nabo ke bana ba bene ba ntumbo bwa bana ba Leza.’—Loma 8:21.

[Bushintuludi pa paje 5]

Leza usaka tumuyuke pa dyandi dijina dya bu Yehova, dishintulula pa bute pa bute “Yewa Wikadija Ke”

[Bushintuludi pa paje 6]

“Yehova kaungelelepo mu matompo ami onso auntene.”—HENRYK

[Bushintuludi pa paje 7]

“Busongi bwetu i buninge mwanda tutañanga Bible pamo, tupwilanga pamo, ne kulombola bakwetu byobya byotwifunda.”—ZUZANNA