“Fikijija Biyampe Mwingilo Obe”

“Fikijija biyampe mwingilo obe.”—2 TEMOTE 4:5, MB.

1, 2. I bika bisakibwa ku bakulumpe mu Bisonekwa nansha bene Kidishitu bonso byobadi basapudi?

LELO wi musapudi wa Bulopwe? Shi i amo, fwija’ko Yehova Leza pa ano madyese a kutendelwa odi nao. Le wi mukulumpe mu kipwilo? Nabya udi na madyese a mbwejo atamba kudi Yehova. Ino ketufwaninwepo kwilwa nansha dimo amba ke masomopo a bwine ntanda, nansha bwino bwetu bwa kunena bitubwanija kwingila mwingilo ne kwikala batadi mu kipwilo. Yehova mwine ye witukumbanya tubwanye mwingilo, kadi kubwanya kubwenye bana-balume umbukata mwetu misoñanya ya mu Bisonekwa ko kwibalengeje bekale batadi.—2 Kodinda 3:5, 6; 1 Temote 3:1-7.

² Ino bene Kidishitu bonso bepāne bengilanga mwingilo wa busapudi, nakampata batadi, ke bakulumpe kadi, bafwaninwe kupāna kimfwa kiyampe mu mwingilo. Bakulumpe “baputumina mu mīngilo ya kusapula mwanda, ne kufundija” batebwanga mutyima na Leza ne Kidishitu, ne na banababo Batumoni ba Yehova bene. (1 Temote 5:17; Efisesa 5:23; Bahebelu 6:10-12) Mu ngikadilo yo-yonso, bufundiji bwa mukulumpe bufwaninwe kupāna bukomo ku mushipiditu, monka mobālombwedile’kyo mutadi Temote kudi mutumibwa Polo amba: “Myaka ikeya’ko, bantu kebakasakepo kumvwana lufundijo lwa binebine, anha, bakalonda musakila milangwe yabo. Bakeungwijija bibumbo bya bafundiji bakebasapwila byo basenswe kumvwana. Kebakomvwanapo bubinebine, enhe, bakavundamuka ke batale’nka ku bya mfumo ya bitupubitupu. Ino abe wilame abe mwine senene mu byonso. Mona’nka malwa, ingila mwingilo obe wa bu musapudi wa Myanda Miyampe kadi fikijija biyampe mwingilo obe.”—2 Temote 4:3-5, MB.

 3. I bika bya kulonga kutyina amba bufundiji bwa bubela bwakatūla būmi bwa ku mushipiditu bwa kipwilo mu kyaka?

³ Pa kusaka mutadi ayuke amba bufundiji bwa bubela kebutūdilepo būmi bwa ku mushipiditu bwa kipwilo mu kyaka, ufwaninwe kulonda madingi a Polo anena’mba: “Abe ukekala mudimuke mu bintu byonso . . . fikizya mwingilo obe ku mfulo.” (2 Temote 4:5, BB) Bine, mukulumpe unenwe ‘kufikijija biyampe mwingilo wandi.’ Ufwaninwe kupwa’o ne pa mfulo, kuvuija’o onsololo, nansha kukonkeja’o. Mukulumpe wingila mwingilo wandi ne pa mfulo utanga mutyima ku biselwa byandi byonso mokyendele, pampikwa kulengwa kantu nansha kwingila’o kipindi. Muntu wa uno muswelo i mukōkele ne mu tuntu tutyetye.—Luka 12:48; 16:10.

 4. I bika biketukwasha tufikijije biyampe mwingilo wetu?

⁴ Kufikijija mwingilo wetu biyampe kekulombangapo kitatyi kivulevule, ino kulomba kupityija kitatyi senene. Mutabwilo mwenzankane ukokeja kukwasha bene Kidishitu bonso balonge bivule mu mwingilo. Pa kusaka mukulumpe apityije kitatyi kivule mu mwingilo wa budimi, usakilwa kwiteakanya biyampe aye mwine mwa kujadikila mpangiko yandi ne kuyuka mingilo ya kupa bakwabo ne mwa kwibapela’yo. (Bahebelu 13:17) Eyo, mukulumpe mwilēmeke wingilanga na bengila, pamo’nka bwa Nehemia wāingile ne aye mwine mu kubakulula nsakwa ya Yelusalema. (Nehemia 5:15) Ne kadi bengidi bonso ba Yehova bafwaninwe kwingila kitatyi ne kitatyi mwingilo wa kupasula Bulopwe.—1 Kodinda 9:16-18.

