Kikōkeji Kikulamanga

LE USAKANGA kulonga kintu kyonso enka mosakila? Lelo kudi byaba bikwabo byokusakilepo muntu mukwabo ukulombola amba longa nenki ne nenki? Nombole’tu na bubinebine molangila’po.​—

Ino lelo kiyampe mpata kodi i kika? Le bine i kya ñeni kulonga kyonso kyosaka’ni, nansha i biyampe kukōkela shobe ne inobe?​—Leza unena amba ufwaninwe kukōkela bambutwile bobe, ne kudi bubinga bwendele’mo bwa kwibakōkelela. Leka bidi tuyuke bubinga bwine.

Lelo kodi na myaka inga?​—Lelo uyukile bungi bwa myaka ya shobe?​—Le myaka ya inobe nayo ke inga, ne ya bankambo bobe, babutwile ba shobe ne inobe, nayo i inga?​—Ke balāle myaka mingi kukupita. Kadi shi muntu walāla myaka mingi, uyukanga bintu bingi. Mwanda mwaka ne mwaka wivwananga myanda mingi kadi umonanga ne kulonga bintu bivule. O mwanda mwine banuke bakokeja kuboila ñeni ku bakulumpe.

Lelo uyukile muntu kampanda okudile nobe?​—Le mwene nobe wimuyuke bintu bingi kumupita?​—Mwanda waka abe uyukile bingi kumupita?​—I pa mwanda kodi mulāle mafuku mangi. Kodi muyuke bintu bingi kupita yewa ukidi mwanuke mpata.

Le i ani ke mulāle mafuku mavule kukupita, kumpita ami nansha kupita muntu mukwabo yense?​—I Yehova Leza. Aye uyukile bivule kukupita, kadi i muyuke bivule kumpita. Shi wetusapwila kulonga kintu kampanda, tufwaninwe kukulupila amba i kintu kyoloke kulonga, nansha shi i kikomo kulonga’kyo. Le uyukile amba nansha ke Mufundiji Mukatampe mwine wāmwene kitatyi kimo amba i bikomo kukōkela?​—

Kitatyi kimo Leza wānene Yesu kulonga kintu kimo kikomo mpata. Yesu wālombela pa mwine mwanda’wa, enka na motumwena pa kifwatulo’pa. Wālombele amba: ‘Shi usakile umfundule ami kino kitomeno.’ Pa kulombela uno muswelo, Yesu wālombwele amba ke kipēlapo nyeke kulonga kiswa-mutyima kya Leza. Ino le Yesu wāfudije lulombelo lwandi namani? Le uyukile?​—

Yesu wāfudije’lo amba: “Ke mwendele po kiswamutyima kyami, enhe, poso kyobe kilongeke.” (Luka 22:41, 42, MB) Bine, wāsakile amba kiswa-mutyima kya Leza kilongeke, ke kyandipo. Kadi wāendelela kumeso ne kulonga kyokya kisaka Leza pa kyaba kya kyokya kyaādi ulanga aye mwine bu kiyampe.

Lelo i ñeni’ka yotukokeja kuboila pa uno mwanda?​—Ñeni yotuboila’ko i ino: i kiyampe kulonga nyeke binena Leza, nansha shi kebipēlapo kulonga. Ino kudi ñeni mikwabo yotuboila’ko. Lelo wiiyukile?​—Ñeni yotuboila’ko i ino: Leza ne Yesu ke muntu umopo, pamo na munenenanga bantu bakwabo. Yehova Leza i mukulu kadi uyukile bintu bivule kupita biyukile wandi Mwana Yesu.

Shi tukōkele Leza, nabya tubalombola amba tumuswele. Bible unena’mba: “Buno namino bo buswe bwa Leza, amba tulame mbila yandi.” (1 Yoano 5:3, New World Translation) Mwene ubaivwana, batwe bonso tufwaninwe kukōkela Leza. Abe usakanga kumukōkela, mwene i amo?​—

Tupūtule Bible wetu, tutale Leza byanene bana kulonga. Tutange munenena Bible mu Efisesa shapita 6, vese 1, 2, ne 3. Amba: “Bānwe bāna, kōkelai bakwimubutula monka mudi Mfumwetu, ke-kintu i kyendelemo biyampe. Lemeka shobe ne inobe mwine kumo; (kyo kijila kibajinji kino kya pa mwanda-wamulao) amba umone biyampe, shē, ne myaka yobe īvule ya kwikala panopantanda.”

