KIFUNDWA 51
Muswelo wa Kusangaja Yehova na Muneneno Obe
Yehova pawētupangile, wētupele ne kyabuntu kya kutendelwa—ke bukomo bwa kunena kadi. Le aye utanga ne mutyima ku muswelo otwingidija kino kyabuntu? Bine, i amo! (Tangai Yakoba 1:26.) Pene’pa nanshi i muswelo’ka otubwanya kwingidija bukomo bwetu bwa kunena mu muswelo usangaja Yehova?
1. Le tufwaninwe kwingidija namani kyabuntu kyetu kya kunena?
Bible witusoñanya’mba: “Mwikankamikei ne kwitamija nyeke banwe bene na bene.” (1 Bene Tesalonika 5:11) Le ubavuluka’ko muntu kampanda usakilwa kukankamikwa? Ukalonga namani pa kusaka’mba eivwane biyampe? Mukulupije amba umutele mutyima. Padi ubwanya kumusapwila bintu byosangelanga pādi. Le ubavuluka’ko ne kisonekwa kamukaya kibwanya kukankamika muntu oyukile? Kudi bisonekwa bivule byobwanya kutonga. Inoko, vuluka’mba, muswelo onena kintu ne binenwa byoingidija bikokeja kwikala na lupusa lukatampe pa muntu’wa. O mwanda nanshi longa bukomo bwa kwisamba na kanye ne na butūkanye.—Nkindi 15:1.
2. Le i muneneno wa muswelo’ka otufwaninwe kwepuka?
Bible unena’mba: “Kinenwa kibole kekyakatamba mu kyakanwa kyenu.” (Tangai Bene Efisesa 4:29.) Kino kishintulula’mba ketufwaninwepo kwingidija bishima bibi, bikolomona bulobo ne bya kasusu mwanda wa kusanshija mutyima wa yewa witwivwana. Kadi tufwaninwe kwepuka lubabo ne buvubavuba.—Tangai Nkindi 16:28.
3. Le i bika biketukwasha tunene mu muswelo ūbaka?
Divule dine, bintu byotunena bisokolanga byobya bidi mu mutyima wetu, bine bilēmenene’ko ñeni yetu. (Luka 6:45) O mwanda nanshi tufwaninwe kwiibidija kuta mutyima ku bintu biyampe—bintu byoloke, byampikwa disubi, bya kusanshibwa, ne binenenwa biyampe. (Bene Fidipai 4:8) Pa kuta mutyima ku bino bintu, tufwaninwe kutonga na tunangu bintu byotwipwija nabyo mukose ne balunda. (Nkindi 13:20) Kadi bilombanga ne kulanguluka kumeso kwa kunena. Vuluka muswelo usa kutengwa bakwabo na byobya byonena. Bible unena’mba: “Binenwa byampikwa kulanga bidi pamo bwa kusaba kwa kipete, ino ludimi lwa ba tunangu i bundapi.”—Nkindi 12:18.
LANGULUKA BININGE
Wifunde kwisamba mu muswelo usangaja Yehova ne ukankamika bakwabo.
4. Tadija muneneno obe
Kyaba kimo, batwe bonso tunenanga bintu byotwialakanya pa kupwa. (Yakoba 3:2) Tangai Bene Ngalatea 5:22, 23, ne kwisambila pa bino bipangujo:
Le i ngikadila’ka pa ino yobwanya kulomba bininge amba wikale nayo mwanda wa ikukwashe mu muneneno obe? Ne ayo mine ibwanya kukukwasha namani?
Tangai 1 Bene Kodinda 15:33, ne kwisambila pa kino kipangujo:
Lelo balunda botonga ne bya kwipwija nabyo mukose byotonga bibwanya kwikala na lupusa’ka pa muneneno obe?
Le i bika bibwanya kushinta muneneno obe?
Tangai Musapudi 3:1, 7, ne kwisambila pa kino kipangujo:
Le i kitatyi’ka kibwanya kwikala kiyampe kuba talala amba wilaije kitatyi kiyampe kya kwisamba?
5. Nenena bakwabo bintu biyampe
I muswelo’ka otukepuka kutuka bakwabo ne kwibanenena bintu bibi? Talai VIDEO, ne kwisambila pa bipangujo bilonda’bya.
Mu ino video, mwanda waka uno tutu wadi ufwaninwe kushinta muswelo wanena myanda itala bakwabo?
Le walongele namani pa kushinta?
Tangai Musapudi 7:16, ne kwisambila pa kino kipangujo:
I bika byotufwaninwe kuvuluka shi mutyima kewitutonona kunenena muntu mukwabo bibi?
Tangai Musapudi 7:21, 22, ne kwisambila pa kino kipangujo:
Le ano mavese akukwasha namani uleke kukalabala kitatyi kikunenena bantu bakwabo bibi?
6. Ikala na kanye powisamba na ba mu kisaka
Yehova usaka twisambe na bantu ba mu kisaka kyetu na kanye ne na buswe. Talai VIDEO, ne kwisambila pa kipangujo kilonda’kya.
Le i bika bikakukwasha wisambe na kanye ku bantu ba mu kisaka kyenu?
Tangai Bene Efisesa 4:31, 32, ne kwisambila pa kino kipangujo:
Le i binenwa bya muswelo’ka bibwanya kūbaka kisaka?
Yehova wālombwele mwaswelele wandi Mwana, Yesu. Tangai Mateo 17:5, ne kwisambila pa kino kipangujo:
I muswelo’ka obwanya kwifwana Yehova mu muswelo owisamba na ba mu kisaka kyenu?
Kimba mikenga ya kufwija’ko bakwabo
BANTU BAMO BANENANGA’MBA: “Ami nenanga byonso byakangiya’mo. Shi kudi muntu kasenswe byonena’bya, byabyo bimutala aye mwine.”
Le nobe ubaitabija uno mulangwe? Mwanda wa bika ubanena nankyo?
MU KĪPI
Binenwa bidi na bukomo. Tufwaninwe kulangulukila na katentekeji pa bine bya kunena, kitatyi kya kwibinena, ne muswelo wa kwibinena.
Pitulukai’mo
Le i mu miswelo’ka imo mobwanya kwingidija muneneno obe mwanda wa kukwasha bakwabo?
Le i muneneno wa muswelo’ka osaka kwepuka?
I bika bibwanya kwitukwasha twikale na kanye kadi tukankamike bakwabo na muneneno wetu?
KIMBA
I bika biketukwasha twikale na muneneno muyampe?
Wifunde, umone bintu bibwanya kukukwasha wepuke muneneno mubi.
“Le Bine I Bibi Kwikala wa Mutonko?” (Kishinte kya pa Entelenete)
Tala mwa kwepukila kuponena mu dikinga dya kunenena bantu bibi.
Tala muswelo wakweshe Yehova muntu umo wadi ulwa pa kuleka binenwa bya mutonko.
“Nāshilwile Kulangulukila Bininge pa Būmi Bwami bwa Kumeso” (Kiteba kya Mulami, 1 Kweji 8, 2013)