 5. Le tufwaninwe kumona mwingilo namani?

⁵ Bine, tupelwe mwingilo wa nsangaji kashā wa kusapula Bulopwe bwa mūlu bushimikilwe kala! Bine ne bine ponka tuswele madyese otweselwe a kusapula myanda miyampe pa ntanda ponso pekelwe na bantu kumeso kwa mfulo kufika. (Mateo 24:14, MB) Nansha byotudi bantu bampikwa kubwaninina, tukankamikwanga na bino binenwa byānene Polo amba: “Tudi na kino kya bulēme [kya mwingilo] mu bingidilwa bya biloba, amba buno bukomo butabukile pa bwikalwanga nabo bwikale bwa Leza, kebutambapo kudi batwe bene, mhm.” (2 Kodinda 4:7, NW) I amo, twingilanga mwingilo mwitabijibwe—ino i enka na bukomo ne tunangu twitupa Leza.—1 Kodinda 1:26-31.

Tumwekejei Ntumbo ya Leza

 6. I kwishila’ka kwishidile Isalela wa ku ngitu ne wa ku mushipiditu?

⁶ Polo wēsambīle pa bene Kidishitu bashingwe māni amba Leza ye “wakwitubwanya ke tudi bengidi ba kipwanino kipya.” Mutumibwa ushiyañanya kipwano kipya kisambilwe na Isalela wa ku mushipiditu kupityila kudi Yesu Kidishitu na kipwano kya kala kya Bijila kyāsambilwe na Isalela wa ku ngitu kupityila kudi Mosesa. Polo ubweja’ko amba Mosesa paātūkile ku Lūlu lwa Shinai na bipapo byādi’po Mbila Dikumi, mu mpala mwandi mwādi mweñenya enka ne bene Isalela bakomenwa kumutala meso sō. Ino mwenda mafuku, kintu kibi mpata kyēbafikila mwanda ‘mityima yabo yāumine’ ne kya kupūta kyāpūta mityima yabo. Ino ponso pobādi bavundamukila kudi Yehova na kwipāna na mutyima onso, kya kupūta’kya kyādi kifundulwa. Kadi Polo wisambila pa mwingilo upelwe boba ba mu kipwano kipya amba: “Bātwe bonso ba mumpala mwampikwa kupūta [tumwekejanga] ntumbo ya Yehova bwa mu kitalo.” (2 Kodinda 3:6-8, 14-18; Divilu 34:29-35) “Mikōko mikwabo” ya Yesu nayo dyalelo idi na madyese a kumwekeja ntumbo ya Yehova.—Yoano 10:16.

 7. Le bantu bakokeja namani kumwekeja ntumbo ya Leza?

⁷ Le bantu babipya-mambo bakokeja namani kumwekeja ntumbo ya Leza, nako i kutupu muntu umumona ne kushala mūmi? (Divilu 33:20) I bine, Yehova kadipo enka na bumuntu bwa ntumbo, ino udi ne na mpango yandi ya ntumbo ya kubingija bubikadi bwandi kupityila ku Bulopwe bwandi. O mwanda bubinebine butala pa buno Bulopwe bubadilwa mu “bintu bikatampe bya Leza” byāshilwile kusapulwa na boba bāpungulwidilwe mushipiditu sandu mu difuku dya Pentekosa wa mu 33 K.K. (Bilongwa 2:11) Byobādi baludikwa na mushipiditu, bābwenye kufikijija mwingilo wēbapelwe.—Bilongwa 1:8.