Mwene ubaivwana, i Yehova Leza mwine ukunena amba kōkela shobe ne inobe. Lelo ‘kwibalēmeka’ kushintulula bika? Kushintulula amba ufwaninwe kwibapa bulēme. Kadi Leza i mulaye amba shi ukōkela bambutwile bobe, ‘ukamona biyampe shē.’

Ivwana nkusapwile lusango lwa bantu bamo bāpandije būmi bwabo mwanda wa kikōkeji kyobādi nakyo. Bano bantu bādi’ko pa kala mu kibundi kikatakata kya Yelusalema. Bantu bavule ba mu kino kibundi kebādipo bevwana binena Leza, o mwanda Yesu wēbadyumwine amba Leza usa konakanya kibundi kyabo. Kadi Yesu wēbasapwidile ne mwa kupandila shi baswele byoloke. Wānena’mba: ‘Pomukamona ku Yelusalema bibumbo bya mvita bibajokoloka konso konso, yukai’mba bonakani bwandi bubafwena. Penepa kitatyi kibabwana kya kutamba mu Yelusalema ne kunyemena ku ngulu.’​—Luka 21:20-22.

Bine, enka mwānenene Yesu, bibumbo bya mvita byāile kutamba Yelusalema bulwi. Bibumbo bya mvita bya bene Loma byāmujokoloka mitamba yonso. Kupwa, bashidika bājoka, pangala pa bubinga kabidye. Bantu bavule bālanga amba kyaka kibapite. Ebiya bāshala mu kibundi. Ino lelo Yesu wānenene amba bādi bafwaninwe kulonga bika?​—Shi nobe wādi wikele mu Yelusalema, le wāswile kulonga namani?​—Boba bāitabije Yesu binebine bāshile mobo abo, banyemena ku ngulu kulampe na Yelusalema.

Kwāpita mwaka mutuntulu, kutupu kintu kilongekele mu Yelusalema. Mu mwaka wa bubidi, kutupu kyālongekele. Ne mu wa busatu mwine, nansha kimo. Padi bantu bamo bālangile amba boba bānyemene mu kibundi bādi babivila. Ino ke mu mwaka wa buná, bibumbo bya mvita bya bene Loma byāalukila’ko. Byājokoloka monka Yelusalema mitamba yonso. Pano byādi ke bikomo mwa kunyemena. Owa mwaka’wa bibumbo bya mvita byāonakanya fututu kibundi’kya. Bantu bavule bādi’mo bāfwa, ne bāshele bōmi nabo bāselwa bu misungi.

Ino le byāikele namani ku boba bākōkele Yesu?​—Abo bāpandile. Bādi kulampe na Yelusalema. O mwanda mwine kebāfikilwepo na kibi nansha kimo. Kikōkeji kyēbalamine.

Shi nobe udi na kikōkeji, lelo kikakulama?​—Bambutwile bakokeja kukusapwila amba kokikaila nansha dimo mu kilayi. Mwanda waka babwanya kunena nabya?​—Mwanda motoka ukokeja kukukonga. Ino padi mafuku makwabo ukalanga’mba: ‘Pano i mutupu myotoka. I kutupu kinonga. Ami monanga nyeke bana bakwabo bakaila mu kilayi ino kukongwa mpika.’

Uno o muswelo wādi ulanga bantu bavule ba mu Yelusalema. Pāfundukile bibumbo bya mavita bya bene Loma, abo bāmwene amba abapande. Pa kumona amba bantu bakwabo beshadile biyampe mu kibundi, nabo bāshala’mo. Bādyumwinwe, ino kebādipo bevwana. Kino kyēbafikije ku kujimija būmi bwabo.

Tubandaule kimfwa kikwabo. Lelo wibidile kukaya na tutyi twa alumetyi?​—Poakijanga mudilo ku kifofolo bimwekanga bu makayo asangaja mpata. Ino kukaya na alumetyi i kyaka kileta musala. Bine njibo yonso mituntulu ibwanya kutēma mudilo, padi ne abe mwine wafwa!

Vuluka amba kukōkela enka’tu na dimodimo kekubwenepo. Ino shi ukōkele mafuku onso, kikōkeji kikakulama binebine. Le mwine ukusapwila’mba: “Bānwe bāna, kōkelai bakwimubutula” i ani le?​— I Leza. Kadi vuluka amba aye ukunenanga kukōkela mwanda ukuswele.