 8. Polo wādi musumininwe kulonga bika mu bwingidi bwandi?

⁸ Polo wādi musumininwe amba i kutupu kintu kimukankaja kufikijija mwingilo wandi. Wāsonekele amba: “Byo tudi ne buno bwingidi, mo twafwilwako lusa, ketupungilapo, ehe; nanshi tubatyipe lukwembo mu bintu bifībwe bya bumvu, ne kwendela umbudyumuku mpika, nansha kwiongojena pa mwanda wa Leza, ehe; ino pa kumwekeja byabinebine twitendelanga bātwe bene ku mutyima wa mundamunda wa bantu bonso mu meso a Mwine Leza.” (2 Kodinda 4:1, 2) “Buno bwingidi” butelele Polo bo bulengeje bubinebine bumweke patōka ne mwinya wa ku mushipiditu umunikwe konso konso.

9, 10. Le tukokeja namani kumwekeja ntumbo ya Yehova?

⁹ Polo usoneka pangala pa Nsulo ya mwinya wa ku ngitu ne wa ku mushipiditu amba: “I Leza, wanenene’mba: Mwinya ukatemena mu fukutu; ye enka watemena mu mityima yetu, kupana mwinya wa ñeni ya ntumbo ya Leza, monka mumpala mwa Yesu Kidishitu.” (2 Kodinda 4:6; Ngalwilo 1:2-5) Byotupelwe madyese makatakata namino a kwikala bengidi ba Leza, twikalei nyeke batōka mwa kumwekejeja biyampe ntumbo ya Yehova pamo bwa bitalo.

¹⁰ Bantu badi mu fukutu ya ku mushipiditu kebabwanyapo kumona ntumbo ya Yehova nansha kumwekeja kumwekeja’yo Yesu Kidishitu, Mosesa Mukatampe. Ino batwe bengidi ba Yehova, tutambulanga mwinya wa ntumbo mu Bisonekwa ne kumunika’o ku bakwetu. Shi boba badi mu fukutu ya ku mushipiditu dyalelo basaka kupanda ku bonakani, banenwe kutambula mwinya wa Leza. O mwanda tukōkelanga na nsangaji ne bupyasakane bukatampe ku lubila lwa Leza lwa kumunika mwinya wa ntumbo ya Yehova mu fukutu.

Mwinya Wenu Weñenye ku Bifundwa bya Bible bya ku Mobo

11. Le Yesu wānene bika pa mwanda utala kumunika mwinya, ne i muswelo’ka umo wa kumunika’o mu mwingilo wetu?

¹¹ Yesu wānene balondi bandi amba: “Bānwe kadi mudi mwinya wa panopantanda, kibundi kitenteke pa lūlu kekiyūkwapo kufībwa, mhm. Nansha bantu pa kwakija kinanu kebekiputyilapo na musu, mhm, nanshi bekībīka ponka pa kibīko kya kinanu, ebiya kya tōkeja bonso ba mu njibo. I yenka namino kadi bu-mwinya bwenu busokokele ku bantu, amba bemumone mīngilo yenu miyampe, nabo batumbije Shenu wa mūlu.” (Mateo 5:14-16) Mwiendelejo wetu muyampe ufikijanga bakwetu ku kutumbija Leza. (1 Petelo 2:12) Kadi miswelo pala pala ya mwingilo wetu wa busapudi itupanga mikenga mivule ya kumunika mwinya wetu. Kitungo kyetu kimo kikatampe i kumunika mwinya wa ku mushipiditu utamba mu Kinenwa kya Leza na kwendeja bifundwa bya Bible bya ku mobo byendelela kumeso. Uno i muswelo mukatampe mpata wa kufikijija biyampe mwingilo wetu. Le i madingi’ka aketukwasha twendeje bifundwa bya Bible bitenga mityima ya boba bakimba bubinebine?

12. Le milombelo ikwatañene namani na kwendeja bifundwa bya Bible bya ku mobo?

¹² Kulombela kudi Yehova pa uno mwanda kulombola amba bine tudi na mutyima wa kwendeja bifundwa bya Bible. Kadi kulombola amba tumwene kukwasha bantu netu bayuke Leza bu kintu kya mvubu. (Ezekyele 33:7-9) Na bubine Yehova ulondololanga milombelo yetu ne kwitwesela potulonga bukomo bwa binebine mu mwingilo. (1 Yoano 5:14, 15) Ino ketulombangapo enka kusokola muntu wa kwifunda nandi Bible. Shi kifundwa kibaninge biyampe, kulombela ne kulanguluka pa bisakibwa kampanda bya mwifundi wa Bible kuketukwasha twendeje kifundwa musunsa ne musunsa mobifwaninwe.—Loma 12:12.

13. I bika padi biketukwasha twendeje bifundwa bya Bible bya ku mobo bifwaninwe?

¹³ Pa kwendeja bifundwa bya Bible senene, tufwaninwe ne kwiteakanya biyampe kumeso kwa kwifunda. Shi tumona amba i bitukomene, padi tukokeja kumona muswelo wendeja mutadi wa Kifundwa kya Kitabo kya pa Kipwilo kifundwa kya ku yenga ne yenga. Pakwabo tukokeja padi kwenda na basapudi ba Bulopwe balupula bipa biyampe mu bifundwa byabo bya Bible byobendeja. Ino na bubine, tubandaule nakampata mulongelo ne manwa āingidije Kidishitu pa kufundija.

14. I muswelo’ka otukokeja kutenga mutyima wa mwifundi wa Bible?

¹⁴ Yesu wādi uloelelwa kulonga kiswa-mutyima kya Shandi ne kusapwila bakwabo myanda ya Leza. (Mitōto 40:8) Wādi muntu mutūkije monyi ya meso, utenga mityima ya boba bādi bamwivwana. (Mateo 11:28-30) O mwanda tulongei bukomo bwa kutenga mityima ya botwifunda nabo Bible. Shi tusaka kwibatenga mityima, tufwaninwe kuteakanya kifundwa ne kifundwa koku tulamine mu ñeni ngikadilo ya mwifundi ne mwifundi. Kimfwa, shi utamīne mu bantu kebakwete Bible na bulēme, tufwaninwe kumukulupija amba binena Bible byo bya bine. Mu uno muswelo, tukatanga nandi bisonekwa bivule ne kumushintulwila’byo.

Tukwashei Befundi Bemvwanije Byelekejo

15, 16. (a) I muswelo’ka otukakwasha mwifundi shi kevwanijepo kyelekejo kingidijibwe mu Bible? (b) Tukalonga namani shi dibuku dyetu dileta kyelekejo kikomene mwifundi wa Bible kansangwa?

¹⁵ Mwifundi wa Bible ukokeja padi kayukilepo kyelekejo kampanda kingidijibwe mu Bisonekwa. Kimfwa, padi kevwanijepo byādi bikimba kunena Yesu paānene amba batūlanga kinanu pa kibīko kya binanu. (Mako 4:21, 22) Yesu wādi wisambila pa kinanu kya pa kala kya māni kyādi na lutambi lwaka mudilo. Kino kinanu kyādi kitūlwa pantu payampe senene mwa kutōkejeja’kyo mwinjibo monso. Kikakulomba padi kukimba myanda mu dibuku pamo bwa Étude perspicace des Écritures pa kishima “lampe” ne “porte-lampe(s)” mwa kutōkejeja kyelekejo kya Yesu.a Bine, ukapalwa mpalo mikata shi wenda kukefunda kifundwa kya Bible koku wikele na bushintuludi bwivwanikwa ne busangelwa na mwifundi!

¹⁶ Dibuku dyomwifundila’mo Bible dibwanya kuleta kyelekejo kikomo kwivwanwa na mwifundi kansangwa. Leya’ko kitatyi kya kumushintulwila’kyo, nansha kuleta kyelekejo kikwabo kisambila pa mwanda’wa. Padi dibuku dinena amba mwinē petu muyampe ne bukomo bwa kwingidila pamo bidi na mvubu mu busongi. Padi dibuku dileta kyelekejo kya mwana-mulume uyela ku myonji, wilekelela mu luvula koku ukulupile amba mukayi mukwabo ye wa kumukwata. Ino pa kupingakanya kino kyelekejo, mvubu ya mwinē petu ne bukomo bwa kwingidila pamo bikokeja kwelekejibwa na bengidi bengidila pamo pa kwabula bintu mu bwato betambika’byo mu mulongo.

17. I ñeni’ka yotuboila kudi Yesu pa kuleta byelekejo?

¹⁷ Kupingakanya kyelekejo kulomba kwiteakanya kumeso kwa kitatyi. Ino uno o muswelo wa kulombola amba tutela mwifundi netu wa Bible mutyima. Yesu wādi uleta byelekejo bipēla mwa kutōkejeja myanda mikomo. Mu Busapudi bwa ku Lūlu mudi bino bimfwa, kadi Bible ulombola amba bufundiji bwandi bwāivwenwe biyampe na bemvwaniki bandi. (Mateo 5:1–7:29) Yesu wādi ushintulula myanda na kitūkijetyima mwanda wādi utele bakwabo mutyima mpata.—Mateo 16:5-12.

18. I bika byotufwaninwe kulonga na bisonekwa bitelelwe bitupu mu mabuku etu?

¹⁸ Kuta kotuta bakwetu mutyima kuketutonona ‘tulanguluke nabo mu Bisonekwa.’ (Bilongwa 17:2, 3) Kino kilomba kwifunda bya bine na bine ne milombelo pamo mabuku alupulwa na “kalama wa bine,” ne kwingidija’o senene. (Luka 12:42-44) Kimfwa, dibuku Buyuki Butwala ku Būmi bwa Nyeke dipituluka mu bisonekwa bivule.b Ino pa mwanda wa kubulwa kyaba, bisonekwa bivule i bitelwe’mo bitupu. Pomwifunda kifundwa kya Bible, i biyampe kutanga ne kushintulula nansha’tu bisonekwa bibala-binga bitelelwe bitupu. Ke-pantu bufundiji bwetu bwimanine pa Kinenwa kya Leza, kadi kyo akyo kidi na bukomo. (Bahebelu 4:12) Nyemena ku Bible mu bula bwa kifundwa ne kifundwa, ne kwingidija divule bisonekwa bitanwa mu misango. Kwasha mwifundi amone binena Bible pa mwanda kampanda nansha pa kilongwa kamukaya. Longa buninge bwa kumulombola kamweno kakamwena mu kukōkela Leza.—Isaya 48:17, 18.

Ipangula Bipangujo Bilanguluja

19, 20. (a) Mwanda waka tufwaninwe kwipangula bipangujo bya kuloba tudi mu kanwa potwendeja kifundwa kya Bible kya ku njibo? (b) Tukalonga namani shi kudi mwanda wa pa bula ulomba kubandaula monka?

¹⁹ Bwino bwa Yesu bwa kwipangula bipangujo bwādi bukwasha bantu balanguluke. (Mateo 17:24-27) Shi twipangula bipangujo bya kuloba tudi mu kanwa kebikolejapo mwifundi wa Bible, malondololo akokeja kusokola byalanga pa mwanda kamukaya. Kepabulwe tukamona amba ukilamete ku mimweno ipelejibwe mu bisonekwa. Kimfwa, padi ukikulupile mu Busatu Busantu. Ino dibuku Buyuki, mu shapita 3, dinena patōka amba kishima “Busatu Busantu” kekitanwapo mu Bible. Dibuku dipituluka ne kutela bisonekwa bilombola amba Yehova i mwishile na Yesu ne amba mushipiditu sandu i bukomo bwa Leza bwingila, ke muntupo. Kutanga ne kwisambila pa bino bisonekwa padi i kubwane. Ino shi ukisakila’ko bikwabo le? Kekubulwe kupwa kwa kifundwa kilonda’ko muketūdila’ko kitatyi kya kwisamba uno mwanda mu muswelo ūbaka, na kutala mu dibuku dikwabo dya Batumoni ba Yehova, kimfwa boloshile Lelo Ukakulupila mu Busatu-Busantu? Ebiya kupwa mwajokela ku kifundwa kyenu mu dibuku Buyuki.

²⁰ Langa’po shi malondololo a mufundi ku kipangujo kya kuloba tudi mu kanwa abakutulumuja nansha kukuzozeja mutyima. Shi mwanda i uteneka, kimfwa wa kutoma mfwanka, tukokeja kumunena kwendelela bidi na kwifunda kupwa ke ketukesambila pa mwanda’wa mwenda mafuku. Kuyuka amba mwifundi utomanga mfwanka kuketupa muswelo wa kukimba myanda mu mabuku alupwilwe mwa kumukwashisha endelele ku mushipiditu. Potulonga bukomo bwa kutenga mutyima wa mwifundi, i biyampe kulomba Yehova amukwashe atame ku mushipiditu.

21. Bikekala namani shi tukwatañanya mufundijijo wetu na bisakibwa kampanda bya mwifundi wa Bible?

²¹ Shi twiteakanya biyampe ne na bukwashi bwa Yehova, bine ketukabulwepo kukwatañanya mufundijijo wetu na bisakibwa kampanda bya mwifundi wa Bible. Mwenda mafuku padi tukamukwasha atamije buswe bwa mushike bwa kuswa Leza. Ne kadi tubwanya kutamija mutyima wandi wa kulēmeka ne kufwija’ko bulongolodi bwa Yehova. Bine, i kya nsangaji mpata shi mwifundi wa Bible wayuka amba ‘Leza udi bine umbukata mwetu’! (1 Kodinda 14:24, 25) Nanshi twendejei bifundwa bya Bible byendelela kumeso ne kulonga buninge bwa kukwasha bakwetu bekale bana ba bwanga ba Yesu.

Kya Bulēme kya Kukwata Makasa Abidi

22, 23. I bika bitusakila shi tukimba kufikijija mwingilo wetu biyampe?

²² Pa kufikijija mwingilo wetu, tufwaninwe kwisumbidila bukomo bupāna Leza. Polo wāyukije banababo bene Kidishitu bashingwe mani myanda ya mwingilo amba: “Tudi na kino kya bulēme mu bingidilwa bya biloba, amba buno bukomo butabukile pa bwikalwanga nabo bwikale bwa Leza, kebutambapo kudi batwe bene, mhm.”—2 Kodinda 4:7, NW.

²³ Twikale bashingwe māni nansha “mikōko mikwabo,” twi bazoze pamo bwa bingidilwa bya biloba. (Yoano 10:16) Ino Yehova witupanga bukomo botusakilwa mwa kwingidila mwingilo waētupele nansha byotutyintyidilwa na mitabakano. (Yoano 16:13; Fidipai 4:13) Shi ke pano, tukulupilei mudi Yehova ne kutatana mpika, tukwatei makasa abidi kya bulēme kyetu kya mwingilo, ne kufikijija biyampe shē mwingilo wetu.

[Kunshi kwa dyani]

Usa Kulondolola Namani?

• Bakulumpe babwanya kulonga bika mwa kufikijija mwingilo wabo biyampe?

• I muswelo’ka otukokeja kulupwila’ko bipa biyampe mu bifundwa byetu bya Bible bya ku mobo?

• Le ukalonga namani shi mwifundi wa Bible kevwanijepo kyelekejo kampanda nansha shi ukasila’ko milangwe mikwabo pa mwanda kampanda?

[Kifwatulo pa paje 18]

Bakulumpe bene Kidishitu bafundijanga mu kipwilo ne kukwasha banababo betabije mu mwingilo

[Kifwatulo pa paje 20]

Kwendeja bifundwa bya Bible bya ku mobo byendelela kumeso i muswelo umo wa kumunika mwinya wetu